ប៉ូលិសហុងកុងនៅថ្ងៃអង្គារនេះបាននិយាយថា ពួកគេបានចាប់ខ្លួនមនុស្ស៩នាក់ដោយសង្ស័យថាបានចូលរួមក្នុងសកម្មភាពភេរវកម្ម បន្ទាប់ពីប៉ូលិសបានរកឃើញការប៉ុនប៉ងផលិតគ្រឿងផ្ទុះនិងការដាក់គ្រាប់បែកនៅទីក្រុងនេះ។
ការចាប់ខ្លួននេះបានកើតឡើងចំពេលមានការបែកបាក់ផ្នែកនយោបាយនៅទីក្រុងហុងកុង រយៈពេលពីរឆ្នាំបន្ទាប់ពីការតវ៉ាគាំទ្រលទ្ធិប្រជាធិបតេយ្យដ៏ច្រើនកុះករបានធ្វើឲ្យកក្រើកទីក្រុងពាក់កណ្តាលស្វ័យភាពរបស់ជនជាតិចិននេះ។ ការចាប់ខ្លួននេះធ្វើឡើងមួយឆ្នាំបន្ទាប់ពីរដ្ឋាភិបាលក្រុងប៉េកាំងបានដាក់ចេញច្បាប់សន្តិសុខថ្មីដ៏តឹងរ៉ឹងទៅលើទីក្រុងដែលធ្លាប់នៅក្រោមអាណានិគមអង់គ្លេសនេះ។
ក្នុងចំណោមមនុស្ស៩នាក់ដែលត្រូវបានចាប់ខ្លួននោះ មាន៦នាក់ជាសិស្សអនុវិទ្យាល័យ។ ប៉ូលិសបាននិយាយថា ក្រុមនេះបានព្យាយាមផលិតគ្រឿងផ្ទុះធ្វើពីសារធាតុ Triacetone Triperoxide (TATP) ក្នុងមន្ទីរពិសោធន៍នៅផ្ទះមួយកន្លែង។
លោក Li Kwai-wah អធិការជាន់ខ្ពស់នៃនាយកដ្ឋានសន្តិសុខជាតិប៉ូលិសហុងកុង បានឲ្យដឹងថា អ្នកដែលត្រូវបានចាប់ខ្លួនទាំង៩នាក់ មានបុរស៥នាក់ និងស្ត្រី៤នាក់ដែលមានអាយុចន្លោះពី១៥ទៅ ៣៩ឆ្នាំ។
ប៉ូលិសក៏បានបង្កកទ្រព្យសម្បត្តិចំនួន៦សែនដុល្លារហុងកុងដែលពួកគេនិយាយថា អាចជាប់ទាក់ទងនឹងផែនការនេះ។ ក្រុមអាជ្ញាធរបានឲ្យដឹងថា សមាជិកទាំងអស់នៃក្រុមនេះគ្រោងចាកចេញពីហុងកុងជារៀងរហូត ហើយពួកគេគ្រោងនឹងធ្វើវិទ្ធង្សនានៅហុងកុង មុនពេលចាកចេញ។
មេដឹកនាំទីក្រុងហុងកុងគឺអ្នកស្រី Carrie Lam បានថ្លែងនៅក្នុងសន្និសីទសារព័ត៌មានមួយនៅថ្ងៃអង្គារនេះថា អ្នកស្រីសង្ឃឹមថា សមាជិកសាធារណជននឹង«ថ្កោលទោសដោយបើកចំហចំពោះការគំរាមកំហែងនៃអំពើហិង្សា»។
អ្នកស្រី Lam បាននិយាយថា ស្រោមសំបុត្រដែលមានម្សៅពណ៌ស ត្រូវបានបញ្ជូនទៅការិយាល័យរបស់អ្នកស្រី។ ប៉ូលិសបានឲ្យដឹងនៅថ្ងៃអង្គារនេះថា សារធាតុនេះកំពុងត្រូវបានវិភាគ ប៉ុន្តែពួកគេមិនជឿថា វាបង្កគ្រោះថ្នាក់ទេ។
កាលពីខែធ្នូ ឆ្នាំ២០១៩ អាជ្ញាធរបានដោះគ្រាប់បែក២គ្រាប់នៅក្នុងសាលាកាតូលិកក្នុងតំបន់មួយ។ គ្រាប់បែកច្នៃដែលបញ្ជាពីចម្ងាយមួយក៏ត្រូវបានដោះដែរនៅក្បែររថយន្តប៉ូលិសក្នុងឆ្នាំ២០១៩ នៅពេលបាតុកម្មប្រឆាំងរដ្ឋាភិបាលកំពុងកើតឡើង៕
