ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណ​បក្ស​ក្រៅ​រដ្ឋាភិបាល​៤​ស្នើ​ឱ្យ​ក្រសួង​មហា​ផ្ទៃ​​​​​លើក​ស្ទួយ​សេរីភាព​នយោបាយ​ មុន​​ការ​បោះឆ្នោត​ជាតិ​ឆ្នាំ​២០២៣​


ទិដ្ឋ​ភាព​ទូទៅ​ថ្ងៃបោះឆ្នោតជ្រើសរើស​ក្រុម​​ឃុំសង្កាត់ឃុំសង្កាត់នៅ​ការិយាល័យ​បោះ​ឆ្នោត​អូរ​តាគាំ១​ក្នុង​ក្រុង​បាត់​ដំបង នៅ​ថ្ងៃទី០៥ ខែមិថុនា ឆ្នាំ២០២២។ (លាស់ លីបលីប​/​វីអូអេ)

គណ​បក្ស​នយោបាយ​ក្រៅ​រដ្ឋាភិបាល​ចំនួន​៤ ​បាន​លើក​សំណើ​ទៅ​ក្រសួង​មហា​ផ្ទៃ​ឱ្យ​ដោះស្រាយ​បញ្ហា​ប្រឈម​ចំនួន​៧​ចំណុច ដើម្បី​ធានា​ថា ពលរដ្ឋ​មាន​សិទ្ធិ​សេរីភាព​នយោបាយ​ច្រើន​ជាង​មុន​ ហើយ​ប្រព័ន្ធ​បោះ​ឆ្នោត​នៅ​កម្ពុជា​មាន​ភាព​ល្អ​ប្រសើរ​សម្រាប់ការ​បោះ​ឆ្នោត​ថ្នាក់​ជាតិ​ឆ្នាំ​២០២៣។​

កាល​ពី​ថ្ងៃ​ព្រហស្បតិ៍ ​គណបក្ស​ចំនួន​៤ រួម​មាន ​គណ​បក្ស​ប្រជាធិបតេយ្យ​មូលដ្ឋាន ​គណ​បក្ស​កែ​ទម្រង់​កម្ពុជា ​គណ​បក្ស​ភ្លើង​ទៀន ​គណ​បក្ស​ឆន្ទៈ​ខ្មែរ ​បាន​ជួប​ជាមួយ​តំណាង​ក្រសួង​មហា​ផ្ទៃ ​លោក ​សក់ សេដ្ឋា ​ហើយ​បានជជែក និង​ពិភាក្សា​អំពីកង្វល់​របស់​គណ​បក្ស​ដែលបាន​កើត​ឡើងកាល​ពី​កន្លង​មក។​ នេះ​បើ​តាម​តំណាងគណ​បក្ស​នយោបាយ។ ​

អ្នក​នាំ​ពាក្យ​គណ​បក្ស​ប្រជាធិបតេយ្យ​មូល​ដ្ឋាន​លោក​ ឡឹក សុធារ​ ប្រាប់​វីអូអេ​នៅ​ថ្ងៃ​សុក្រ​នេះ​ថា​ ក្នុង​ជំនួបរបស់​គណ​បក្ស​ទាំង​៤​ជាមួយ​ក្រសួង​មហា​ផ្ទៃ​នោះ ​ភាគី​គណ​បក្ស​បាន​លើក​ឡើង​ពីបញ្ហា​ប្រឈម​ពាក់​ព័ន្ធ​ស្ថាន​ភាព​នយោបាយ​ និង​ប្រព័ន្ធ​បោះ​ឆ្នោត។​

បើ​តាម​លោក ​ឡឹក សុធារ​ តំណាង​គណបក្ស​នយោបាយ​ទាំង​៤​ បាន​ដាក់​សំណើ​ចំនួន​៧​ចំណុច​ជូន​ក្រសួងដើម្បី​លើក​ស្ទួយ​សេរី​ភាព​នយោបាយនៅ​កម្ពុជា​ ជា​ពិសេស​ធ្វើ​ឱ្យ​ការ​បោះ​ឆ្នោតថ្នាក់​ជាតិ​ឆ្នាំ​២០២៣​មាន​លក្ខណៈ​សេរី​ ត្រឹមត្រូវ ​យុត្តិ​ធម៌​ និង​មាន​ការ​ចូល​រួម​ពី​គ្រប់​គណ​បក្ស​នយោបាយ​ដោយ​មិន​ប្រកាន់​និន្នាការ។​

