ប៉ូលិសក្នុងប្រទេសមីយ៉ាន់ម៉ាបានបង្ក្រាបក្រុមបាតុករដែលតវ៉ាប្រឆាំងទៅនឹងការធ្វើរដ្ឋប្រហាររបស់យោធានៅក្នុងទីក្រុងណៃពិដោ នៅថ្ងៃអង្គារ ដោយពួកគេបានព្រមានបាញ់គ្រាប់កាំភ្លើងជ័រ និងបានប្រើកាំភ្លើងបាញ់ទឹក បាញ់ទៅលើក្រុមអ្នកបាតុករទាំងនោះ ដែលបានធ្វើឲ្យបាតុកររបួសធ្ងន់យ៉ាងតិចណាស់ចំនួន ២ នាក់ នៅក្នុងអ្វីដែលគេជឿថាជាស្នាមរបួស ដោយសារគ្រាប់កាំភ្លើងពិត។
ក្រុមបាតុករបានជួបជុំគ្នាធ្វើបាតុកម្មនៅតាមដងផ្លូវក្នុងរដ្ឋធានីរ៉ង់ហ្គូន ប្រទេសមីយ៉ាន់ម៉ា អស់រយៈពេល ៤ ថ្ងៃជាប់គ្នាមកហើយ ដោយមិនអនុវត្តតាមគោលការណ៍រឹតបន្តឹងរបស់របបយោធា ដែលមានបំណងបញ្ឈប់នូវបាតុកម្មមហាជន ដែលប្រឆាំងតវ៉ាចំពោះការទម្លាក់រដ្ឋាភិបាលស៊ីវិល ដែលជាប់ឆ្នោតរបស់ប្រទេសមីយ៉ាន់ម៉ានោះ។
គ្រូពេទ្យព្យាបាលម្នាក់ដែលសុំមិនបញ្ចេញឈ្មោះ ដែលបានព្យាបាលក្រុមបាតុករប្រឆាំងតវ៉ាក្នុងទីក្រុងណៃពិដោនោះ បានប្រាប់វីអូអេភូមាថា យ៉ាងហោចណាស់មានបាតុករ ២ នាក់បានរងបួសធ្ងន់ ហើយលោកជឿជាក់ថា អ្នកទាំង ២ នាក់នោះ មានរបួសដោយត្រូវនឹងគ្រាប់កាំភ្លើងពិត ដែលម្នាក់រងរបួសដោយការបាញ់ចំក្បាល និងម្នាក់ទៀតត្រូវចំទ្រូង។
បាតុករម្នាក់ក្នុងចំណោមនោះឈ្មោះ Myat Thwe Khine ត្រូវបានគ្រូពេទ្យដាក់បំពង់ជំនួយដកដង្ហើម ហើយកំពុងស្ថិតក្នុងស្ថានភាពមិនទាន់ដឹងខ្លួននៅឡើយ បន្ទាប់ពីត្រូវគ្រាប់កាំភ្លើងចំក្បាលមក។បើតាមការបញ្ជាក់របស់គ្រូពេទ្យដែលបានថតស្គែនមើលក្បាលរបស់នាង បានឲ្យដឹងថា ក្បាលគ្រាប់កាំភ្លើងកំពុងនៅជាប់ក្នុងក្បាលរបស់នាងនៅឡើយ។
ចំណែកបាតុករម្នាក់ទៀតឈ្មោះ Soe Wai មានអាយុ ២៣ ឆ្នាំនោះ បានត្រូវគ្រាប់កាំភ្លើងចំទ្រូងរបស់គាត់។
វេជ្ជបណ្ឌិតរូបនេះមិនអាចបញ្ជាក់ថា តើមានក្រុមបាតុករប៉ុន្មាននាក់ ដែលត្រូវរងរបួសដោយសារគ្រាប់កាំភ្លើង ឬបំពង់បាញ់ទឹកនោះទេ ប៉ុន្តែវេជ្ជបណ្ឌិតរូបនេះបញ្ជាក់ថា ភាគច្រើននៃក្រុមបាតុករទាំង ២០ នាក់ដែលទទួលការព្យាបាលនៅក្នុងមន្ទីរពេទ្យរបស់លោក មិនបានរងរបួសដោយសារគ្រាប់កាំភ្លើងជ័រនោះទេ។
ការប្រឆាំងតវ៉ារបស់ពលរដ្ឋមីយ៉ាន់ម៉ាក្នុងទីក្រុងណៃពិដោបានកើតមានឡើងតែក្នុងរយៈពេលប៉ុន្មានម៉ោងប៉ុណ្ណោះ បន្ទាប់ពីក្រុមយោធាបានប្រកាសដាក់បំរាមគោចរចាប់ពីម៉ោង ៨ យប់រហូតដល់ម៉ោង ៤ ភ្លឺក្នុងទីក្រុងរ៉ង់ហ្គូន និងទីក្រុង Mandalay។ របបយោធាមីយ៉ាន់ម៉ានេះ ក៏បានហាមប្រាមដល់ការជួបជុំគ្នាលើសពី ៤ នាក់ឡើងទៅនៅទូទាំងប្រទេសមីយ៉ាន់ម៉ាផងដែរ។
នៅក្នុងសេចក្ដីថ្លែងការណ៍មួយ អង្គការសហប្រជាជាតិបានសម្ដែង «ការព្រួយបារម្ភយ៉ាងខ្លាំងក្លា»ចំពោះការបង្ក្រាបបាតុកម្មនេះ។
លោក Ola Almgren អ្នកសម្របសម្រួលរបស់អង្គការសហប្រជាជាតិប្រចាំប្រទេសមីយ៉ាន់ម៉ា បានថ្លែងក្នុងសេចក្ដីថ្លែងការណ៍មួយថា៖ «ខ្ញុំអំពាវនាវឲ្យកងកម្លាំងសន្ដិសុខគោរពសិទ្ធិមនុស្ស និងសេរីភាពមូលដ្ឋាន ដោយរួមបញ្ចូលទាំងសិទ្ធិក្នុងការប្រមូលផ្ដុំគ្នាដោយសន្ដិវិធី និងសេរីភាពក្នុងការបញ្ចេញមតិផងដែរ»។
លោកបានថ្លែងទៀតថា៖ «ការប្រើប្រាស់កម្លាំងហួសហេតុទៅលើក្រុមបាតុករ គឺជារឿងដែលមិនអាចទទួលយកបានទេ»។
លោក Almgren បានអំពាវនាវឲ្យបណ្ដាមេដឹកនាំយោធាគោរពឆន្ទៈរបស់ពលរដ្ឋមីយ៉ាន់ម៉ា អនុវត្តទៅតាមវិធានប្រជាធិបតេយ្យ និងដោះស្រាយនូវភាពខ្វែងគំនិតគ្នា តាមរយៈការចរចាដោយសន្ដិវិធី៕
