ក្រោយក្រសួងសាធារណការ និងដឹកជញ្ជូន ដាក់ដំណើរការ «ការលក់លេខចុះបញ្ជីពិសេស» សម្រាប់រថយន្ត មានការបញ្ចេញមតិផ្សេងៗគ្នាទៅលើគំនិតផ្តួចផ្តើមមួយនេះ ដោយអ្នកខ្លះថានេះជា «ការជំរុញសម្ភារៈនិយមឬជំនឿនិយម»។
ក្រសួងសាធារណការ និងដឹកជញ្ជូន បានដាក់ឲ្យដំណើរការជាផ្លូវការ«ការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ត» កាលពីថ្ងៃអង្គារ។ យោងតាមសេចក្តីជូនដំណឹងរបស់ក្រសួង សាធារណជនដែលជាម្ចាស់យានយន្តក្នុងប្រទេសកម្ពុជាអាចធ្វើការទិញ ស្នើទិញ ឬដេញថ្លៃ តាមរយៈប្រព័ន្ធស្វ័យប្រវត្តិកម្មចុះបញ្ជីយានយន្ត«ការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ត»។
លោក វ៉ាស៊ឹម សូរិយា អ្នកនាំពាក្យរបស់ក្រសួងសាធារណការនិងដឹកជញ្ជូនបានប្រាប់ VOA ថា ការបង្កើតគំនិតផ្តួចផ្តើមនេះឡើង គឺធ្វើឡើងតាមសំណូមពរជាច្រើនពីម្ចាស់រថយន្តក្នុងប្រទេសកម្ពុជា។ លោកបន្ថែមថា ការបង្កើតនេះនឹងបន្ថែមចំណូលដល់រដ្ឋាភិបាលផងដែរ។
លោកមានប្រសាសន៍ថា៖ «ជាឧទាហរណ៍មួយគឺផ្លាកលេខថ្មី គឺទោះជាយើងនៅណាក៏ដោយ ក៏យើងអាចដាក់ស្លាកលេខថ្មីបានដែរបាទ។ ទីពីរគឺរកចំណូលថវិកាជាតិ»។
យោងតាមគេហទំព័ររបស់ក្រសួងសាធារណការ និងដឹកជញ្ជូន ម្ចាស់រថយន្តនានាអាចស្វែងរកស្នើ និងទិញលេខរថយន្តដែលខ្លួនពេញចិត្តតាមប្រព័ន្ធអនឡាញ ដោយគ្រាន់តែចូលទៅគេហទំព័ររបស់ក្រសួង។ ចំណែកតម្លៃរបស់ស្លាកលេខនីមួយៗ គឺខុសគ្នាទៅតាមសេរីលេខ ដែលមានរហូតដល់១០០លានរៀល ឬប្រមាណ ២៥.០០០ដុល្លារអាមេរិក សម្រាប់តម្លៃដេញថ្លៃទៅលើផ្លាកលេខឈ្មោះ Loy9។
លោក វ៉ាស៊ឹម សូរិយា ទទួលស្គាល់ថាមានការរិះគន់លើបញ្ហានេះ ដែលលោកចាត់ទុកជារឿងធម្មតា ប៉ុន្តែលោកថា ក្រសួងក៏ទទួលបានការគាំទ្រច្រើនផងដែរ។
លោកបានបន្ថែមថា៖ «ប៉ុន្តែអាស្រ័យនៅលើការផ្តល់វិញ្ញាបនបត្រឬពេលដែលយើងលក់លេខហ្នឹងទៅ ក៏យើងត្រូវសិក្សា បើសិនជាវាមិនស្រួល ឬក៏វាប៉ះពាល់ យើងបិទចោល ឬក៏ហៅគេឲ្យមកប្តូរវិញ»។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយនិងអ្នកវិភាគសេដ្ឋកិច្ចម្នាក់ បានលើកឡើងថា លោកមិនគាំទ្រគំនិតផ្តួចផ្តើមនេះទេ។ លោកបានសរសេរនៅលើទំព័រហ្វេសប៊ុករបស់លោកនៅថ្ងៃព្រហស្បតិ៍នេះថា៖ «ផលចំណេញគឺអ្នកមានលុយច្រើន ឬមានជំនឿខ្លាំង បង់លុយទៅរដ្ឋ។
