ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

​រដ្ឋាភិបាល​​ការពារ​ការ​បង្កើត​ក្រុង​កោះរ៉ុង​ក្នុង​សមុទ្រ​ខ្មែរ


រូបឯកសារ៖ លោក​នាយករដ្ឋមន្ត្រី ហ៊ុន សែន ថ្លែង​សុន្ទរកថា ក្នុង​វេទិកា​សភា​អាស៊ី-ប៉ាស៊ីហ្វិក​លើក​ទី​២៧​ ​ដែល​ធ្វើ​ឡើង​ក្នុង​ក្រុង​អង្គរ​ខេត្ត​សៀមរាប​កាល​ពី​ថ្ងៃទី ១៥ ខែ មករា ឆ្នាំ២០១៩។ (រូបថត​ពី​ទំព័រ​ហ្វេសប៊ុក​ផ្លូវការ​របស់​លោក ហ៊ុន សែន)

ទោះបី​ប្រឈម​នឹង​ការ​រិះគន់​ពីមន្ត្រី​អង្គការ​ក្រៅ​រដ្ឋាភិបាល​មួយ​ចំនួន​ថា​ មិន​មាន​ភាព​ចាំ​បាច់​អ្វី​ត្រូវ​បង្កើត​ក្រុង​កោះរ៉ុង​ក្នុង​ខេត្ត​ព្រះ​សីហនុ​ដែល​ស្ថិត​នៅ​ភាគ​ខាងលិច​នៃ​ប្រទេស​កម្ពុជា​ក៏​ដោយ​នោះ​ ក៏​រដ្ឋាភិបាល​ខ្មែរ​បាន​ការពារការ​បង្កើត​ក្រុងថ្មី​នេះ​ថានឹង​ជួយ​ពន្លឿន​កិច្ចការ​រដ្ឋបាល​របស់​ខេត្ត​ព្រះសីហនុ ទោះបីក្នុង​ក្រុង​សមុទ្រ​ថ្មី​នេះ​ ​មាន​តែ​សង្កាត់​ពីរ ​ហើយចំនួន​ប្រជាជន​ក៏​នៅ​មាន​តិចតួច​នៅ​ឡើយ។​

អនុក្រិត្យ​របស់​លោក​នាយករដ្ឋមន្ត្រី​ ​ហ៊ុន សែន​ ​ស្តីពី​ការ​ការបង្កើត​ក្រុង​កោះរ៉ុងនៃ​ខេត្ត​ព្រះ​សីហនុ​ ដែល​ VOA ​បាន​ទទួល​នៅ​សប្តាហ៍នេះ​ បាន​បញ្ជាក់​ឲ្យដឹង​ថា៖​

«ត្រូវ​បាន​បង្កើត​ក្រុង​កោះរ៉ុង​ ​នៃ​ខេត្ត​ព្រះ​សីហនុ​ ដោយ​កំណត់​យក​សង្កាត់​ចំនួន​២​ ពីក្រុង​ព្រះ​សីហនុ​ នៃ​ខេត្ត​ព្រះ​សីហនុ​ គឺសង្កាត់​កោះរ៉ុង​ និង​សង្កាត់​កោះរ៉ុង​សន្លឹម»។​

អនុក្រិត្យ​ដដែល​បាន​បញ្ជាក់​ថា​ទីតាំង​សាលា​ក្រុង​កោះរ៉ុង​ ត្រូវ​ស្ថិត​នៅ​ក្នុង​សង្កាត់​កោះរ៉ុង​សន្លឹម។​

អ្នកស្រី​ ​ជាប សុធារី​ មន្ត្រី​សិទ្ធិ​មនុស្ស​របស់​សមាគម​ការពារ​សិទ្ធិ​មនុស្ស​អាដហុក​ ប្រចាំ​ខេត្ត​ព្រះ​សីហនុ​ សម្តែង​ការភ្ញាក់​ផ្អើល​ចំពោះការ​បង្កើត​ក្រុងមួយដែលមាន​សង្កាត់​តែពីរនេះ។​

អ្នកស្រី​ប្រាប់​ ​VOA ​នៅថ្ងៃ​ពុធនេះ​ថា​ អ្នកស្រី​ពិត​ជាមិន​បាន​ដឹង​ពីគោលដៅ​របស់​រដ្ឋាភិបាល​ដែល​សម្រេច​បង្កើត​ក្រុង​នេះទេ។ តែ​អ្នកស្រី​យល់​ថា​ ការបង្កើត​ក្រុង​ដែលមានពលរដ្ឋ​រស់​នៅ​តិច​តួច​នៅឡើយ​ គឺ​មិនចាំបាច់​ ព្រោះវា​នឹង​ត្រូវ​ចាយ​ថវិការដ្ឋ​ច្រើន​ថែម​ទៀត​ ដើម្បី​រៀប​ចំ​ហេដ្ឋារ​ចនា​សម្ព័ន្ធនានា​ ដើម្បី​បម្រើ​ដល់​កិច្ច​ការ​រដ្ឋបាល។​

