ភ្ជាប់​ទៅ​គេហទំព័រ​ទាក់ទង

លោក​អូបាម៉ា​នឹង​ប្រកាស​ពី​ការ​បង្កើន​ថវិកា​ដល់​ការបោស​សម្អាត​គា្រប់​​មិន​ទាន់​ផ្ទុះ​ក្នុង​ប្រទេស​ឡាវ


គ្រាប់​មិន​ទាន់​ផ្ទុះដែល​គេ​ប្រមូល​បាន​នៅ​ក្នុង​ប្រទេស​ឡាវ។ គេ​រំពឹង​ថា​លោក​ប្រធានាធិបតី​អូបាម៉ា​នឹង​បង្កើត​ថិវកា​សម្រាប់​បោស​សម្អាត់​គ្រាប់​មិន​ទាន់​ផ្ទុះ​នៅ​ក្នុង​ប្រទេសនេះ។

ក្នុង​​សង្រ្គាម​ជាមួយ​ប្រទេស​វៀតណាម​ សហរដ្ឋ​អាមេរិក​បាន​ទម្លាក់​គ្រាប់​បែក​ចង្កោម​ជាង​២៧០​លាន​គ្រាប់​​នៅ​ប្រទេស​ឡាវ​ ហើយ​សព្វ​ថ្ងែ​នេះ​នៅ​មាន​គ្រាប់​បែក​មិន​ទាន់​ផ្ទុះ​រាប់​លាន​គ្រាប់​កប់​នៅ​ក្នុង​ប្រទេស​នេះ​។​

គេ​រំពឹង​ថា​លោក​ប្រធានា​ធិបតី​ បារ៉ាក់​ អូបាម៉ា​ នឹង​ប្រកាស​ពី​ការ​បង្កើន​ថវិកា​សម្រាប់​បោស​សម្អាត​យុទ្ធភណ្ឌ​មិន​ទាន់​ផ្ទុះ​នៅ​ក្នុង​ប្រទេស​ឡាវ។ ​លោក​អូបាម៉ា​គឺ​ជា​ប្រធានា​ធិបតី​សហរដ្ឋ​អាមេរិក​ទី​មួយ​ ដែល​នឹង​ទៅ​ធ្វើ​ទស្សនកិច្ច​នៅប្រទេស​នៅ​តំបន់​អាស៊ីអាគ្នេយ៍​មួយ​នេះ​ នា​ខែ​កញ្ញា​ខាង​មុខ​នេះ​។​ ក្នុង​អំឡុង​ពេល​សង្រ្គាម​ជាមួយ​ប្រទេស​វៀតណាម​ សហរដ្ឋ​អាមេរិក​បាន​ទម្លាក់​គ្រាប់​បែក​ចង្កោម​ជាង​២៧០​លាន​គ្រាប់នៅ​ប្រទេស​ឡាវ​ ហើយ​សព្វ​ថ្ងែ​នេះ​នៅ​មាន​គ្រាប់​បែក​មិន​ទាន់​ផ្ទុះ​រាប់​លាន​គ្រាប់​កប់​នៅ​ក្នុង​ប្រទេស​នេះ​។​

សម្រស់​ស្រស់​ត្រកាល​នៃ​ព្រៃ​ភ្នំ​នៅ​ខេត្ត​ Xieng Khouang​ ដែល​ស្ថិត​នៅ​ភាគ​ឦសាន​ ប្រទេស​ឡាវ​ បាន​បិទបាំង​កេរ៍តំណែល​ដ៏​ប្រល័យ​ ដែល​ជា​គ្រាប់​មិន​ទាន់​ផ្ទុះ​បន្សល់​ទុក​ ពី​ការ​ទម្លាក់​គ្រាប់​បែក​យ៉ាង​ធ្ងន់ធ្ងរ​ដោយ​សហរដ្ឋអាមេរិក​ អស់​រយៈ​ពេល​ប្រាំ​បួន​ឆ្នាំ។​

