រដ្ឋមន្ត្រីការបរទេសម៉ាឡេស៊ីលោក Saifuddin Abdullah បានបញ្ជាក់នៅថ្ងៃចន្ទនេះថា ប្រទេសម៉ាឡេស៊ីនិងឥណ្ឌូណេស៊ី មានការព្រួយបារម្ភអំពីការសម្រេចរបស់ប្រទេសអូស្ត្រាលីនៅក្នុងការទិញនាវាមុជទឹកដើរដោយថាមពលនុយក្លេអ៊ែរ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
ដោយសំដៅទៅលើកិច្ចព្រមព្រៀង AUKUS ដែលជាកិច្ចព្រមព្រៀងសន្តិសុខត្រីភាគីដែលបានព្រមព្រៀងគ្នាកាលពីខែមុនរវាងប្រទេសអូស្ត្រាលី សហរដ្ឋអាមេរិក និងចក្រភពអង់គ្លេស លោក Saifuddin បាននិយាយថា ប្រទេសម៉ាឡេស៊ីនិងឥណ្ឌូណេស៊ី មានការព្រួយបារម្ភប្រហាក់ប្រហែលគ្នាអំពីកិច្ចព្រមព្រៀងនេះ។
បន្ទាប់ពីបានជួបប្រជុំជាមួយនឹងរដ្ឋមន្ត្រីការបរទេសឥណ្ឌូណេស៊ីអ្នកស្រី Retno Marsudi មក លោក Saifuddin បានថ្លែងក្នុងសន្និសីទកាសែតរួមគ្នាមួយថា៖ «យើងបានយល់ស្របគ្នាលើបញ្ហាកាលពីពេលថ្មីៗនេះនៅក្នុងតំបន់ទាក់ទិននឹងប្រទេសមួយដែលនៅជិតទឹកដីរបស់យើងដែលកំពុងទិញនាវាមុជទឹកថ្មីដែលដើរដោយថាមពលនុយក្លេអ៊ែរ»។
លោក Saifuddin បានបន្ថែមថា៖ «ទោះបីជាប្រទេសនោះ មិនមានសមត្ថភាពខាងអាវុធនុយក្លេអ៊ែរក៏ដោយ ក៏យើងមានការព្រួយបារម្ភអំពីបញ្ហានេះដែរ»។
កាលពីខែមុន ប្រទេសឥណ្ឌូណេស៊ីបានបញ្ជាក់ថា ខ្លួនមានការព្រួយបារម្ភថា កិច្ចព្រមព្រៀង AUKUS អាចនាំឱ្យមានការប្រជែងខាងសព្វាវុធនៅក្នុងតំបន់។
កិច្ចព្រមព្រៀង AUKUS នេះបានធ្វើឡើង នៅចំពេលដែលមានភាពតានតឹងកើនឡើងនៅសមុទ្រចិនខាងកើត (East China Sea) និងសមុទ្រចិនខាងត្បូង (South China Sea) ដែលជាផ្លូវទឹកដឹកជញ្ជូនទំនិញប្រហែលមួយភាគបីនៃពាណិជ្ជកម្មពិភពលោក៕
