អតីតមេដឹកនាំប្រទេសអេហ្ស៊ីបលោក Hosni Mubarak បានស្លាប់ក្នុងអាយុ៩១ឆ្នាំ។ នេះបើយោងតាមសេចក្ដីរាយការណ៍របស់ទូរទស្សន៍រដ្ឋនៅថ្ងៃអង្គារនេះ។
លោក Mubarak បានដឹកនាំប្រទេសអេហ្ស៊ីបជិត ៣០ ឆ្នាំ មុនពេលលោកបានចេញពីដំណែងនៅឆ្នាំ ២០១១ បន្ទាប់ពីមានការតវ៉ារបស់ប្រជាពលរដ្ឋរយៈពេល ១៨ ថ្ងៃ។
លោកបានលេចឡើងតាមរយៈមុខតំណែងនៃជួរកងទ័ពអាកាសរបស់ប្រទេសអេហ្ស៊ីប ដោយក្រោយមកក្លាយជាមេបញ្ជាការយោធា និងជាអនុរដ្ឋមន្ត្រីការពារជាតិ។ បន្ទាប់មកនៅឆ្នាំ ១៩៧៥ លោកបានក្លាយជាអនុប្រធានាធិបតីអេហ្ស៊ីប ដែលនៅពេលនោះលោក Anwar Sadat គឺជាប្រធានាធិបតី។
ក្រោយមកនៅឆ្នាំ ១៩៨១ នៅពេលដែលលោក Sadat ត្រូវបានពួកសកម្មប្រយុទ្ធឥស្លាមធ្វើឃាត លោក Mubarak បានក្លាយជាប្រធានាធិបតី និងបានរក្សាអំណាចរបស់លោកដោយប្រកាន់គោលជំហរធ្វើជាសម្ព័ន្ធមិត្តបស្ចិមប្រទេសដ៏ទុកចិត្តម្នាក់ ដែលគោរពកិច្ចព្រមព្រៀងសន្តិភាពឆ្នាំ ១៩៧៩ ជាមួយនឹងប្រទេសអ៊ីស្រាអែល ទោះបីជាមានការប្រឆាំងតវ៉ាខ្លាំងក្លានៅស្ទើរតែទូទាំងតំបន់មជ្ឈិមបូព៌ាក៏ដោយ។
នៅក្នុងប្រទេសអេហ្ស៊ីប លោក Mubarak បានដឹកនាំដោយប្រើកណ្ដាប់ដៃដែក ដោយលោកបានដាក់ឲ្យអនុវត្តច្បាប់ស្ថានការណ៍បន្ទាន់ ដែលអនុញ្ញាតឲ្យកងកម្លាំងសន្តិសុខប្រើអំណាចបង្ក្រាបលើអ្នកប្រឆាំង នឹងរារាំងសេរីភាពជាមូលដ្ឋានរបស់ពលរដ្ឋ។
នៅខែមករា ឆ្នាំ ២០១១ ការតវ៉ាទ្រង់ទ្រាយធំប្រឆាំងនឹងរដ្ឋាភិបាលរបស់លោកបានផ្ទុះឡើងនៅក្នុងទីក្រុងឡឺគែរ និងទីក្រុងផ្សេងទៀតក្នុងប្រទេសអេហ្ស៊ីប។ នៅថ្ងៃទី ១១ ខែកុម្ភៈ ឆ្នាំ ២០១១ លោកអនុប្រធានាធិបតី Omar Suleiman បានប្រកាសថា លោក Mubarak ចុះចេញពីតំណែង ហើយក្រុមប្រឹក្សាកំពូលរបស់យោធានឹងដឹកនាំប្រទេស។
លោក Mubarak និងក្រុមគ្រួសារបានរត់គេចទៅកាន់ផ្ទះលំហែកាយរបស់ខ្លួននៅសមុទ្រក្រហម។ ប៉ុន្តែក្រោយមកត្រូវបានចាប់ខ្លួន និងកាត់ទោសពាក់ព័ន្ធនឹងការស្លាប់របស់ក្រុមអ្នកតវ៉ាប្រឆាំងរដ្ឋាភិបាល។ នៅថ្ងៃទី ២ ខែមិថុនា ឆ្នាំ ២០១២ លោកត្រូវបានគេរកឃើញថាមានទោសពីបទសមគំនិត ដោយសារលោកមិនបានរារាំងការសម្លាប់មនុស្សរាប់រយនាក់ដែលបានងើបបះបោរប្រឆាំងនឹងលោក។
លោកត្រូវបានផ្ដន្ទាទោសឲ្យជាប់ពន្ធនាគារមួយជីវិតជាមួយនឹងអតីតរដ្ឋមន្ត្រីក្រសួងមហាផ្ទៃរបស់លោកគឺលោក Habib Al-Adly ប៉ុន្តែតុលាការកំពូលអេហ្ស៊ីបក្រោយមកបានលើកលែងទោសឲ្យពួកគេទាំងពីរ៕