លោក​ថ្លែង​ថា៖ ​«ក្នុង​ជំនួប​ជាមួយ​ក្រសួង​មហាផ្ទៃ​ តំណាង​គណបក្ស​ទាំង​៤​បាន​ស្នើ​ឡើង​នូវ​យន្ត​ការ​៧​ចំណុច​ដើម្បី​កែ​ទម្រង់​ប្រព័ន្ធ​បោះ​ឆ្នោត​ និង​លើក​កម្ពស់​សិទ្ធិ​សេរី​ភាព​នយោបាយ​នៅ​កម្ពុជា»។​

ចំណុច​ទាំង​៧​ ដែល​គណបក្ស​ទាំង​៤​ស្នើ​ទៅ​ក្រសួង​មហា​ផ្ទៃ​ រួម​មាន៖ ទី១ ​ការ​បង្កើត​យន្ត​ការ​ទំនាក់​ទំនង​ជា​មួយ​ក្រសួង​មហាផ្ទៃ​សម្រាប់​ការ​ជួយ​សម្រួល​ និង​ដោះ​ស្រាយ​បញ្ហា​ពាក់​ព័ន្ធ​នឹង​ការ​គំរាម​កំហែង​ និង​ការ​បំភិត​បំភ័យ​ពី​សំណាក់​អាជ្ញាធរ​នៅ​តាម​មូលដ្ឋាន​គ្រប់​លំដាប់​ថ្នាក់។​ ទី២ ​ជំរុញ​កិច្ច​សហការ​ល្អ​រវាង​សមាជិក​ក្រុម​ប្រឹក្សាឃុំ​សង្កាត់​ និង​ការ​បែង​ចែក​តួនាទី​ស្រប​តាម​ច្បាប់។ ទី៣​ ការ​លុប​បំបាត់​បណ្ដឹង​ជា​លក្ខណៈ​នយោបាយ។ ទី​៤ ​សម្រួល​ដល់​ទំនាក់​ទំនង​ និង​កិច្ច​សហ​ការ​រវាង​តំណាង​គណ​បក្ស​នយោបាយ​ជាមួយ​អាជ្ញាធរ​មូលដ្ឋាន។ ​ចំណែកចំណុចទី​៥​គឺ​គណ​បក្ស​ទាំងបួន​សុំ​ឱ្យ​ក្រសួង​ធ្វើការ​ណែនាំ​ជាផ្លូវ​ការ​ និងឱ្យ​មាន​ប្រសិទ្ធិ​ភាព ​កុំ​ឱ្យ​មាន​ការ​រើស​អើង​សមាជិក​គណបក្ស​នយោបាយ​ក្រៅ​រដ្ឋា​ភិបាល។​ ទី៦​ ធានា​និង​ការ​ពារ​សុវត្ថិ​ភាព​សកម្ម​ជន​គណ​បក្ស​នយោ​បាយ​ក្រៅ​រដ្ឋា​ភិបាល។​ ទីប្រាំ៧​ សុំ​ណែនាំ​កុំ​ឱ្យ​មាន​ភាគី​ណាមួយ​ធ្វើ​ការ​ហាម​ឃាត់​ ឬ​គំរាម​ម្ចាស់​ផ្ទះ ​ម្ចាស់​សណ្ឋាគារ​ ម្ចាស់​អគារ​ប្រជុំ​ សាល​សន្និ​សីទ​ មិន​ឱ្យ​ជួល ​ឬ​មិន​អនុញ្ញាត​ឱ្យគណ​បក្ស​ក្រៅ​រដ្ឋា​ភិបាល។​ នេះ​បើ​តាម​លិខិត​សំណើ​ដែល​វីអូអេ​ទទួល​បាន។ ​

ដោយ​ឡែក ​កាល​ពីថ្ងៃ​ទី​៣១​ ខែ​សីហា ​គណ​បក្ស​ទាំង​៤​នេះ​ក៏​បាន​ជួប​ជាមួយ​ស្ថាប័ន​រៀបចំ​ការ​បោះឆ្នោត​ ​(គ.ជ.ប.)​ផង​ដែរ ​ដោយ​បានដាក់​សំណើ​ចំនួន​១៦​ចំណុច​ទៅ​ស្ថាប័ន​គ.ជ.ប.​ដើម្បី​ឱ្យ​កែ​លម្អ​ប្រព័ន្ធ​បោះ​ឆ្នោត។​

