បេក្ខជន៧រូបដែលប្រកួតដណ្តើមយកការតែងតាំងជាបេក្ខជនប្រធានាធិបតីសហរដ្ឋអាមេរិកពីគណបក្សប្រជាធិបតេយ្យ នឹងឡើងឆាកនៅយប់ថ្ងៃអង្គារនេះ នៅក្នុងរដ្ឋ South Carolina ភាគខាងត្បូងសហរដ្ឋអាមេរិក។
សមាជិកព្រឹទ្ធសភាប្រចាំរដ្ឋ Vermont លោក Bernie Sanders បានទទួលសន្ទុះពីជ័យជម្នះដាច់គេនៅក្នុងការបោះឆ្នោតបឋម caucus នៅក្នុងរដ្ឋ Nevada កាលពីថ្ងៃសៅរ៍ ហើយថែមទាំងការនាំមុខខាងចំនួនសរុបនៃប្រតិភូដែលបេក្ខជននិមួយៗត្រូវការដើម្បីអាចទទួលបានការតែងតាំងពីបក្ស ដើម្បីប្រកួតទល់នឹងលោកប្រធានាធិបតី Donald Trump ក្នុងខែវិច្ឆិកា។
អ្នកនាំមុខគេនឹងក្លាយជាគោលដៅវាយប្រហារនៅក្នុងការជជែកដេញដោលគ្នា ប៉ុន្តែនៅក្នុងរដ្ឋ South Carolina លោកអតីតអនុប្រធានាធិបតី Joe Biden ក៏មានប្រជាប្រិយភាពហើយអាចក្លាយជាគោលដៅនៃការវាយប្រហារដែរ។
ការជជែកដេញដោលនៅយប់ថ្ងៃអង្គារជាឱកាសសម្រាប់បេក្ខជនដើម្បីទាក់ទាញអ្នកបោះឆ្នោតមិនត្រឹមតែនៅក្នុងរដ្ឋ South Carolina ដែលនឹងបោះឆ្នោតនៅថ្ងៃសៅរ៍ទី២៩ ខែកុម្ភៈ ប៉ុណ្ណោះទេ ប៉ុន្តែក៏អាចចាប់ផ្តើមទាក់ទាញអ្នកបោះឆ្នោតនៅក្នុងរដ្ឋចំនួន១៤ ដែលនឹងនឹងបោះឆ្នោតនៅថ្ងៃទី៣ខែមីនាខាងមុខ។
ការស្ទង់មតិក៏បង្ហាញថា ការបោះឆ្នោតនៅរដ្ឋ South Carolina អាចជាឱកាសស្រាប់បេក្ខជនថ្មីមួយគឺលោកមហាសេដ្ឋី Tom Steyer ដែលនាំមុខអតីតអភិបាលក្រុង South Bend រដ្ឋ Indiana លោក Pete Buttigieg និងសមាជិកព្រឹទ្ធសភាប្រចាំរដ្ឋ Minnesota អ្នកស្រី Amy Klobuchar។
លោក Michael Bloomberg មហាសេដ្ឋីនិងជាអតីតអភិបាលក្រុងញូវយ៉ក នឹងចូលរួមការជជែកដេញដោលនៅយប់ថ្ងៃអង្គារនេះ បើទោះបីជាលោកមិនមានឈ្មោះនៅក្នុងការបោះឆ្នោតថ្ងៃសៅរ៍នៅរដ្ឋ South Carolina នេះក៏ដោយ៕
