អគ្គរដ្ឋអាជ្ញានៃប្រទេសហ្គំប៊ីដែលដាក់ពាក្យបណ្តឹងទៅតុលាការអន្តរជាតិ បានប្រាប់សារព័ត៌មាន Reuters កាលពីថ្ងៃទី១៤ ខែមករាថា គេរំពឹងថា អ្នកតំណាងនៃរបបយោធាមីយ៉ាន់ម៉ា នឹងតវ៉ាលើយុត្តាធិការរបស់តុលាការអន្តរជាតិក្នុងការកាត់ក្តីលើបទចោទដែលថា ប្រទេសនេះ ប្រព្រឹត្តអំពើប្រល័យពូជសាសន៍លើជនជាតិភាគតិចរ៉ូហ៊ីងយ៉ា នៅក្នុងជុំដំបូងនៃសវនាការ ចាប់ពីថ្ងៃទី២១ ខែកុម្ភៈខាងមុខតទៅ។
លោកអគ្គរដ្ឋអាជ្ញា Dawda Jallow បានថ្លែងក្នុងសម្តីដើមថា៖ «សវនាការកូនកាត់មួយ នឹងត្រូវចាប់ផ្តើមនៅថ្ងៃទី២១ ខែកុម្ភៈ ឆ្នាំ២០២២»។
លោក Jallow បានបន្ថែមថា អ្នកស្រី Aung San Suu Kyi ជាអ្នកដឹកនាំការការពាររឿងក្តីសម្រាប់ប្រទេសមីយ៉ាន់ម៉ានេះ នៅក្នុងសវនាការសាធារណៈជុំទី១នៅក្នុងឆ្នាំ២០១៩ ប៉ុន្តែបន្ទាប់ពីរដ្ឋប្រហារដណ្តើមអំណាចដោយយោធាមក តួនាទីជាអ្នកតំណាងជាន់ខ្ពស់អ្នកស្រីក្នុងរឿងក្តីនេះ ត្រូវបានជំនួសជាផ្លូវការ។
សវនាការកូនកាត់ គឺជានីតិវិធីមួយដែលអ្នកចូលរួមមួយចំនួនមានវត្តមានដោយផ្ទាល់ និងអ្នកផ្សេងចូលរួមតាមប្រព័ន្ធអ៊ីនធឺណិតដោយសារវិធានការបង្ការជំងឺកូវីដ១៩។
ជនជាតិភាគតិចរ៉ូហ៊ីងយ៉ាជាង ៧៣០.០០០ នាក់ បានរត់ភៀសខ្លួន បន្ទាប់ពីមានការបង្ក្រាបដែលដឹកនាំដោយយោធានៅក្នុងឆ្នាំ២០១៧ និងត្រូវបានបង្ខំឱ្យរស់នៅក្នុងជំរំស្មោកគ្រោកនៅតាមព្រំដែនក្នុងប្រទេសបង់ក្លាដែស។ អ្នកអង្កេតការណ៍អង្គការសហប្រជាជាតិសន្និដ្ឋានថា យុទ្ធនាការយោធា ត្រូវបានអនុវត្តដោយមាន «ចេតនាប្រល័យពូជសាសន៍»។
អ្នកនាំពាក្យម្នាក់នៃតុលាការព្រហ្មទណ្ឌអន្តរជាតិបដិសេធមិនបញ្ជាក់ថា តើកាលបរិច្ឆេទសម្រាប់សវនការថ្មី ត្រូវបានផ្លាស់ប្តូរ ឬយ៉ាងណាទេ។
នៅក្នុងខែធ្នូ ឆ្នាំ២០១៩ ម្ចាស់ពានរង្វាន់ណូបែលសន្តិភាពអ្នកស្រី Suu Kyi ដែលនៅពេលនោះជាមេដឹកនាំស៊ីវិលរបស់មីយ៉ាន់ម៉ា បានចូលរួមក្នុងសវនាការដោយផ្ទាល់នៅទីក្រុងឡាអេដើម្បីស្នើសុំឱ្យចៅក្រមទម្លាក់ចោលបទចោទ។
អ្នកស្រីត្រូវបានយោធាទម្លាក់ពីតំណែងនៅក្នុងរដ្ឋប្រហារឆ្នាំ២០២១ ហើយចាប់ពីពេលនោះមក ត្រូវបានកាត់ទោសឱ្យជាប់ពន្ធនាគារ ៦ឆ្នាំ និងប្រឈមមុខនឹងបទចោទជាច្រើនផ្សេងទៀត។
ការណ៍ដែលកងទ័ពដណ្តើមការកាន់កាប់រដ្ឋាភិបាលជាប់ឆ្នោតតាមបែបប្រជាធិបតេយ្យ នាំឱ្យមានការតវ៉ាយ៉ាងច្រើន។
រដ្ឋាភិបាលយោធា បានព្យាយាមប្រយុទ្ធដើម្បីឱ្យមានការទទួលស្គាល់ជាអន្តរជាតិ និងអន្ទះសារចង់បានឱកាសដើម្បីបង្ហាញថា ពួកគេជាអ្នកតំណាងស្របច្បាប់របស់មីយ៉ាន់ម៉ានៅតុលាការជាន់ខ្ពស់របស់អង្គការសហប្រជាជាតិនេះ។
ប្រភពនានាដែលដឹងសំណុំរឿងនេះនិយាយថា រដ្ឋាភិបាលយោធា បានចូលរួមជាមួយតុលាការដើម្បីដាក់របាយការណ៍ដែលតុលាការបង្គាប់បញ្ជាឱ្យដាក់ជារៀងរាល់ខែស្តីពីស្ថានភាពជនជាតិភាគតិចរ៉ូហ៊ីងយ៉ា។ របាយការណ៍នេះ មិនត្រូវបានធ្វើឡើងជាសាធារណៈនោះទេ។
ជំហានបន្ទាប់នៅក្នុងនីតិវិធីតុលាការយុត្តិធម៌អន្តរជាតិ គឺជាការតវ៉ារបស់មីយ៉ាន់ម៉ាប្រឆាំងយុត្តាធិការរបស់តុលាការ។ សំណួរពាក់ព័ន្ធថា តើអំពើប្រល័យពូជសាសន៍ កើតមានក្នុងប្រទេសមីយ៉ាន់ម៉ា ឬអត់ នឹងត្រូវលើកឡើងនៅក្នុងសវនាការលើកក្រោយទៀត៕
សេចក្តីរាយការណ៍បន្ថែមដោយ លោក ម៉ែន គឹមសេង
