លោក ហ៊ុន ម៉ាណែត ទទួលបានសំឡេងគាំទ្រច្រើនលើសលប់ក្នុងរដ្ឋសភាធ្វើជានាយករដ្ឋមន្ត្រីថ្មីរបស់ប្រទេសកម្ពុជា និងបានប្រកាសធានាលើការកែទម្រង់អភិបាលកិច្ច និងពង្រឹងស្ថាប័នសាធារណៈដែលមានសមត្ថភាពខ្ពស់ ហើយបន្តជំរុញការអភិវឌ្ឍសេដ្ឋកិច្ច និងសង្គមកម្ពុជា។ លោកក៏ប្តេជ្ញាបន្តរក្សាសន្តិភាព ការអភិវឌ្ឍក្នុងប្រទេស និងអនុវត្តតាមគោលនយោបាយសំខាន់ៗផ្សេងទៀត។
អំឡុងពេលរដ្ឋសភានៃនីតិកាលទី៧ បន្តសម័យប្រជុំលើកទី១ នៅថ្ងៃអង្គារទី២២ ខែសីហានេះ សមាជិកសភាចំនួន១២៣រូប ក្នុងចំណោម១២៥រូប បានបោះឆ្នោតគាំទ្រលោក ហ៊ុន ម៉ាណែត ដែលនឹងចាប់ផ្តើមការងារជាផ្លូវការជាមួយគណៈរដ្ឋមន្ត្រីថ្មីរបស់លោកនៅថ្ងៃទី២៣ ខែសីហា។
ការឡើងកាន់អំណាចរបស់លោក ហ៊ុន ម៉ាណែត បានបញ្ចប់ការគ្រប់គ្រងរបស់ឪពុកលោកគឺលោក ហ៊ុន សែន ដែលបានធ្វើជានាយករដ្ឋមន្ត្រីចំនួន៣៨ឆ្នាំ។
ក្រោយការផ្តល់សេចក្តីទុកចិត្តរបស់រដ្ឋសភាឱ្យធ្វើជានាយករដ្ឋមន្ត្រីកម្ពុជាក្នុងអាណត្តិទី៧នេះ លោក ហ៊ុន ម៉ាណែត បានថ្លែងក្នុងសម័យប្រជុំសភានោះថា ក្នុងនាមលោកដែលដឹកនាំរដ្ឋាភិបាលអាណត្តិទី៧ នឹងបន្តជំរុញការអភិវឌ្ឍសេដ្ឋកិច្ច និងសង្គមកម្ពុជា ដែលនេះជាចំណុចមួយក្នុងចំណោមការធានាទាំង៥របស់រដ្ឋាភិបាលលើការអនុវត្តកម្មវិធីគោលនយោបាយដើម្បីប្រជាជន។
លោក ហ៊ុន ម៉ាណែត ថ្លែងថា៖ «ការធានាបន្តជំរុញអភិវឌ្ឍសេដ្ឋកិច្ច និងសង្គមកម្ពុជា ក្នុងគ្រប់វិស័យ ដែលផ្តោតលើអាទិភាពលើការកែទម្រង់អភិបាលកិច្ចសំដៅពង្រឹងស្ថាប័នសាធារណៈ ដែលមានសមត្ថភាពខ្ពស់ ខ្លាំង វៃឆ្លាត និងស្អាតស្អំ រួមបញ្ចូលផងដែរនូវការពង្រឹងគោលការណ៍នីតិរដ្ឋ និងការពង្រឹងយុត្តិធម៌ក្នុងសង្គម...»។
ក្រៅពីនេះ លោក ហ៊ុន ម៉ាណែត ថ្លែងថា រដ្ឋាភិបាលអាណត្តីទី៧នេះ នឹងធានាការពារឱ្យបានជាដាច់ខាតនូវសន្តិភាព ស្ថិរភាព សន្តិសុខ និងសុវត្ថិភាព ព្រមទាំងការពារឯករាជ្យ អធិបតេយ្យ និងបូរណភាពទឹកដីឱ្យបានគង់វង្សចីរកាល មិនឱ្យកម្លាំងណាមកបំពាន ឬបំផ្លាញបានឡើយ។
