អស់រយៈពេលជាង១០០ឆ្នាំមកហើយដែលទិវានារីអន្តរជាតិ បានត្រូវគេប្រារព្ធដើម្បីរំឭកដល់សមិទ្ធិផលនានារបស់ស្ត្រីទូទាំងសាកលលោក។
ក៏ប៉ុន្តែនៅឆ្នាំនេះ ដោយសារតែការបាត់បង់ការងារជាច្រើន និងការកើនឡើងនូវបន្ទុកនៃការថែទាំនៅឯផ្ទះ ស្ត្រីបានជួបបញ្ហាខាងសេដ្ឋកិច្ចអាក្រក់ជាងបុរស។
តាមទិន្នន័យពីអង្គការពលកម្មអន្តរជាតិ (ILO) របស់អង្គការសហប្រជាជាតិបង្ហាញថា ស្ត្រីទូទាំងសាកលលោក បានបាត់បង់ការងារដោយសារការរាតត្បាតដោយជំងឺកូវីដ១៩ ច្រើនជាងបុរស។ ស្ត្រីប្រហែល ៥% បានបាត់បង់ការងារនៅឆ្នាំ២០២០ ដោយសារការបាត់បង់ការងារ ឬត្រូវគេកាត់បន្ថយម៉ោងធ្វើការបើប្រៀបធៀបនឹងបុរសដែលមានតែ ៣,៩%។
ក្នុងអំឡុងពេលនៃការរាតត្បាតនេះ អង្គការសហប្រជាជាតិ បានលាតត្រដាងពីភាពខុសគ្នារវាងការរងផលប៉ះពាល់របស់ស្ត្រីដោយសារវិបត្តិនេះ បើប្រៀបធៀបជាមួយបុរស។
បើតាមអង្គការស្ត្រីនៃអង្គការសហប្រជាជាតិ (UN Women) ៥៨% នៃស្ត្រីដែលធ្វើការនៅទូទាំងសាកលលោក គឺធ្វើ«ក្នុងការងារក្រៅផ្លូវការ»ឬការងារដែលមិនមានច្បាប់គ្រប់គ្រង ហើយជារឿយៗមិនមានពន្ធដារ ឬការទទួលបានអត្ថប្រយោជន៍ផ្សេងៗ។ ស្ត្រីកាន់តែច្រើនឡើងទំនងធ្វើការងារនៅក្នុងវិស័យដែលរងការប៉ះពាល់ខ្លាំងជាងគេដោយការរាតត្បាតជំងឺ ដូចជាវិស័យទេសចរណ៍ និងបដិសណ្ឋារកិច្ចនិងការថែទាំកូនក្មេង៕