សហរដ្ឋ​អាមេរិក​បាន​ទម្លាក់​គ្រាប់​បែក​ចំនួន​២​លាន​តោន​ នៅ​ក្នុង​ប្រទេស​ឡាវ​ក្នុង​ចន្លោះ​ឆ្នាំ​ ១៩៦៤​ទៅ​ឆ្នាំ​ ១៩៧៣​ ​ក្នុង​ប្រតិបត្តិការ​សម្ងាត់​មួយ​ ដើម្បី​កាត់​ផ្តាច់​បណ្តាញ​ផ្គត់ផ្គង់​ទៅ​ឲ្យ​វៀតណាម​ខាង​ជើង​។​

ការណ៍​នេះ​បាន​បន្សល់​ទុក​ទៅ​ឲ្យ​អង្គការ​បោស​សម្អាត​គ្រាប់​មិន​ទាន់​ផ្ទុះ​ ឬ​ហៅ​ថា​UXO​ ដែល​ជា​អង្គការ​ចំណុះ​រដ្ឋាភិបាល​ឡាវ​ ធ្វើ​ការ​បោស​សម្អាត​គ្រាប់​មិន​ទាន់​ផ្ទុះ​ទាំង​នោះ​។​ នាង​ កាន់​ ថាលី​ (​Kan Thalee) ​ភ្នាក់ងារ​បោស​សម្អាត​គ្រាប់​មិន​ទាន់​ផ្ទុះ​ នៃ អង្គការ​ UXO​ និយាយ​ថា៖​ «​ខ្ញុំ​ធ្វើ​ការងារ​នេះ​ ដោយ​សារ​ខ្ញុំ​ស្រឡាញ់​ការងារ​នេះ​។​ ខ្ញុំ​ចង់​ឲ្យ​អ្នកភូមិ​រស់នៅ​មាន​សុវត្ថិភាព​ ហើយ​ពួកគេ​អាច​ធ្វើ​ស្រែ​ចំការ​លើ​ដី​របស់​ពួកគេ​បាន​ដោយ​សុវត្ថិភាព‍​»​។​

ប្រហែល​១​ភាគ​៣​នៃ​គ្រាប់​បែក​ដែល​បាន​ទម្លាក់​ក្នុង​ប្រទេស​ឡាវ​ គឺ​ជា​គ្រាប់​មិន​ទាន់​ផ្ទុះ​ ដូច្នេះ​ការ​ធ្វើ​ស្រែ​ចំការ​របស់​អ្នក​ភូមិ​ពោរពេញ​ទៅ​ដោយ​គ្រោះថ្នាក់​។​ អ្នកភូមិ​ចំនួន​ច្រើន​ជាង​មួយ​ម៉ឺន​នាក់​បាន​ស្លាប់​ និង​របួស​ដោយសារ​គា្រប់​បែក​មិន​ទាន់​ផ្ទុះក្រោយ​សង្រ្គាម​បាន​បញ្ចប់​។

មាន​ការ​ប៉ាន់​ស្មាន​ថា​ ជិត​មួយ​ភាគរយ​នៃ​គ្រាប់​មិន​ទាន់​ផ្ទុះ​ក្នុង​ប្រទស​ឡាវ​ ត្រូវ​បាន​បោស​សម្អាត​ចាប់​តាំង​ពី​ឆ្នាំ​ ១៩៧៣ ​មក​។​

លោក​ ឃីងផេត ភីមម៉ាវង្ស ​(Kingphet Phimmavong) អ្នក​សម្រប​សម្រួល​ប្រចាំ​តំបន់​នៃ​អង្គការ​ UXO​ ឡាវ​ថ្លែង​ថា​ រដ្ឋាភិបាល​ផ្តោត​លើ​ការ​បោស​សម្អាត​ដី​ស្រែ​ចំការ​ ដើម្បី​លើក​កម្ពស់​ការ​អភិវឌ្ឍ​កសិកម្ម​នៅ​ក្នុង​តំបន់​នេះ​។​