បើតាមលោក ហ៊ុន ម៉ាណែត ក្នុងឆ្នាំ២០២៣នេះ រដ្ឋាភិបាលថ្មីនឹងយកចិត្តទុកលើការពង្រីកសេវាថែទាំសុខភាព ការបណ្តុះបណ្តាលវិជ្ជាជីវៈនិងបច្ចេកទេស កម្មវិធីជាតិជំនួយសង្គម ការជំរុញអនុវត្តយុទ្ធសាស្ត្រអភិវឌ្ឍសេដ្ឋកិច្ចក្រៅប្រព័ន្ធ ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទានសំដៅលើកស្ទួយផលិតកម្ម រកទីផ្សារ និងរក្សាលំនឹងតម្លៃកសិផល និងការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំសង្កាត់ជាដើម។
លោក ហ៊ុន ម៉ាណែត បន្ថែមថា ការសម្រេចចិត្តរបស់ពលរដ្ឋកម្ពុជាដែលបោះឆ្នោតឱ្យគណបក្សប្រជាជនកម្ពុជា កាលពីថ្ងៃទី២៣ ខែកក្កដា ឆ្នាំ២០២៣ ក៏ជាការឆ្លុះបញ្ចាំងឱ្យឃើញពីការបដិសេធយ៉ាងដាច់អហង្ការ ចំពោះក្រុមអគតិមួយចំនួន ដែលញុះញង់ អុជអាល បំផុសប្រជាពលរដ្ឋឱ្យធ្វើទៅតាមមហិច្ឆតារបស់ពួកគេ។
ក្រោយពេលបញ្ចប់សម័យប្រជុំរដ្ឋសភាលើកទី១នេះ លោក ហ៊ុន សែន ដែលអះអាងថា លោកនឹងក្លាយជាប្រធានព្រឹទ្ធសភានៅខែមីនា ឆ្នាំ២០២៤នោះ បានធ្វើសន្និសីទសារព័ត៌មាននៅក្នុងបរិវេណរដ្ឋសភា។ ប៉ុន្តែអ្នកយកព័ត៌មានឱ្យសំឡេងសហរដ្ឋអាមេរិក(វីអូអេ)ត្រូវបានមន្ត្រីមួយចំនួនដែលមានវត្តមានក្នុងសភាប្រាប់ថា មិនអាចឱ្យចូលរួមសន្និសីទនោះបានទេ។
ក្នុងសន្និសីទដែលមានការផ្សាយបន្តផ្ទាល់តាមប្រព័ន្ធទំនាក់ទំនងសង្គម លោក ហ៊ុន សែន ប្រាប់អ្នកសារព័ត៌មានថា គោលបំណងរបស់លោកដែលចង់ឱ្យលោក ហ៊ុន ម៉ាណែត ធ្វើជានាយករដ្ឋមន្ត្រី បានក្លាយជាការណ៍ពិត។
លោកថ្លែងថា៖ «ខ្ញុំកំពុងក្លាយខ្លួនជាឪពុកនាយករដ្ឋមន្ត្រី។ ប៉ុន្មានម៉ោងមុននេះ ខ្ញុំជានាយករដ្ឋមន្ត្រី។ ប៉ុន្តែពេលខ្ញុំនិយាយនេះ ខ្ញុំគឺជាឪ [របស់]នាយករដ្ឋមន្ត្រី។ អ្នកទាំងអស់គ្នាធ្លាប់ឮទេថា ខ្ញុំនឹងក្លាយខ្លួនទៅជាឪនាយករដ្ឋមន្ត្រី។ ឥឡូវខ្ញុំសម្រេចនូវអ្វីដែលខ្ញុំចង់បានហើយ»។
លោក ហ៊ុន សែន បន្ថែមថា កូនប្រុសគាត់ និងអ្នកជំនាន់ថ្មី ពិតជាមានលទ្ធភាពធ្វើកិច្ចការនានា និងបន្តរែកពន់កិច្ចការដែលនៅសេសសល់ពីអ្នកដឹកនាំចាស់។