គណ​បក្ស​ទាំង​៤​ត្រូវ​បាន​គេ​មើល​ឃើញ​ថា ​តែង​តែ​មាន​សកម្មភាពជួប​គ្នា​ក្នុង​ការ​ផ្លាស់​ប្តូរ​យោបល់ ​និង​លើក​ឡើង​បញ្ហា​ប្រឈម​ដើម្បីធ្វើ​ការ​តស៊ូ​មតិ​រួម​គ្នា​ ជា​មួយ​ស្ថាប័ន​ពាក់​ព័ន្ធ ​ដោយ​ទាមទារ​ឱ្យ​ស្ថាប័ន​ទាំង​នោះ​ជួយ​កែប្រែ​ប្រព័ន្ធ​បោះ​ឆ្នោត​ដើម្បី​ធ្វើ​ឱ្យ​ដំណើរ​ការ​បោះ​ឆ្នោត​នៅ​កម្ពុជា​មាន​ភាព​ល្អ​ប្រសើរ​ឡើង។​ ពួកគេ​ធ្វើ​សកម្មភាព​ទាំង​នេះ ​ក្រោយ​ពី​មាន​ការ​កត់​សម្គាល់​នូវ​បញ្ហា​ប្រឈម​ក្នុង​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ​សង្កាត់ឆ្នាំ​២០២២​នេះ។​

បើ​តាម​អ្នក​នាំ​ពាក្យ​គណ​បក្ស​ប្រជាធិបតេយ្យ​មូលដ្ឋានលោក​ ឡឹក សុធារ​ នៅ​ថ្ងៃទី​១៥​ខែ​កញ្ញា ​គណ​បក្ស​ទាំង​៤​ក៏​បាន​ជួប​ជាមួយ​ឯក​អគ្គ​រាជទូត​ជប៉ុន​ដើម្បី​ពិភាក្សា​បញ្ហា​ដែល​បាន​លើក​ឡើង​ខាង​លើ​នេះ​ ក៏ដូច​ជា​បញ្ហា​ការ​កែ​ទម្រង់​ប្រព័ន្ធ​បោះ​ឆ្នោតនៅ​កម្ពុជា​ផងដែរ។ ​

វីអូអេ​បាន​ព្យាយាម​ទាក់ទង​តាម​រយៈ​ប្រព័ន្ធ​ទូរស័ព្ទ​ និង​ប្រព័ន្ធ​តេឡេក្រាម​សុំ​ការ​បញ្ជាក់​ពី​លោក​ ​សក់ សេដ្ឋា ​រដ្ឋ​លេខាធិការ​ក្រសួង​មហាផ្ទៃ ​ដែល​បាន​ជួប​ផ្ទាល់​ជាមួយ​នឹង​តំណាង​គណបក្ស​នយោបាយ​ទាំង​៤ ​ ប៉ុន្តែ​មិន​អាច​ទាក់ទង​បាន​នៅ​ឡើយ​ទេ​នៅ​ថ្ងៃ​សុក្រ​នេះ។​

រដ្ឋ​លេខាធិការ​ក្រសួង​មហាផ្ទៃ ​និង​ជា​អ្នក​នាំ​ពាក្យ​ លោក​ ខៀវ សុភ័គ ​សូម​មិន​ធ្វើ​ការ​អត្ថាធិប្បាយ​ ​ដោយ​លោកថា ​លោកមិន​បាន​ចូល​រួម​ក្នុង​ជំនួប​នោះ និងមិន​ទាន់​ទទួល​បាន​ព័ត៌មាន​អ្វី​នៅ​ឡើយ​ទេ។ ​

ប្រទេស​កម្ពុជា​នឹង​រៀបចំ​ការ​បោះឆ្នោត​ជ្រើសរើស​តំណាង​រាស្ត្រ​ នៅ​ថ្ងៃទី​២៣​ ខែ​កក្កដា​ ឆ្នាំ​២០២៣​ ខាង​មុខ។​

លោក​ កន សាវាង្ស មន្ត្រី​សម្រប​សម្រួល​ជាន់​ខ្ពស់​នៃ​អង្គការ​ខុមហ្វ្រែល ​(Comfrel) ដែល​ឃ្លាំមើល​ការ​បោះឆ្នោត​យល់​ថា​ ជំនួប​របស់​គណ​បក្ស​ជាមួយ​ក្រសួង​មហា​ផ្ទៃ​នេះ​ជា​រឿង​ល្អ។ ​លោក​បន្តថា ក្រសួង​មហា​ផ្ទៃ​គួរ​យក​ចិត្ត​ទុក​ដាក់ និង​ពិនិត្យ​មើលការ​អនុវត្ត​ការ​ងារ​របស់​ថ្នាក់​ក្រោម​ឱ្យមាន​ប្រសិទ្ធ​ភាព​ដើម្បីកុំ​ឱ្យ​មាន​ការ​អនុវត្ត​ខុស​នីតិវិធី​ ឬកុំ​ឱ្យមាន​ការ​លម្អៀង​ផ្នែក​នយោ​បាយ​ណា​មួយ​កើត​មាន​ឡើង។​

