ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​សហជីព​៩នាក់ ត្រូវ​ចាប់ខ្លួន​ចំពោះ​កូដកម្ម​នៅមុខ​ក្រុមហ៊ុន​ណាហ្គាវើលដ៍ ប៉ុន្តែ​៣នាក់ ​ត្រូវ​ដោះលែង


រូបឯកសារ៖ សកម្មភាព​កូដកម្ម​នៅ​ខាង​មុខ​អគារ​ក្រុមហ៊ុន​ណាហ្គាវើលដ៍​នៅ​រាជធានី​ភ្នំពេញ នៅ​ថ្ងៃពុធ ទី២២ ខែធ្នូ ឆ្នាំ២០២១។ (ណឹម សុភ័ក្រ្តបញ្ញា/វីអូអេ)

ថ្នាក់​ដឹកនាំ​ និង​សកម្មជន​សហជីព​យ៉ាង​ហោច​ណាស់​៩​នាក់ ​ត្រូវ​បាន​ចាប់​ខ្លួន​ដោយ​មន្ត្រី​នគរបាល​ក្នុង​ទីក្រុង​ភ្នំពេញ​ ពាក់ព័ន្ធ​នឹង​ការ​ធ្វើ​កូដ​កម្ម​នៅ​មុខ​កាស៊ីណូ​ណាហ្គាវើលដ៍​ ដែល​អូស​បន្លាយ​ពេល​ជិត​ពីរ​សប្តាហ៍​មក​ហើយ។​

ក៏​ប៉ុន្តែ ​ក្នុង​ចំណោម​អ្នក​ដែល​ត្រូវ​បាន​ចាប់​ខ្លួន​ដោយ​មន្ត្រី​នគរបាល​រាជធានី​ភ្នំពេញ​ កាល​ពី​យប់​ឆ្លង​ឆ្នាំ​សកល​នោះ​ មាន​៣​នាក់ ​ត្រូវ​បាន​ដោះលែង​នៅ​ថ្ងៃ​ចន្ទ​នេះ​ ហើយ​៦​នាក់​ផ្សេង​ទៀត ​ត្រូវ​បាន​បញ្ជូន​ខ្លួន​ចុះ​ឡើង​ពី​ស្នង​ការដ្ឋាន​នគរបាល​រាជធានី​ភ្នំពេញ​ទៅ​សាលាដំបូង​រាជធានី​ភ្នំពេញ​ ដើម្បី​ធ្វើការ​សាកសួរ ​តែ​មិន​ទាន់​មាន​ការ​ចោទ​ប្រកាន់​ជាក់​លាក់​ពី​សំណាក់​តុលាការ​នៅ​ឡើយ​ទេ។​

ការ​ចាប់​ខ្លួន​នេះ​ មិន​បាន​បង្អាក់​កូដកម្ម​របស់​កម្មករ​និយោជិត​ក្រុមហ៊ុន​ណាហ្គាវើលដ៍នោះ​ទេ ​ខណៈ​ភាគី​និយោជក​បាន​រក្សា​ភាពស្ងៀម​ស្ងាត់​ មិន​ចេញ​មុខ​មក​ជួប​ចរចា​ជាមួយ​ភាគី​តំណាង​កម្មករ។ ​នេះ ​បើ​តាម​ការ​បញ្ជាក់​របស់​មេ​ដឹកនាំ​សហជីព​នៅ​ក្រុមហ៊ុន​ណាហ្គាវើលដ៍។​

មេ​ដឹក​នាំ​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គាវើលដ៍​ កញ្ញា​ ឈឹម សីថរ​ ប្រាប់​វីអូអេ​ នៅ​ថ្ងៃ​ចន្ទ​នេះ​ថា ​កម្មករ​និយោជិត​មិន​បញ្ឈប់​កូដកម្ម​ទេ ​បើ​គ្មាន​ដំណោះ​ស្រាយ​សមស្រប​ដើម្បី​ឆ្លើយ​តប​ទៅ​នឹង​វិវាទ​ការងារ​ដែល​បាន​កើត​ឡើង​អស់​រយៈ​ពេល​ជិត​៩​ខែ​មក​នេះ។​

