នាយករដ្ឋមន្ត្រីខ្មែរលោក ហ៊ុន សែន បានចេញសារបន្ទាន់មួយកាលពីយប់ថ្ងៃពុធ ដោយបញ្ជាឲ្យអាជ្ញាធរបិទជាបណ្តោះអាសន្នការធ្វើដំណើររបស់ពលរដ្ឋចេញពីក្រុងព្រះសីហនុ ទីដែលមានកម្រិតឆ្លងខ្ពស់មួយគួរឲ្យព្រួយបារម្ភនៃជំងឺកូវីដ១៩។
ក្នុងខ្សែអាត់ជាសំឡេងដែលមានរយៈពេលជាង៤នាទី មេដឹកនាំប្រទេសកម្ពុជារូបនេះ យល់ថា ករណីឆ្លងដែលកើនឡើងនៅក្នុងខេត្តព្រះសីហនុ តម្រូវឲ្យមានវិធានការបន្ទាន់មួយ គឺត្រូវទប់ការបម្លាស់ទីរបស់ពលរដ្ឋចេញពីខេត្តព្រះសីហនុ បន្ថែមលើវិធានការចាក់វ៉ាក់សាំងដែលកំពុងបន្ត។
លោក ហ៊ុន សែន បន្ថែមថា ការចរាចរណ៍ទំនិញចេញពីខេត្តជាប់មាត់សមុទ្រមួយនេះ នឹងមិនត្រូវបានធ្វើឲ្យអាក់ខានទេ ក៏ប៉ុន្តែពលរដ្ឋដែលចង់ចាកចេញពីខេត្តនេះ ទៅកាន់ខេត្តផ្សេងៗទៀត ដូចជាខេត្តកែប និងកំពតតាមផ្លូវជាតិលេខ៤នោះ នឹងមិនត្រូវបានអនុញ្ញាតទេ។
«យើងមិនអាចបិទបានទាំងស្រុងទេ ដោយសារយើងមិនបិទក្រុងហ្នឹងបានទេ ដោយសារតែវាពាក់ព័ន្ធជាមួយនឹងការនាំចេញនាំចូលទំនិញ។ ប៉ុន្តែចំពោះមនុស្សអាចនឹងមានការតម្រូវឲ្យមានការខិតខំ ដើម្បីនឹងទប់ស្កាត់នូវការរីករាលដាលទៅកាន់ខេត្តផ្សេង ចម្លងនឹងកាត់ខេត្តផ្សេង អ៊ីចឹងគឺសុំឲ្យគេស្នាក់នៅខេត្តព្រះសីហនុ កុំឲ្យចេញមកក្រៅ ដូចជាកែប ដូចជាកំពត ឬក៏មកតាមផ្លូវជាតិលេខបួន»។
វិធានជាអាទិភាពដែលនឹងធ្វើបន្តទៀតនោះ គឺការជំរុញឲ្យពលរដ្ឋរស់នៅទីនោះទៅទទួលវ៉ាក់សាំង ដើម្បីបង្ការការឆ្លងបន្ថែម។ នេះបើតាមការអំពាវនាវរបស់លោកនាយករដ្ឋមន្ត្រី។
លោក ហ៊ុន សែន ថ្លែងយ៉ាងដូច្នេះ៖ «វិធានការទីពីរ គឺជំរុញការចាក់វ៉ាក់សាំងដែលនឹងត្រូវបន្ត វ៉ាក់សាំងទាំងសម្រាប់អ្នកដែលក្រោមអាយុ៥៩ឆ្នាំ ពី៥៩ឆ្នាំចុះ និងថែមទៅ AstraZeneca សម្រាប់៦០ឆ្នាំឡើង សម្រាប់ប្រជាពលរដ្ឋផង សម្រាប់មន្ត្រីរាជការដែលមានអាយុលើសពី៦០ រាប់ទាំងជនចូលនិវត្តន៍»។
បើតាមស្ថិតិចុងក្រោយរបស់ក្រសួងសុខាភិបាល គិតត្រឹមថ្ងៃទី៤ ខែមីនា មានករណីឆ្លងថ្មីចំនួន២៨ករណី ដែលពាក់ព័ន្ធនឹងព្រឹត្តិការណ៍២០កុម្ភៈ។
ជារួម ករណីឆ្លងក្នុងព្រឹត្តិការណ៍២០កុម្ភៈ បានកើនដល់៤០២ករណី ដែលភាគច្រើនជាពលរដ្ឋខ្មែរនិងជនជាតិចិនរស់នៅក្នុងរាជធានីភ្នំពេញ និងខេត្តព្រះសីហនុ។
រដ្ឋបាលខេត្តព្រះសីហនុ និងក្រសួងសុខាភិបាលបានឲ្យដឹងថា គិតត្រឹមថ្ងៃទី៤ ខែមីនានេះ មនុស្សចំនួន៨០នាក់ ត្រូវបានរកឃើញថា មានមេរោគបង្កជំងឺកូវីដ១៩ ក្នុងខេត្តដែលជាទិសដៅទេសចរណ៍សំខាន់មួយផងដែរនោះ។
រដ្ឋបាលខេត្តព្រះសីហនុឲ្យដឹងនៅថ្ងៃព្រហស្បតិ៍នេះដែរថា ពាក់ព័ន្ធព្រឹត្តិការណ៍សហគមន៍ ២០កុម្ភៈ មានករណីឆ្លងជំងឺកូវីដ១៩ ដល់មនុស្សដែលកំពុងរស់នៅ ធ្វើការ ប្រកបអាជីវកម្មនៅខេត្តព្រះសីហនុ«ក្នុងចំនួនមួយគួរឲ្យព្រួយបារម្ភ»។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ មានប្រសាសន៍ថា វិធានការបិទការធ្វើដំណើររបស់ពលរដ្ឋចេញពីខេត្តព្រះសីហនុនេះ នឹងធ្វើឡើងតែ«មួយរយៈពេល» ហើយការប្រែប្រួលខាងមុខ អាស្រ័យលើការសម្រេចរបស់ថ្នាក់ដឹកនាំខេត្ត។ វិធានការពិនិត្យនឹងធ្វើឡើងនៅតំបន់មួយចំនួនតូចដែលជាការកំណត់របស់រដ្ឋបាលស្រុក និងក្រុងព្រះសីហនុ។