លោក​ថ្លែង​ថា៖ ​«ជា​ការណ៍​ពិត​ណាស់​ដែល​ក្រសួង​មហាផ្ទៃ​ត្រូវ​តែ​យក​ចិត្ត​ទុក​ដាក់។ ហើយ​អ្វី​ដែល​ខ្ញុំ​បាន​តាម​ដាន​កន្លង​មក​ក៏​ធ្លាប់​ឃើញ​ក្រសួង​មហា​ផ្ទៃ​ចេញ​នូវ​សេចក្តី​ថ្លែង​ការណ៍​ សេច​ក្តី​ប្រកាស​ផ្សេងៗ​ដើម្បី​ជំរុញ​ឱ្យ​អាជ្ញាធរ​មូលដ្ឋាន​ធ្វើការ​កែ​សម្រួល​ដែរ​ តែ​សំខាន់​ជាង​គេ​ថា ​តើ​ប្រសិទ្ធ​ភាព​របស់​ក្រសួង​មហា​ផ្ទៃធ្វើ​ឱ្យ​ថ្នាក់​ក្រោម​ជាតិ​ហ្នឹង​ទទួល​បាន​នូវ​ការ​ណែនាំ​របស់​ក្រសួង​ដែរ​ ឬ​ទេ? ឬ​មួយ​ជា​ការ​បង្ហាញ​ខាង​លើ​[ផ្សេង] ខាង​ក្រោម​ផ្សេង»។​

នាយក​រង​ទទួល​បន្ទុក​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ​លោក​ អំ សំអាត​ ថ្លែង​ថា ​អង្គ​ការ​សង្គម​ស៊ីវិល​ផ្នែក​សិទ្ធិ​មនុស្ស​ តែង​តែ​កត់​សម្គាល់​ឃើញ​នូវ​ការ​រឹត​ត្បិត​សេរី​ភាព ទាំង​សិទ្ធិ​សេរី​ភាពមូល​ដ្ឋាន​ពល​រដ្ឋ​ ​សេរី​ភាព​នយោ​បាយ ​សេរីភាព​ទទួល​បាន​ព័ត៌មាន​ និង​សេរី​ភាព​លើ​ការ​បំពេញ​ការងារ​សមាគម​ជា​ដើម។​

អ្នក​ការពារ​សិទ្ធិ​មនុស្ស​រូប​នេះ​បន្ថែម​ថា ​ទាំង​អ្នក​រាយ​ការណ៍​ពិសេស​ផ្នែក​សិទ្ធិ​មនុស្ស​នៅ​កម្ពុជា​ សហគមន៍​អន្តរជាតិ ​និង​សហ​រដ្ឋ​អាមេរិក​ក៏​កត់​សម្គាល់​ឃើញ​ដូច​គ្នា​ចំពោះ​ការ​រឹត​ត្បិត​សេរីភាព​នេះ​ផង​ដែរ ដូច្នេះ​ ​រដ្ឋា​ភិបាល ​និង​អ្នក​ពាក់​ព័ន្ធ​ត្រូវ​តែ​បង្ក​លក្ខណៈ​ឱ្យ​មាន​ភាព​ល្អ​ប្រសើរ​ក្នុង​ការ​បើក​លម្អ​សេរីភាព​ទាំង​អស់​នេះ ​និង​អនុវត្ត​ច្បាប់​ឱ្យ​ស្មើ​ភាព​គ្នា​ដើម្បីធ្វើ​ឱ្យ​កម្ពុជា​ឈាន​ទៅ​រក​ដំណើរការ​ប្រព័ន្ធ​ប្រជា​ធិបតេយ្យ​ត្រឹម​ត្រូវ​ឡើង​វិញ​ ពោល​គឺ​ភាគី​ពាក់​ព័ន្ធ​ទាំងអស់​ត្រូវបង្ក​ឱ្យ​មាន​បរិយាកាសនយោបាយ​ល្អ​ប្រសើរ​នៅ​មុន​ និង​អំឡុង​ពេល​នៃ​ការ​បោះឆ្នោត​ថ្នាក់​ជាតិ​ខាង​មុខ៕

XS
SM
MD
LG