ភ្ជាប់​ទៅ​គេហទំព័រ​ទាក់ទង

មន្ត្រី​រដ្ឋាភិបាល​ទាត់ចោល​របាយ​ការណ៍​អង្គការ​លីកាដូ​ស្តីពី​ការ​រំលោភ​បំពាន​លើ​អ្នក​ការពារ​សិទ្ធិ​មនុស្ស


រូបឯកសារ៖ លោក​ សុខ​ ឥសាន​ អ្នកនាំពាក្យ​គណបក្សប្រជាជន​កម្ពុជា​ ប្រាប់​ក្រុម​អ្នក​សារព័ត៌មាន​ កាលពី​ថ្ងៃ​ទី៥​ ខែមករា​ ឆ្នាំ​ ២០១៧​ អំពើ​សំណើរបស់​គណបក្ស​កាន់​អំណាច​ក្នុង​ការ​កែសម្រួល​បទបញ្ជា​ និង​នីតិវិធីសម្រាប់​ការ​បោះឆ្នោត​ ឃុំ​ សង្កាត់។​ (ហ៊ុល រស្មី/VOA)

មន្ត្រី​រដ្ឋាភិបាល​ទាត់ចោល​របាយ​ការណ៍​អង្គការ​លីកាដូ​ស្តីពី​ការ​រំលោភ​បំពាន​លើ​អ្នក​ការពារ​សិទ្ធិ​មនុស្ស ប៉ុន្តែមន្ត្រីរដ្ឋាភិបាល​ការពារ​សកម្មភាព​របស់​អាជ្ញាធរ។

អង្គការការ​ពារ​សិទ្ធិ​មនុស្ស​លីកាដូ​បាន​រក​ឃើញ​ការ​រំលោភ​បំពាន​នានា​ទៅ​សិទ្ធិ​សេរីភាព​របស់​ពល​រដ្ឋ​កម្ពុជា​ ​ហើយ​និងការ​វាយ​ប្រហារ​លើ​អ្នក​ការពារ​សិទ្ធិ​មនុស្ស និង​អ្នក​និយាយ​រិះគន់​រដ្ឋាភិបាល​ ​មន្ត្រី​រដ្ឋាភិបាល​ទាត់ចោល​របាយ​ការណ៍​អង្គការ​លីកាដូ​ស្តីពី​ការ​រំលោភ​បំពាន​លើ​អ្នក​ការពារ​សិទ្ធិ​មនុស្ស ​ដោយ​ប្រើប្រព័ន្ធ​តុលាការ​ ដែល​អង្គការ​ដដែល​នេះ​អះអាង​ថា ​នៅ​មិនទាន់​មាន​ភាព​ឯករាជ្យ​នៅ​ឡើយ។​ ក៏​ប៉ុន្តែ​ ​របាយ​ការណ៍​របស់​អង្គការ​សិទ្ធិ​មនុស្ស​ដ៏​សំខាន់​នេះ​ត្រូវ​បាន​ច្រានចោល​ភ្លាមៗ​ ​ដោយ​មន្ត្រី​គណ​បក្ស​កាន់​អំណាច​ ​ដែល​លើក​ឡើង​ថា ​រដ្ឋាភិបាល​បាន​ផ្តល់​សិទ្ធិ​គ្រប់គ្រាន់​ដល់​ពលរដ្ឋ​គ្រប់​រូប។​

របាយ​ការណ៍​សង្ខេប​ស្តីពី​ ​«ហានិភ័យ​នៃ​សំឡេង​រិះគន់៖​ ការ​រំលោភ​បំពាន​ទៅ​លើ​អ្នក​ការពារ​សិទ្ធិ​មនុស្ស» ​ដែល​ចេញផ្សាយ​ជា​សាធារណៈ​កាល​ពី​ថ្ងៃ​ចន្ទ ​បានឲ្យ​ដឹង​ផង​ដែរ​ថា​ វិធី​សាស្ត្រ​ដដែលៗ ​ដែល​រឹត​ត្បិត​សំឡេង​អ្នក​ការពារ​សិទ្ធិ​មនុស្ស ​ត្រូវ​បាន​ប្រើប្រាស់​ ក្នុង​នោះ​មាន​ការ​ប្រើ​ប្រាស់​ប្រព័ន្ធ​តុលាការ​ដែល​មាន​លក្ខណៈ​លម្អៀង​ ការ​ប្រើ​ប្រាស់​អំពើ​ហិង្សា​ដែល​គាំទ្រ​ដោយ​អាជ្ញាធរ​ និង​ការ​បង្រ្កាប​លើការ​តវ៉ា​ដោយ​ហិង្សា​នា​នា​ ត្រូវ​បាន​បន្ថែម​ទម្ងន់​តាម​រយៈការ​អនុម័ត​ច្បាប់​ថ្មី​មួយ​ចំ​នួន​ ​ដែល​មាន​លក្ខណៈ​គាប​សង្កត់​ ហើយ​នឹង​ការត្រួត​ពិនិត្យ​ចាប់​ពិរុទ្ធ​តាម​រយៈ​ប្រព័ន្ធ​អ៊ិន​ធើណេត​ជាដើម។​