លោកបន្ថែមថា៖ «សូមកុំមានការច្រឡំថា យើងត្រូវតែឬគួរតែដាក់ឈ្មោះយើង នៅលើយានយន្តយើងដូចគេអ្នកមាននោះទេ។ វាជាប្រព័ន្ធសម្រាប់មនុស្សមួយក្រុមតូចប៉ុណ្ណោះ»។
លោកបានឲ្យដឹងទៀតថា៖«ផលវិបាកចម្បង គឺការជំរុញសម្ភារៈនិយមឬជំនឿនិយម។ នៅក្នុងសង្គម គួរមានការជំរុញឲ្យមានការឲ្យតម្លៃលើសីលធម៌ និងសិទ្ធិស្មើគ្នា ជាជាងការបែងចែកទៅតាមទ្រព្យសម្បត្តិ»។
លោក គង់ រតនៈ ប្រធានស្តីទីវិទ្យាស្ថានសុវត្ថិភាពចរាចរណ៍ ប្រាប់VOA នៅថ្ងៃព្រហស្បតិ៍នេះថា ការលក់លេខយានយន្តពិសេសនេះមានទាំងផលវិជ្ជមាននិងអវិជ្ជមាន ដោយសារតែវាអាចបង្កើនចំណូលចូលស្ថាប័នរដ្ឋ ហើយម្ចាស់យានយន្តក៏អាចមានជម្រើសច្រើន ដើម្បីទទួលបានលេខដែលខ្លួនពេញចិត្តផងដែរ។
លោកបាននិយាយថា៖ «ខ្ញុំគិតថាវាជា មុខរបរថ្មីរបស់រដ្ឋាភិបាលដែលគាត់ចង់បង្កើនប្រាក់ចំណូលសម្រាប់ស្ថាប័នរដ្ឋអាហ្នឹងជារឿងមួយដែលយើងមើលឃើញ ហើយសម្រាប់ខ្ញុំ ការបង្កើតឲ្យមានជម្រើសសម្រាប់បងប្អូនប្រជាពលរដ្ឋហ្នឹងវាជារឿងល្អ»។
ប៉ុន្តែលោកថា វាអាចមានការពិបាកសម្រាប់ប្រជាពលរដ្ឋក្នុងការចំណាំ ឬអានអក្សរអង់គ្លេសនោះបាន នៅពេលដែលម្ចាស់រថយន្តប្រើស្លាកលេខពិសេស បង្កគ្រោះថ្នាក់ ហើយរត់គេច។
លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជាបានបង្ហាញការបារម្ភចំពោះព័ត៌មានផ្ទាល់ខ្លួនរបស់ម្ចាស់យានយន្តដែលអាចស្វែងរកបានតាមរយៈ QR Code នៅលើស្លាកលេខថ្មីនេះ។
លោកបាននិយាយថា៖ «បើសិនជាទិន្នន័យនេះវាធ្លាក់ទៅដល់ដៃមនុស្សខិលខូច ឬក៏ក្រុមដែលលួចទិន្នន័យវាអាចនាំមកនូវផលប៉ះពាល់មួយដែលពិបាកនឹងស្មាន»។
បើតាមផ្លាកលេខពិសេសផ្ទាល់ខ្លួននេះ ផ្នែកខាងលើមានសរសេរអក្សរខ្មែរ «កម្ពុជា» ផ្នែកកណ្ដាលជាលេខចុះបញ្ជីមានលេខ ឬ/និង អក្សរឡាតាំង មិនលើសពី៨ខ្ទង់ និងផ្នែកខាងក្រោមសរសេរអក្សរឡាតាំង «CAMBODIA»។
សាធារណជនអាចអាចដាក់ឈ្មោះ ឬលេខដែលខ្លួនពេញចិត្តបាន លើកលែងតែឈ្មោះទីកន្លែងប្រវត្តិសាស្ត្រ ឈ្មោះប្រាសាទ ឈ្មោះរាជធានី-ខេត្ត ឈ្មោះក្រសួង-ស្ថាប័ន គណបក្សនយោបាយ ឈ្មោះថ្នាក់ដឹកនាំជាន់ខ្ពស់និងជនល្បីឈ្មោះ ជាដើម។ នេះបើតាមក្រសួងសាធារណការ និងដឹកជញ្ជូន៕