«តាមគោលការណ៍របស់គណៈបញ្ជាការឯកភាព គឺយើងត្រួតពិនិត្យ ដើម្បីបើមិនចាំបាច់កុំឲ្យចរាចរចាកចេញ ដើម្បីជៀសវាងបញ្ហារាលដាលមេរោគ កូវីដហ្នឹងមួយរយៈពេលទេ ហើយរហូតដល់ថ្ងៃសេចក្តីជូនដំណឹងវិញនោះ ក្រុមការងារឯកឧត្តមអភិបាលខេត្តរៀបចំ»។
ស្នងការនគរបាលខេត្តព្រះសីហនុរូបនេះបន្ថែមថា កម្លាំងនគរបាលនឹងផ្តើមវិធានការបិទការធ្វើដំណើររបស់ពលរដ្ឋចេញពីខេត្តព្រះសហីនុ នៅពេលមានសេចក្តីណែនាំរបស់អភិបាលខេត្ត។
លោកស្រី ជាប សុធារី មន្ត្រីសម្របសម្រួលរបស់សមាគមការពារសិទ្ធិមនុស្សអាដហុក ប្រចាំខេត្តព្រះសីហនុលើកឡើងពីការបារម្ភមួយចំនួនពាក់ព័ន្ធនឹងស្ថានភាពរកប្រាក់ចំណូលរបស់អ្នករត់រថយន្តតាក់ស៊ីនិងអ្នកដែលត្រូវធ្វើដំណើរចេញពីខេត្តព្រះសីហនុ ដើម្បីបំពេញភារកិច្ចចាំបាច់របស់ខ្លួននៅតំបន់ផ្សេង ឬក៏មកពិនិត្យសុខភាពនៅរាជធានីភ្នំពេញ។
«ប៉ុន្តែបើសិនជាអីចេះ អាហ្នឹងក៏ល្អប្រសើរដែរថា ឲ្យអ្នកខាងប្រកបមុខរបររកស៊ីតាក់ស៊ី គាត់ធ្វើការសម្អាត ហើយមានទឹកអាល់កុល ម៉ាសអីហ្នឹង ហើយចង់និយាយថា តាក់ស៊ី រាល់ដងជិះមនុស្សច្រើន តែឥឡូវអាចដូចថា ជិះទៅតាមចំនួនដែលអាចដាក់បានដូចថាគម្លាតគ្នា តាមធម្មតាប្រទេសគេតាក់ស៊ីមួយគេជិះគ្នាតែ៤នាក់ តែតាក់ស៊ីស្រុកយើងមិនមែនជិះ៤នាក់ទេ...ដាក់អស់»។
ស្នងការប៉ូលិសខេត្តព្រះសីហនុលោកជួន ណារិន ប្រាប់វីអូអេបន្ថែមថា បុគ្គលដែលមិនអនុវត្តតាមបម្រាមធ្វើដំណើរចេញចូលខេត្តជាបណ្តោះអាសន្ននេះ នឹងត្រូវទទួលការឆ្លើយតបជាមួយវិធានការផ្សេងៗតាមអនុក្រឹត្យស្តីពីវិធានការចត្តាឡីស័ក ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន កាលពីថ្ងៃទី១៨ ខែកុម្ភៈ ឆ្នាំ២០២១។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ មានប្រសាសន៍ថា ពលរដ្ឋនឹងមិនត្រូវបានអនុញាតឲ្យចាកចេញផុតពីព្រំប្រទល់ខេត្តព្រះសីហនុទៅកាន់ទីតាំងផ្សេងទៀត តាមគ្រប់រូបភាពនៃមធ្យោបាយធ្វើដំណើរ។
«អ៊ីចឹងបានន័យថា ច្រកសំខាន់ៗ ដែលត្រូវចេញចូលឆ្លងកាត់ ចេញពីខេត្តនិងចូលមកខេត្តព្រះសីហនុវិញនោះ គឺត្រូវបានបិទផ្អាកជាបណ្តោះអាសន្ន។ អ៊ីចឹង ទាំងយើងនិយាយទៅ ទាំងមនុស្ស ដែលគាត់យើងនិយាយថា គ្រប់មធ្យោបាយទាំងអស់»។
លោកបញ្ជាក់ថា ស្រុកជាច្រកចេញចូលខេត្តព្រះសីហនុសំខាន់ៗ ដែលនឹងត្រូវបិទផ្អាកជាបណ្តោះអាសន្នមិនឲ្យពលរដ្ឋធ្វើដំណើរឆ្លងកាត់ លើកលែងតែរថយន្តដឹកទំនិញ និងរថយន្តសង្គ្រោះបន្ទាន់នោះ រួមមានស្រុកកំពង់សិលា មានព្រំប្រទល់ជាប់ខេត្តកំពង់ស្ពឺតាមផ្លូវជាតិលេខបួន និងជាប់ខេត្តកោះកុងនៅត្រង់ចំណុចផ្លូវបំបែកស្រែអំបិល និងស្រុកព្រៃនប់ ដែលមានព្រំប្រទល់ជាប់ខេត្តកំពតនៅត្រង់ចំណុចត្រពាំងល្ពៅ៕