រូបឯកសារ៖ សាកសព​របស់​លោក កែម ឡី ត្រូវ​បាន​បញ្ជូន​ដល់​គេហដ្ឋាន​របស់​លោក​នៅ​ឃុំ​លាយបូ ស្រុកត្រាំកក់ ខេត្តតាកែវ នៅ​ថ្ងៃអាទិត្យ ទី២៤ ខែកក្កដា ឆ្នាំ២០១៦។ (ផន បុប្ផា/VOA)
រូបឯកសារ៖ សាកសព​របស់​លោក កែម ឡី ត្រូវ​បាន​បញ្ជូន​ដល់​គេហដ្ឋាន​របស់​លោក​នៅ​ឃុំ​លាយបូ ស្រុកត្រាំកក់ ខេត្តតាកែវ នៅ​ថ្ងៃអាទិត្យ ទី២៤ ខែកក្កដា ឆ្នាំ២០១៦។ (ផន បុប្ផា/VOA)

របាយ​ការណ៍​ដែល​មាន​៣៩​ទំព័រ​នេះ​បាន​ពណ៌នា​អំពីការ​បាញ់​សម្លាប់​លោក​កែម ឡី​ទាំង​កណ្តាល​ថ្ងៃ​ នៅ​រាជធានី​ភ្នំពេញ​កាលពី​ថ្ងៃ​ទី១០​ ខែ​កក្កដា​ឆ្នាំ​ ២០១៦។​ លោកកែម ឡីគឺ​ជា​អ្នក​វិភាគ​នយោបាយដ៏​លេច​ធ្លោ​ម្នាក់​នៅ​កម្ពុជា។​ ​ឃាតកម្ម​លោករូប​លោក​បានកើត​មាន​ឡើង​ នៅ​ខណៈ​ដែល​មាន​ការ​កើន​ឡើង​នូវ​ការ​រឹត​ត្បិត​ពី​អាជ្ញាធរ។​

រូបឯកសារ៖ លោក​ គឹម សុខ​ អ្នកវិភាគនយោបាយ​ម្នាក់ កំពុង​ជាប់ឃុំ​ឃាំង​បណ្តោះ​អាសន្ន​។
រូបឯកសារ៖ លោក​ គឹម សុខ​ អ្នកវិភាគនយោបាយ​ម្នាក់ កំពុង​ជាប់ឃុំ​ឃាំង​បណ្តោះ​អាសន្ន​។

​មាន​អ្នក​រិះគន់​រដ្ឋាភិបាល​មួយរូប​ទៀត​គឺ​លោក ​គឹម សុខ ​កំពុង​ជាប់ឃុំ​ឃាំង​បណ្តោះ​អាសន្ន​ រង់​ចាំ​សវនាការ​ ក្រោម​បទ​ចោទ​បរហារិកេរ្តិ៍ ​និងញុះញង់​ ដោយសារ​សកម្ម​ភាព​របស់​លោក​ក្នុង​ការ​ធ្វើ​បទ​អធិប្បាយ​ក្នុង​កិច្ច​សម្ភាសន៍​មួយ​ ជា​មួយ​វិទ្យុ​អាស៊ី​សេរី​ ពាក់ព័ន្ធ​នឹង​សំណុំ​រឿង​ឃាតកម្ម​លើ​លោក​កែម ឡី​នោះ។​ ហើយកាលពី​ថ្ងៃ​ទី​១២​ ​ខែ​មីនា​ ​យុវជន​បួន​នាក់​ត្រូវ​បាន​គេ​ចាប់​ខ្លួន​ និង​ឃាត់​ខ្លួន​រយៈពេល​ខ្លី​ ​នៅ​ពេល​ដែល​នគរបាល​ ​និងកង​សន្តិ​សុខ​ខ័ណ្ឌ​ ប្រមាណ​៤០​នាក់​ បាន​ហាម​ឃាត់ ​មិន​ឲ្យចាក់​បញ្ចាំង​វីដេអូឯកសារ​របស់​សារ​ព័ត៌មាន​បរទេស​ Al Jazeera​ ​ជា​លក្ខណៈ​ឯកជន​អំពី​ឃាតកម្ម​លើ​លោកកែម ឡី​ ​ដែល​វីដេអូ​នេះ​ត្រូវ​បាន​គេ​ ​ផ្សព្វផ្សាយ​ជា​សាធារណៈ​នៅលើ​ប្រព័ន្ធ​អ៊ីនធឺណេត​តាំង​ពីប៉ុន្មាន​ខែ​មុន​មក​ម្ល៉េះ។

