ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្រ្តី​ក្រសួង​មហាផ្ទៃ៖ កម្ពុជា​ជា​ជន​រងគ្រោះ​នៃ​បទល្មើស​ឆបោក​តាម​បច្ចេកវិទ្យា


រូបឯកសារ៖ លោក ស ខេង ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ​ចូលរួម​ក្នុង​កិច្ចប្រជុំ​មួយ​ជាមួយ​នឹង​រដ្ឋមន្ត្រី​ក្រសួង​មហាផ្ទៃ​​ស៊ុយអែត លោក Anders Ygeman នៅ​ទីក្រុង Stockholm ប្រទេស​ស៊ុយអែត ថ្ងៃទី២៥ ខែឧសភា ឆ្នាំ២០១៥។ (Reuters)

រដ្ឋមន្រ្តី​ក្រសួង​មហាផ្ទៃ ​លោក ​ស ខេង​ នៅ​ថ្ងៃ​ព្រហស្បតិ៍​នេះ​ បាន​ថ្លែង​ថា ​កម្ពុជា​ត្រូវ​បាន​ប្រើ​ប្រាស់​ជា​កន្លែង​ប្រព្រឹត្ត​បទ​ល្មើស​ឆបោក​តាម​បច្ចេក​វិទ្យា​ពី​សំណាក់​ជន​បរទេស ​ដែល​នេះ​នាំ​ឲ្យ​កម្ពុជា​ក្លាយ​ជា​ប្រទេស​រង​គ្រោះ​នៃ​អំពើ​ខុស​ច្បាប់​ទាំង​នេះ។​

លោក ​ស ខេង ​បាន​ថ្លែង​បែប​នេះ​នៅ​ក្នុង​ពិធី​សម្ពោធ​ដាក់​ឱ្យ​ប្រើប្រាស់​អគារ​រដ្ឋបាល​របស់​ស្នង​ការដ្ឋាន​នគរបាល​រាជធានី​ភ្នំពេញ។​

លោក​ ស ខេង ​ថ្លែង​ថា ​បទ​ល្មើស​ឆបោក​តាម​ទូរ​គមនាគមន៍ ​ឬ​បច្ចេក​វិទ្យា​នេះ​ ជន​រង​គ្រោះ ​ជន​ល្មើស​ មេ​ខ្លោង ​ឬ​មេ​ខ្យល់ ​គឺ​ជា​ជន​បរទេស ​ដែល​យក​ទឹក​ដី​កម្ពុជា​ជា​កន្លែង​ប្រព្រឹត្ត​បទ​ល្មើស​ ដែល​ក្នុង​នោះ​ក៏​មាន​ការ​បង្ខាំង​មនុស្ស​ផង​ដែរ។

លោក​ ស ខេង ថ្លែង​ថា៖​ «អ៊ីចឹង​កម្ពុជា​យើង​ជា​កន្លែង​រង​គ្រោះ ​ពី​ព្រោះ​អ្នក​ប្រព្រឹត្ត​បទ​ល្មើស​ជាមេ​ខ្លោង​នោះ ៩៩,៩% ​មិន​មែន​ខ្មែរ ​ដែល​នៅ​កម្ពុជា»។

បើ​តាម​លោក ​ស ខេង ​ ជន​រង​គ្រោះ​ត្រូវ​បាន​ឆបោក​ឱ្យ​មក​បម្រើ​ការងារ​ក្នុង​ផ្នែក​ល្បែង​អនឡាញ។​
លោក​រដ្ឋមន្រ្តី​ក្រសួង​មហាផ្ទៃបន្ថែម​ថា ​កម្ពុជា​កំពុង​តែ​ចាត់​វិធានការ​លើ​បញ្ហា​នេះ​ ដោយ​ជួយ​ជន​គ្រោះ​ជា​ជន​បរទេស ​និង​នាំ​ជន​ល្មើស​មក​ផ្តន្ទា​ទោស​តាម​ច្បាប់។​

កាល​ពី​កន្លង​ទៅ ​ក្រសួង​មហា​ផ្ទៃ​បាន​ឲ្យ​ដឹង​ថា​ អាជ្ញាធរ​កម្ពុជា​បាន​ជួយ​សង្រ្គោះ​ជន​បរទេស ​ដែល​ត្រូវ​បាន​រាយ​ការណ៍​ថា ​ជា​ជន​រងគ្រោះ​នៃ​អំពើ​ជួញដូរ​ និង​រត់ពន្ធ​មនុស្ស​ សរុប​ប្រមាណ​ ៩០០​នាក់​ ចាប់​តាំង​ពី​ដើម​ខែ​មករា ​រហូត​ដល់​ថ្ងៃទី​២០​ ខែ​សីហា​ ឆ្នាំ ​២០២២​នេះ។

គួរ​បញ្ជាក់​ថា​ កម្ពុជា​ត្រូវ​បាន​ប្រើ​ប្រាស់​ជា​កន្លែង​បោក​បញ្ឆោត​តាម​ប្រព័ន្ធ​អ៊ីនធឺណិត​ (Scam)​ ដោយ​ប្រើ​ប្រាស់​កម្លាំង​ពលកម្ម​បរទេស​ ធ្វើ​ការ​នៅ​តាម​អគារ​ខ្ពស់ៗ​នៅ​ក្នុង​ប្រទេស​កម្ពុជា​ រហូត​មាន​សេចក្តី​រាយ​ការណ៍​អំពី​ការ​បង្ខាំង​ទុក​ពួកគេ ​មិន​ឱ្យ​មាន​សេរី​ភាព ​ធ្វើ​ទារុណកម្ម ​និង​ជំរិត​ទារ​ប្រាក់​ជា​ដើម៕​

អត្ថបទ​ទាក់ទង

XS
SM
MD
LG