លោកថ្លែងថា៖ «ខ្ញុំគិតថា ពួកគេពិតជាមានលទ្ធភាពដើម្បីធ្វើកិច្ចការទាក់ទងជាមួយអ្វីដែលជាកិច្ចការដែលនៅសេសសល់។ វាមិនមែនគ្រាន់តែជាការដោះស្រាយបញ្ហាទៅមុខទេ។ កិច្ចការអម្រែក ដែលដាក់ពីអ្នកជំនាន់ចាស់ វាពិតជាធ្ងន់ណាស់សម្រាប់អ្នកបន្តវេន ដែលពួកគេនឹងបន្តរែកពន់កិច្ចការដែលយើងធ្លាប់រែកពន់»។
លោក ហ៊ុន សែន ចាត់ទុកថា ថ្ងៃទី២២ ខែសីហានេះជាព្រឹត្តិការណ៍ប្រវត្តិសាស្ត្រដែលកម្ពុជាបានធ្វើដើម្បីនិរន្តរភាពនៃសន្តិភាព និងការអភិវឌ្ឍ។
ដោយឡែក នៅថ្ងៃអង្គារ ទី២២ ខែសីហានេះ ព្រះមហាក្សត្រនរោត្តមសីហមុនី បានចេញព្រះរាជក្រឹត្យត្រាស់បង្គាប់ដោយតែងតាំងលោក ហ៊ុន ម៉ាណែត ជានាយករដ្ឋមន្ត្រី និងបានតែងតាំងឧបនាយករដ្ឋមន្ត្រីចំនួន១០រូប ទេសរដ្ឋមន្ត្រីចំនួន២១រូប និងតែងតាំង រដ្ឋមន្ត្រីចំនួន៣០រូបឱ្យដឹកនាំនៅតាមក្រសួងស្ថាប័នរដ្ឋ។
ព្រះរាជក្រឹត្យត្រាស់បង្គាប់នោះ បានបង្ហាញថា លោក ស សុខា បានទៅកាន់តួនាទីជារដ្ឋមន្ត្រីក្រសួងមហាផ្ទៃជំនួសឱ្យឪពុកលោក គឺលោក ស ខេង លោក ទៀ សីហា កូនប្រុសលោក ទៀ បាញ់ បានក្លាយជារដ្ឋមន្ត្រីក្រសួងការពារជាតិ។ ចំណែកកូនស្រីរបស់លោក ចម ប្រសិទ្ធ អតីតរដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ គឺអ្នកស្រី ចម និម្មល នឹងទៅកាន់តួនាទីជារដ្ឋមន្ត្រីក្រសួងពាណិជ្ជកម្ម និងកូនៗរបស់មន្រ្តីជាន់ខ្ពស់គណបក្សប្រជាជនកម្ពុជាមួយចំនួនទៀត នឹងឡើងជំនួសរដ្ឋមន្រ្តីចាស់ៗផ្សេងទៀតផងដែរ។
ព្រះមហាក្សត្រក៏បានតែងតាំងលោក ហ៊ុន សែន ឱ្យធ្វើជាប្រធានឧត្តមក្រុមប្រឹក្សាផ្ទាល់ព្រះមហាក្សត្រ ដែលមានឋានៈស្មើនាយករដ្ឋមន្ត្រី លោក ហេង សំរិន ធ្វើជាប្រធានកិត្តិយសនៃឧត្តមក្រុមប្រឹក្សាផ្ទាល់ព្រះមហាក្សត្រ មានឋានៈស្មើនាយករដ្ឋមន្ត្រី និងលោក ស ខេង លោក ទៀ បាញ់ និងអ្នកស្រី ម៉ែន សំអន ជាឧត្តមប្រឹក្សាក្រុមផ្ទាល់ព្រះមហាក្សត្រ មានឋានៈស្មើឧបនាយករដ្ឋមន្ត្រី។ នេះបើតាមព្រះរាជក្រឹត្យត្រាស់បង្គាប់ ចុះថ្ងៃទី២២ ខែសីហា។