កញ្ញា​និយាយ​ថា ​ពេល​នេះ ​ភាគី​និយោជក​ មិន​បាន​ធ្វើ​សកម្ម​ភាព​ណា​មួយ​ដើម្បី​ឈាន​ទៅរក​ដំណោះ​ស្រាយ​បញ្ចប់​វិវាទ​ទេ​ ហើយ​មាន​តែ​ភាគី​រដ្ឋាភិបាល​ក្នុង​នោះ​ គឺ​សាលា​រាជធានី​ភ្នំពេញ​ និង​ក្រសួង​ការងារ​កំពុង​ធ្វើការ​ដោះ​ស្រាយ​វិវាទ​ការងារ​ដែល​ជាប់គាំង​ ដោយសារ​ក្រុមហ៊ុន​បដិសេធ​មិន​ទទួល​យក​ថ្នាក់​ដឹក​នាំ​សហជីព​ សកម្ម​ជន​របស់​សហជីព​ និង​បុគ្គលិក​ប្រមាណ​២៧៩​នាក់​ឲ្យ​ចូល​ធ្វើ​ការ​វិញ។​

«ខាង​និយោជក​គេ​អត់​ចេញ​មុខ​ដោះស្រាយ​តែម្តង​ ឥឡូវ​ហ្នឹង​គឺ​ថា​ ប្រព័ន្ធ​តុលាការ​ អាជ្ញាធរ​សាលាក្រុង ​ក្រសួង​ការងារ​គឺ​ជា​អ្នក​ធ្វើ​ការ​ គឺ​អ្នក​ចេញ​មុខ​បង្ក្រាប​កម្មករ​និយោជិត។ ​ខាង​ថៅកែ​ គេនៅ​ស្ងៀម។ គេ​អត់​ធ្វើ​អីទេ។ ​គេ​អត់​ចាំបាច់​ធ្វើ​អី​ទាំង​អស់»។​

ពាក់ព័ន្ធ​នឹង​ការ​ចាប់​ខ្លួន​ថ្នាក់​ដឹកនាំ​ និង​សកម្មជន​សហជីព​ កញ្ញា​ ឈឹម ស៊ីថរ​ ថា ​ មិនទាន់​មាន​ការ​ចោទ​ប្រកាន់​យ៉ាង​ណា​ពី​សំណាក់​តុលាការ​ទៅ​លើ​អ្នក​ដែល​ត្រូវ​បាន​ចាប់​ខ្លួន​ទាំង​៦​នាក់​នោះ​ទេ។​

ការ​ចាប់​ខ្លួន​ក្រុម​តំណាង​កម្មករ​និយោជិត​នៅ​ក្រុមហ៊ុន​ណាហ្គាវើលដ៍​ដែល​មាន​បុគ្គលិក​សរុប​ប្រមាណ​៨០០០​នាក់​នោះ​ ធ្វើ​ឡើង​ក្រោយ​រដ្ឋបាល​សាលា​រាជធានី​ភ្នំពេញ​បាន​ចោទ​កញ្ញា​ ឈឹម សីថរ​ និង​សហការី​ ព្រម​ទាំង​បុគ្គលិក​ថា បាន​ធ្វើ​សកម្មភាព​សម្តែង​មតិ​ដោយ​ខុស​ច្បាប់​នៅ​លើ​សួនច្បារ​សាធារណៈ ​និង​នៅ​តាម​ដង​ផ្លូវ​សាធារណៈ។​

រូបឯកសារ៖ ស្ត្រី​មាន​ផ្ទៃពោះ​ចូល​រួម​កូដកម្ម​នៅ​មុខ​កាស៊ីណូ​ណាហ្គាវើលដ៍​ក្នុង​ទីក្រុង​ភ្នំពេញ​ កាល​ពី​ថ្ងៃទី​២៤​ ខែធ្នូ​ ឆ្នាំ​២០២១។​ (ហ៊ុល រស្មី/វីអូអេ)
រូបឯកសារ៖ ស្ត្រី​មាន​ផ្ទៃពោះ​ចូល​រួម​កូដកម្ម​នៅ​មុខ​កាស៊ីណូ​ណាហ្គាវើលដ៍​ក្នុង​ទីក្រុង​ភ្នំពេញ​ កាល​ពី​ថ្ងៃទី​២៤​ ខែធ្នូ​ ឆ្នាំ​២០២១។​ (ហ៊ុល រស្មី/វីអូអេ)

