រដ្ឋមន្ត្រីចក្រភពអង់គ្លេសទទួលបន្ទុកកិច្ចការអាស៊ីបានបង្ហាញការយកចិត្តទុកដាក់អំពីស្ថានភាពសិទ្ធិមនុស្សនៅកម្ពុជាដែលនាពេលថ្មីៗនេះមានការចាប់ខ្លួនតំណាងសហជីពនិងការរឹតត្បិតសិទ្ធិជាមូលដ្ឋានផ្សេងទៀតដូចជាការបង្កើតគណបក្សនយោបាយ។ នេះបើតាមមន្ត្រីសង្គមស៊ីវិលដែលបានជួបជាមួយអ្នកស្រី Amanda Milling រដ្ឋមន្ត្រីចក្រភពអង់គ្លេសទទួលបន្ទុកកិច្ចការអាស៊ីដែលមកបំពេញទស្សនកិច្ចរយៈពេលពីរថ្ងៃនៅកម្ពុជាចាប់ផ្តើមពីថ្ងៃទី១០ដល់ថ្ងៃទី១១ ខែមករា។
អ្នកស្រីបានជួបពិភាក្សាការងារជាមួយក្រុមមន្ត្រីកម្ពុជាក្នុងនោះមានរដ្ឋមន្ត្រីក្រសួងការបរទេសលោក ប្រាក់ សុខុន រដ្ឋមន្ត្រីក្រសួងអប់រំលោកហង់ ជួន ណារ៉ុននិងរដ្ឋមន្រ្តីក្រសួងបរិស្ថានលោកសាយ សំអាល់។ អ្នកស្រីក៏បានជួបពិភាក្សាជាមួយអង្គការសិទ្ធិមនុស្សនិងអតីតប្រធានគណបក្សសង្គ្រោះជាតិលោកកឹម សុខាផងដែរ។
អ្នកនាំពាក្យសមាគមសិទ្ធិមនុស្សអាដហុកលោកស៊ឹង សែនករុណាប្រាប់វីអូអេកាលពីព្រឹកថ្ងៃពុធថា អ្នកស្រី Amanda Milling បានទទួលដំណឹងអំពីការចាប់ខ្លួនថ្នាក់ដឹកនាំនិងសកម្មជនសហជីពនៅពេលពួកគេធ្វើកូដកម្មជំទាស់នឹងការបណ្តេញចេញពីការងារទាំងបង្ខំនៅក្រុមហ៊ុនណាហ្គាវើលដ៍(NagaWorld) និងបានបង្ហាញក្តីបារម្ភអំពីស្ថានភាពមិនប្រសើរឡើងនៃការគោរពសិទ្ធិជាមូលដ្ឋានរបស់ពលរដ្ឋខ្មែរដែលកំពុងរងការគាបសង្កត់ពីអាជ្ញាធរ។
លោកជឿថាចក្រភពអង់គ្លេសដែលជាប្រទេសផ្តល់តម្លៃដល់ការគោរពសិទ្ធិមនុស្សនិងជាប្រទេសដែលមានឥទ្ធិពលខាងការទូតមួយក្នុងសាកលលោកនឹងផ្សព្វផ្សាយពីបញ្ហាដែលបានកើតឡើងនៅកម្ពុជាដល់សហគមន៍អន្តរជាតិផ្សេងទៀតដែលអាចនឹងធ្វើឱ្យរដ្ឋាភិបាលកម្ពុជាបែរមកលើកកម្ពស់សិទ្ធិជាមូលដ្ឋាននៅក្នុងប្រទេស។
បើតាមលោក ស៊ឹង សែនករុណា អ្នកស្រី Milling បានបង្ហាញការចាប់អារម្មណ៍ទៅលើផលលំបាករបស់ពលរដ្ឋក្នុងការចងក្រងសមាគម ឬដំណើរការអង្គការសមាគមនិងការបង្កើតគណបក្សនយោបាយក្រោយស្ថានភាពនយោបាយបានប្រែប្រួលនៅឆ្នាំ២០១៧ដែលមានការរំលាយគណបក្សសង្គ្រោះជាតិ។
លោកប្រាប់វីអូអេបន្ថែមថា៖ «យើងឃើញមានការលំបាកច្រើនអំពីការបំពេញការងារ។បេសកកម្មពួកគេនៅមូលដ្ឋានមានការរារាំងមានការតាមដានមានការឃ្លាំមើលមានការបង្កលក្ខណៈនៅក្នុងការចុះបញ្ជីទាំងគណបក្សនយោបាយចុះបញ្ជីទាំងខាងសហជីពអីជាដើម អង្គការសង្គមស៊ីវិលផ្សេងៗអីជាដើម។ យើងឃើញថាវាជាការបង្កការលំបាកច្រើននៅក្នុងរឿងហ្នឹង។អ៊ីចឹងចំណុចទាំងអស់នេះដែលគាត់ចាប់អារម្មណ៍ជាងគេនៅក្នុងរឿងហ្នឹង»។
ក្រៅពីផ្តោតលើបញ្ហាសិទ្ធិសេរីភាពជាមូលដ្ឋានរបស់ពលរដ្ឋកម្ពុជាអ្នកស្រី Milling បានពិភាក្សាជាមួយមន្ត្រីរដ្ឋាភិបាលកម្ពុជាផងដែរអំពីការប្តេជ្ញាចិត្តរបស់ចក្រភពអង់គ្លេសក្នុងការជំរុញទំនាក់ទំនងនិងធ្វើការជាមួយកម្ពុជាដែលជាប្រធានសមាគមអាស៊ានក្នុងឆ្នាំ២០២២នេះដើម្បីដោះស្រាយបញ្ហាប្រឈមធំៗមួយចំនួនក្នុងតំបន់ដែលរួមមានការសា្តរឡើងវិញពីជំងឺកូវីដ១៩ ការដោះស្រាយវិបត្តិនៅក្នុងប្រទេសមីយ៉ាន់ម៉ានិងបញ្ហាប្រែប្រួលអាកាសធាតុ។នេះបើតាមសេចក្តីប្រកាសចេញផ្សាយដោយស្ថានទូតអង់គ្លេសប្រចាំកម្ពុជា។
