សកម្មជនរបស់អតីតគណបក្សសង្គ្រោះជាតិចំនួនប្រាំនាក់ថ្មីទៀតត្រូវតុលាការខេត្តប៉ៃលិន និងខេត្តកំពង់ចាម ចោទប្រកាន់ពីបទ«រួមគំនិតក្បត់» នៅថ្ងៃអង្គារនេះ ដោយសង្ស័យថា ពួកគេគាំទ្រការវិលត្រឡប់មកប្រទេសកម្ពុជាវិញរបស់លោកសម រង្ស៊ី ប្រធានស្តីទីនៃអតីតគណបក្សសង្គ្រោះជាតិ។ លោកសម រង្ស៊ី បានប្រកាសថា លោកនឹងវិលត្រឡប់មកប្រទេសកម្ពុជាវិញនៅថ្ងៃទី៩ ខែវិច្ឆិកា ខាងមុខ ដើម្បីផ្លាស់ប្តូរការដឹកនាំរដ្ឋាភិបាល។
រដ្ឋាភិបាលកម្ពុជាបានហៅការវិលត្រឡប់មកប្រទេសកម្ពុជាវិញរបស់លោកសម រង្ស៊ី ថាជាគម្រោងការមួយដើម្បីធ្វើរដ្ឋប្រហារផ្តួលរំលំរដ្ឋាភិបាលដែលកំពុងតែដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន។
ក្នុងសេចក្តីជូនដំណឹងនៅថ្ងៃនេះ តុលាការខេត្តប៉ៃលិនបានបញ្ជាក់ថា មនុស្សបួននាក់ត្រូវចោទប្រកាន់ក្រោយពីបានផ្តល់បទសម្ភាសន៍ជាមួយវិទ្យុអាស៊ីសេរី បន្ទាប់ពីបានផ្តល់ទីកន្លែងដល់ការជួបជុំ និងបន្ទាប់ពីបានធ្វើការផ្សព្វផ្សាយតាមបណ្តាញសង្គមហ្វេសប៊ុកអំពីការប្រមូលផ្តុំដែលត្រូវសង្ស័យថាជាមូលហេតុនៃការប៉ុនប៉ងផ្តួលរំលំរដ្ឋាភិបាល។
ក្នុងចំណោមជនសង្ស័យទាំងបួននាក់ក្នុងខេត្តប៉ៃលិន មានអ្នកស្រី វ៉េន តារា ដែលជាស្គាល់ថាជាសកម្មជនរបស់គណបក្សប្រឆាំងយ៉ាងខ្លាំងក្លានិ ងជាក្មួយបង្កើតរបស់អតីតមេទ័ពជើងម្ខាងរបស់ខ្មែរក្រហមគឺ តាម៉ុក។
ដោយឡែក តុលាការខេត្តកំពង់ចាមក៏បានចោទប្រកាន់បុរសវ័យ៤៧ឆ្នាំមួយរូបផងដែរ នៅថ្ងៃនេះពីបទ«រួមគំនិតក្បត់»ដូចគ្នា ដោយយោងតាមមាត្រា៤៥៣នៃក្រមព្រហ្មទណ្ឌ។
មាត្រានេះចែងពីទោសជាប់ពន្ធនាគាររហូតដល់ដប់ឆ្នាំ ប្រសិនបើតុលាការរកឃើញថាមានទោស។
រហូតមកទល់ពេលនេះ សកម្មជនអតីតគណបក្សសង្រ្គោះជាតិកើនដល់ជាង៣០នាក់ហើយ ដែលត្រូវតុលាការខ្មែរចាប់ខ្លួននិងចោទប្រកាន់។ ជាពិសេសការចោទប្រកាន់ចុងក្រោយពាក់ព័ន្ធនឹងការ«រួមគំនិតក្បត់» ដែលជាការចាប់និងចោទជាសេរីក្រោយពីការប្រកាសវិលចូលមកប្រទេសកម្ពុជាវិញរបស់លោកសម រង្ស៊ី។
លោកសឹង សែនករុណា អ្នកនាំពាក្យអង្គការសិទ្ធិមនុស្សអាដហុក យល់ឃើញថា នេះជា«ការធ្វើទុក្ខបុកម្នេញលើសកម្មជននយោបាយ គឺមិនមែនជាការអនុវត្តច្បាប់ទេ»។
លោកមើលឃើញថា និន្នាការនេះនឹងនៅតែបន្តទៀត ដោយសារតែការប្រឈមមុខដាក់គ្នារវាងបក្សកាន់អំណាចនិងអតីតបក្សប្រឆាំងហាក់មិនថមថយទេ៕
