លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ បានប្រកាសគាំទ្រសេចក្តីសម្រេចរបស់តុលាការក្រុងភ្នំពេញ ពាក់ព័ន្ធជាមួយនឹងការកាត់ទោសដាក់ពន្ធនាគារអស់មួយជីវិតលើមេដឹកនាំគណបក្សប្រឆាំងលោក សម រង្ស៊ី ដែលទើបបានប្រកាសពីគម្រោងវិលចូលមកកម្ពុជា ក្នុងពេលបោះឆ្នោតថ្នាក់ជាតិឆ្នាំ ២០២៣ ខាងមុខ។
ថ្លែងនៅក្នុងសន្និសីទសារព័ត៌មានក្រោយពីបានចុះឈ្មោះក្នុងបញ្ជីបោះឆ្នោតនៅក្រុងតាខ្មៅ ខេត្តកណ្តាល នាព្រឹកថ្ងៃព្រហស្បតិ៍ លោក ហ៊ុន សែន លើកឡើងថា លោក សម រង្ស៊ី មានបំណងកាត់ទឹកដីកម្ពុជាទៅឱ្យជនបរទេស គ្រាខ្លួនមិនទាន់បានឡើងកាន់អំណាច។ លោកថ្លែងបន្ថែមថា ការកាត់សេចក្តីរបស់តុលាការធ្វើឡើងដោយមានភស្តុតាងគ្រប់គ្រាន់។
បើតាមលោកនាយករដ្ឋមន្ត្រី ហ៊ុន សែន ការចុះកិច្ចសន្យារវាងលោក សម រង្ស៊ី ជាមួយនឹងអ្នកតំណាងជនជាតិដើមភាគតិចម៉ុងតាញ៉ានោះ បញ្ជាក់បានថា អតីតប្រធានគណបក្សសង្គ្រោះជាតិរូបនេះ ជាជនក្បត់ជាតិ ដោយសារតែក្រុមជនជាតិម៉ុងតាញ៉ានោះ ប្រើប្រាស់ទង់ជាតិរបស់ខ្លួនមួយដាច់ដោយឡែក ពីកម្ពុជា និងវៀតណាម។
លោក ហ៊ុន សែន ថ្លែងថា៖ «បងប្អូនប្រជាពលរដ្ឋត្រូវមើលឃើញឱ្យច្បាស់ពីចរិតសារជាតិក្បត់ជាតិរបស់ជនក្បត់ជាតិនេះ ដែលខ្ញុំចាត់ទុកថាជាអំពើក្បត់បីជំនាន់មកនោះ តាំងពីជីតា ឪពុក រហូតមកដល់កូន។ សូម្បីតែយើងសព្វថ្ងៃ ចរចា មួយតឹក មួយផឹង ចុះហត្ថលេខាទើបបាន ៨៤ % ប៉ុណ្ណោះ។ នៅសល់ ១៦% ទៀត នៅតថ្លៃគ្នាស្វិតស្វាញនៅទីនេះ ប៉ុន្តែហេតុអ្វីបានជាជននេះមិនទាន់បានកាន់អំណាចផង បែរជាហ៊ានកាត់ទឹកដីរហូតដល់បួនខេត្តទៅឱ្យជនបរទេស»។
លោកអះអាងទៀតថា៖ «គេមានទង់ជាតិរបស់គេមួយ មិនមែនជាទង់ជាតិខ្មែរ ហើយក៏មិនមែនទង់ជាតិវៀតណាមដែរ គឺជាទង់ជាតិមួយនៃរដ្ឋដែលគេបានបង្កើតប្រឆាំងជាមួយរដ្ឋាភិបាលវៀតណាម និងសហការជាមួយក្រុមឧទ្ទាមក្រៅច្បាប់នៅកម្ពុជា ដែលគេបានចុះហត្ថលេខា»។
បើតាមលោក ហ៊ុន សែន ការវិលត្រឡប់មកចូលប្រទេសកម្ពុជាវិញរបស់លោក សម រង្ស៊ី គឺមិនអាចធ្វើទៅរួចនោះឡើយ ដោយហេតុថាលោក សម រង្ស៊ី នឹងមិនទទួលបានការលើកលែងទោសពីលោកជាលើកទី ៣ ទេ។
