ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

បណ្ដា​ប្រទេស​នានា​រួម​គ្នា​គាំទ្រ​សកម្មភាព​ពង្រឹង​ការ​រក្សា​សន្តិភាព​របស់​អង្គការ សហប្រជាជាតិ


រដ្ឋ​លេខា​ធិការ​អង្គការ​សហប្រជាជាតិ​ Antonio Guterres (ឆ្វេង) ស្តាប់​ប្រធានាធិបតី​អាមេរិក​ Donald Trump ខណ​ដែល​លោក​បើក​កិច្ច​ប្រជុំ​ក្រុមប្រឹក្សា​សន្តិសុខ​កាលពី​ថ្ងៃទី​២៦ ខែ កញ្ញា ឆ្នាំ ២០១៨ក្នុង​ទីក្រុង​ញូវយ៉ក។

ដោយសារ​ជម្លោះ​នានា​នៅ​លើ​ពិភពលោក​កាន់តែ​មាន​ភាព​ស្មុគស្មាញ អូស​បន្លាយ​កាន់តែ​យូរ និង​ពិបាក​ដោះស្រាយ​ជាង​មុន ជា​ពិសេស​ដោយសារ​កង​រក្សា​សន្តិភាព​របស់​អង្គការ​សហប្រជាជាតិ​ប្រឈម​នឹង​ស្ថានការណ៍​កាន់តែ​លំបាក​ជាង​មុន បណ្ដា​ប្រទេស​នានា​បាន​ចាប់ផ្ដើម​រួម​គ្នា​គាំទ្រ​ដល់​កិច្ចការ​ថែ​រក្សា​សន្តិភាព​របស់​អង្គការ​សហប្រជាជាតិ​នៅ​លើ​ពិភពលោក។

ដោយ​កង​រក្សា​សន្តិភាព​អង្គការ​សហប្រជាជាតិ​ទាំង ១ សែន​នាក់ ប្រឈម​នឹង​ស្ថានការណ៍​ផ្លាស់ប្ដូរ និង​លំបាក​ជាង​មុន ប្រទេស​ចំនួន ១៤៥ បាន​សម្រេច​គាំទ្រ​លើ​ផែនការ​សកម្មភាព​មួយ​កាល​ពី​ថ្ងៃ​ទី ២៥ ខែ​កញ្ញា​កន្លង​ទៅ​នេះ ដើម្បី​ធ្វើ​ឲ្យ​ប្រតិបត្តិការ​រក្សា​សន្តិភាព​នេះ​កាន់តែ​រឹងមាំ និង​អាច​បត់បែន​បាន​ជាង​មុន។

អគ្គលេខាធិការ​អង្គការ​សហប្រជាជាតិ​លោក Antonio Guterres បាន​និយាយ​នៅ​ក្នុង​កិច្ច​ប្រជុំ​កម្រិត​ខ្ពស់​មួយ​អំពី​ការ​រក្សា​សន្តិភាព បន្ថែម​ទៅ​នឹង​កិច្ច​ប្រជុំ​របស់​មហា​សន្និបាត​អង្គការ​សហប្រជាជាតិ​យ៉ាង​ដូច្នេះ​ថា៖ «កង​រក្សា​សន្តិភាព​មួក​ខៀវ​របស់​អង្គការ​សហប្រជាជាតិ​ត្រូវ​ប្រឈម​នឹង​ការ​កើន​ឡើង​នូវ​ជម្លោះ​ស្មុគស្មាញ​នានា ដោយ​មាន​សត្រូវ​គ្រប់​ប្រភេទ ដំណើរការ​នយោបាយ​ជាប់​គាំង អំពើ​ភេរវកម្ម និង​ឧក្រិដ្ឋកម្ម​ឆ្លង​ដែន​រៀបចំ​ទុក​ជា​មុន។ ប៉ុន្តែ ខ្ញុំ​យល់​ថា ពួកគេ​ក៏​ប្រឈម​ផង​ដែរ​នឹង​បញ្ហា​ខ្លាំងក្លា​ជាង​មុន ដែល​នោះ​គឺ​ភាព​ខុស​គ្នា​រវាង​សេចក្ដី​ប៉ង​ប្រាថ្នា និង​ភាព​ពិត​ជាក់​ស្ដែង»។

