ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​អ៊ីរ៉ង់​ថ្មី​សន្យា​ប្រើ​ការទូត​ដើម្បី​លុបចោល​ទណ្ឌកម្ម​អាមេរិក​


ប្រធានាធិបតី​​ថ្មី​របស់​​អ៊ីរ៉ង់​លោក​ Ebrahim Raisi​ ថ្លែង​សុន្ទរកថា​ក្រោយ​ពិធី​ស្បថ​ចូល​កាន់​តំណែង​នៅ​​សភា​ក្នុង​រដ្ឋធានី​តេហេរ៉ង់​កាល​ពី​ថ្ងៃ​ព្រហស្បតិ៍ ទី​៥ ខែ​កក្កដា ឆ្នាំ​២០២១។

ប្រធានាធិបតី​អភិរក្ស​និយម​ថ្មី​នៃ​ប្រទេស​អ៊ីរ៉ង់​លោក​ Ebrahim Raisi​ បាន​ស្បថ​ចូល​កាន់​តំណែង​ដោយ​បាន​សន្យា​អនុវត្ត​ការទូត​ដើម្បី​លុបចោល​ទណ្ឌកម្ម​របស់​សហរដ្ឋ​អាមេរិក​ដែល​បាន​ធ្វើ​ឲ្យ​មាន​ការ​ឆ្លើយតប​ដោយ​ការ​ប្រុង​ប្រយ័ត្ន​ពី​រដ្ឋាភិបាល​ក្រុង​វ៉ាស៊ីនតោន។​

លោក ​Raisi​ ដែល​កាលពី​ពេល​មុន​បាន​ធ្វើ​ជា​ប្រធាន​តុលាការ​របស់​អ៊ីរ៉ង់​បាន​ស្បថ​ចូល​កាន់​តំណែង​នៅ​ឯ​សភា​អ៊ីរ៉ង់​នៅ​ក្នុង​ពិធី​មួយ​កាលពី​ថ្ងៃ​ព្រហស្បតិ៍​គឺ​២​ថ្ងៃ​បន្ទាប់​អាណត្តិ​របស់​លោក​បាន​ចាប់​ផ្តើម​ជា​ផ្លូវការ​ដោយ​មាន​ការ​យល់​ព្រម​ពី​មេដឹកនាំ​កំពូល​លោក​ Ayatollah Ali khamenei។​

លោក​ Raisi​ ដែល​លោក​ Khemenei​ បាន​ទំនុក​បម្រុង​ជាយូរ​អង្វែង​មក​ហើយ​នោះបាន​ឈ្នះ​ភ្លូក​ទឹក​ភ្លូក​ដី​ក្នុង​ការ​បោះឆ្នោត​ប្រធានាធិបតី​កាលពី​ខែ​មិថុនា​ដោយ​មាន​អ្នក​បោះឆ្នោត​តិច។​ ក្រុម​ប្រឹក្សា​ឆ្មាំ​អ៊ីរ៉ង់​ដែល​សុទ្ធតែ​ជា​អ្នក​ស្មោះត្រង់​នឹង​លោក​ Khamenei​ ដែល​ទទួល​បន្ទុក​ពិនិត្យ​បេក្ខជន​ប្រធានាធិបតី​នោះ​បាន​ជម្រុះ​គូប្រជែង​ល្បីៗ​ភាគ​ច្រើន​របស់​លោក​ Raisi​ មិន​ឲ្យ​ឈរ​ឈ្មោះ​ដែល​ធ្វើ​ឲ្យ​សាធារណជន​ធ្លាក់​ទឹក​ចិត្ត​នៅ​ក្នុង​ការ​បោះឆ្នោត។​ សហ​រដ្ឋ​អាមេរិក​និង​ក្រុម​សកម្មជន​បក្ស​ប្រឆាំង​ច្រានចោល​ជ័យជម្នះ​របស់​លោក ​Raisi​ ដោយ​និយាយ​ថា​ការបោះឆ្នោត​នោះ​មិន​សេរី​និង​មិន​យុត្តិធម៌។​

ក្នុង​សន្ទរកថា​ទៅ​កាន់​សភា​ លោក ​Raisi​ បាន​និយាយ​ថា៖​ «ការដាក់​ទណ្ឌកម្ម​លើ​អ៊ីរ៉ង់​ត្រូវតែ​លុប​ចោល​ហើយ​យើង​នឹង​គាំទ្រ​ផែនការ​ការទូត​ដែល​សម្រេច​គោល​ដៅ​នេះ»។​

សេដ្ឋកិច្ច​របស់​អ៊ីរ៉ង់​បាន​ធ្លាក់​ចុះ​ចាប់តាំង​ពី​ឆ្នាំ​២០១៨​មក​ នៅ​ពេល​រដ្ឋបាល​លោក​ប្រធានាធិបតី​Donald Trump​ បាន​ចាប់​ផ្តើម​រឹតបន្តឹង​ទណ្ឌកម្ម​ជា​ឯកតោ​ភាគី​ប្រឆាំង​រដ្ឋាភិបាល​ក្រុង​តេហេរ៉ង់។​

អ៊ីរ៉ង់​បាន​សងសឹក​ទណ្ឌកម្ម​របស់​សហ​រដ្ឋ​អាមេរិក​ចាប់តាំង​ពី​ឆ្នាំ​២០១៩​ដោយ​ធ្វើ​នុយក្លេអ៊ែរ​លើស​ការ​កំណត់​ដោយ​កិច្ច​ព្រមព្រៀង​នុយក្លេអ៊ែរ​ឆ្នាំ​២០១៥​ជាមួយ​មហា​អំណាច​ពិភពលោក៕

XS
SM
MD
LG