លោក ​សុខ ឥសាន​ ​អ្នក​នាំពាក្យ​គណបក្ស​ប្រជាជន​កម្ពុជា​ បាន​ច្រាន​ចោល​របាយ​ការណ៍របស់​ក្រុមការពារ​សិទ្ធិ​មនុស្ស​លីកាដូ​ ​ដោយ​លើ​ហេតុផល​ថា​ ប្រទេស​កម្ពុជា​បាន​ផ្តល់​សិទ្ធិ​សេរីភាព​យ៉ាង​ច្រើន​ដល់​ពលរដ្ឋ​ខ្លួន​ ដោយ​លោក​បាន​លើក​ជាឧទាហរណ៍​ទាក់ទិន​សេរីភាព​សារ​ព័ត៌មាន​នៅ​ក្នុង​ប្រទេស។​

លោក ​សុខ ឥសាន​ ​អ្នក​នាំពាក្យ​គណបក្ស​ប្រជាជន​កម្ពុជា​ ​ថ្លែង​ប្រាប់​ VOA​ ​កាល​ពីថ្ងៃ​ចន្ទ​ថា៖

«ពីព្រោះ​សារព័ត៌មាន​ ការ​ផ្សាយ​វិទ្យុ​ ការ​ផ្សាយ​ទូរទស្សន៍​គឺ​រដ្ឋ​មិន​បាន​ត្រួត​ពិនិត្យ​ខ្លឹម​សារ​នៃ​ការ​ផ្សាយ​មុន​ទេ។ ​ដូចយើង​នៅ​ក្នុង​ប្រព័ន្ធ​ផ្សព្វផ្សាយ​ យើង​ដឹង​ស្រាប់​ហើយ​ អត់​មាន​រដ្ឋ​ណា​ទៅ​ជ្រៀត​ជ្រែក​ ចូល​ខ្លឹមសារ​នៃ​ការ​ផ្សាយ​ទេ។​ ហើយ​បើ​ប្រទេស​មួយ​ចំនួន​ គេ​សុទ្ធ​តែ​ត្រួត​ពិនិត្យ​ខ្លឹម​សារ​សិន​ ទាំង​វិទ្យុ​ ទំាង​ទូរទស្សន៍​ ​ទាំង​កាសែត​ បាទ។ ​តែ​ដោយ​ឡែក​កម្ពុជា​ អត់​មាន​ពិនិត្យ​ខ្លឹម​សារ​ទេ​ ហើយតែ​ក្នុង​ករណី​ណា ដែល​មាន​ការ​តវ៉ា​ ឬ​មួយ​ខុស​ឆ្គង​ អា​ហ្នឹង​គឺ​រដ្ឋ​តម្រូវ​ឲ្យ​គ្រាន់​តែ​កែតម្រូវ​តែ​ប៉ុណ្ណោះ»។

