មន្ត្រីជាន់ខ្ពស់គណបក្សប្រជាជនកម្ពុជា លោក សុខ ឥសាន បានលើកឡើងថា ក្នុងអាណត្តិទី៧ខាងមុខនេះ ក្រោមការដឹកនាំរបស់លោក ហ៊ុន ម៉ាណែត គណៈរដ្ឋមន្ត្រីថ្មីនឹងមានកូនៗរបស់រដ្ឋមន្ត្រីដែលឡើងកាន់តួនាទីជំនួសឪពុករបស់ពួកគេ។ អ្នកតាមដានយល់ថា ការតែងតាំងសែស្រឡាយមិនគួរកើតឡើងក្នុងសម័យទំនើប ព្រោះវានឹងអាចប៉ះពាល់ដល់អភិបាលកិច្ចល្អ។
អ្នកតាមដានមើលឃើញថា ជិត៤ទសវត្សរ៍មកនេះ មានការតែងតាំងសែស្រឡាយឱ្យកាន់តួនាទីរដ្ឋធំៗដែលធ្វើឱ្យមន្ត្រីមួយចំនួនដែលមានសមត្ថភាព ដែលមិនមានសែស្រឡាយអាក់អន់ស្រពន់ចិត្តផងដែរ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍និងសន្តិភាព លោក យង់ គិមអេង យល់ថា ការដាក់សែស្រឡាយទៅគ្រប់គ្រងតាមក្រសួងស្ថាប័នរដ្ឋ មិនគួរកើតឡើងក្នុងសម័យទំនើប នាពេលបច្ចុប្បន្ននេះទេ ព្រោះវានឹងអាចប៉ះពាល់ដល់អភិបាលកិច្ចល្អក្នុងសង្គម។
លោកថ្លែងថា៖ «ចំពោះបញ្ហានេះ វាអត់មានអ្វីដែលថាថ្មីទេ។ គ្រាន់ថាជារឿងមួយដែលប្រជាពលរដ្ឋមួយចំនួនក៏បានលើកឡើងដែរថាបញ្ហាទាំងអស់នេះ មិនគួរកើតឡើងក្នុងសម័យទំនើបនាពេលបច្ចុប្បន្ននេះ ព្រោះថា ការដាក់សែស្រឡាយ សាច់ញាតិ វានឹងធ្វើឱ្យបញ្ហាអភិបាលកិច្ចអស់ប្រសិទ្ធភាព ពីព្រោះដោយសារថាម្នាក់ៗ មានអ្នកដែលចាំការពារនៅពីក្រោយ»។
លោកបន្ថែមថា ការគ្រោងរៀបចំឱ្យកូនរបស់រដ្ឋមន្ត្រីឡើងធ្វើជារដ្ឋមន្ត្រីជំនួសឪពុកពួកគេនោះ ក៏នឹងធ្វើឱ្យមន្ត្រីដែលមានសមត្ថភាពមួយចំនួនអាក់អន់ស្រពន់ចិត្តផងដែរ។
លោកថ្លែងថា៖ «នៅក្នុងការប្រែប្រួល ផ្លាស់ប្តូរណាមួយ ចៀសមិនរួចទេ អំពីការអាក់អន់ស្រពន់ចិត្ត ពីព្រោះជាធម្មតា គឺអាចនឹងមានមន្ត្រីដែលគាត់ធ្វើកិច្ចការយូរហើយ ក៏មានសមត្ថភាពដែរ ប៉ុន្តែមិនត្រូវបានគេតែងតាំង ដោយសារគាត់អត់មានសែស្រឡាយអីហូរហែ អាហ្នឹងក៏ជាបញ្ហាដែរ»។
លោក យង់ គិមអេង យល់ថា រដ្ឋាភិបាលអាណត្តិទី៧ដែលនឹងដឹកនាំដោយ លោក ហ៊ុន ម៉ាណែត នឹងប្រើប្រាស់ពេលវេលាច្រើន ក្នុងការសម្របសម្រួលបញ្ហាផ្ទៃក្នុងគណបក្ស ជាជាងការអភិវឌ្ឍប្រទេស។
