ខណៈដែលការចាប់ខ្លួននិងការចោទប្រកាន់លើសហសេវិករបស់ពួកគេមានការកើនឡើង សកម្មជនអតីតគណបក្សសង្គ្រោះជាតិ បានស្វែងរកជំនួយពីអង្គការការពារសិទ្ធិមនុស្សនាំមុខចំនួនពីរគឺសមាគមអាដហុក និងអង្គការលីកាដូ។
លោក ស៊ឹង សែនករុណា អ្នកនាំពាក្យសមាគមអាដហុក បានថ្លែងប្រាប់ VOA នៅថ្ងៃពុធនេះថា លោកបានទទួលពាក្យបណ្ដឹងជាលាយលក្ខណ៍អក្សរ និងផ្ទាល់មាត់ពីក្រុមគ្រួសាររបស់សកម្មជននយោបាយ អំពីការចាប់ខ្លួន ការគំរាមកំហែង ការដែលសមត្ថកិច្ចហៅទៅសាកសួរ និងអំពើហិង្សាលើសកម្មជនរបស់អតីតគណបក្សសង្គ្រោះជាតិ។
លោកបន្តថា ស្ថានភាពអាចនឹងកាន់តែតានតឹងនៅពេលខាងមុខទៀត។
«ហើយយើងគិតថារឿងទាំងអស់នេះ អាចនឹងបន្តកើតឡើងមានទៅមុខទៀត ប្រសិនជាមិនមានការរកដំណោះស្រាយនយោបាយ ដែលធ្វើឲ្យស្ថានភាពនយោបាយធូរស្រាលឡើងវិញទេ»។
មន្ត្រីសិទ្ធិមនុស្សរូបនោះបន្តថា អ្នកមកស្វែងរកជំនួយបានប្រាប់សមាគមរបស់លោកថា ពួកគេមិនបានធ្វើអ្វីខុសដូចការចោទប្រកាន់នោះទេ ហើយពួកគេយល់ថា ការរំលាយគណបក្សសង្គ្រោះជាតិគឺជារឿងអយុត្តិធម៌។
ចាប់តាំងពីដើមឆ្នាំ២០១៩ មក យ៉ាងតិចមានសកម្មជនអតីតគណបក្សសង្គ្រោះជាតិចំនួនជាង៣០នាក់ ត្រូវបានចាប់ខ្លួននិងចោទប្រកាន់។ ដោយឡែក អ្នកគាំទ្រនយោបាយប្រឆាំងចំនួនប្រមាណ១៦០នាក់ ត្រូវបានកោះហៅមកសាកសួរ។ នេះបើយោងតាមរបាយការណ៍របស់ក្រុមអង្គការការពារសិទ្ធិមនុស្ស។
លោក អំ សំអាត នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (Licadho) បានឲ្យដឹងថាក្រោយពីលោក សម រង្ស៊ី ប្រកាសវិលចូលស្រុក កំណើននៃការបំភិតបំភ័យ ការគំរាមកំហែង និងការចាប់ខ្លួន មានការកើនឡើង ហើយបទចោទប្រកាន់ក៏កាន់តែធ្ងន់ធ្ងរ។
មន្ត្រីសិទ្ធិមនុស្សដដែលបញ្ជាក់ថាអង្គការរបស់លោកក៏បានទទួលពាក្យបណ្ដឹងជាបន្តបន្ទាប់ផងដែរពីសកម្មជននយោបាយរបស់គណបក្សប្រឆាំង និងក្រុមគ្រួសាររបស់ពួកគេ ក្នុងនោះមានការស្នើសុំមេធាវី ការពិគ្រោះផ្នែកច្បាប់ និងការស្វែងរកជំនួយឲ្យឃ្លាំមើលករណីរបស់ពួកគេផងដែរ។
«ជាធម្មតា គ្រួសារដែលត្រូវបានចាប់ខ្លួនហ្នឹង គឺគាត់និយាយថាការចាប់ខ្លួនហ្នឹង ជារឿងខុសនឹងនីតិវិធី ជារឿងអយុត្តិធម៌ ក្រុមគ្រួសារគាត់ មិនបានប្រព្រឹត្តអីដូចការចោទប្រកាន់អីជាដើម»។
