ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយនៅថ្ងៃអង្គារនេះថា មេដឹកនាំសហភាពអឺរ៉ុប បានបញ្ជូនសារមួយទៅកាន់ប្រទេសចិនថា ចិនមិនត្រូវគាំទ្ររុស្ស៊ីខាងផ្នែកយោធា នៅក្នុងសង្គ្រាមឈ្លានពានប្រឆាំងនឹងប្រទេសអ៊ុយក្រែននោះឡើយ។
ថ្លែងក្នុងកិច្ចប្រជុំថ្នាក់រដ្ឋមន្ត្រីការបរទេសរបស់អង្គការអូតង់ក្នុងទីក្រុងព្រុចសែល ប្រទេសបែលហ្ស៊ិក និងនៅមុនដំណើរទស្សនកិច្ចរបស់លោកទៅចិននៅសប្តាហ៍ក្រោយផងនោះលោក Borrell និយាយថា សហភាពអឺរ៉ុប មាន«ភាពច្បាស់លាស់នឹងចិនដែលថា ជំហររបស់ចិនជុំវិញសកម្មភាពឃោរឃៅនិងឧក្រិដ្ឋកម្មសង្គ្រាមរបស់រុស្ស៊ី នឹងក្លាយជាកត្តាកំណត់នៃគុណភាពសម្រាប់ទំនាក់ទំនងរបស់សហភាពអឺរ៉ុបជាមួយរដ្ឋាភិបាលក្រុងប៉េកាំង»។
លោកនិយាយថា មេដឹកនាំសហភាពអឺរ៉ុបដទៃទៀតដែលទៅធ្វើទស្សនកិច្ចប្រទេសចិន ដែលរួមមានប្រធានគណៈកម្មការសហភាពអឺរ៉ុប លោកស្រី Ursula von der Leyen និងប្រធានាធិបតីបារាំងលោក Emmanuel Macron ក៏នាំសារដូចគ្នានេះផងដែរ។
លោក Borrell បានថ្លែងទៅកាន់ក្រុមអ្នកសារព័ត៌មាន រួមជាមួយរដ្ឋមន្ត្រីការបរទេសអាមេរិកលោក Antony Blinken ដែលបាននិយាយថា នឹងមានការផ្តោតទៅលើការកាត់បន្ថយការពឹងផ្អែកទៅលើថាមពលរបស់រុស្ស៊ី និងបង្កើនការផលិតថាមពលស្អាតវិញ។
អ្នកការទូតជាន់ខ្ពស់ទាំងពីររូប មានគម្រោងចូលរួមកិច្ចប្រជុំថ្នាក់រដ្ឋមន្ត្រីការបរទសរបស់អង្គការអូតង់ ដើម្បីស្វាគមន៍សមាជិកថ្មីរបស់ប្រទេសហ្វាំងឡង់ ដែលបានក្លាយជាសមាជិកផ្លូវការរបស់អង្គការនេះ។
ហ្វាំងឡង់ក្លាយជាសមាជិកអង្គការអូតង់
ការបង្ហូតទង់ជាតិហ្វាំងឡង់នៅទីស្នាក់ការកណ្តាលរបស់អង្គការអូតង់ កើតមានឡើងក្នុងរយៈពេលតិចជាង១ឆ្នំា ក្រោយប្រទេសនេះបានដាក់ពាក្យសុំចូលជាសមាជិករបស់អង្គការនេះ ដែលជាការឆ្លើយតបចំពោះការឈ្លានពានរបស់រុស្ស៊ីទៅលើប្រទេសអ៊ុយក្រែន។
ប្រទេសរុស្ស៊ីបានព្រមានកាលពីថ្ងៃចន្ទម្សិលមិញថា ខ្លួននឹងបង្កើនកងកម្លាំងទៅជិតប្រទេសហ្វាំងឡង់ ប្រសិនបើអង្គការអូតង់បញ្ជូនកងទ័ព ឬយុទ្ធោបករណ៍ទៅកាន់ប្រទេសនេះ ក្នុងនាមជាសមាជិកថ្មីទី៣១របស់ខ្លួន។
ជំនួយយោធាអាមេរិកទៅអ៊ុយក្រែន៖
មន្ត្រីស.រ.អ.បាននិយាយថា ស.រ.អ.នឹងបញ្ជូនគ្រាប់រំសេវនិងគ្រឿងឧបករណ៍តម្លៃប្រមាណ៥០០លានដុល្លារទៅឱ្យអ៊ុយក្រែន ហើយនឹងចំណាយយជាង២ពាន់លានដុល្លារទៀតដើម្បីទិញគ្រាប់រំសេវ រ៉ាដា និងអាវុធឯទៀតៗក្នុងពេលអនាគត នៅពេលក្រុមទាហានអ៊ុយក្រែនប្រុងប្រៀបធ្វើការវាយលុកប្រឆាំងនឹងកងកម្លាំងរុស្ស៊ីនៅរដូវផ្ការីកនេះ។
