អង្គការអូតង់និងប្រទេសរុស្ស៊ី បានធ្វើការសន្ទនាគ្នាលើកទីមួយរបស់ពួកគេក្នុងរយៈពេលពីរឆ្នាំ។ ការជួបប្រជុំគ្នារវាងពួកឯកអគ្គរដ្ឋទូតនៃបណ្ដាប្រទេសជាសមាជិកនៃសម្ព័ន្ធភាពនេះជាមួយប្រទេសរុស្ស៊ីនៅក្នុងក្រុងប៊្រុចសែល កាលពីថ្ងៃពុធ គ្មានជោគជ័យក្នុងការធ្វើឱ្យមានកិច្ចព្រមព្រៀងណាមួយទេ។
ក៏ប៉ុន្តែពួកអ្នកធ្វើវិភាគបាននិយាយថា ការប្រជុំគ្នានេះបាននាំឱ្យមានសេចក្តីសង្ឃឹមថា ប្រទេសរុស្ស៊ីប្រហែលជាធ្វើកិច្ចខិតខំប្រឹងប្រែងថ្មីមួយដើម្បីចេញពីភាពនៅដាច់ពីគេ នៅក្រោយពេលរុស្ស៊ីបានចូលកាន់កាប់តំបន់គ្រីម៉េ និងគាំទ្រពួកឧទ្ទាមទាមទារបំបែករដ្ឋនៅក្នុងផ្នែកខាងកើតនៃប្រទេសអ៊ុយក្រែន។
ប្រទេសរុស្ស៊ីនៅតែឋិតនៅក្រោមការដាក់ទណ្ឌកម្មរបស់ស.រ.អា. និងសមាជិកឯទៀតៗនៃអង្គការអូតង់ ដែលបានអំពាវនាវដល់កងកម្លាំងរុស្ស៊ីឱ្យបញ្ឈប់សកម្មភាពរបស់ពួកគេក្នុងការធ្វើឱ្យតំបន់ខាងកើតនៃប្រទេសអ៊ុយក្រែនមានអស្ថិរភាពនិងបានតវ៉ាប្រឆាំងនឹងការកាន់កាប់តំបន់គ្រីម៉េផងដែរ។
នៅក្នុងការប្រជុំនោះ ពួកមន្ត្រីមិនបានបង្ហាញការបញ្ជាក់ថា ប្រទេសរុស្ស៊ីប្រុងប្រៀបធ្វើសម្បទានណាមួយដូចជាការបញ្ឈប់ការគាំទ្ររបស់ខ្លួនទាំងខាងបុគ្គលិក និងទាំងខាងអាវុធឱ្យដល់ពួកឧទ្ទាមទាមទារបំបែករដ្ឋក្នុងប៉ែកខាងកើតនៃប្រទេសអ៊ុយក្រែនទេ។
លោក Jens Stoltenburg អគ្គលេខាធិការនៃអង្គការអូតង់បានមានប្រសាសន៍ថា៖ «យើងមានការពិភាក្សាគ្នាដ៏ស្មោះត្រង់ និងម៉ឺងម៉ាត់» ក៏ប៉ុន្តែលោកបាននិយាយថា ការខ្វែងគំនិតគ្នារវាងរដ្ឋាភិបាលក្រុងមូស្គូ និងអង្គការអូតង់មានជានិច្ចហើយមានភាពខ្លាំងក្លាថែមទៀតផង។ លោកបានថ្លែងថានៅមាន «ការខ្វែងគំនិតគ្នាយ៉ាងខ្លាំង»៕