ក្នុងកម្មវិធី Hello VOA របស់សំឡេងសហរដ្ឋអាមេរិក នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី កត់សម្គាល់ថា ការផ្លាស់ប្តូរតំណែងពីឪពុក ឬម្តាយទៅកូន ឱ្យកាន់តួនាទីធំៗ ក្នុងជួររដ្ឋាភិបាលបែបនេះ គឺមិនធ្លាប់កើតមាននៅតំបន់អាស៊ី និងសាកលលោកទេ។ លោកថា នេះជាការផ្លាស់ប្តូរបែបប្រព័ន្ធគ្រួសារ និងសែស្រឡាយនិយម។
លោកថ្លែងថា៖ «ការផ្លាស់ប្តូរនេះទៀតសោត យើងឃើញមានការប្តូរដោយសែស្រឡាយ ហើយលក្ខណៈគ្រួសារនិយមមានន័យថា ការផ្លាស់ប្តូរពីម្តាយទៅកូនតែម្តង ហើយសុទ្ធតែកាន់តំណែងសំខាន់ៗ តំណែងផ្នែកនយោបាយផង តំណែងផ្នែកបច្ចេកទេសផងនៅក្នុងក្បាលម៉ាស៊ីនដឹកនាំថ្មីនេះ។ ដូច្នេះវាជាការផ្លាស់ប្តូរមួយធំ សម្រាប់កម្ពុជា ហើយសម្រាប់ពលរដ្ឋ។ ការផ្លាស់ប្តូរនេះ យើងអាចមើលឃើញថា ជាការផ្លាស់ប្តូរដែលមិនធ្លាប់មានទេ សម្រាប់តំបន់ក្តី នៅសាកលលោកក្តី ដែលជាការផ្លាស់ប្តូរបែបប្រព័ន្ធគ្រួសារ និងសែស្រឡាយនិយមនេះ»។
បើតាមលោក ប៉ិច ពិសី ប្រជាពលរដ្ឋកំពុងចាំមើលការដឹកនាំប្រទេសកម្ពុជាដោយអ្នកជំនាន់ថ្មីផងដែរ ដូច្នេះអ្នកជំនាន់ថ្មីត្រូវផ្តល់ទំនុកចិត្តដល់ពលរដ្ឋ។
លោកថា៖ «បាទ ខ្ញុំគិតថា អាទិភាពចម្បងទីមួយគឺការកសាងទំនុកចិត្តពីពលរដ្ឋ ជាអាទិភាពទីមួយ។ ឥឡូវយើងបានដឹងហើយថា ពលរដ្ឋកំពុងតែចាំមើល ហើយមានការមន្ទិលសង្ស័យច្រើន មានភាពមិនច្បាស់លាស់ក្នុងចិត្តច្រើនថា តើទិសដៅជាតិ ដែលថ្នាក់ដឹកនាំថ្មីដែលនឹងរៀបចំ និងអនុវត្តនោះ នឹងដើរទៅទិសខាងណា ទាក់ទងវិស័យនយោបាយ ទាក់ទងសេដ្ឋកិច្ច ទាក់ទងសង្គម ហើយវិស័យពាក់ព័ន្ធផ្សេងៗទៀត ដែលអាចប៉ះពាល់ដល់ប្រជាពលរដ្ឋទាំងមូលហ្នឹង។ អ៊ីចឹងប្រជាពលរដ្ឋកំពុងរង់ចាំមើល»។
ក្នុងសម័យប្រជុំសភាលើកទី១នីតិកាលទី៧ នាព្រឹកថ្ងៃអង្គារ ទី២២ ខែសីហា ឆ្នាំ២០២៣នេះ រដ្ឋសភាបានបោះឆ្នោតគាំទ្រលោកស្រី ឃួន សុដារី ឱ្យធ្វើជាប្រធានរដ្ឋសភា លោក ជាម យៀប ធ្វើជាអនុប្រធានទី១ និង លោក វង សូត ធ្វើជាអនុប្រធានទី២ ដោយសំឡេងគាំទ្រ១២៣ លើ១២៥ នៃសមាជិករដ្ឋសភាទាំងមូល៕