សាលា​រាជធានីភ្នំ​ពេញ​លើក​ឡើង​ក្នុង​សេចក្តី​ជូន​ដំណឹង​មួយ​ចេញ​ផ្សាយ​កាលពី​ថ្ងៃ​ទី​៣០​ ខែ​ធ្នូ​ ឆ្នាំ​២០២១​ ថា ​សកម្មភាព​នេះ​ បាន​ធ្វើ​ឲ្យ​ប៉ះពាល់​ធ្ងន់ធ្ងរ​ដល់​សន្តិសុខ​សុវត្ថិភាព​ សណ្តាប់​ធ្នាប់​ និង​របៀប​រៀបរយ​សាធារណៈ ​និង​សិទ្ធិ​ស្រប​ច្បាប់​របស់​ក្រុមហ៊ុន​ ជា​ពិសេស​ ក្រុម​អ្នក​តវ៉ា​មិន​ចូលរួម​ទប់​ស្កាត់​ការ​រីករាល​ដាល​នៃ​ជំងឺ​កូវីដ១៩។​

ថ្នាក់​ដឹក​នាំ​ និង​សកម្មជន​សហជីព​ទាំង​៦​នាក់​ដែល​កំពុង​ត្រូវ​បាន​បញ្ជូន​ចុះ​ឡើង​ពី​ស្នង​ការដ្ឋាន​ប៉ូលិស​ក្រុង​ ទៅ​កាន់​តុលាការ​ក្រុង​ភ្នំពេញ​នោះ​រួមមាន​ឈ្មោះ​ ហៃ សុភាព​ ឈ្មោះ ​ទូច​ សិរីមាស​ ឈ្មោះ ​រី សុវណ្ណឌី ​ឈ្មោះ ​ឃ្លាំង​ សុបិន្ត​ ឈ្មោះ​ ឈឹម សុខន​ និង​ឈ្មោះ ​សុន ស្រីពេជ្រ។ ​នេះ ​បើ​តាម​ការ​បញ្ជាក់​របស់​អ្នក​ការពារ​សិទ្ធិ​មនុស្ស​មួយ​ចំនួន។​

នាយក​រង​ទទួល​បន្ទុក​ឃ្លាំមើល​សិទ្ធិ​មនុស្ស​នៃ​អង្គការ​លីកាដូ​លោក ​អំ សំអាត​ ថ្លែង​ថា​ អង្គការ​សង្គម​ស៊ីវិល​មួយ​ចំនួន​បាន​ខ្នះខ្នែង​ផ្តល់​មេធាវី​ការពារ​សិទ្ធិ​ឲ្យ​ទៅ​អ្នក​ទាំង​៦​នាក់​ដែល​ត្រូវ​បាន​ចាប់​ខ្លួន​ និង​បន្ត​សាក​សួរ​នៅ​តុលាការ​នោះ តាម​ការ​ស្នើ​សុំ​របស់​ក្រុម​គ្រួសារ។​

លោក​ប្រាប់​វីអូអេ​បន្ថែម​នៅ​ថ្ងៃ​ចន្ទ​នេះ​ថា វិវាទ​ការងារ​ គួរ​ត្រូវ​បាន​ដោះស្រាយ​ឲ្យ​ស្រប​តាម​ច្បាប់​ការងារ​ ហើយអាជ្ញាធរ​មិន​គួរ​អនុញ្ញាត​ឱ្យ​មាន​ការ​ចាប់​ខ្លួន​អ្នក​តំណាង​ឱ្យ​កម្មករ​និយោជិត​នៅ​ក្រុមហ៊ុន​ណាហ្គាវើលដ៍​ទាំង​៦​រូប​នោះ​ទេ ​ព្រោះ​ការ​ចាប់​ខ្លួន​នេះ​ អាច​នាំ​ឱ្យ​មាន​ការ​រិះគន់​ពី​ក្រុម​អង្គការ​សិទ្ធិ​មនុស្ស​ជាតិ​ និង​អន្តរជាតិ​ ទាក់ទង​ការ​រំលោភ​សិទ្ធិ​មនុស្ស​ និង​វិជ្ជាជីវៈ​របស់​សហជីព។​