បើតាមបញ្ជីឈ្មោះក្រៅផ្លូវការមួយច្បាប់ដែលរៀបរាប់អំពីសមាសភាពរដ្ឋាភិបាលបម្រុងទុក គេឃើញកូនប្រុសរបស់រដ្ឋមន្ត្រីក្រសួងមហាផ្ទៃ លោក ស ខេង គឺលោក ស សុខា ដែលបច្ចុប្បន្នជារដ្ឋលេខាធិការក្រសួងអប់រំយុវជន និងកីឡា នឹងទៅកាន់តួនាទីជារដ្ឋមន្ត្រីក្រសួងមហាផ្ទៃ។ កូនប្រុសរបស់រដ្ឋមន្ត្រីក្រសួងការពារជាតិ លោក ទៀ បាញ់ គឺលោក ទៀ សីហា ដែលបច្ចុប្បន្នជាអភិបាលខេត្តសៀមរាប នឹងទៅកាន់តួនាទីជារដ្ឋមន្ត្រីក្រសួងការពារជាតិ។ កូនស្រីរបស់ លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ គឺអ្នកស្រី ចម និម្មល ដែលបច្ចុប្បន្នជារដ្ឋលេខាធិការក្រសួងពាណិជ្ជកម្ម នឹងឡើងទៅជារដ្ឋមន្ត្រីក្រសួងពាណិជ្ជកម្ម។ បើតាមបញ្ជីក្រៅផ្លូវការនោះ កូនមួយចំនួនទៀតរបស់មន្រ្តីជាន់ខ្ពស់គណបក្សប្រជាជនកម្ពុជា នឹងឡើងជំនួសរដ្ឋមន្រ្តីផ្សេងទៀត។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងថា យន្តការនៃការផ្ទេរតំណែងទម្រង់ក្រុមគ្រួសារនេះ អាចមានគុណវិបត្តិច្រើនជាងគុណសម្បត្តិ ដែលអាចបង្កើតឱ្យមានបក្ខពួកនិយម បង្កជាជម្លោះផលប្រយោជន៍ដែលប៉ះពាល់ដល់ដំណើរការនីតិរដ្ឋ។
លោកប្រាប់វីអូអេថា៖ «គ្រួសារនិយមអាចបង្កើតឱ្យមានបក្ខពួកនិយមកើតឡើង ហើយចំណុចមួយទៀតគឺវាក៏អាចបង្កើតឱ្យមានទំនាស់ផលប្រយោជន៍អាចឈានទៅដល់ការចុះខ្សោយនៃដំណើរការនីតិរដ្ឋអំពើពុករលួយ ការរំលោភអំណាច និងភាពអយុត្តិធម៌នៅក្នុងនោះ»។
លោកបន្ថែមថាបរិបទនៃការផ្ទេរអំណាចនៅក្នុងស្ថាប័នរដ្ឋមួយ ដែលមានភាពទន់ខ្សោយ ចៀសមិនផុតពីភាពចម្រូងចម្រាសផ្ទៃក្នុងបក្ស ដែលជាហេតុទាមទារឱ្យមានការបែងចែកអំណាច។
លោកថ្លែងថា៖ «ស្ថាប័នរដ្ឋរបស់យើងនៅមានភាពទន់ខ្សោយ ដូចជានៅកម្ពុជាបច្ចុប្បន្ននេះ មិនអាចចៀសផុតទេពីការសម្របសម្រួលខាងផ្នែកនយោបាយ និងការផ្ដល់អត្ថប្រយោជន៍ទៅដល់សមាជិកដទៃទៀតនៃគណបក្សមួយដែលឈ្នះឆ្នោត ការបែងចែកទាំងអំណាច ទាំងផលប្រយោជន៍បែបនេះធ្វើអាចធ្វើឱ្យដំណើរការនៃការផ្ទេរអំណាចនេះវាប្រព្រឹត្តទៅដោយរលូន»។
ទាក់ទងនឹងបញ្ជីឈ្មោះក្រៅផ្លូវការ ដែលរៀបរាប់អំពីសមាសភាពរដ្ឋាភិបាលថ្មី លោក សុខ ឥសាន អ្នកនាំពាក្យគណបក្សកាន់អំណាចបញ្ជាក់ថា គណបក្សប្រជាជនកម្ពុជាពិតជាបានរៀបចំសមាសភាពគណៈរដ្ឋមន្ត្រី និងសមាសភាពរដ្ឋាភិបាលនោះពិតមែន។ លោកថា នៅថ្ងៃទី២២ ខែសីហា ខាងមុខ បញ្ជីឈ្មោះផ្លូវការនឹងត្រូវផ្សព្វផ្សាយជាសាធារណៈ។
ប៉ុន្តែលោកថា ឯកសារបញ្ជីឈ្មោះនៃសមាសភាពរដ្ឋាភិបាលបម្រុងទុកមួយនេះ គឺជាមូលដ្ឋានមួយ ក្រោយពេលលោក ហ៊ុន ម៉ាណែត ទូលថ្វាយព្រះមហាក្សត្រចេញព្រះរាជក្រឹត្យ ដើម្បីឱ្យចាត់តាំង និងរៀបចំសមាសភាពគណៈរដ្ឋមន្ត្រីថ្មី រួចសុំសេចក្តីទុកចិត្តពីរដ្ឋសភា ទើបគណៈរដ្ឋមន្ត្រីថ្មី ទទួលស្គាល់ជាផ្លូវការ។