កង​រក្សា​សន្តិភាព​របស់​អង្គការ​សហប្រជាជាតិ​ត្រូវ​គេ​ស្គាល់​ថា​កង​កម្លាំង «មួក​ខៀវ» ដោយសារតែ​ពណ៌​របស់​មួក​របស់​ពួកគេ។

ចាប់តាំង​ពី​ពេល​ដែល​កង​រក្សា​សន្តិភាព​អង្គការ​សហប្រជាជាតិ​ត្រូវ​បាន​បញ្ជូន​ដំបូង​ទៅ​កាន់​តំបន់​មជ្ឈិម​បូព៌ា​កាល​ពី​ឆ្នាំ ១៩៤៨ ដើម្បី​ត្រួត​ពិនិត្យ​មើល​កិច្ច​ឈប់​វាយ​ប្រយុទ្ធ​គ្នា​រវាង​ប្រទេស​អ៊ីស្រាអែល និង​បណ្ដា​ប្រទេស​អារ៉ាប​ជិត​ខាង​មក អង្គការ​សហប្រជាជាតិ​មាន​បេសកកម្ម​រក្សា​សន្តិភាព​ជាង ៧០ ដង​រួច​មក​ហើយ​នៅ​លើ​ពិភពលោក។

ប៉ុន្តែ ស្ថានភាព​នៃ​ជម្លោះ​តែងតែ​ផ្លាស់ប្ដូរ ហើយ​ប្រតិបត្តិការ​រក្សា​សន្តិភាព​កំពុង​ធ្វើ​ការ​ដើម្បី​ដោះស្រាយ​បញ្ហា​ប្រឈម​ទាំង​នេះ ដោយ​ព្យាយាម​ធ្វើ​កុំ​ឲ្យ​មាន​ចំនួន​អ្នក​ស្លាប់​ច្រើន និង​បង្កើន​សមត្ថភាព​ធ្វើ​ប្រតិបត្តិការ​ឲ្យ​បាន​ប្រសើរ​ជាង​មុន។

លោក Gutteres បាន​និយាយ​ថា៖ «ផ្នែក​សន្តិសុខ និង​រចនាសម្ព័ន្ធ​នៃ​ការ​ដឹកនាំ​របស់​កង​រក្សា​សន្តិភាព​របស់​អង្គការ​សហប្រជាជាតិ​កំពុង​ត្រូវ​បាន​ធ្វើ​ឲ្យ​ប្រសើរ​ឡើង។ ផ្នែក​នៃ​ការ​ទទួល​ខុស​ត្រូវ​ក៏​ត្រូវ​បាន​ពង្រឹង ហើយ​ការ​បរាជ័យ​នៃ​ការ​អនុវត្ត​ប្រតិបត្តិការ​នេះ​ក៏​ត្រូវ​បាន​ដោះស្រាយ​ផង​ដែរ»។

លោក Emmanuel Macron ប្រធានាធិបតី​បារាំង បាន​និយាយ​ថា៖ «ការ​រក្សា​សន្តិភាព​នៅតែ​ជា​មធ្យោបាយ​ដ៏​សំខាន់ និង​មិន​អាច​ខ្វះ​បាន​មួយ​សម្រាប់​សង្គម​ជា​រួម​របស់​យើង។ ការ​ថែ​រក្សា​សន្តិភាព​នា​ពេល​បច្ចុប្បន្ន​នេះ ដូច​ដែល​បាន​បង្កើត អនុវត្ត និង​គោរព​តាម គឺ​បាន​ឈាន​មក​ដល់​ចុង​បញ្ចប់​នៃ​វដ្ដ​របស់​វា​ហើយ»។

លោក​ Macron បាន​និយាយ​ថា ឥឡូវ​នេះ​ដល់​ពេល​ដែល​ត្រូវ​កែ​សម្រួល​ទម្រង់​នៃ​ការ​រក្សា​សន្តិភាព​នេះ​ឡើង​វិញ​ហើយ ដោយ​យើង​ត្រូវ​មាន​ភាព​ប្រាកដ​និយម​អំពី​អ្វី​ដែល​វា​អាច​និង​មិន​អាច​សម្រេច​បាន។