«វា​មិន​មែន​ជា​ដំណោះ​ស្រាយ​ល្អ​ទេ។​ ​ ផ្ទុយ​ទៅវិញ​គេ​យល់​ថា​ វា​ជា​ការ​គំរាម​កំហែង​ ជា​ការ​បំភិត​បំភ័យ​បំបាក់​ស្មារតី​ទៅ​លើ​អ្នក​ធ្វើ​កូដកម្ម​ កន្លង​មក​ហ្នឹង​ដើម្បី​កុំ​ឱ្យធ្វើ​កូដកម្ម​បន្ត​ទៀត។​ អ៊ីចឹង​ វា​មិន​មែន​ជា​ដំណោះ​ស្រាយ​ល្អ​ទេ»។​

ចំណែក​មន្ត្រី​កម្មវិធី​ការងារ​របស់​មជ្ឈមណ្ឌល​សម្ព័ន្ធ​ភាព​ការងារ​និង​សិទ្ធិ​មនុស្ស​ហៅ​កាត់​ថា​ សង់ត្រាល់ ​លោក​ ឃុន ថារ៉ូ ​យល់​ថា​ ​ការ​ចាប់​ខ្លួន​ថ្នាក់​ដឹកនាំ​ និង​សកម្មជន​សហជីព​ខាង​លើ​«ជា​ការ​គម្រាម​កំហែង​យ៉ាង​ធ្ងន់ធ្ងរ​ដល់​ការ​អនុវត្ត​សិទ្ធិ​ជា​មូលដ្ឋាន​របស់​កម្មករ​និយោជិត។​ ការ​ធ្វើ​កូដកម្ម​ដោយ​សន្តិវិធី ​មិនមែន​ជា​បទ​ល្មើស​នោះ​ទេ»។​

អ្នក​ការពារ​សិទ្ធិ​ការងារ​រូប​នេះ​ លើក​ឡើង​ទៀត​ថា ​សង្គម​ស៊ីវិល​សូម​អំពាវនាវ​ដល់​អាជ្ញាធរ​មាន​សមត្ថកិច្ច​រួម​ទាំង​ក្រសួង​ការងារ​ និង​បណ្តុះ​បណ្តាល​វិជ្ជាជីវៈ ​ប្រើ​ប្រាស់​តួនាទី​ប្រកប​ដោយ​វិជ្ជាជីវៈ អព្យាក្រឹត ​មិន​លម្អៀង​ទៅ​រក​ភាគី​ណា​មួយ​នៅ​ក្នុង​ដំណើរ​ការ​ស្វែងរក​ដំណោះ​ស្រាយ​ករណី​វិវាទ​ការងារ​រួម​មួយ​ នេះ​ប្រកប​ដោយ​ការ​ទទួល​ខុស​ត្រូវ​ខ្ពស់​ និង​ក៏​សូម​អំពាវនាវ​ឱ្យ​មាន​ការ​ដោះលែងដោយ​ឥត​លក្ខខណ្ឌ​សម្រាប់​ថ្នាក់​ដឹកនាំ​ និង​សកម្ម​ជន​សហជីព​ ដែល​ត្រូវ​បាន​ចាប់​ខ្លួន។ ​

លោក​ប្រាប់​វីអូអេ​បន្ថែម​តាម​ប្រព័ន្ធ​ទំនាក់​ទំនង​តេឡេក្រាម​ក្នុង​ន័យ​ដើម​ថា៖​«ចេតនា​របស់​អាជ្ញាធរ​ក្នុង​ការ​ដោះ​ស្រាយ​វិវាទ​ការងារ​នេះ​ គឺ​ព្យាយាម​អូស​បន្លាយ​ឱ្យ​កាន់​តែ​យូរ​ដែល​ធ្វើឱ្យ​ស្ថានភាព​នៃ​ការ​តវ៉ា​របស់​បុគ្គលិក​កាន់​តែ​ខ្សោយ​ទៅៗ​ ហើយ​វា​កាន់​តែ​បង្កើត​ភាព​អយុត្តិធម៌​ និង​ការ​ឈឺ​ចាប់​បន្ថែម​ទៀត​ចំពោះ​កូដករ»។​

