ជាថ្មីម្តងទៀត មេដឹកនាំយោធាមីយ៉ាន់ម៉ា កំពុងព្យាយាមប្តូរឯកអគ្គរដ្ឋទូតប្រចាំនៅអង្គការសហប្រជាជាតិដែលប្រឆាំងរដ្ឋប្រហារកាលពីថ្ងៃទី១ ខែកុម្ភៈ ដែលបណ្តេញមេដឹកនាំស៊ីវិល គឺលោកស្រី អង់សាន ស៊ូជី និងដណ្តើមកាន់កាប់រដ្ឋាភិបាល។
លិខិតរបស់លោក Wunna Maung Lwin រដ្ឋមន្រ្តីការបរទេសរបបយោធានេះ ផ្ញើឱ្យអគ្គលេខាធិការអ.ស.ប.គឺលោក Antonio Guterres ហើយដែលទីភ្នាក់ងារព័ត៌មាន AP ទទួលបានកាលពីថ្ងៃអង្គារ សរសេរថា លោកបានតែងតាំងលោក Aung Thureinទាហានជើងចាស់ធ្វើជាឯកអគ្គរដ្ឋទូតមីយ៉ាន់ម៉ានៅអ.ស.ប.។ លោក Lwin ថា លោក Kyaw Moe Tun ឯកអគ្គរដ្ឋទូតមីយ៉ាន់ម៉ាបច្ចុប្បន្ន ត្រូវបានបញ្ចប់តួនាទីនៅថ្ងៃទី២៧ ខែកុម្ភៈ ឆ្នាំ២០២១ ដោយសារការរំលោភលើកាតព្វកិច្ចនិងអាណត្តិ។
នៅក្នុងសុន្ទរកថាយ៉ាងក្លាហានទៅកាន់កិច្ចប្រជុំមហាសន្និបាតស្តីពីនៅប្រទេសមីយ៉ាន់ម៉ានៅថ្ងៃទី ២៦ ខែកុម្ភៈ គឺប៉ុន្មានសប្តាហ៍បន្ទាប់ពីយោធាដណ្តើមអំណាច លោក Tun បានអំពាវនាវឱ្យ«សហគមន៍អន្តរជាតិធ្វើសកម្មភាពខ្លាំងបំផុតដែលអាចធ្វើទៅបាន» ដើម្បីស្តារប្រជាធិបតេយ្យឡើងវិញនៅក្នុងប្រទេសរបស់លោក។ លោក ក៏បានជំរុញឱ្យប្រទេសទាំងអស់ថ្កោលទោសយ៉ាងខ្លាំងចំពោះរដ្ឋប្រហារមិនទទួលស្គាល់របបយោធា និងស្នើមេដឹកនាំយោធាឱ្យគោរពការបោះឆ្នោតនៅខែវិច្ឆិកាឆ្នាំ២០២០ ដែលគណបក្សសម្ព័ន្ធដើម្បីប្រជាធិបតេយ្យរបស់លោកស្រី ស៊ូជី ឈ្នះ។
លោកថា «យើងនឹងបន្តតស៊ូដើម្បីរដ្ឋាភិបាលរបស់ប្រជាជន ដែលជ្រើសរើសដោយប្រជាជន ដើម្បីប្រជាជន»។
លោក Tun បាននិយាយនៅក្នុងសុន្ទរកថាដែលមានការទះដៃអបអរសាទរយ៉ាងខ្លាំងពីអ្នកការទូតនៅក្នុងអង្គប្រជុំដែលនិយាយ ជាសុន្ទរកថាមានឥទ្ធិពល អង់អាច និងក្លាហាន។
ការព្យាយាមលើកមុនរបស់របបយោធាដើម្បីដកលោក Tun បានបរាជ័យ ហើយមិនមានរបាយការណ៍ស្តីពីការធ្វើតាមលិខិតរបស់រដ្ឋមន្ត្រីការបរទេសចុះថ្ងៃទី១២ ខែឧសភានោះទេ។
មហាសន្និបាតដែលមានសមាជិក១៩៣រូបទទួលបន្ទុក សម្រេចអំពីសារតាំងអ្នកការទូត។ សំណូមពរសម្រាប់ការទទួលស្គាល់ជាផ្លូវការជាដំបូងត្រូវតែបញ្ជូនទៅគណៈកម្មាធិការសារតាំងដែលមានសមាជិក៩រូបដែលឆ្នាំនេះ មានប្រទេសកាមេរូន ចិន អ៊ីស្លង់ ប៉ាពូអាស៊ីនូវែលហ្គីណេ រុស្ស៊ី ទ្រីនីដាដ និងតូបាហ្គោ តង់សានី សហរដ្ឋអាមេរិកនិងអ៊ុយរូហ្គាយ។
អ្នកនាំពាក្យរងរបស់អ.ស.ប.លោក Farhan Haq បាននិយាយថា បើតាមលោកយល់ថា គ្មានការប្រជុំរបស់គណៈកម្មាធិការសារតាំង។ កាលពីខែមិថុនា អ.ស.ប. បាននិយាយថា លោកអគ្គលេខាធិការអ.ស.ប. បានបង្ហាញថា លទ្ធផលនៃការបោះឆ្នោតខែវិច្ឆិកាដែលផ្តល់អាណត្តិទី ២ យ៉ាងរឹងមាំដល់គណបក្សរបស់លោកស្រី ស៊ូជី ត្រូវតែត្រូវបានគោរព៕
