អ្នកនាំពាក្យក្រសួងមហាផ្ទៃចាត់ទុកការលើកឡើងថា លោក ស ខេង អតីតរដ្ឋមន្រ្តីក្រសួងមហាផ្ទៃ«ផ្ទេរអំណាច»ទៅកូនប្រុស ជាការមិនយល់អំពីច្បាប់កម្ពុជា។ នេះបើយោងតាមសេចក្តីប្រកាសព័ត៌មានមួយរបស់អ្នកនាំពាក្យក្រសួងមហាផ្ទៃចេញផ្សាយកាលពីថ្ងៃទី២៧ ខែសីហា ឆ្នាំ២០២៣ ដែលវីអូអេទទួលបាន។
អ្នកនាំពាក្យក្រសួងមហាផ្ទៃបានឆ្លើយតបបែបនេះទៅនឹងអត្ថបទដែលបង្ហោះនៅលើគេហទំព័រវិទ្យុអាស៊ីសេរី ដែលចុះផ្សាយក្រោមចំណងជើងថា «អ្នកឃ្លាំមើលរិះគន់ការតែងតាំងកូនចៅ និងសាច់ញាតិលោក ស ខេងស្អេកស្កះក្នុងក្រសួងមហាផ្ទៃ»។
អ្នកនាំពាក្យក្រសួងមហាផ្ទៃចាត់ទុកករណីផ្សាយថា លោក ស ខេង «ផ្ទេរអំណាចឱ្យកូនប្រុស» គឺជាការផ្សាយដែលមិនយល់ពីរដ្ឋធម្មនុញ្ញ ច្បាប់ និងគោលការណ៍របស់គណបក្សនយោបាយនានាជុំវិញការរៀបចំ និងតែងតាំងសមាសភាពរាជរដ្ឋាភិបាល។
អ្នកនាំពាក្យក្រសួងមហាផ្ទៃបន្ថែមថា ការតែងតាំងនេះជាការ«ផ្គូផ្គង»របស់លោក ហ៊ុន ម៉ាណែត ដែលជានាយករដ្ឋមន្រ្តីថ្មី ជាការផ្តល់សេចក្តីទុកចិត្តដោយរដ្ឋសភាដែលកើតចេញពីការបោះឆ្នោត និងជាការគោរពតាមព្រះរាជក្រឹត្យតែងតាំងរបស់ព្រះមហាក្សត្រ។
នៅក្នុងការតែងតាំងមួយទៀត អ្នកនាំពាក្យក្រសួងមហាផ្ទៃបញ្ជាក់ថា ការលើកឡើងថា លោក ស ខេង តែងតាំងលោក ស រដ្ឋា កូនប្រុសពៅរបស់លោកជាអគ្គស្នងការរងនៃអគ្គស្នងការដ្ឋាននគរបាលជាតិ គឺ«កាន់តែខុសធ្ងន់ទៅទៀត» ដោយថា នេះជាការផ្ទេរពីអង្គភាពមួយទៅអង្គភាពមួយចំណុះក្រសួងមហាផ្ទៃតែប៉ុណ្ណោះ។
ក្រសួងមហាផ្ទៃបញ្ជាក់ថា លោក ស រដ្ឋា បានបម្រើការងារជានគរបាលជាតិក្នុងក្របខណ្ឌក្រសួងមហាផ្ទៃរយៈពេល១៨ឆ្នាំមកហើយ ហើយចុងក្រោយនេះលោកជាអគ្គនាយករងនៃអគ្គនាយកដ្ឋានអន្តោប្រវេសន៍។
ក្រសួងបញ្ជាក់ថា ការចុះផ្សាយថា លោក ស ខេង តែងតាំងកូនចៅសាច់ញាតិស្អេកស្កះក្នុងក្រសួងមហាផ្ទៃ បែបគ្រួសារនិយម គឺជា«ការផ្សាយដែលពុំបានស្វែងយល់ពីគោលការណ៍តែងតាំងមន្រ្តីរាជការ ផ្ទុយពីភាពប្រាកដនិយម និងមានចេតនាមួលបង្កាច់ ធ្វើឱ្យមតិសាធារណជនយល់ច្រឡំមកលើភាពស្អាតស្អំរបស់សម្តេចក្រឡាហោម ស ខេង»។
សេចក្តីប្រកាសរបស់ក្រសួងមហាផ្ទៃបញ្ជាក់ថា៖ «ផ្ទុយមកវិញ មានមហាជនជាសាក្សី សម្តេចក្រឡាហោម ស ខេង ពុំមែនជាបុគ្គលសួនតួនិយម គិតតែអំពីគ្រួសារនិយម ផលប្រយោជន៍ឯកជន ដូចការផ្សព្វផ្សាយនោះឡើយ ពោលគឺសម្តេចក្រឡាហោម ស ខេង ពុំមែនជាបុគ្គលដែលគិតតែពីផលប្រយោជន៍ផ្ទាល់ខ្លួននោះទេ គឺលោកតែងតែតម្កល់សុខទុក្ខប្រជាពលរដ្ឋ ផលប្រយោជន៍មហាជន ផលប្រយោជន៍សាធារណៈ និងផលប្រយោជន៍ជាតិជាធំ»។
