ចៅក្រមមួយរូបក្នុងប្រទេសហ្វ៊ីជីបានកាត់សេចក្តីថា អាជ្ញាធរសហរដ្ឋអាមេរិកអាចឃាត់នាវាកម្សាន្តទំនើបមួយគ្រឿងដែលជាកម្មសិទ្ធិរបស់រុស្ស៊ីបាន ក៏ប៉ុន្តែត្រូវរង់ចាំយ៉ាងហោចណាស់ក៏ដល់ថ្ងៃសុក្រនេះផងដែរខណៈដែលក្រុមមេធាវីការពារក្តីនៅក្នុងសំណុំរឿងនេះកំពុងធ្វើការប្តឹងជំទាស់នោះ។ នេះបើតាមការចេញផ្សាយរបស់ទីភ្នាក់ងារព័ត៌មាន AP។
នាវាកម្សាន្ត Amadea ដែលមានតម្លៃប្រមាណ៣២៥លានដុល្លារត្រូវបានឃាត់ទុកមិនឱ្យចាកចេញពីប្រទេសហ្វ៊ីជីដែលស្ថិតនៅក្នុងតំបន់មហាសមុទ្រប៉ាស៊ីហ្វិកខាងត្បូងដោយសារតែមានការពាក់ព័ន្ធនឹងប្រទេសរុស្ស៊ី។ បទបញ្ជារបស់ចៅក្រមរូបនេះ កំពុងមានសុពលភាពនៅពេលនេះហើយបានរារាំងមិនឱ្យអាជ្ញាធរអាមេរិកយកនាវាកម្សាន្តនេះទៅកាន់កោះហាវ៉ៃឬកន្លែងណាផ្សេងទៀត។
នៅមានសំណួរមួយបានចោទឡើងនៅឡើយជុំវិញរឿងនេះថាតើសេដ្ឋីរុស្ស៊ីណាម្នាក់ក្នុងចំណោមពីរនាក់ដែលជាម្ចាស់ពិតប្រាកដនៃនាវាកម្សាន្តទំនើប Amadea នេះពីព្រោះក្នុងចំណោមសេដ្ឋីរុស្ស៊ីទាំងពីរនាក់នោះមានម្នាក់ជាប់ឈ្មោះស្ថិតនៅក្រោមការដាក់ទណ្ឌកម្ម ហើយម្នាក់ទៀតមិនមានឈ្មោះក្នុងបញ្ជីទណ្ឌកម្មទេ។ វាក៏នៅមានសំណួរជាច្រើនផងដែរថាតើសហរដ្ឋអាមេរិក មានដែនយុត្ថាធិការច្បាប់អនុវត្តបានកម្រិតណានៅក្នុងប្រទេសហ្វ៊ីជីនោះ។
ចៅក្រមតុលាការជាន់ខ្ពស់ក្នុងរដ្ឋធានីស៊ូវ៉ានៃប្រទេសហ្វ៊ីជីលោក Deepthi Amaratunga បានចេញដីកាបង្គាប់មួយកាលពីថ្ងៃអង្គារដោយអនុញ្ញាតឱ្យសហរដ្ឋអាមេរិកអាចចាប់ឃាត់នាវាកម្សាន្តទំនើបមួយគ្រឿងនេះបន្ទាប់ពីសហរដ្ឋអាមេរិកបានដាក់ឯកសារស្នើសុំធ្វើការឃាត់ទុកនាវានេះក្នុងពេលកន្លងទៅ ក៏ប៉ុន្តែចៅក្រមរូបនេះក៏បានអនុញ្ញាតឱ្យផ្អាកការអនុវត្តដីកាបញ្ជារបស់ខ្លួនមួយរយៈខ្លីសិន ខណៈពេលដែលក្រុមមេធាវីការពារក្តីក្នុងសំណុំរឿងនេះកំពុងប្តឹងតវ៉ាប្រឆាំង។
ការសម្រេចចិត្តបន្ទាប់របស់ចៅក្រមរូបនេះនឹងត្រូវធ្វើឡើងនៅថ្ងៃសុក្រខាងមុខនេះ នៅពេលដែលលោកនឹងធ្វើការសម្រេចចិត្តថាតើនឹងបន្តនីតិវិធីក្នុងការផ្អាកការអនុវត្តការឃាត់ទុកនាវាមួយគ្រឿងនេះ ដោយរង់ចាំការប្តឹងឧទ្ធរណ៍ជាផ្លូវការសិនពីក្រុមមេធាវីការពារក្តីរបស់នាវានេះឬយ៉ាងណានោះ។
សហរដ្ឋអាមេរិកបានអះអាងថា ម្ចាស់កម្មសិទ្ធិពិតប្រាកដនៃនាវាកម្សាន្តទំនើប Amadea នេះ មានឈ្មោះថា Suleiman Kerimov ដែលជាអ្នកសេដ្ឋកិច្ចនិងអ្នកនយោបាយរុស្ស៊ីមួយរូប ដែលត្រូវបានសហរដ្ឋអាមេរិកដាក់ទណ្ឌកម្មកាលពីឆ្នាំ២០១៨ពីបទបានលាងលុយកខ្វក់និងប្រឈមពីការដាក់ទណ្ឌកម្មមួយចំនួនផងដែរពីប្រទេសកាណាដា ប្រទេសនៅទ្វីបអឺរ៉ុប ចក្រភពអង់គ្លេសនិងប្រទេសមួយចំនួនផ្សេងទៀតក្រោយរុស្ស៊ីបានចូលឈ្លានពានលើប្រទេសអ៊ុយក្រែន៕
ចៅក្រមនៅហ្វ៊ីជីថា អាមេរិកអាចឃាត់នាវាកម្សាន្តទំនើបមួយគ្រឿងរបស់រុស្ស៊ីបាន ប៉ុន្តែមិនអាចធ្វើបានភ្លាមៗនោះទេ
ទីក្រុងវែលីងតោន ប្រទេសនូវែលសេឡង់ —