អ្នកស្រី សុខ ថៃ អាយុ៣៧ឆ្នាំ ជាពលរដ្ឋម្នាក់រស់នៅក្នុងខេត្តកំពង់ធំ បានស្វែងរកជំនួយពីសមាគមអាដហុដ និងអង្គការលីកាដូ ក្រោយប្ដីរបស់អ្នកស្រី គឺលោក នូ ភឿន ត្រូវបានចាប់ខ្លួន កាលពីដើមខែកញ្ញា ជាមួយនឹងសកម្មជនដូចគ្នាចំនួនបីនាក់ផ្សេងទៀត។ ប្តីរបស់អ្នកស្រីគឺជាសកម្មជនម្នាក់របស់អតីតគណបក្សសង្គ្រោះជាតិ ក្នុងឃុំបារាយណ៍ ស្រុកបារាយណ៍ ខេត្តកំពង់ធំ។ ហើយការចាប់ខ្លួនរូបលោកក្រោយពីលោកបានសម្ដែងមតិទាក់ទិននឹងរឿងនយោបាយតាមបណ្ដាញសង្គមនិងក្នុងចំណោមប្រជាពលរដ្ឋដូចគ្នា។
អ្នកស្រី សុខ ថៃ បានចាត់ទុកថា ប្ដីអ្នកស្រីមិនមានកំហុស ហើយអ្វីៗគ្រាន់តែជាការបញ្ចេញមតិតែប៉ុណ្ណោះ។
«មកដល់ចាប់ប្រតាយទៅ យកឡើងឡានទៅតែម្ដង។ សម្រាប់ខ្ញុំ វាអយុត្តិធម៌ ខ្លោចផ្សាសម្រាប់ខ្ញុំណាស់ ព្រោះអីគ្រួសារខ្ញុំមានទោសអីដល់ថ្នាក់ធ្ងន់ធ្ងរដល់ថ្នាក់យ៉ាងនេះ»។
គណបក្សសង្គ្រោះជាតិ ត្រូវបានរំលាយកាលពីខែវិច្ឆិកា ឆ្នាំ២០១៧។ បន្ទាប់ពីការរំលាយគណបក្សប្រឆាំង សកម្មភាព និងការបង្ហោះសារនៅលើបណ្ដាញសង្គមហ្វេសប៊ុកពីសំណាក់អតីតមន្ត្រីបក្សប្រឆាំងជាពិសេសសកម្មជនថ្នាក់ជាតិនិងក្រោមជាតិ ត្រូវបានតាមដានយ៉ាងយកចិត្តទុកដាក់ពីសំណាក់អាជ្ញាធរមានជំនាញ។ ករណីខ្លះ សកម្មជនទាំងនោះត្រូវបានកោះហៅទៅសាកសួរ និងចាប់ដាក់ពន្ធនាគារផងដែរ។
លោក សែនករុណា អ្នកនាំពាក្យសមាគមអាដហុក បានឲ្យដឹងទៀតថា ក្នុងពេលនេះប្រជាជនមួយចំនួន ក៏បានចាប់ផ្ដើមគេចចេញពីភូមិផងដែរ ដោយសារការបារម្ភខ្លាចត្រូវគេចាប់ខ្លួន។
បើតាមដីកាតុលាការដែលVOAទទួលបាន យ៉ាងតិចមានសកម្មជននយោបាយចំនួនប្រាំពីរនាក់របស់អតីតគណបក្សសង្គ្រោះជាតិ ត្រូវបានចោទប្រកាន់ពីបទ«រួមគំនិតក្បត់ និងញុះញង់ឲ្យមានវឹកវរធ្ងន់ធ្ងរដល់សន្តិសុខសង្គម» ទាក់ទងនឹងការគាំទ្រការវិលមកវិញរបស់លោក សម រង្ស៊ី។
មន្ត្រីសិទ្ធិមនុស្សនៃអង្គការលីកាដូ លោក អំ សំអាត បានអះអាងថាបញ្ហាសិទ្ធិមនុស្សនៅកម្ពុជាកាន់តែធ្លាក់ចុះ និងគួរឲ្យព្រួយបារម្ភទៅៗ ដែលមិនស្របតាមការចង់បានរបស់សហគមន៍អន្តរជាតិនោះទេ។
ភាពតានតឹងផ្នែកនយោបាយក្នុងប្រទេសកម្ពុជាមានសភាពកាន់តែខ្លាំងឡើង ក្រោយលោក សម រង្ស៊ី បានប្រកាសចូលប្រទេសវិញនៅថ្ងៃទី៩ ខែវិច្ឆិកា។ រដ្ឋាភិបាលរបស់លោកនាយករដ្ឋមន្រ្តី ហ៊ុន សែន បានប្រកាសថាការគាំទ្រការត្រឡប់របស់លោក សម រង្ស៊ី ជារឿងខុសច្បាប់ ហើយត្រូវប្រឈមនឹងការចាប់ខ្លួន៕