ក្រោយឡើងកាន់អំណាចចាប់ពីថ្ងៃទី២២ ខែសីហា លោកនាយករដ្ឋមន្រ្តី ហ៊ុន ម៉ាណែត បានចាប់ផ្តើមតែងតាំងមន្រ្តីជាបន្តបន្ទាប់ ក្នុងនោះមានរដ្ឋមន្រ្តី និងអភិបាលខេត្តមួយចំនួន ដែលជាកូនរបស់មន្រ្តីជាន់ខ្ពស់គណបក្សប្រជាជនកម្ពុជា។
ការតែងតាំងកូនៗរបស់មន្រ្តីជាន់ខ្ពស់ឱ្យមកគ្រប់គ្រងស្ថាប័នរដ្ឋ និងខេត្តនានា ត្រូវបានមើលឃើញថាជាការដាក់សែស្រឡាយគណបក្សកាន់អំណាច ប៉ុន្តែវាអាចមានផលអវិជ្ជមានផងដែរ។
អ្នកវិភាគនយោបាយ លោក មាស នី មើលឃើញថា នេះជាយុទ្ធសាស្រ្តនៃការរៀបចំការគ្រប់គ្រងប្រទេស តាមរយៈការចាត់តាំងសែស្រឡាយក្រុមគ្រួសារ តាំងពីថ្នាក់លើរហូតដល់ថ្នាក់ក្រោមដែលលោកថាមិនសូវជាមានអនុវត្តនៅក្នុងសង្គមប្រជាធិបតេយ្យឡើយ។ លោកបន្ថែមថា ការរៀបចំយុទ្ធសាស្រ្តនេះគឺដើម្បីផលប្រយោជន៍សម្រាប់មន្រ្តីក្នុងជួរគណបក្សកាន់អំណាច ប៉ុន្តែលោកថា វាអាចនឹងមានឥទ្ធិពលអវិជ្ជមាន បើកាលណាមិនមានការដឹកនាំបានល្អ ហើយអាចបង្កជាទំនាស់ផ្ទៃក្នុងផងដែរ។
លោក មាស នី ប្រាប់វីអូអេកាលពីសប្តាហ៍មុនថា៖ «ប្រព័ន្ធបែបនេះច្រើនតែប្រឈមជាមួយហ្នឹងទំនាស់ផលប្រយោជន៍និងវាឈានចូលទៅដល់ការបន្តពង្រីកនូវអំពើពុករលួយ ធ្វើឱ្យប្រព័ន្ធយុត្តិធម៌ វាកាន់តែលែងមានដំណើរការ។ នេះសុទ្ធតែជាការមើលឃើញនៅក្នុងគំនរទាញពីវិធីសាស្រ្តនយោបាយមកនិយាយទេ ប៉ុន្តែជាក់ស្តែងវាអាស្រ័យទៅលើសមត្ថភាពរបស់មេដឹកនាំបច្ចុប្បន្នដែរ។ បើសិនជាមេដឹកនាំបច្ចុប្បន្នអាចគ្រប់គ្រងរឿងហានិភ័យទាំងអស់នោះបាន [ខ្ញុំ]គិតថា ខ្ញុំជាពលរដ្ឋខ្មែរក៏សប្បាយចិត្តទៅតាមហ្នឹងដែរ ប៉ុន្តែហានិភ័យគឺមានខ្ពស់»។
នៅក្នុងពិធីសម្ពោធសាលាបឋមសិក្សាមួយកន្លែងក្នុងខេត្តបាត់ដំបង កាលពីខែកញ្ញា ឆ្នាំ២០២២ លោក ស សុខា អតីតរដ្ឋលេខាធិការក្រសួងអប់រំ យុវជន និងកីឡា និងបច្ចុប្បន្នជាតំណាងរាស្រ្តជាប់ឆ្នោតមណ្ឌលខេត្តព្រៃវែងផងដែរ បានថ្លែងថា ប្រសិនបើបុគ្គលម្នាក់បំពេញការងារមួយមិនបានល្អប្រសើរជាងអ្នកមុន បុគ្គលនោះគួរលាលែងពីតំណែង។
លោកបញ្ជាក់ថា៖ «បើធ្វើការងារថ្ងៃហ្នឹង មិនខុសពីអ្នកមុនដែលគាត់ធ្វើទេ ឬមួយមិនអាចកែប្រែឱ្យល្អជាងអ្នកមុនធ្វើទេ ខ្ញុំគិតថាមិនបាច់[ធ្វើទេ] ឈប់ធ្វើហ្មងទៅ ឈប់ធ្វើហើយដើរចេញឱ្យអ្នកផ្សេងធ្វើវិញ»។
គួរបញ្ជាក់ថា ក្រៅពីកូនប្រុសរបស់លោក ស ខេង ដែលទទួលតំណែងជារដ្ឋមន្រ្តីក្រសួងមហាផ្ទៃ ក៏មានកូនរបស់មន្រ្តីជាន់ខ្ពស់ផ្សេងទៀត ដែលទទួលតំណែងជារដ្ឋមន្រ្តីជំនួសឪពុក ដូចជាលោក ទៀ សីហា កូនប្រុសរបស់លោក ទៀ បាញ់ ទទួលតំណែងជារដ្ឋមន្រ្តីក្រសួងការពារជាតិ។ លោកនាយករដ្ឋមន្រ្តី ហ៊ុន ម៉ាណែត ក៏បានតែងតាំងប្អូនប្រុសរបស់លោក គឺលោក ហ៊ុន ម៉ានី ជារដ្ឋមន្រ្តីក្រសួងមុខងារសាធារណៈផងដែរ៕
