បទបញ្ជាដែលទើបតែត្រូវបានចុះហត្ថលេខានាពេលថ្មីៗនេះនឹងរារាំងទិដ្ឋាការទាំងនោះដល់ដំណាច់ឆ្នាំ២០២០។ ទិដ្ឋាការទាំងនោះរួមមានទិដ្ឋាការសម្រាប់មកធ្វើការជា មេដោះ វិស្វករ និងអ្នកវិទ្យាសាស្ត្រ ដែលមកធ្វើការនៅអាមេរិកក្នុងរយៈពេលមានកំណត់។
តើប៉ះពាល់លើអ្នកណាខ្លះ?
បទបញ្ជានេះប៉ះពាល់លើទិដ្ឋាការ H1B សម្រាប់អ្នកធ្វើការជំនាញជាន់ខ្ពស់ដែលភាគច្រើនស្ថិតក្នុងឧស្សាហកម្មបច្ចេកវិទ្យារបស់អាមេរិក ទិដ្ឋាការប្រភេទ L ដែលជាញឹកញាប់ត្រូវបានប្រើប្រាស់ដោយពាណិជ្ជកម្មនានាដើម្បីបញ្ជូនជនបរទេសមកធ្វើការក្នុងក្រុមហ៊ុនណាមួយ ទិដ្ឋាការ J1 សម្រាប់ឲ្យជនបរទេសមកផ្លាស់ប្តូរការសិក្សា ការងារនិងវប្បធម៌ និងទិដ្ឋាការ H2B សម្រាប់អ្នកធ្វើការបណ្តោះអាសន្នក្នុងឧស្សាហកម្មនានាដែលមិនស្ថិតក្នុងវិស័យកសិកម្ម។
ប្រពន្ធកូនក្រោមអាយុ១៨ឆ្នាំរបស់អ្នកសុំទិដ្ឋាការក៏នឹងត្រូវប៉ះពាល់ផងដែរ។ ពួកគេជារឿយៗទទួលបានទិដ្ឋាការដែលអាចឲ្យធ្វើការងារតិចតួចផងដែរ។
អ្នកណាខ្លះដែលមិនប៉ះពាល់?
បទបញ្ជានេះមិនប៉ះពាល់អ្នកដែលមានទិដ្ឋាការដែលមានសុពលភាពឬប័ណ្ណដែលហៅថា green card សម្រាប់អ្នកមានសិទ្ធិរស់នៅក្នុងអាមេរិកជាអចិន្ត្រៃយ៍ស្រាប់ទៅហើយនោះទេ មិនថាអ្នកទាំងនោះនៅក្នុងឬក្រៅអាមេរិកក្នុងពេលនេះ ហើយក៏មិនប៉ះពាល់អ្នកដែលបានដាក់ពាក្យសុំ green card ឬទិដ្ឋាការបណ្តោះអាសន្ន នៅក្នុងសហរដ្ឋអាមេរិកនោះទេ។
អ្នកដទៃទៀតដែលត្រូវបានលើកលែងឲ្យក្រោមបទបញ្ជានេះរួមមានប្តីឬប្រពន្ធ ឬកូនរបស់ពលរដ្ឋដែលមានសញ្ជាតិអាមេរិកាំង អ្នកដែលផ្តល់សេវាកម្មដែលត្រូវបានចាត់ទុកថាមានសារៈសំខាន់សម្រាប់ផ្នែកផ្គត់ផ្គង់ម្ហូបអាហាររបស់អាមេរិក ឬអ្នកដែលមានប្រយោជន៍ចំពោះសហរដ្ឋអាមេរិក តាមការសម្រេចរបស់ក្រសួងការបរទេសអាមេរិកឬក្រសួងសន្តិសុខមាតុភូមិ។
តើជាបទបញ្ជានេះធ្វើឡើងក្នុងគោលបំណងអ្វី?
លោកប្រធានាធិបតី ត្រាំ បានថ្លែងថា បទបញ្ជានេះមានគោលបំណងដើម្បីការពារការងារសម្រាប់ពលរដ្ឋអាមេរិកាំងក្នុងគ្រាដែលអត្រាអ្នកអត់ការងារធ្វើខ្ពស់ ក្នុងអំឡុងពេលមានជំងឺរាតត្បាតកូវីដ១៩។
បទបញ្ជានេះធ្វើឡើង២ខែបន្ទាប់ពីលោកប្រធានាធិបតីបានប្រកាសពីការព្យួរ green card ដែលផ្តល់សិទ្ធិរស់នៅស្របច្បាប់ជាអចិន្ត្រៃយ៍ ដោយប្រកែកពីជំហានដែលត្រូវការដើម្បីលើកកម្ពស់ការស្តារសេដ្ឋកិច្ចអាមេរិកឡើងវិញ។
តើអ្នកណាខ្លះស្វាគមន៍ការប្រកាសបទបញ្ជានេះ?
