រដ្ឋមន្ត្រីការបរទេសសហភាពអឺរ៉ុប ជួបគ្នានៅខាងក្រៅមហាសន្និបាតអង្គការសហប្រជាជាតិកាលពីថ្ងៃចន្ទ ដើម្បីពិភាក្សាអំពីសន្ធិសញ្ញា AUKUS ដែលជាកិច្ចព្រមព្រៀងនាវាមុជទឹកដែលបានទទួលបរាជ័យរវាងបារាំងនិងអូស្ត្រាលី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
លោក Peter Stano អ្នកនាំពាក្យទទួលបន្ទុកកិច្ចការបរទេសរបស់សហភាពអឺរ៉ុប និយាយថា «នេះជាឱកាសលើកដំបូងសម្រាប់រដ្ឋមន្ត្រីការបរទេសសហភាពអឺរ៉ុបពិភាក្សាពីភាពសាំញ៉ាំនិងផលវិបាកនៃកិច្ចព្រមព្រៀងទាំងមូល»។
លោក បាននិយាយទៀតថា ជំនួបនេះជាឱកាសមួយដើម្បីពិភាក្សា«មិនត្រឹមតែបញ្ហារវាងប្រទេសបារាំងនិងអូស្ត្រាលីទេ ក៏ប៉ុន្តែ វាក៏ពិភាក្សាពីភាពសាំញ៉ាំនៃសម្ព័ន្ធភាព AUKUS ទាំងមូលផងដែរ»។
ជំនួបនេះ ត្រូវបានគ្រោងធ្វើឡើងកាលពីពេលមុនទៅតាមភាពជាក់ស្តែងធម្មតាសម្រាប់បណ្តាប្រទេសនៅក្នុងសហភាពអឺរ៉ុបដើម្បីសម្របសម្រួលនិងពិគ្រោះលើប្រធានបទជាច្រើនមុនពេលអ្នកតំណាងរបស់ពួកគេ ថ្លែងនៅឯមហាសន្និបាតប្រចាំឆ្នាំរបស់អង្គការសហប្រជាជាតិ។
ក៏ប៉ុន្តែ ដោយប្រទេសអូស្ត្រាលី សហរដ្ឋអាមេរិក និងចក្រភពអង់គ្លេសកាលពីសប្តាហ៍មុន បានបញ្ចេញសន្ធិសញ្ញាការពារប្រទេសថ្មី ដែលបានចរចាសម្ងាត់អស់រយៈពេលជាច្រើនខែមក ដែលបានធ្វើឲ្យប៉ះពាល់ដល់ផលប្រយោជន៍របស់ប្រទេសបារាំងនោះ បញ្ហានេះ បានស្ថិតនៅលើគេនៅក្នុងរបៀបវារៈនៃកិច្ចប្រជុំ។
បារាំង បានកោះហៅឯកអគ្គរដ្ឋទូតរបស់ខ្លួនប្រចាំនៅសហរដ្ឋអាមេរិកនិងប្រទេសអូស្ត្រាលីនៅក្នុងការបង្ហាញនូវការមិនសប្បាយចិត្តរបស់ខ្លួន មិនត្រឹមតែការបាត់បង់កិច្ចសន្យាដែលបានព្រមព្រៀងគ្នាជាមួយអូស្ត្រាលីដែលមានតម្លៃជាង៣៧ពាន់លានដុល្លារប៉ុណ្ណោះទេ ក៏ប៉ុន្តែជាពិសេស គឺ«ការក្បត់នូវសេចក្តីទុកចិត្ត»ដែលខ្លួនបានទទួលពីសម្ព័ន្ធមិត្តនោះ។
លោក Clement Beaune រដ្ឋមន្ត្រីតំណាងអឺរ៉ុប បាននិយាយថា កិច្ចព្រមព្រៀងពាណិជ្ជកម្មជាមួយសហភាពអឺរ៉ុបដែលប្រទេសអូស្ត្រាលីបានធ្វើឲ្យជឿនលឿនចាប់តាំងពីឆ្នាំ២០១៨មក អាចទទួលរងនូវការប៉ះពាល់។
ពួកអ្នកចរចាពាណិជ្ជកម្មមកនៃភាគីទាំង២ បានជួបគ្នាចុងក្រោយកាលពីខែមិថុនា ហើយមានគម្រោងបន្តជំនួបរបស់ខ្លួននៅក្នុងខែតុលាខាងមុខនេះទៀត៕