លោក ហ៊ុន សែន ថ្លែងយ៉ាងដូច្នេះ៖ «អត់មានផ្លូវទេ។ ខ្ញុំធ្លាប់បានអនុគ្រោះឱ្យជនក្បត់ជាតិនេះពីរដងរួចស្រេចទៅហើយ។ ឯជនក្បត់ជាតិនេះ មិនត្រឹមតែមិនធ្វើការកែប្រែ ក៏ប៉ុន្តែពួកគេនៅបន្តបំផ្លិចបំផ្លាញកម្ពុជា។ ដូច្នេះ ខ្ញុំមិនត្រឹមតែមិនលើកលែង លើកដៃលើកលែង ចុះហត្ថលេខាលើកលែងឱ្យជនក្បត់នេះតែប៉ុណ្ណោះទេ។ ប៉ុន្តែខ្ញុំកំពុងតែបំផុសចលនា ដើម្បីនឹងកម្ចាត់ចោលនូវមនោគមវិជ្ជាជ្រុលនិយមនៃជនក្បត់បីជំនាន់»។
ការថ្លែងចោទប្រកាន់របស់លោក ហ៊ុន សែន មកលើលោក សម រង្ស៊ី ថាជាជនក្បត់ជាតិម្តងហើយម្តងទៀតនោះ ធ្វើឡើងក្រោយតុលាការក្រុងភ្នំពេញបានផ្តន្ទាទោសលោក សម រង្ស៊ី ឱ្យជាប់ពន្ធនាគារអស់មួយជីវិត ចំពោះការចុះហត្ថលេខាជាមួយប្រធានមូលនិធិម៉ុងតាញ៉ា ដែលមានមូលដ្ឋាននៅសហរដ្ឋអាមេរិកគឺលោក កុក ស អំពីការកាត់ទឹកដីបួនខេត្តរបស់កម្ពុជា ឱ្យទៅជនជាតិដើមភាគតិចម៉ុងតាញ៉ា។ តុលាការក៏ដកហូតសិទ្ធិធ្វើនយោបាយរបស់លោក សម រង្ស៊ី ក្នុងសំណុំរឿងកាត់ដីឱ្យជនជាតិដើមភាគតិចម៉ុងតាញ៉ានេះផងដែរ។
លោកយុង ផានិត មេធាវីការពារក្តីឱ្យលោក សម រង្ស៊ី ប្រាប់វីអូអេថា ការសម្រេចរបស់តុលាការគឺធ្វើឡើងដោយមិនមានភស្តុតាងគ្រប់គ្រាន់ដាក់បន្ទុកនោះឡើយ ព្រោះសម្រាប់ការកាត់ក្តីនេះ តុលាការសម្អាងតែទៅលើលិខិតស្នាមដែលបានចុះកិច្ចសន្យារវាងលោក សម រង្ស៊ី ជាមួយនឹងលោក កុក ស កាលពីឆ្នាំ ២០១៣ តែប៉ុណ្ណោះ។
លោក យុង ផានិត ថ្លែងថា៖ «ខ្ញុំយល់ឃើញថា អត់មានភស្តុតាងគ្រប់គ្រាន់ទៅលើបទចោទប្រកាន់នេះទេ។ អាហ្នឹងខ្ញុំឱ្យលុបបទចោទ»។
ក្នុងសំណុំរឿងកាត់ដីខ្មែរឱ្យជនជាតិដើមភាគតិចម៉ុងតាញ៉ានេះ លោក សម រង្ស៊ី កន្លងមក បានបដិសេធការចោទប្រកាន់ ដោយថា ភាសារបស់លោកដែលបានប្រើពេលចុះហត្ថលេខានៅសហរដ្ឋអាមេរិកកាលពីឆ្នាំ ២០១៣ នោះ មានន័យសំដៅទៅលើការគោរពសិទ្ធិរបស់ជនជាតិដើមភាគតិច តាមរយៈការអនុញ្ញាតឱ្យពួកគេមានលទ្ធភាពកាន់កាប់ដីធ្លីនិងមានសេរីភាពក្នុងការប្រណិប័តន៍ជំនឿសាសនាដែលស្មើភាពគ្នាដូចនឹងជនជាតិខ្មែរទូទៅដែរ។
បើតាមលោក សម រង្ស៊ី អ្វីដែលលោកបាននិយាយ គឺស្របទៅតាមច្បាប់អន្តរជាតិដែលមានចែងក្នុងអង្គការសហប្រជាជាតិស្តីពីសិទ្ធិជនជាតិដើមភាគតិច៕
រាយការណ៍បន្ថែមដោយ លោក ហាន ណូយ