បើ​តាម​លោក​ ឃុន ថារ៉ូ​ ចំនួន​ថ្នាក់​ដឹកនាំ​ និង​សកម្មជន​សហជីព​ ព្រម​ទាំង​ពលរដ្ឋ​១០​នាក់ ​ត្រូវ​បាន​ឃាត់​ខ្លួន ​ប៉ុន្តែ​អ្នក​នាំពាក្យ​ស្នង​ការដ្ឋាន​នគរបាល​រាជធានី​ភ្នំពេញ​បញ្ជាក់​ថា​ អ្នក​ដែល​ត្រូវ​បាន​ឃាត់​ខ្លួន​នោះ​ គឺ​មាន​តែ​៩​នាក់​ទេ ​ហើយ​៣​នាក់​ ត្រូវ​បាន​ដោះលែង។​

ក្រុមហ៊ុន​ណាហ្គាវើលដ៍​ជា​សាខា​របស់​ក្រុមហ៊ុន​ NagaCorp ​និង​បាន​ចុះ​បញ្ជី​នៅ​ផ្សារហ៊ុន​ទីក្រុង​ហុងកុង​មាន​ប្រតិបត្តិការ​កាស៊ីណូ​នៅ​កណ្តាល​ទីក្រុង​ភ្នំពេញ។​

កាលពី​ចុង​ខែ​មេសា​ ឆ្នាំ​២០២១​ ក្រុមហ៊ុន​ណាហ្គាវើលដ៍​ត្រូវ​សហជីព​នៅ​ក្រុមហ៊ុន​នេះ​ចោទ​ប្រកាន់​ថា ​បាន​កាត់​បុគ្គលិក​ចេញ​ពី​ការងារ​ជាង​១៣០០​នាក់​ទាំង​បង្ខំ​ ដោយ​មិន​ផ្តល់​អត្ថប្រយោជន៍​ផ្សេង​ទៀត​ ក្នុង​នោះ​ក៏មាន​ប្រាក់​អតីត​ភាព​ការងារ​ផង​ដែរ។​ក្នុង​ចំណោម​បុគ្គលិក​ជាង​១៣០០​នាក់​នោះ​ មាន​បុគ្គលិក​ចំនួន​ប្រមាណ​២៧៩​នាក់​ ដែល​ជា​ថ្នាក់​ដឹកនាំ​សកម្ម​ជន​សហជីព​ និង​បុគ្គលិក​នៅ​ក្រុមហ៊ុន​ណាហ្គាវើលដ៍​កំពុង​ទាម​ទារ​ឲ្យ​បាន​ចូល​ធ្វើ​ការ​វិញ។​

លោក​ ហេង សួរ ​អ្នក​នាំ​ពាក្យ​ក្រសួង​ការងារ​ មិន​ទាន់​ឆ្លើយ​សំណួរ​របស់​សំឡេង​សហ​រដ្ឋ​អាមេរិក​ដែល​បាន​ផ្ញើ​តាម​ប្រព័ន្ធ​ទំនាក់​ទំនង​ WhatsApp​ នៅ​ថ្ងៃ​ចន្ទ​នេះ​ទេ។​

វីអូអេ ​ក៏​មិន​ទាន់​អាច​ទាក់ទង​សុំ​ការ​អត្ថាធិប្បាយ​ពី​ប្រធាន​ផ្នែក​ធនធាន​មនុស្ស​នៃ​ក្រុមហ៊ុន​ណាហ្គាវើលដ៍​លោក​ Hein Dames​ នៅ​ថ្ងៃ​ចន្ទ​នេះ​បាន​ដែរ។​