របាយ​ការណ៍​ដដែល​របស់​អង្គការ​លីកាដូ​ស្តីពី​ការរំលោភ​បំពាន​ទៅ​លើ​អ្នក​ការពារ​សិទ្ធិ​មនុស្ស​ បាន​បន្ត​ឲ្យ​ដឹង​ថា​ ក្នុង​រយៈពេល​ពីរ​ឆ្នាំ​ចុង​ក្រោយ​នេះ​ ​អ្នក​ដែល​ហ៊ាន​ចេញ​តវ៉ា​ដើម្បី​សិទិ្ធ​មនុស្ស​អាច​ប្រឈម​មុខ​នឹង​ច្បាប់​ដែល​មាន​លក្ខណៈរឹតត្បិត​ បំភិត​បំភ័យ​ ដោយ​ប្រព័ន្ធ​ច្បាប់​ និង​ប៉ះពាល់​លើ​ការ​អនុវត្ត​សេរីភាព​ជាមូលដ្ឋាន​ ក្នុង​គោល​បំណង​បង្កើត​ឲ្យ​មាន​បរិយាកាស​ភ័យ​ខ្លាច​ និង​ស្ងប់​ស្ងាត់​ ដោយ​កាត់​បន្ថយ​សំឡេង​រិះគន់​នានា។ ​ការ​ប្រមូល​ផ្តុំ​ដោយ​សន្តិ​វិធី​មួយ​ចំនួន​ត្រូវ​បាន​ចាត់​ទុក​ថា​ ជា​បដិវត្តន៍​ ​និង​ត្រូវ​បាន​ហាម​ឃាត់​ ហើយ​តែង​តែ​ត្រូវបាន​បង្ក្រាប​ដោយ​ហិង្សា។​

ការ​ចេញ​របាយ​ការណ៍​សង្ខេប​របស់​អង្គការ​លីកាដូ​ស្តីពី​ការ​រំលោភ​បំពាន​ទៅ​លើ​អ្នក​ការពារ​សិទ្ធិ​មនុស្ស​នេះ​ ធ្វើ​ឡើង​តែ​ប៉ុន្មាន​ថ្ងៃ​ប៉ុណ្ណោះ​ បន្ទាប់​ពីតុលាការ​បានដោះលែង​អ្នក​ការពារ​សិទ្ធិ​មនុស្ស​បួន​នាក់​របស់​សមាគម​ការពារ​សិទ្ធិមនុស្ស​អាដហុក​ និង​មន្ត្រី​ជាន់​ខ្ពស់​ម្នាក់​របស់​គណៈ​កម្មាធិការ​ជាតិ​រៀបចំ​ការ​បោះឆ្នោត​ ឲ្យ​ពួកគេ​បាន​នៅក្រៅ​ឃុំ​ ក្នុង​សំណុំរឿង​សូកប៉ាន់​សាក្សី​ និង​សមគំនិត​សូកបាន់​សាក្សី។ ​អង្គការលីកាដូ​ក៏​បាន​រាប់​បញ្ចូល​ករណី​ចាប់​ឃុំខ្លួន​អ្នក​ទាំងប្រាំ​នេះ​ និង​អ្នក​ការពារ​សិទ្ធិ​មនុស្ស​ផ្សេង​ទៀត​ ដូចជា​អ្នកស្រី​ទេព វន្នីផង​ដែរ​ នៅ​ក្នុង​របាយ​ការណ៍​របស់​ខ្លួន។​

រូបឯកសារ៖ ពលរដ្ឋ​រស់នៅ​តំបន់​បឹងកក់​មួយ​ចំនួន​ចូលរួម​ដាក់​ញត្តិ​សុំដោះលែង​អ្នកស្រី ទេព វន្នី ដែល​កំពុង​ជាប់​ឃុំ នៅ​រាជធានី​ភ្នំពេញ កាលពី​ថ្ងៃទី១១ ខែឧសភា ឆ្នាំ២០១៧។ (ពិន ស៊ីសុវណ្ណ/VOA)
រូបឯកសារ៖ ពលរដ្ឋ​រស់នៅ​តំបន់​បឹងកក់​មួយ​ចំនួន​ចូលរួម​ដាក់​ញត្តិ​សុំដោះលែង​អ្នកស្រី ទេព វន្នី ដែល​កំពុង​ជាប់​ឃុំ នៅ​រាជធានី​ភ្នំពេញ កាលពី​ថ្ងៃទី១១ ខែឧសភា ឆ្នាំ២០១៧។ (ពិន ស៊ីសុវណ្ណ/VOA)

លោក ​សុខ ឥសាន​ ​អ្នកនាំពាក្យ​គណបក្ស​គ្រប់គ្រង​ប្រទេស​ បាន​ការពារ​វិធាន​ការ​ចាប់​ឃុំ​ខ្លួន​អ្នក​ការ​ពារ​សិទ្ធិ​មនុស្ស​ ដោយ​លើក​ឡើង​ថា​ អ្នក​ទាំងនោះបានធ្វើ​សកម្មភាព​ហួស​ពី​ការ​ទទួល​ខុស​ត្រូវ​របស់​ខ្លួន​ទាក់​ទិន​បញ្ហា​សិទ្ធិ​មនុស្ស។​

