ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ការ​ឆ្លង​មេរោគ​កូរ៉ូណា​ថ្មី​នៅ​ក្នុង​សហរដ្ឋ​អាមេរិក ជិត​ឡើង​ដល់​កម្រិត​ខ្ពស់​បំផុត


ក្រុម​អ្នក​ជិះ​ពង​ខ្យល់​ត្រៀម​ចេញ​ដំណើរ​នៅ​ទន្លេ Comal កាល​ពី​ថ្ងៃ​ទី ២៥ មិថុនា ២០២០ បើ​ទោះ​បី​ជា​មាន​ការ​ហក់​ឡើង​នៃ​ការ​ឆ្លង​ជំងឺ​កូវីដ១៩ នៅ​រដ្ឋ​តិចសាស សហរដ្ឋ​អាមេរិក។

ចំនួន​ឆ្លង​មេរោគ​កូរ៉ូណាថ្មី​ក្នុង​រយៈ​ពេល​មួយ​ថ្ងៃ​នៅ​ក្នុង​សហរដ្ឋ​អាមេរិក​ ឡើង​ជិត​ទៅ​ដល់​កម្រិត​ខ្ពស់​មួយ​នៅ​ពេល​ដែល​រដ្ឋាភិបាល ​បាន​ប្រាប់​ឲ្យ​ដឹង​ថា​ មនុស្ស​ជិត​២០​លាន​នាក់​នៅ​ក្នុង​ប្រទេស​នេះ​អាច​បាន​ឆ្លង​វីរុស​នេះ។

រដ្ឋ​នានា​នៅ​ក្នុង​សហរដ្ឋ​អាមេរិក​ បាន​រាយការណ៍​ពី​ការ​ឆ្លង​ថ្មី​ចំនួន​៣៩.៣២៧​ករណី​កាល​ពី​ថ្ងៃព្រហស្បតិ៍។ នេះ​បើ​តាម​សេចក្តី​រាយការណ៍​របស់​កាសែត The Washington Post។ ចំនួន​នេះ​ជា​ចំនួន​ដ៏​ខ្ពស់​បំផុត​ក្នុង​រយៈ​ពេល​មួយ​ថ្ងៃ​ចាប់​តាំង​ពី​ការ​ផ្ទុះ​បាន​ចាប់​ផ្តើម​កាល​ពី​ខែ​ធ្នូ​ឆ្នាំ​ទៅ​មក។

សាក​លវិទ្យាល័យ ​Johns Hopkins ​របស់​សហរដ្ឋ​អាមេរិក​ បាន​កត់​ត្រា​ចំនួន​៣៤.៣០០​ករណី​កាល​ពី​ថ្ងៃ​ពុធ​ ដែល​ជិត​ដល់ចំនួន​៣៦.០០០ពាន់​ករណី​ដែល​ជា​ចំនួន​ឆ្លង​ឡើង​ខ្ពស់​បំផុត​កាល​ពី​ថ្ងៃ​ទី​២៤ ខែ​មេសា។​

លោក ​Ashish Jha នាយក​វិទ្យាស្ថាន​សុខភាព​សាកល​នៃ​សាកល​វិទ្យាល័យ Harvard បាន​និយាយ​នៅ​ក្នុង​កិច្ច​សម្ភាសន៍​កាល​ពី​ថ្ងៃ​ព្រហស្បតិ៍​ជាមួយ​បណ្តាញ​ទូរទស្សន៍ NBC ក្នុង​កម្មវិធី​ «ថ្ងៃនេះ» ​ថា ការ​កើន​ឡើង​កាល​ពី​ពេល​ថ្មីៗ​នេះ​ក្នុង​សហរដ្ឋ​អាមេរិក​ បណ្តាល​មក​ពី​ការ​បើក​សេដ្ឋ​កិច្ច​ក្នុង​ប្រទេស​ឡើង​វិញ​ ខណៈ​ដែល​ខ្វះ​ទម្រង់​ការ​សុវត្ថិភាព​ត្រឹម​ត្រូវ។

ក្នុង​ខណៈ​នោះ​ដែរ មជ្ឈមណ្ឌល​សម្រាប់​ការ​ត្រួត​ត្រា​និង​រារាំង​ជំងឺ​របស់​សហរដ្ឋ​ អាមេរិក បាន​ប្រាប់​ឲ្យ​ដឹង​កាល​ពី​ថ្ងៃ​ព្រហស្បតិ៍​ថា ចំនួន​ករណី​មេរោគ​កូរ៉ូណា​ អាច​មាន​ចំនួន​១០​ដង​ច្រើន​ជាង​ចំនួន​ដែល​ត្រូវ​បាន​រាយការណ៍។

ការ​កត់​ត្រា​ដោយ​សាកលវិទ្យាល័យ Johns Hopkins បាន​ដាក់​ចំនួន​ករណី​ឆ្លង​២,៥​សែន​ករណី។

ក៏ប៉ុន្តែ មជ្ឈមណ្ឌល​សម្រាប់​ការ​ត្រួត​ត្រា​និង​រារាំង​ជំងឺ​របស់​សហរដ្ឋ​អាមេរិក​ (CDC) បាន​ប្រាប់​ឲ្យ​ដឹង​ថា ចំនួន​ឆ្លង​ពិត​ប្រាកដ​ប្រហែល​២០​លានករណី។

ពួកមន្រ្តី​បាន​ជឿ​ជា​យូរ​យា​ណាស់​មក​ហើយ​ថា​ ចំនួន​ពិត​ប្រាកដ​មិន​បាន​ត្រូវ​គេ​រាយការណ៍​ទេ។ មជ្ឈមណ្ឌល​ CDC ប្រាប់​ឲ្យ​ដឹង​ថា​ ខ្លួន​ផ្អែក​លើ​ការ​ប៉ាន់​ស្មាន​ថ្មី​បន្ទាប់​ពី​ការ​សិក្សា​សំណាក​ឈាម​មក​ពី​ទូទាំង​ប្រទេស៕

អត្ថបទ​ទាក់ទង

XS
SM
MD
LG