អង្គការសកម្មជនមួយ បានបញ្ជាក់កាលពីថ្ងៃអង្គារម្សិលមិញថា ឈើម៉ៃសាក់មីយ៉ាន់ម៉ាប្រមាណជិត ១.៦០០ តោន ត្រូវបាននាំចេញទៅកាន់ក្រុមហ៊ុនអាមេរិកកាលពីឆ្នាំមុន ដោយរំលោភលើការដាក់ទណ្ឌកម្មរបស់រដ្ឋាភិបាលសហរដ្ឋអាមេរិកដែលដាក់លើរបបយោធានៅក្នុងប្រទេសមីយ៉ាន់ម៉ា។ នេះ បើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ប្រទេសមីយ៉ាន់ម៉ា បានធ្លាក់ចូលក្នុងភាពចលាចល តាំងពីថ្ងៃរដ្ឋប្រហារយោធាកាលពីថ្ងៃទី ១ ខែកុម្ភៈ ឆ្នាំមុនមក។ ភាពវឹកវរនេះ បានធ្វើឲ្យរបបយោធាបង្ក្រាបដោយហិង្សា ដោយកន្លងមក បានសម្លាប់មនុស្សប្រមាណ ១.៤០០ នាក់។ នេះបើតាមការលើកឡើងរបស់ក្រុមអ្នកតាមដានមួយនៅក្នុងប្រទេសមីយ៉ាន់ម៉ា។
សហរដ្ឋអាមេរិក បានឆ្លើយតបដោយដាក់ទណ្ឌកម្មលើយោធាមីយ៉ាន់ម៉ា និងលើក្រុមហ៊ុនជំនួញដែលពាក់ព័ន្ធនឹងរបបយោធា ដែលក្នុងនោះ មានទាំងសហគ្រាស Myanma Timber Enterprise ដែលជាក្រុមហ៊ុនគ្រប់គ្រងការលក់ក្ដារបន្ទះនៅទូទាំងប្រទេសមីយ៉ាន់ម៉ាផងដែរ។
ឈើម៉ៃសាក់ គឺជាប្រភេទឈើនៅក្នុងប្រទេសមីយ៉ាន់ម៉ាដែលមានការពេញនិយមបំផុតមួយ ដោយគេនិយមយកវាទៅធ្វើនាវា និងគ្រឿងសង្ហារឹមផ្សេងៗ ដោយសារតែវាមានភាពធន់នឹងទឹក។
ការនាំចូលឈើម៉ៃសាក់ទៅក្នុងសហរដ្ឋអាមេរិកតម្រូវឲ្យមានការហាមឃាត់ ក្រោមទណ្ឌកម្មរបស់សហរដ្ឋអាមេរិក ប៉ុន្តែអង្គការសកម្មជន Justice for Myanmar បានរកឃើញថា ឈើម៉ៃសាក់ប្រមាណជិត ១.៦០០ តោន ត្រូវបានដឹកទៅដល់ក្រុមហ៊ុនអាមេរិកនៅចន្លោះខែកុម្ភៈ និងចុងខែវិច្ឆិកា ឆ្នាំមុន។
អង្គការនេះ បានអំពាវនាវឲ្យរដ្ឋាភិបាលអាមេរិកដាក់បម្រាមដល់ការនាំចេញឈើគ្រប់ប្រភេទទាំងអស់ពីមីយ៉ាន់ម៉ាចូលទៅសហរដ្ឋអាមេរិក៕