«ខ្ញុំ​យល់​ថា​ អា​ហ្នឹង​កុំ​ឲ្យ​គាត់​មើល​តែ​មួយ​ជ្រុង។​ មន្ត្រី​សិទ្ធិ​មនុស្ស​មិនមែន​ល្អ​ឥត​ខ្ចោះ​ទេ។ ធ្វើការ​ងារ​យើង​គោរព​អំពី​លក្ខន្តិកៈ​ បទបញ្ជា​នីតិវិធី​ផ្ទៃ​ក្នុង​របស់​យើង។ ក៏ប៉ុន្តែ​បើយើង​ទៅ​ធ្វើ​អ្វី​ វា​ប៉ះពាល់​ទៅ​ដល់​សមត្ថកិច្ច​ ប៉ះពាល់​ទៅដល់​សណ្តាប់​សាធារណៈ​ ​អាហ្នឹង​ម៉េច​ថា​ ត្រូវ? អា​ហ្នឹង​វា​អត់​ត្រូវ​ទេ! កុំ​អាង​សិទ្ធិ​ ឬ​មួយ​កុំ​អាង​ផ្លាក​សញ្ញា​ជាមន្ត្រី​សិទ្ធិ​មនុស្ស​ ឬអង្គការ​ស្អី​ផ្សេងៗ​នោះ»។​

រូបឯកសារ៖ លោក យឿង សុធារ៉ា សាស្ត្រាចារ្យ​ច្បាប់​នៃ​សាកល​វិទ្យាល័យ​បញ្ញាសាស្ត្រ​កម្ពុជា ចូលរួម​ជា​វាគ្មីន​ពិភាក្សា​អំពី​ឯករាជ្យភាព​នៃ​ប្រព័ន្ធ​យុត្តិធម៌​នៅ​កម្ពុជា នៅ​ក្នុង​កម្មវិធី Hello VOA កាលពី​ថ្ងៃច័ន្ទ ទី១៣ ខែមិថុនា ឆ្នាំ២០១៦។ (លឹម សុធី/VOA)
រូបឯកសារ៖ លោក យឿង សុធារ៉ា សាស្ត្រាចារ្យ​ច្បាប់​នៃ​សាកល​វិទ្យាល័យ​បញ្ញាសាស្ត្រ​កម្ពុជា ចូលរួម​ជា​វាគ្មីន​ពិភាក្សា​អំពី​ឯករាជ្យភាព​នៃ​ប្រព័ន្ធ​យុត្តិធម៌​នៅ​កម្ពុជា នៅ​ក្នុង​កម្មវិធី Hello VOA កាលពី​ថ្ងៃច័ន្ទ ទី១៣ ខែមិថុនា ឆ្នាំ២០១៦។ (លឹម សុធី/VOA)

យ៉ាងណា​ក៏ដោយ​ លោកយឿង សុធារ៉ា​ ​មន្ត្រី​ផ្នែកច្បាប់​ និង​អង្កេត​នៃ​អង្គការ​ខុម​ហ្វ្រែល​ បាន​ថ្លែង​ថា​ សកម្មភាព​រឹតត្បិត​សេរីភាព​ប្រជា​ពលរដ្ឋ​នានា​ ដែល​ធ្វើឡើង​ដោយ​អាជ្ញាធរ​នៅ​រាជធានី​ភ្នំពេញ​ បាន​ធ្វើ​ឲ្យ​គណបក្ស​កាន់​អំណាច​បាត់​បង់​ការ​គាំទ្រ​ជាច្រើន​ នៅ​ក្នុង​រាជធានី​ភ្នំពេញ​ តាម​ការ​បោះឆ្នោត​ឃុំ-សង្កាត់​ ដែល​បាន​រៀបចំ​ឡើង​កាលពី​ថ្ងៃ៤​ ខែ​មិថុនា​កន្លង​ទៅ។​ លោក​ថា​ ​អាជ្ញាធរ​បាន​ខិតខំ​ធ្វើការ​ងារ​ច្រើន​ដើម្បី​បម្រើ​ពលរដ្ឋ​ តែរឿង​រ៉ាវ​ដែល​បាន​កើត​ឡើង​នៅ​រាជធានី​ភ្នំពេញ​បាន​ធ្វើ​ឲ្យ​គណបក្ស​កាន់​អំណាច​ខូច​ឈ្មោះ។​

លោក យឿង សុធារ៉ា​ ​មន្ត្រី​ផ្នែកច្បាប់​ និង​អង្កេត​នៃ​អង្គការ​ខុម​ហ្វ្រែល​ថ្លែង​ថា៖

«គណបក្ស​កាន់​អំណាច​ គាត់​ធ្លាក់​សំឡេង​ឆ្នោត​ច្រើន​នៅ​ទីក្រុង​ភ្នំពេញ​នេះ​ សរ​បញ្ជាក់​ថា​សកម្ម​ភាព​មួយ​ចំនួន​ គាត់​បាន​ប្រព្រឹត្ត​អីចឹង ហើយ​ធ្វើ​ឲ្យ​ប្រជា​ពលរដ្ឋ​គាត់​មិន​សប្បាយ​ចិត្ត​ ហើយ​ជា​លទ្ធផល​គាត់​ធ្លាក់​សំឡេង​ឆ្នោត​ច្រើន​នៅ​ទីប្រជុំជន​ ជាពិសេស​នៅ​ទីក្រុង​ភ្នំពេញ​ជាដើម»។

​របាយការណ៍​របស់​អង្គការ​ការពារ​សិទ្ធិមនុស្ស​លីកាដូ​បាន​ឲ្យដឹង​ថា ​មាន​អំពើ​ហិង្សា​មួយ​ចំនួន​បាន​គាំទ្រ​ដោយ​អាជ្ញាធរ។​ ​នគរ​បាល ​កងសន្តិសុខ​ និង​ទាហាន​ ជា​ញឹក​ញយ​ ត្រូវ​បាន​ដាក់​ពង្រាយ​ដើម្បី​រា​រាំង​ការ​ប្រមូល​ផ្តុំ​ដោយ​អហិង្សា​ ​និង​បំបែក​អ្នក​តវ៉ា​ ហើយ​អាច​ភ្ជាប់​ជាមួយ​នូវ​សកម្មភាព​ហិង្សា​ ដោយ​មិន​រើស​មុខ​ និង​ដាក់​គោល​ដៅ​លើ​បុគ្គល​ជាក់លាក់​ ​អាច​ធ្វើ​ឲ្យ​រង​របួស​ទៅ​លើ​អ្នក​ការពារ​សិទិ្ធ​មនុស្ស​ សកម្មជន​ និង​សហជីព​មួយ​ចំនួន។​

របាយ​ការណ៍​បាន​សរសេរ​ក្នុង​ន័យ​ដើម​ថា៖​

«កង​សន្តិសុខ​បាន​ចេញ​មុខ​ម្តង​ហើយ​ម្តងទៀត ​នៅ​ពេល​មាន​ការ​ប្រមូល​ផ្តុំ​បញ្ចេញ​មតិ​ណា​មួយ​ជំទាស់​នឹង​អាជ្ញាធរ។​ កង​សន្តិសុខ ​ដែល​ប្រដាប់​ដោយ​ដំបង ​អាច​ត្រូវបាន​អាជ្ញាធរ​ប្រើប្រាស់​ដើម្បី​បំបែក​ដោយ​ហិង្សា​លើ​ការ​តវ៉ា​នានា​ ហើយ​ច្រើន​តែ​ដាក់​គោលដៅ​ជាក់លាក់​លើ​មេដឹក​នាំ​សហជីព​ និង​ក្រុម​ពល​រដ្ឋ​មូលដ្ឋាន។​ ​ទោះ​ជាកង​សន្តិសុខ​ប្រើ​សកម្មភាព​ហិង្សា​មក​លើ​អ្នក​តវ៉ា​អហិង្សា​ក៏​ដោយ​ ក៏​មិនទាន់​មាន​កងសន្តិសុខ​ណាម្នាក់​ត្រូវ​បាន​គេ​ចោទ​ប្រកាន់​នៅ​ឡើយ​ទេ។ ​មិនតែ​ប៉ុណ្ណោះ​ កង​សន្តិ​សុខ​ទាំង​នោះ​នៅ​តែអាច​ប្រព្រឹត្ត​អំពើ​ហិង្សា​ ដោយ​គ្មាន​ការ​ផ្ដន្ទាទោស​ទៀត​ផង​ ទោះ​បី​ជា​មាន​នគរបាល​នៅ​ក្បែរ​ទីនោះ​ក៏​ដោយ»។​