ដោយ​ឡែក​ អ្នក​នាំពាក្យ​ស្នងការដ្ឋាន​នគរបាល​រាជធានី​ភ្នំពេញ​លោក ​សាន សុខសីហា​ បាន​ច្រាន​ចោល​ការ​រិះ​គន់​របស់​អ្នក​ការពារ​សិទ្ធិ​មនុស្ស​ពាក់​ព័ន្ធ​នឹង​វិធានការ​ចាប់​ខ្លួន​តំណាង​កម្មករ​និយោជិត​នៅ​ក្រុមហ៊ុន​ណាហ្គាវើលដ៍​នា​ពេល​ថ្មីៗ​នេះ​ ដោយ​ថា​កូដកម្ម​ដែល​បាន​ធ្វើ​ឡើង​កន្លង​មក​នោះ ​ជា​កូដកម្ម​ខុស​ច្បាប់​ និង​អាច​ប៉ះពាល់​ដល់​សណ្តាប់​ធ្នាប់​សន្តិសុខ​សង្គម។

«មាន​ន័យ​ថា​ គឺ​ការ​ដឹកនាំ​បាតុកម្ម​របស់​គាត់​ហ្នឹង ​គឺ​ខុស​ច្បាប់​ទាំង​ស្រុង​ ដោយ​សាលា​រាជធានី​ភ្នំពេញ​គេ​បាន​ចេញ​សេចក្តី​ណែនាំ​ជាច្រើន​លើក​ច្រើន​សារ​ឱ្យ​មេ​ដឹកនាំ​បាតុកម្ម​ទាំង​អស់​ហ្នឹង ​គឺ​បញ្ឈប់​ជា​បន្ទាន់​ទាក់​ទង​នឹង​ការ​ដឹកនាំ​បាតុកម្ម​ខុស​ច្បាប់។ ​ហើយ​មួយ​វិញ ​គឺ​ទាក់​ទង​នឹង​ការ​ញុះញង់​បង្ក​ឱ្យ​មាន​ភាព​វឹកវរ​ដល់​សង្គម​ជាតិ ​ញុះ​ញង់​បង្ក​ឲ្យ​មាន​ការ​បិទ​ផ្លូវ​សាធារណៈ​ ក៏ដូច​ជា​ធ្វើ​ឲ្យ​រាំង​ស្ទះ​ដល់​ការ​ប្រកប​អាជីវ​កម្ម​របស់​ក្រុមហ៊ុន»។​

កូដកម្ម​ដែល​បាន​ធ្វើ​ឡើង​ចំនួន​១៣​ថ្ងៃ​មក​នេះ​ មាន​ការ​ទាម​ទារ​៩​ចំណុច​សំខាន់ៗ​ ក្នុង​នោះ​ គឺ​ការ​ទូទាត់​ប្រាក់​អតីត​ភាព​ការងារ​ការ​ប្រើប្រាស់​កិច្ច​សន្យា​កម្ម​សិក្សា​ដែល​ខុស​ច្បាប់​ ការ​ស្នើ​សុំ​ដំឡើង​ប្រាក់​ឈ្នួល​ និង​ការ​មិន​គោរព​ច្បាប់​ការងារ។​

គិត​ត្រឹម​រសៀល​ថ្ងៃ​ចន្ទ​នេះ​ អាជ្ញាធរ​មាន​សមត្ថ​កិច្ច​ក្នុង​រាជធានី​ភ្នំពេញ​ បាន​ឃាត់​ខ្លួន​អ្នក​ធ្វើ​កូដកម្ម​បន្ថែម​ទៀត​ចំនួន​ប្រមាណ​១៤​នាក់​ ក្នុង​នោះ​មាន​ស្ត្រី​មាន​ផ្ទៃ​ពោះ​មួយ​រូប​ផង​ដែរ។ ​នេះ ​បើ​តាម​ការ​បញ្ជាក់​ពី​អ្នក​ការពារ​សិទ្ធិ​មនុស្ស​ដែល​ឃ្លាំ​មើល​កូដកម្ម​នៅ​កាស៊ីណូ​ណាហ្គាវើលដ៍៕

XS
SM
MD
LG