ទិដ្ឋភាព​ផ្លាស់ប្ដូរ

ពិភពលោក​នា​ពេល​បច្ចុប្បន្ន​នេះ​កំពុង​ប្រឈម​នឹង​ជម្លោះ​កាន់​តែ​ច្រើន​ឡើង​ដែល​អូស​បន្លាយ​អស់​រយៈពេល​រាប់​ឆ្នាំ និង​ពិបាក​ដោះស្រាយ។ ជារឿយៗ កង​រក្សា​សន្តិភាព​ត្រូវ​បាន​ដាក់​ពង្រាយ​នៅ​តាម​បណ្ដា​ប្រទេស​ណា​ដែល​មាន​កិច្ច​ព្រមព្រៀង​នយោបាយ​ទន់​ខ្សោយ ដែល​កិច្ច​ព្រមព្រៀង​នយោបាយ​ទន់ខ្សោយ​នេះ​បាន​ធ្វើ​ឲ្យ​ស្មុគស្មាញ​ដល់​កិច្ចការ​ថែ​រក្សា​សន្តិភាព និង​ជំរុញ​ឲ្យ​កង​រក្សា​សន្តិភាព​បន្ត​វត្តមាន​របស់​ពួកគេ​បន្ថែម​ទៀត​នៅ​ប្រទេស​ទាំង​នោះ។

បន្ថែម​ពី​លើ​នេះ​ទៀត កង​រក្សា​សន្តិភាព​ខ្លួន​ឯង​ផ្ទាល់​បាន​ក្លាយទៅជា​គោលដៅ​នៃ​ការ​វាយ​ប្រហារ​នៅ​ក្នុង​ជម្លោះ​ទាំង​នោះ ដោយ​នៅ​ក្នុង​ឆ្នាំ ២០១៨ នេះ មាន​កង​កម្លាំង​រក្សា​សន្តិភាព​ប្រហែល ៦៤ នាក់​ហើយ​បាន​ស្លាប់។

ប្រទេស​ស៊ូដង់​ខាងត្បូង និង​សាធារណរដ្ឋ​ប្រជាធិបតេយ្យ​កុងហ្គោ​គឺ​ជា​ឧទាហរណ៍​ដូច​នេះ​ចំនួន ២ ករណី ដោយ​នៅ​ក្នុង​ប្រទេស​ទាំង​នោះ អង្គការ​សហប្រជាជាតិ​បាន​ដាក់​ពង្រាយ​កង​កម្លាំង​រាប់​ម៉ឺន​នាក់ ដើម្បី​រក្សា​សន្តិភាព​សម្រាប់​ជម្លោះ​ដែល​អូស​បន្លាយ​រយៈ​ពេល​យូរ​នៅ​ក្នុង​ស្ថានការណ៍​ដ៏​លំបាក។ ជោគជ័យ​នៃ​ការ​រក្សា​សន្តិភាព​នេះ​គឺ​ត្រូវ​បាន​សម្រេច​បាន​ដោយ​អន្លើៗ​តែ​ប៉ុណ្ណោះ ហើយ​បេសកកម្ម​រក្សា​សន្តិភាព​នីមួយៗ​ចំណាយ​អស់​ថវិកា​ប្រចាំ​ឆ្នាំ​ជាង ១ ពាន់​លាន​ដុល្លារ​អាមេរិក។

លោក Paul Kagame ប្រធានាធិបតី​ប្រទេស​រ៉្វាន់ដា ដែល​ជា​ប្រទេស​បញ្ជូន​យោធា​និង​ប៉ូលិស​ជា​ច្រើន​ទៅ​ចូលរួម​ក្នុង​បេសកកម្ម​ថែ​រក្សា​សន្តិភាព​របស់​អង្គការ​សហប្រជាជាតិ បាន​និយាយ​ថា៖ «យើង​ចង់​បាន​ពិភពលោក​មួយ​ដែល​មិន​គួរ​មាន​កង​កម្លាំង​រក្សា​សន្តិភាព» ។

ប៉ុន្តែ​ប្រសិនបើ​យើង​ត្រូវតែ​មាន​កង​រក្សា​សន្តិភាព គឺ​ត្រូវតែ​ធ្វើ​ឲ្យ​ប្រាកដ​ថា កង​កម្លាំង​រក្សា​សន្តិភាព​ទាំង​នោះ​ត្រូវ​បាន​ដាក់​ពង្រាយ​ដើម្បី​ជួយ​ដល់​ដំណើរការ​នយោបាយ​ច្បាស់លាស់​មួយ។ ចំណុច​នេះ​មាន​ន័យ​ថា យើង​ត្រូវ​មាន​បេសកកម្ម​មួយ​ដ៏​ត្រឹមត្រូវ​ដោយ​មិន​ប៉ះពាល់​ដល់​កិច្ច​ព្រមព្រៀង​នានា ក៏ដូចជា​មិន​ប៉ះពាល់​ដល់​ធនធាន និង​មធ្យោបាយ​នានា ដែល​ត្រូវការ​ចាំបាច់​ដើម្បី​សម្រេច​ឲ្យ​បាន​នូវ​កិច្ចការ​នេះ»។

នា​ពេល​បច្ចុប្បន្ន​នេះ អង្គការ​សហប្រជាជាតិ​មាន​បេសកកម្ម​រក្សា​សន្តិភាព​ចំនួន ១៤ នៅ​ទ្វីប​ចំនួន ៤ នៅ​លើ​ពិភពលោក ដោយ​មាន​ថវិកា​ប្រចាំ​ឆ្នាំ​សម្រាប់​បេសកកម្ម​ទាំង​នេះ​ចំនួន​ជិត ៧ ពាន់​លាន​ដុល្លារ​អាមេរិក។ ប៉ុន្តែ​បេសកកម្ម​របស់​ខ្លួន​ជារឿយៗ​ខ្វះ​នូវ​ឧបករណ៍​សំខាន់ៗ​ដូចជា​ឧទ្ធម្ភាគចក្រ​ជា​ដើម ហើយ​ទាហាន​រក្សា​សន្តិភាព​មាន​សមត្ថភាព និង​ទទួល​បាន​ការ​បណ្ដុះ​បណ្ដាល​មិន​ស្មើ​គ្នា។

បេសកកម្ម​រក្សា​សន្តិភាព​របស់​អង្គការ​សហប្រជាជាតិ​ចំនួន​ពាក់​កណ្ដាល​គឺ​ធ្វើ​ឡើង​នៅ​ទ្វីប​អាហ្វ្រិក ហើយ​គេ​ឃើញ​មាន​ការ​បង្កើន​កិច្ច​សហប្រតិបត្តិការ​រវាង​អង្គការ​សហ​ប្រជាជាតិ និង​សហភាព​អាហ្វ្រិក។ មួយ​ផ្នែក​នៃ​កិច្ច​សហប្រតិបត្តិការ​នេះ រួម​បញ្ចូល​ទាំង​វិធានការ​ជំរុញ​ឲ្យ​សហភាព​អាហ្វ្រិក​រួម​ចំណែក​ជា​ថវិកា​ដល់​បេសកកម្ម​រក្សា​សន្តិភាព​នៅ​លើ​ទ្វីប​នេះ​ផង​ដែរ។

លោក Moussa Faki Mahamat ប្រធាន​គណៈកម្មការ​សហភាព​អាហ្វ្រិក មាន​ប្រសាសន៍​ដូច្នេះ​ថា៖ «សហភាព​អាហ្វ្រិក​ស្នើ​អង្គការ​សហ​ប្រជាជាតិ​ឲ្យ​ទទួល​ខុស​ត្រូវ​សម្រាប់​ការ​ចំណាយ​ភាគ​ច្រើន​នៃ​ប្រតិបត្តិការ​រក្សា​សន្តិភាព ដែល​ខ្លួន​បាន​ធ្វើ​ដោយ​មាន​ការ​យល់ព្រម​ពី​ក្រុមប្រឹក្សា​សន្តិសុខ​អង្គការ​សហប្រជាជាតិ ហើយ​ទ្វីប​អាហ្វ្រិក​គួរតែ​រួម​ចំណែក​ថវិកា​ចំនួន​តែ ២៥ ភាគរយ​តែ​ប៉ុណ្ណោះ។ នេះ​មាន​ន័យ​ថា វា​ជា​ជំហាន​ថ្មី​មួយ​ឆ្ពោះ​ទៅ​មុខ​នៅ​ក្នុង​កិច្ច​សហប្រតិបត្តិការ​របស់​យើង​ដើម្បី​ថែ​រក្សា​សន្តិភាព»។

ស្វែង​រក​ភាព​ជោគជ័យ

ប្រសិន​បើ​គោលដៅ​នៃ​ផែនការ​សកម្មភាព​នេះ​អាច​សម្រេច​បាន នោះ​អង្គការ​សហ​ប្រជាជាតិ​សង្ឃឹម​ថា ខ្លួន​អាច​មាន​រឿងរ៉ាវ​ជោគជ័យ​ជា​ច្រើន​ទៀត ដូច​ទៅ​នឹង​រឿងរ៉ាវ​ជោគជ័យ​នៃ​បេសកកម្ម UNMIL របស់​ខ្លួន​នៅ​ក្នុង​ប្រទេស​លីបេរីយ៉ា​ជា​ដើម។ បេសកកម្ម​នោះ​ត្រូវ​បាន​បិទ​បញ្ចប់​ប្រតិបត្តិការ​របស់​ខ្លួន​កាល​ពី​ថ្ងៃ​ទី ៣០ ខែ​មិនា​កន្លង​ទៅ​នេះ បន្ទាប់ពី​មាន​វត្តមាន​ជិត ១៥ ឆ្នាំ​មក​នៅ​ក្នុង​ប្រទេស​លីបេរីយ៉ា ក្រោយ​ពី​ប្រទេស​នេះ​មាន​សង្គ្រាម​ស៊ីវិល​អស់​រយៈពេល ៤ ឆ្នាំ​មក។

រដ្ឋមន្ត្រី​ការបរទេស​របស់​ប្រទេស​លីបេរីយ៉ា​លោក Gbehzonar Milton Findley បាន​បញ្ជាក់​ថា៖ «ក្នុង​រយៈ​ពេល​នោះ បេសកកម្ម UNMIL បាន​ដាក់​ពង្រាយ​កង​រក្សា​សន្តិភាព​ជាង ១ សែន ៨ ម៉ឺន​នាក់ ដក​ហូត​អាវុធ​ពី​អតីត​យុទ្ធជន​ជាង ១ សែន​នាក់ សម្រប​សម្រួល​ការ​ធ្វើ​មាតុភូមិនិវត្តន៍​របស់​ជន​ភៀស​ខ្លួន​ចំនួន ២ ម៉ឺន ៦ ពាន់ ៥២៣ នាក់ និង​ជួយ​នៅ​ក្នុង​ការ​បោះឆ្នោត​ជ្រើសរើស​ប្រធានាធិបតី និង​រដ្ឋសភា តាម​បែប​ប្រជាធិបតេយ្យ​ចំនួន ៣ លើក​រួច​មក​ហើយ»។

បេសកកម្ម​នេះ​ចំណាយ​អស់​ថវិកា​ចំនួន ៧ ពាន់ ៥ រយ​លាន​ដុល្លារ​អាមេរិក ហើយ​កង​កម្លាំង​រក្សា​សន្តិភាព​ជាង ២ រយ​នាក់​បាន​ស្លាប់​នៅ​ក្នុង​ការ​បំពេញ​កាតព្វកិច្ច​របស់​ខ្លួន។ ប៉ុន្តែ​នា​ពេល​បច្ចុប្បន្ន​នេះ ប្រទេស​លីបេរីយ៉ា​ទទួល​បាន​ស្ថិរភាព ហើយ​កំពុង​ធ្វើ​ដំណើរ​វិវឌ្ឍ​ទៅ​មុខ។ លោកFindley បាន​បន្ថែម​ថា៖ «ការ​រក្សា​សន្តិភាព​គឺ​ល្អ​បំផុត ប្រសិន​បើ​វា​មិន​មែន​ជា​វដ្ដ​មួយ​ដែល​គ្មាន​ទី​បញ្ចប់​នោះ»៕


ប្រែ​សម្រួល​ដោយ ហេង រស្មី

XS
SM
MD
LG