ប៉ុន្តែ​នេះ​ជា​ការងារ​ដ៏​ច្រើន​មួយ​ ហើយ​កម្មវិធី​ដែល​ពឹង​ផ្អែក​លើ​ជំនួយ​ថវិកា​ពី​បរទេស​បែប​នេះ​ មាន​ការ​ខ្វះខាត​បុគ្គលិក​ និង​បច្ចេកវិទ្យា​ដើម្បី​ពន្លឿន​ការងារ​បោស​សម្អាត​នេះ​។​ លោក​ថ្លែង​ថា​៖​ «​ជា​រៀងរាល់​ឆ្នាំ​បុគ្គលិក​ទាំង​១២​ក្រុម​របស់​យើង​បោស​សម្អាត​បាន​ផ្ទៃ​ដី​៦០០​ហិកតា​ ដែល​១​ក្រុម​អាច​សំអាត​បាន​៥០​ហិកតា​ក្នុង​១​ឆ្នាំ​។​ ប៉ុន្តែ​បើ​យើង​ប្រៀបធៀប​ជាមួយ​នឹង​ចំនួន​ផ្ទៃ​ដី​ចំការ​ ដែល​ប្រជាជន​ចង់​ឲ្យ​សម្អាតដើម្បី​អាច​ធ្វើ​ស្រែ​ចំការ​បាន​នោះ​គឺ​មាន​ដល់​ទៅ​ ៥.000​ ទៅ​ ៦.000​ ហិកតា​ ហើយ​ពួក​យើង​អាច​ធ្វើ​បាន​តែ​១០​ភាគរយ​ប៉ុណ្ណោះ​»​។

ប្រជាជន​រស់​នៅ​ក្នុង​ខេត្ត​ Xieng Khouang​ បាន​រៀន​ពី​របៀប​រស់​នៅ​ នៅ​លើ​តំបន់​ដែល​មាន​គ្រាប់​មិន​ទាន់​ផ្ទុះ​ ក៏​ប៉ុនែ្ត​មាន​យុទ្ធភណ្ឌ​មិន​ទាន់​ផ្ទុះ​ជាច្រើន​នេះ​ ​បាន​បន្សល់​ស្លាក​ស្នាម​អស់​មួយ​ជីវិត​។​

កាល​ពី​១០​ឆ្នាំ​មុន​ នាង​ អេ វូ​ (Ai Vue)​បាន​បាត់បង់​កូន​ប្រុស​ម្នាក់​ ខណៈ​ពេល​ដែល​កូន​ប្រុស​របស់​នាង​ និង​បង​ប្អូន​ជីដូន​មួយ​របស់​គេ​បាន​ស្លាប់​ ដោយ​សារ​តែ​គ្រាប់​បែក​ មិន​ទាន់​ផ្ទុះ​ដែល​ពួក​គេ​បាន​រក​ឃើញ​។ «​យើង​មិន​បាន​ដឹង​ ថា​តើ​ពួកគេ​បាន​ដំ​គ្រាប់​នោះ​ ឬ​ក៏​គ្រាន់​តែ​កាន់​ធ្លាក់​ទៅ​លើ​ដី​ ហើយ​វា​បាន​ផ្ទុះ​ឡើង​យ៉ាង​ណា​នោះ​ទេ»។​

ករណី​គ្រោះ​ថ្នាក់​បាន​ធ្លាក់​ចុះ​ ហើយ​ប្រជាជន​អាច​ធ្វើ​ស្រែ​ចំការ​បាន​លើ​ផ្ទៃ​ដី​មួយ​ចំនួន ​ប៉ុន្តែ​គ្រាប់​បែក​មិន​ទាន់​ផ្ទុះ​ដែល​បាន​បន្សល់​ទុក​ជា​ច្រើន​ក្នុង​ខេត្តXieng Khouang​នឹង​ស្ថិត​នៅ​ដក់​ជាប់​ក្នុង​អារម្មណ៍​របស់​ក្មេង​ជំនាន់​ក្រោយ​ៗ​ទៀត​ផង​ដែរ៕​

ប្រែសម្រួលដោយ ស៊ូ ពេជ្រចិន្តា

XS
SM
MD
LG