បើតាមទំព័រហ្វេសប៊ុកផ្លូវការរបស់ស្ថានទូតចក្រភពអង់គ្លេសប្រចាំកម្ពុជា អ្នកស្រី Amanda Millingបានបញ្ជាក់សាជាថ្មីអំពីសារៈសំខាន់នៃការការពារសិទ្ធិមនុស្សនិងការគាំទ្ររបស់ចក្រភពអង់គ្លេសចំពោះសេរីភាពនៃការបញ្ចេញមតិនិងសេរីភាពសារព័ត៌មាននៅកម្ពុជានិងតំបន់អាស៊ីអាគ្នេយ៍។
ក្នុងសារឆ្លើយតបតាមអ៊ីមែលទៅនឹងសំឡេងសហរដ្ឋអាមេរិកពាក់ព័ន្ធនឹងបញ្ហាសិទ្ធិមនុស្ស ស្ថានទូតរបស់ចក្រភពអង់គ្លេសនៅទីក្រុងភ្នំពេញបានលើកឡើងថា៖ «អ្នកស្រីរដ្ឋមន្ត្រីបានពិភាក្សាការតវ៉ាខាងការងារនាពេលថ្មីៗនេះនិងសារៈសំខាន់នៃប្រជាធិបតេយ្យនៅមុនការបោះឆ្នោតឃុំសង្កាត់ក្នុងរដូវក្តៅនេះ[ពាក់កណ្តាលឆ្នាំនេះ]»។
ក្រោយជំនួបជាមួយលោក កឹម សុខា កាលពីថ្ងៃអង្គារ អ្នកស្រី Milling បានបញ្ជាក់លើប្រព័ន្ធ Twitterរបស់អ្នកស្រីថា៖ «យើងទាំងពីរនាក់ចង់ឃើញកម្ពុជាដែលមានសន្តិភាពវិបុលភាពនិងប្រជាធិបតេយ្យ។យើងបានពិភាក្សាអំពីតម្រូវការសម្រាប់ការគោរពសិទ្ធិមនុស្សហើយថាតើអ្នកជំនាន់ក្រោយកម្ពុជាអាចចូលរួមចំណែកធ្វើឱ្យមានការផ្លាស់ប្តូរលើបញ្ហាទាំងនេះយ៉ាងដូចម្តេច»។
លោក ជិន ម៉ាលីន អ្នកនាំពាក្យក្រសួងយុត្តិធម៌និងមានតួនាទីជាអនុប្រធានគណៈកម្មាធិការសិទ្ធិមនុស្សកម្ពុជា ថ្លែងថាក្នុងបញ្ហាសិទ្ធិមនុស្សអ្នកស្រី Amanda Milling នឹងអាចវាយតម្លៃនៅពេលក្រោយបន្ទាប់ពីដំណើរទស្សនកិច្ចរបស់អ្នកស្រីនៅកម្ពុជាក្រោយពីបានជួបភាគីពាក់ព័ន្ធផ្សេងទៀតដែលធ្វើការលើការពង្រឹងសិទ្ធិមនុស្សនេះ។
លោកប្រាប់វីអូអេយ៉ាងដូច្នេះថា៖ «ធម្មតាទេដំណើរទស្សនកិច្ចរបស់គាត់ គាត់ត្រូវជួបជាមួយគ្រប់ភាគី ហើយក្នុងហ្នឹងភាគីដែលមាននិន្នាការប្រឆាំងនឹងរដ្ឋាភិបាលគឺនឹងធ្វើការរិះគន់ផ្តល់ព័ត៌មានមិនល្អពីរដ្ឋាភិបាលទៅគាត់ហើយក៏ប៉ុន្តែគាត់ក៏ជួបជាមួយនឹងតំណាងរដ្ឋាភិបាលដែរអ៊ីចឹងគាត់ក៏ទទួលបានព័ត៌មានពីគ្រប់ភាគីពាក់ព័ន្ធហើយគាត់ក៏អាចធ្វើការថ្លឹងថ្លែងនិងពិចារណាមើលបានដែរ»។
មុនដំណើរទស្សនកិច្ចរបស់អ្នកស្រី Amanda Milling នៅកម្ពុជា សកម្មជនសង្គមនិងនយោបាយយ៉ាងហោចណាស់ជាង២០នាក់ត្រូវបានដោះលែង។ ក៏ប៉ុន្តែក្នុងរយៈពេលប៉ុន្មានសប្តាហ៍ចុងក្រោយនេះ អាជ្ញាធរបានចាប់ឃុំខ្លួនអ្នកសហជីពចំនួន៨នាក់នៅក្រុមហ៊ុនណាហ្គាវើលដ៍ចំពោះតួនាទីរបស់ពួកគេក្នុងការដឹកនាំកូដកម្មនៅក្រុមហ៊ុននេះ។ ការចាប់ខ្លួននេះនាំឱ្យក្រុមអ្នកការពារសិទ្ធិមនុស្សមានការបារម្ភជាថ្មីចំពោះការកើនឡើងនៃការគាបសង្កត់លើសិទ្ធិជាមូលដ្ឋានរបស់ពលរដ្ឋក្នុងការតស៊ូមតិនិងការចងក្រងសមាគម៕