លោកបញ្ជាក់ថា៖ «គណបក្សប្រជាជនមិនមានទម្លាប់ធ្វើអ្វីដោយចៃដន្យទេ។ យើងធ្វើតែងតែមានគម្រោង តែងតែមានផែនការច្បាស់លាស់។ អ៊ីចឹងផែនការ និងទម្រង់នេះហើយ ដែលបែកធ្លាយមកខាងក្រៅ។ តែទោះបែកធ្លាយមកខាងក្រៅ ក៏យើងអាចចាត់ទុកថាជាឯកសារជាមូលដ្ឋាន ដើម្បីឱ្យបេក្ខជននាយករដ្ឋមន្ត្រី ដែលជាប់ឆ្នោតថ្មីនេះ ដាក់រៀបចំ ដើម្បីសុំសេចក្តីទុកចិត្តពីរដ្ឋសភា»។
បើតាមលោក សុខ ឥសាន ការត្រៀមតែងតាំងសមាសភាពគណៈរដ្ឋមន្ត្រីថ្មីដែលភាគច្រើនជាកូនៗរបស់រដ្ឋមន្ត្រី គឺដោយសារឪពុករបស់ពួកគេជារដ្ឋមន្ត្រីចាស់ៗ សុទ្ធតែជាឥស្សរជនមានគុណសម្បត្តិ មានស្នាដៃ និងគោលជំហរល្អចំពោះជាតិមាតុភូមិ។
លោក សុខ ឥសាន បញ្ជាក់បន្ថែមថា គណបក្សប្រជាជនកម្ពុជាបានបណ្តុះបណ្តាលធនធានមនុស្ស ដោយជ្រើសយកកូនចៅដែលមានពូជពង្សល្អឱ្យបន្តវេន។ លោកបន្តថា គណបក្សប្រជាជនកម្ពុជានិងគណបក្សដទៃក៏តែងតែកសាងយុវជនរបស់ខ្លួន ដើម្បីស្នងតំណែង ដែលស្របតាមរបបប្រជាធិបតេយ្យ សេរី ពហុបក្ស។
បើតាមលោក សុខ ឥសាន គណបក្សប្រជាជនកម្ពុជាមិនមានវប្បធម៌ច្រណែនគ្នាអំពីតួនាទីអ្វីនោះទេ។
លោកថ្លែងថា៖ «គណបក្សប្រជាជន អត់មានវប្បធម៌ច្រណែនគ្នាអំពីតួនាទីទេ។ វាអាស្រ័យតួនាទី តំណែង កាន់កន្លែងណាមួយ វាអាស្រ័យលើការសម្រេចរបស់ថ្នាក់ដឹកនាំកំពូលរបស់គណបក្សប្រជាជនកម្ពុជា ស្របតាមសមត្ថភាព គោលជំហរ ក៏ដូចបទពិសោធន៍របស់មន្ត្រីម្នាក់ៗ។ អ៊ីចឹងមន្ត្រីវ័យក្មេងជំនាន់ក្រោយដែលជាទំពាំងស្នងឫស្សីនេះ ត្រូវទទួលការចាត់តាំង និងតែងតាំង ដោយថ្នាក់ដឹកនាំគណបក្សប្រជាជនកម្ពុជា ហើយគ្មានទស្សនៈណាមួយ ដែលច្រណែនឈ្នានីសគ្នាទេ»។
បើតាមការបង្ហោះសារ និងរូបភាពនៅលើគណនីហ្វេសប៊ុករបស់លោក ទៀ បាញ់ រដ្ឋមន្ត្រីក្រសួងការពារជាតិ កាលពីថ្ងៃអាទិត្យ គេឃើញលោក ទៀ សីហា ក្នុងសម្លៀកបំពាក់ជាទាហាន អមឪពុករបស់លោក ចុះត្រួតពិនិត្យការដ្ឋានសាងសង់មូលដ្ឋានសមុទ្ររាមនៅក្នុងខេត្តព្រះសីហនុ ដែលអាចជាសញ្ញាក្នុងការផ្ទេរតួនាទីនៅពេលខាងមុខ។
វីអូអេមិនទាន់អាចសុំការអត្ថាធិប្បាយពីលោក ទៀ សីហា និងលោក ស សុខា បាននៅឡើយទេ។
គួរបញ្ជាក់ថា កាលពីពេលថ្មីៗនេះ អ្នកស្រី ជា សិរី ដែលជាកូនស្រីរបស់លោក ជា ចាន់តូ ទេសាភិបាលធនាគារជាតិនៃកម្ពុជា ត្រូវបានព្រះមហាក្សត្រតែងតាំងជាអគ្គទេសាភិបាលធនាគារជាតិនៃកម្ពុជា ជំនួសឪពុករបស់អ្នកស្រី៕