មន្ត្រីទាំងនេះបានថ្លែងថា គ្រាប់រំសេវ កាំភ្លើងបាញ់ គ្រាប់បែកដៃ និងយានយន្ត នឹងត្រូវយកពីកន្លែងស្តុកអាវុធនិងឧបករណ៍យោធាដើម្បីឱ្យសម្ភារៈទាំងនេះអាចទៅដល់តំបន់មានសង្គ្រាមឱ្យបានឆាប់រហ័ស។
បើតាមពួកមន្ត្រីដែលបាននិយាយដោយមិនឱ្យគេបញ្ចេញឈ្មោះដោយសារមិនទាន់ប្រកាសអំពីជំនួយនេះថា ជំនួយក្នុងរយៈពេលយូរមានទឹកប្រាក់២.១០០លានដុល្លារ ដែលត្រូវផ្តល់តាមរយៈការផ្តើមគំនិតខាងជំនួយសន្តិសុខឱ្យអ៊ុយក្រែន (Ukraine Security Assistance Initiative) នឹងទិញមីស៊ីលសម្រាប់ប្រព័ន្ធមីស៊ីលជាតិទំនើបបាញ់ពីដីទៅអាកាសហៅ NASAMS រ៉ាដា និងអាវុធ ឯទៀតៗ។ គេរំពឹងថានឹងមានការប្រកាសអំពីការផ្តល់ជំនួយទាំងនេះនឹងធ្វើឡើងនៅថ្ងៃអង្គារនេះ។
អាវុធថ្មីៗនិងការផ្តល់ប្រាក់កាសឱ្យអ៊ុយក្រែនមានឡើងនៅពេលដែលរុស្ស៊ីបន្តបាញ់ផ្តក់លើអ៊ុយក្រែនដោយមីស៊ីលបាញ់បានឆ្ងាយ ហើយការប្រយុទ្ធក្តៅគគុកដើម្បីកាន់កាប់ក្រុង Bakhmut នាប៉ែកខាងកើតប្រទេស នៅតែមានធ្វើតទៅទៀត។ ប្រធានាធិបតីអ៊ុយក្រែនលោក Volodymyr Zelenskyy បាននិយាយប្រាប់ទីភ្នាក់ងារសារព័ត៌មាន Associated Press នៅក្នុងសេចក្តីសម្ភាសន៍ផ្តាច់មុខមួយថា រុស្ស៊ីអាចចាប់ផ្តើមធ្វើឱ្យមានការគាំទ្រអន្តរជាតិដល់កិច្ចព្រមព្រៀងមួយតម្រូវឱ្យអ៊ុយក្រែនធ្វើការសម្របសម្រួលដែលមិនអាចទទួលយកបាន បើប្រទេសលោកចាញ់នៅក្នុងការប្រយុទ្ធនោះ។
កញ្ចប់ជំនួយស.រ.អ.ថ្មីបំផុតនេះ ដែលមានរួមផ្សំជំនួយក្នុងរយៈពេលខ្លីនិងជំនួយក្នុងរយៈពេលយូរ មានរួមគ្រាប់រំសេវចម្រុះមកពីស្តុកនៃក្រសួងការពារជាតិស.រ.អ. គ្រាប់កាំភ្លើងដៃ២៣លានគ្រាប់និងគ្រាប់បែកដៃ២សែនគ្រាប់ ព្រមទាំងការផ្តល់ប្រាក់សម្រាប់អាវុធប្រកបដោយបច្ចេកវិទ្យាខ្ពស់ មានរួមប្រព័ន្ធរ៉ុក្កែតបាញ់ដ្រូន រ៉ាដាឃ្លាំមើលអាកាសនិងកន្លែង និងសេវាទាក់ទងតាមផ្កាយរណប។
កញ្ចប់ជំនួយនេះនាំឱ្យទឹកប្រាក់សរុបនៃជំនួយខាងសន្តិសុខស.រ.អ.ឱ្យអ៊ុយក្រែនមានដល់ជាង៣៥ពាន់លានដុល្លារ តាំងពីរុស្ស៊ីបានចូលលុកលុយអ៊ុយក្រែននៅខែកុម្ភៈ ឆ្នាំ២០២២មក៕
ព័ត៌មានខ្លះនៅក្នុងសេចក្តីរាយការណ៍នេះ ត្រូវបានដកស្រង់ពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