«ខ្ញុំ​ថា​ ដូច​ជា​មិន​ចាំបាច់​អី​ទេ​ហ្នឹង​ហើយ​ ដោយសារ​តំបន់​ប្រជាពលរដ្ឋ​រស់​នៅ​ហ្នឹង​តិច​ ហើយ​ឃុំ​តែ​ពីរហ្នឹង​ បង្កើត​ក្រុង​មួយ​ យើង​ថា​ យើង​ចំណាយ​ថវិកា​ជាតិ​អាច​អស់​ច្រើន​ដែរ​អូន​ ព្រោះ​អី​ការ​រៀបចំ​ រចនា​សម្ព័ន្ធ​ស្ថាប័ន​រដ្ឋបាល​មួយ​ នៅសាលាក្រុង​ យើង​ត្រូវការ​ធ្វើ​សាលា​ក្រុង​ យើង​ត្រូវ​ការ​មន្ត្រី​ដែល​បម្រើ​ការងារ​នៅក្នុង​ហ្នឹង​ ហើយ​ត្រូវ​មាន​ការិយាល័យ​គ្រប់​មុខ​ទាំង​អស់​ ព្រោះ​ក្រុង!»។​

សម្រាប់​លោក​ ​ផៃ ស៊ីផាន​ ​អ្នកនាំពាក្យ​រដ្ឋាភិបាល​ខ្មែរ​ ជឿថា​ ការ​សម្រេចចិត្តរបស់​រដ្ឋាភិបាល​ដើម្បី​រៀបចំ​ឲ្យមាន​ក្រុង​កោះរ៉ុង​នេះ​មិន​ខុស​ទេ ព្រោះ​នឹង​មាន​ការ​ធ្វើ​ឲ្យប្រសើរឡើង​នៃកិច្ច​ការ​រដ្ឋបាល​ក្នុង​ខេត្ត​ព្រះសីហនុ​ និងពង្រីក​សកម្មភាព​សេដ្ឋកិច្ច​ក្នុង​តំបន់​នោះ។​

លោកប្រាប់​ VOA ​ថា៖​

«ទីមួយ​គឺរដ្ឋបាល​ ក្នុងការ​ផ្តល់​សេវាកម្ម​ឲ្យបាន​ប្រសើរ​។ ទីពីរ​កំណើន​របស់​សេដ្ឋកិច្ច​ ដែល​នៅ​ក្នុង​តំបន់​ហ្នុង​ ពីព្រោះតែ​វាមាន​គោលនយោបាយ​របស់​រាជរដ្ឋាភិបាល​ ក្នុង​ការ​ផ្គត់​ផ្គង់​ ហើយ​ក្នុង​ការ​បង្កើន​ នៃចរាចរណ៍​លុយកាក់​នៅកន្លែង​ហ្នុង នែ៎!​ ដូច្នេះ​អ្នក​ទិតៀន​ហ្នឹង​ គឺមិនបាន​សិក្សា​ទេ​ សុំ​ឲ្យគាត់​អញ្ជើញ​ទៅ​សិក្សា ជាជាង​ ប្រើបបេរមាត់​ ឬអណ្តាត​អត់​មានន័យ​»។

អន្រុក្រិត្យ​ស្តីពីការ​បង្កើតក្រុងកោះរ៉ុង​របស់​លោក​ ហ៊ុន សែន​ បាន​បញ្ជាក់​ឲ្យដឹង​ទៀតថា​ ការ​រៀបចំ​រចនា​សម្ព័ន្ធ​ និងប្រព័ន្ធ​គ្រប់​គ្រង​រដ្ឋបាល​ក្រុង​កោះរ៉ុង​ ត្រូវ​អនុលោម​ទៅ​តាម​ច្បាប់​ស្តី​ពី​ការ​គ្រប់​គ្រង​រដ្ឋបាល​រាជធានី​ ខេត្ត​ ក្រុង​ ស្រុក​ ខណ្ឌ។​

ក្នុង​នាម​ជាអ្នកការពារ​សិទ្ធិមនុស្ស​ អ្នកស្រី​ ​ជាប សុធារី​ ​មិន​បានដឹង​ថា​តើ​ដើម្បីបង្កើត​ទីក្រុង​មួយ​នោះ​ ត្រូវ​ការ​លក្ខខណ្ឌ​អ្វីខ្លះនោះទេ​ ទាក់​ទិន​ចំនួនប្រជាជន​ និង​ចំនួន​ភូមិ សង្កាត់​ ក៏ប៉ុន្តែ​អ្នក​ស្រី​នៅតែ​យល់ថា​ ការ​បង្កើត​ក្រុង​កោះរ៉ុង​នេះ មិន​មែន​ជា​រឿង​ចំាបាច់​នោះឡើយ​ ហើយ​អ្វីដែល​រដ្ឋបាល​ខេត្តព្រះសីហនុ ត្រូវធ្វើ​នោះ​ គឺដោះស្រាយ​វិបត្តិ​សង្គម​ដែល​កំពុង​ហ៊ុម​ព័ទ្ធ​ខេត្ត​ព្រះ​សីហនុ។​

