ភ្ជាប់​ទៅ​គេហទំព័រ​ទាក់ទង

លោក​ Kerry អះអាង​ធានា​អំពី​សមាជិកភាព​​អង្គការ​អូតង់​ក្រោយ​ការ​ចាក​ចេញ​របស់​អង់គ្លេស​ពី​ EU


លោក​ John Kerry​ ថ្លែង​ក្នុង​សន្និសីទ​សារព័ត៌មាន​នៅ​ស្នាក់​ការ​កណ្តាល​នៃ​សហភាព​អឺរ៉ុប​ក្នុង​ទីក្រុង​ប្រ៊ុច​សែល កាល​ពី​ថ្ងៃទី២៧ ខែ​មិថុនា ខណៈ​លោក​កំពុងបំពេញ​​ទស្សនកិច្ច​រយៈ​ពេល​មួយ​ថ្ងៃដើម្បី​ជួប​ជាមួយ​សមាជិក​អង្គការ​អូតង់​និង​​មន្ត្រី​សហភាព​អឺរ៉ុប។

លោក​ John Kerry​ រដ្ឋមន្ត្រី​ការបរទេស​ស.រ.អា. បាន​មាន​ប្រសាសន៍​កាល​ពី​ថ្ងៃ​ចន្ទ​ថា​ ការបោះឆ្នោត​ចាក​ចេញ​ពី​សហភាព​អឺរ៉ុប​របស់​ប្រទេស​អង់គ្លេស​នឹង​គ្មាន​ផល​ប៉ះ​ពាល់​មិន​ល្អ​លើជំនាញ​ខាង​យោធា​និង​ខាង​នយោបាយ​របស់​អង្គការ​សន្ធិសញ្ញា​តំបន់​មហា​សមុទ្រ​អាត្លង់ទិច​ខាង​ជើង​ដែល​ហៅ​កាត់ថា​អង្គការ​អូតង់ទេ។

លោក ​Kerry ​បាន​មាន​ប្រសាសន៍​ប្រាប់​ពួក​អ្នកកាសែត​នៅ​ក្រោយ​ជំនួប​មួយ​ជាមួយ​លោក ​Jens Stoltenberg ​អគ្គលេខាធិការ​នៃ​អង្គការ​អូតង់​នៅ​ឯទីស្នាក់ការ​ធំ​នៃ​អង្គការ​នេះ​ក្រុង​ប្រ៊ុចសែល​ ប្រទេស​បែលហ្ស៊ិក​ ថា៖ «យើង​សង្ឃឹម​ទុក​ជា​មុន​ថា​ អង្គការ​អូតង់​មួយ​ដែល​ខ្លាំង​ជាង​មុន​មាន​ដំណើរការ​ទៅ​មុខទៀត»។

ប្រទេស​ជាតិ​ ២៨ ​ជា​សមាជិក​នៃ​អង្គការ​អូតង់​នឹង​ចូល​រួម​ក្នុង​សន្និសីទ​កំពូល​មួយ​ក្នុង​ក្រុង​វ៉ាសូវី​ ប្រទេស​ប៉ូឡូញ​នៅ​ថ្ងៃ​ទី​៨​និង​ទី​៩​ ខែកក្កដា​ខាង​មុខ​នេះ។ លោក Kerry ​បាន​មាន​ប្រសាសន៍​ថា៖ «យើង​មាន​សេចក្តី​សង្ឃឹម​ខ្លាំង​ថា​ អង្គការ​អូតង់​ខ្លាំង​មួយ​អាច​បំពេញ​លទ្ធផល​សំខាន់ៗ​ដែល​នឹង​គ្មាន​ការ​ប្រែប្រួល​អ្វីឡើយ​ បើ​ទោះ​ជា​មានការ​បោះឆ្នោត​របស់​ប្រទេស​អង់គ្លេស​ដើម្បី​ចាកចេញ​ពី​សហភាព​អឺរ៉ុប​ក៏​ដោយ»។

ប្រទេស​អង់គ្លេស​បាន​ធ្វើឱ្យ​ពិភពលោក​ស្រឡាំង​កាំង​កាល​ពី​ថ្ងៃ​ព្រហស្បតិ៍​មុន​នៅ​ពេល​ប្រជារាស្ត្រ​អង់គ្លេស​បាន​បោះឆ្នោត​ចាក​ចេញ​ពី​សហភាព​អឺរ៉ុប​ដែល​បាន​នាំ​ឱ្យ​មាន​ការ​លក់​ភាគហ៊ុន​ច្រើន​នៅ​ទូទាំង​ផ្សារ​ហិរញ្ញវត្ថុ​សាកលលោក។

លោក​ Stoltenberg ​បាន​មាន​ប្រសាសន៍​ថា​ ការ​បោះឆ្នោត​នេះ​បាន​ធ្វើឱ្យ​អង្គការ​អូតង់​ក្លាយ​ទៅ​ជា​អ្នក​មាន​មុខ​នាទី​សំខាន់​ជាង​មុនក្នុង​កិច្ចការ​នយោបាយ​អន្តរជាតិ​និង​កិច្ចការ​យោធា។ លោក​បាន​និយាយថា៖ «ខ្ញុំ​យល់​ឃើញ​ថា​អង្គការ​អូតង់​មាន​សារៈ​សំខាន់​ជាង​មុន​មិន​មែន​គ្រាន់​តែ​ជា​កាពី​តែន​ម្នាក់​សម្រាប់​កិច្ច​សហ​ប្រតិបត្តិការ​រវាង​អឺរ៉ុប​ និង​ផ្នែក​ខាង​ជើង​នៃ​ទ្វីប​អាមេរិក​ប៉ុណ្ណោះ​ទេ​ ក៏​ប៉ុន្តែ​ក៏​សម្រាប់​សហការ​ខាង​ការពារ​ប្រទេស​និង​ខាង​សន្តិសុខ​រវាង​ពួក​សម្ព័ន្ធ​មិត្ត​អូតង់​ក្នុង​ទ្វីប​អឺរ៉ុប​ផង​ដែរ»។

លោក​ Kerry ​កំពុង​បំពេញ​ទស្សនកិច្ច​ក្នុង​ទីក្រុង​ប្រ៊ុចសែល​ និង​ទីក្រុង​ឡុងដ៍​ ដែល​បាន​ត្រូវ​រៀប​ចំ​ឱ្យ​មាន​ឡើង​ដើម្បី​ធានាជា​ថ្មី​អំពី​សមាជិក​ភាព​របស់​សម្ព័ន្ធ​មិត្ត​របស់​ស.រ.អា.​ ដែល​ខ្វាយខ្វល់​អំពី​ការបោះឆ្នោត​ដោយ​ប្រទេស​អង់គ្លេស ដែល​ក្នុង​នោះ​មាន​ប្រទេស​២២​ជា​សមាជិក​សហភាព​អឺរ៉ុប​ និងប្រទេស​អង់គ្លេស​ផង​ដែរ៕

XS
SM
MD
LG