ខណៈដែលប្រតិកម្មភាគច្រើននៅរដ្ឋសភាមានភាពអវិជ្ជមាន លោក Ted Cruz សមាជិកព្រឹទ្ធសភាខាងគណបក្សសាធារណរដ្ឋប្រចាំរដ្ឋតិចសាសបានហៅបទបញ្ជានេះថាមាន «សារៈសំខាន់» ហើយបាននិយាយក្នុងសេចក្តីថ្លែងការណ៍មួយថា៖«យើងត្រូវតែផ្តោតលើការការពារជីវិតពលរដ្ឋអាមេរិកាំងនិងរក្សាការងារសម្រាប់ពួកគេ។ មូលហេតុនេះហើយបានជាខ្ញុំអំពាវនាវឲ្យប្រធានាធិបតីអាមេរិកបន្តផ្អាកការផ្តល់សិទ្ធិស្របច្បាប់ដល់ជនអន្តោប្រវេសន៍ក្នុងអំឡុងពេលមានវិបត្តិនេះ»។
ក្រុម NumbersUSA ដែលគាំទ្រគោលនយោបាយដាក់កំហិតទៅលើការធ្វើអន្តោប្រវេសន៍នេះ បានហៅការសម្រេចចិត្តនេះថា«មិនធ្លាប់មានពីមុនមក» ហើយបានថ្លែងថា ខ្លួន«អបអរសាទរ» ចំពោះការសម្រេចចិត្តរបស់លោកប្រធានាធិបតីក្នុងការផ្អាកការអនុញ្ញាតឲ្យជនអន្តោប្រវេសន៍និងជនបរទេសដែលចង់មកធ្វើការនៅអាមេរិកក្នុងការចូលមកក្នុងសហរដ្ឋអាមេរិក។
ក្រុម NumbersUSA បានលើកឡើងក្នុងសេចក្តីថ្លែងការណ៍មួយថា៖ «សម្រាប់ពលរដ្ឋអាមេរិកាំងជាង៤៥លាននាក់ដែលបានបាត់បង់ការងារធ្វើក្នុងអំឡុងពេលមានជំងឺរាតត្បាតនេះ បទបញ្ជាប្រធានាធិបតីតំណាងឲ្យឱកាសដ៏ពិតប្រាកដមួយដើម្បីបង្កើនការងារសម្រាប់ពលរដ្ឋអាមេរិកាំងដែលទទួលបានប្រាក់កម្រៃមួយដែលអាចទ្រទ្រង់ជីវភាពរស់នៅបាន»។ ចំណុចសំខាន់មួយទៀត វាក៏តំណាងឲ្យឱកាសមួយសម្រាប់និយោជកអាមេរិកាំងពង្រីកកិច្ចខិតខំប្រឹងប្រែងរបស់ខ្លួននៅក្នុងសហគមន៍មួយដែលមិនទទួលបានការគាំទ្រគ្រប់គ្រាន់ជាប្រវត្តិសាស្ត្រ ហើយជាការបង្ហាញថា ពលរដ្ឋអាមេរិកាំងនឹងធ្វើការងារទាំងនោះ»។
អ្នកណាខ្លះដែលប្រឆាំងនឹងបទបញ្ជានេះ?
បទបញ្ជាដែលដាក់កំហិតទៅលើការធ្វើអន្តោប្រវេសន៍នោះបង្កឲ្យមានទស្សនៈផ្ទុយគ្នារវាងគណបក្សទាំងពីរទាំងនៅក្នុងរដ្ឋសភានិងព្រឹទ្ធសភា។ លោក Lindsey Graham សមាជិកព្រឹទ្ធសភាខាងគណបក្សសាធារណរដ្ឋប្រចាំរដ្ឋ South Carolina ដែលជាធម្មតាថ្លែងការពារលោក ត្រាំ បានបង្ហោះសារលើបណ្តាញ Twitter ថា៖«ជនអន្តោប្រវេសន៍ស្របច្បាប់ផ្តល់ផលវិជ្ជមានសម្រាប់សេដ្ឋកិច្ចអាមេរិក» ហើយបទបញ្ជានេះ«នឹងធ្វើឲ្យមានផលប៉ះពាល់ទៅលើការស្តារសេដ្ឋកិច្ចរបស់យើងឡើងវិញ»។
នៅក្នុងសេចក្តីថ្លែងការណ៍មួយជាមួយនឹងសមាជិករដ្ឋសភាម្នាក់ លោក Jerrold Nadler សមាជិករដ្ឋសភាខាងគណបក្សប្រជាធិបតេយ្យប្រចាំរដ្ឋ New York និងជាប្រធានគណៈកម្មាធិការទទួលបន្ទុកកិច្ចការតុលាការនៅរដ្ឋសភាបានចោទប្រកាន់លោកប្រធានាធិបតី ត្រាំ ថា ប៉ុនប៉ង «បង្វែរចំណាប់អារម្មណ៍សាធារណៈជនអាមេរិកាំងពីបរាជ័យដ៏គួរឲ្យអាម៉ាស់របស់លោកក្នុងការប្រយុទ្ធប្រឆាំងនឹងជំងឺកូវីដ១៩»។
ក្រុមអង្គការសិទ្ធិជនអន្តោប្រវេសន៍និងក្រុមអ្នកតស៊ូមតិ ក៏បានបញ្ចេញសំឡេងតវ៉ាយ៉ាងខ្លាំងផងដែរ៕
ប្រែសម្រួលដោយ ស្រេង លក្ខិណា