នាយ​ឧត្តម​សេនីយ៍​ខៀវ សុភ័គ​ ​អ្នក​នាំពាក្យ​ក្រសួង​មហាផ្ទៃ​ ថ្លែង​ប្រាប់​ VOA​ នៅ​ថ្ងៃ​អង្គារ​នេះ​ថា​ ការ​លើក​ឡើង​របស់​អង្គការ​លីកាដូ​ គ្រាន់​តែជា​ការ​យល់​ឃើញ​មួយ​ជ្រុង​ប៉ុណ្ណោះ​ និង​មិន​បាន​ឆ្លុះ​បញ្ចាំង​ស្ថាន​ភាព​ទូទៅ​នៃ​ការ​គោរព​សិទ្ធិ​មនុស្ស​នៅ​កម្ពុជា​ទេ។​

«ប្រសិន​បើ​អង្គការ​លីកាដូ​មិន​សប្បាយ​ចិត្ត​ ឬ​កើត​ទុក្ខ​មិនសុខចិត្ត​ជាមួយ​នឹង​អ្នក​ណា​មួយ​ គួរ​តែ​ដាក់​ពាក្យ​បណ្តឹង​ទៅ​ ព្រោះ​នៅស្រុក​យើង​វា​មាន​ច្បាប់​ មាន​ទម្លាប់​ មិន​មែន​ចេះ​តែ​កត់​សម្គាល់ៗ​ ហើយ​សិទ្ធិ​មនុស្ស​ធ្លាក់​ចុះ ប្រជាធិបតេយ្យ​ធ្លាក់​ចុះ ធ្លាក់​ចុះៗ​ហ្នឹង។ បើ​តាម​តែ​ការ​ដែល​ធ្លាក់​ចុះ​ហ្នឹង​ ដែល​តាម​អង្គការ​ហ្នឹង​ថា​ ប្រហែល​ជា​ បើ​មាន​នរក ប្រហែលទាំងអស់​គ្នា​ស្ថិត​ក្នុង​ឋាននរកហើយ​មើល​ទៅ!»​

អង្គការ​ការពារ​សិទ្ធិ​មនុស្ស​លីកាដូ​បាន​លើក​ឡើង​នូវ​អនុសាសន៍​មួយ​ចំនួន​ដោយ​បាន​ផ្តល់​ក្តី សង្ឃឹម​ថា​ រដ្ឋាភិបាល និង​អាជ្ញាធរ​កម្ពុជា​នឹង​ដោះលែង​អ្នក​ការពារ​សិទិ្ធ​មនុស្ស​ទាំងអស់​ដែល​កំពុង​ជាប់​ពន្ធនាគារ ដោយ​មិន​មាន​លក្ខ​ខណ្ឌ​ ក្នុង​ពេលឆាប់ៗ​ខាង​មុខ​នេះ។​ ធ្វើ​ការស៊ើប​អង្កេត​ដោយ​ឯករាជ្យ​ ហ្មត់ចត់ និង​ឆាប់​រហ័ស​ទៅ​លើ​ការ​គំរាម​កំហែង ​និង​ការ​រំលោភ​បំពាន​ផ្សេងៗ​ លើ​អ្នក​ការ​ពារ​សិទិ្ធ​មនុស្ស​ និង​ធ្វើ​ការ​ចោទ​ប្រកាន់​លើ​ជន​ល្មើស​ទាំងអស់ ​ដោយ​ត្រឹម​ត្រូវ​ទៅ​តាមច្បាប់។ ​បពា្ឈប់​ការ​បង្ក្រាប​ដោយមិន​ត្រឹម​ត្រូវ​មក​លើ​ប្រជាពល​រដ្ឋ​ដែល​អនុវត្ត​សិទិ្ធ​សេរីភាព​ប្រមូលផ្តុំ ​និង​បញ្ចេញ​មតិ​ដោយ​អហិង្សា។​ បពា្ឈប់​ការ​ប្រើប្រាស់​កង​កម្លាំង​សន្តិសុខ​ ដើម្បី​បង្ក្រាប​លើ​ការ​តវ៉ា​ និង​បាតុ​កម្ម​អហិង្សា​នានា៕

XS
SM
MD
LG