អ្នកស្រី​ទទួល​ស្គាល់​ថា​ ការបង្កើត​ក្រុង​ថ្មី​អាច​ជួយសម្រួល​កិច្ច​ការ​រដ្ឋបាលបាន​មួយ​ផ្នែករបស់​ខេត្ត​ព្រះសីហនុ ក៏ប៉ុន្តែ​កង្វះទឹកស្អាត​ប្រើ​ប្រាស់​ និង​អនាម័យ​ក្នុងខេត្ត​នេះ កំពុង​ធ្វើ​ឱ្យពលរដ្ឋ​មូលដ្ឋាន​ព្រួយ​បារម្ភ ​ខណៈដែល​ជន​ជាតិ​ចិន​នឹង​ហូរចូលមក​ខេត្ត​នេះនៅចុង​ឆ្នាំ​២០១៩នេះ​បន្ថែម​ទៀត​នោះ។​

អ្នកស្រី ​ជាប សុធារី​ ពន្យល់​បន្ថែម​ថា៖​

«​គម្រោង​និយាយថា​ នៅចុង​ឆ្នាំ​២០១៩​ ២០២០​ ជនជាតិ​ចិន​នឹងមាន​រាប់ម៉ឺននាក់​ ចូល​មកថែម​ទៀត​ដើម្បីមក​រក​ស៊ី​នៅខេត្ត​ព្រះសីហនុ​ហ្នឹង​។ អាហ្នឹង​ជា​រឿង​ដែល​យើង​ព្រួយ​បារម្ភ​ ដែល​យើង​ឲ្យ​រដ្ឋាភិបាល​ លោក​មេត្តាដោះស្រាយ​រឿង​ហ្នឹង​ ដូច​ជា​ប្រភព​ធនធាន​ទឹកស្អាត​សម្រាប់​ឧបត្ថម្ភ​ណ៎ា!​ ​ទីតាំងចាក់​សម្រាម​ រាល់​ថ្ងៃ​សម្រាម​រាប់តោន​ ចង់​និយាយ​ចឹង​មិនដឹង​ថា​ យក​ទៅ​ចាក់​កន្លែង​ណា​ ​ព្រោះ​សម្រាម​ទាំង​អស់​ហ្នឹង​ វាមិន​មែន​ចាក់​ភ្លាម​ស្រែក​រលាយ​អស់​ឯណ៎ា!»។

លោក​ ផៃ ស៊ីផាន​ ​បន្តការ​ពារ​ការបង្កើត​ក្រុង​កោះរ៉ុង​៖

«ហេតុ​ម៉េច​ បាន​គេ​ត្រូវ​បង្កើត​ក្រុង?​ ​ព្រោះ​ទិសដៅ​សេដ្ឋកិច្ច​ ហើយ​ហេតុម៉េច​បាន​គេ​បង្កើត​ក្រុង​ គឺទម្លា​ក់​លុយ​ទៅក្រុង​ហ្នឹង​ វាខុស​ពីទម្លាក់​លុយ​ទៅ​ឃុំ​ យល់​! ឲ្យ​គាត់​និយាយម៉េច​ ក៏និយាយ​ទៅ​ គាត់​មិនដែលដឹង​រឿង​ហ្នឹង​ផង​ហ្នឹង​ គាត់​ចង់​និយាយថា​ ម៉ែ​គាត់​នៅក្រមុំ​ក៏បាន​ដែរ​»។​

យ៉ាង​ណាក៏ដោយ​ ការ​បង្កើត​ក្រុង​កោះរ៉ុង នេះ​ បាន​ធ្វើឲ្យ​ខេត្ត​ព្រះសីហនុ​ មាន​លក្ខណៈ​ពិសេស​ជាង​ខេត្តដទៃ​ គឺខេត្តនេះ​ នឹង​មាន​ក្រុង​ពីរ​ គឺ​ក្រុង​ព្រះសីហនុ​ និង​ក្រុង​កោះរ៉ុង​ ហើយ​និង​ស្រុក​ចំនួន​បី​ គឺស្រុក​ព្រៃនប់​ កំពង់​សិលា និង​ស្រុក​ស្ទឹង​ហាវ។​

មុន​ការ​បង្កើត​ក្រុង​កោះរ៉ុងនេះ កាលពីដើម​ខែកុម្ភៈ​ ឆ្នាំ​២០១៨ លោក ហ៊ុន សែន​ ​បាន​សម្រេច​បង្កើត​ឧទ្យាន​ជាតិ​ថ្មី​មួយ​នៅ​ក្នុង​ខេត្ត​ព្រះសីហនុ​ផងដែរ​ ដែល​ឧទ្យាន​នោះ​មាន​ឈ្មោះ​ថា «ឧទ្យាន​ជាតិ​សមុទ្រ​កោះរ៉ុង»​ ដែល​មាន​ផ្ទៃដី​៥៣១១​ហិកតា ​និង​ផ្ទៃ​សមុទ្រ​ទំហំ​៤៧.១៣៧​ហិក​តា​ ដើម្បី​ការ​ពារ​ប្រព័ន្ធ​បរិស្ថាន​ និង​ធនធាន​ធម្មជាតិ​ក្នុង​តំបន់។​

ឧទ្យាន​ជាតិ​សមុទ្រ​កោះ​រ៉ុង​មាន​ផ្ទៃ​សរុប​ ៥២​.៤៤៨​ហិកតា​ និង​ស្ថិត​ក្នុង​ភូមិសាស្ត្រ​ខេត្ត​ព្រះ​សីហនុ​ និង​ខេត្ត​កោះកុង​។​ ឧទ្យាន​ជាតិ​នេះ​ នឹងគ្រប​ដណ្តប់​លើ​កោះ​ជាច្រើន​ រួមមាន​ កោះរ៉ុង កោះរ៉ុង​សន្លឹម​ កោះ​តូច​ កោះ​តាទៀម ​កោះ​ម្នាស់​ក្រៅ​ កោះ​ម្នាស់​ក្នុង​ និង​សមុទ្រ​ជុំវិញ។​

ដោយ​ឡែក​ ​រដ្ឋាភិបាល​កម្ពុជា​របស់​លោក​ ហ៊ុន សែន​ ​ក៏​បាន​ចេញ​អនុក្រិត្យ​ ​បង្កើត​ ខណ្ឌថ្មី​ចំនួន​ពីរ​បន្ថែម​ទៀតក្នុង​ទីក្រុង​ភ្នំពេញ ដែល​រួម​មានខណ្ឌបឹងកេងកង​ និង​ខណ្ឌ​កំបូល​ ធ្វើ​ឲ្យក្រុង​ភ្នំពេញ​មាន​ខណ្ឌសរុប​ចំនួន​១៤។ នៅ​ឯខេត្ត​កំពង់​ធំ​ រដ្ឋាភិបាល​ក៏បង្កើតឲ្យមាន​ស្រុក​មួយថ្មីឈ្មោះ​ ស្រុក​តាំងគោក​ ធ្វើ​ឲ្យ​ខេត្ត​នេះ​មាន​ស្រុក​សរុប​ចំនួន​៨ និង​ក្រុង​មួយ​ គឺ​ក្រុង​ស្ទឹង​សែន​ ហើយ​ក៏មានការ​បង្កើត​ស្រុក​មួយ​ថ្មី​ទៀត​ផងដែរ​នៅ​ខេត្តពោធិ៍សាត់​ គឺ​ស្រុក​តាលោ​សែន​ជ័យ​ ​ធ្វើ​ឲ្យ​ខេត្តនេះ​ មាន​ស្រុក​សរុប​ចំនួន​៦ និង​ក្រុង​មួយ​ គឺ​ក្រុង​ពោធិ៍សាត់។​

ថ្មីៗនេះ​ ​លោកហ៊ុន សែនក៏បានចេញ​អនុក្រិត្យកាត់​ឃុំ​ចំ​នួនបួន​ ពី​ស្រុក​ស្អាង​ គឺ​ឃុំ​ស្វាយរលំ​ ឃុំ​កោះ​អន្លង់​ចិន​ ឃុំសិត្បូ​ ឃុំរកា​ខ្ពស់​ និង​ដីមួយផ្នែក​នៃ​ស្រុក​កណ្តាល​ស្ទឹង​មក​ឲ្យក្រុង​តាខ្មៅ​។​ ​ឃុំ​ទាំងនោះ​ នឹង​ប្តូរ​ទៅជា​សង្កាត់ គឺ​ ​ឃុំ​ស្វាយរលំ​ ទៅជា​សង្កាត់​ស្វាយរលំ​ ឃុំកោះ​អន្លង់​ចិន ទៅ​ជា​សង្កាត់​កោះអន្លង់ចិន​ ឃុំសិត្បូ ទៅជា​សង្កាត់​សិត្បូ​ និងឃុំរកា​ខ្ពស់​ ទៅជា​សង្កាត់​រកា​ខ្ពស់៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG