ក្រសួងការពារជាតិចក្រភពអង់គ្លេសបានឱ្យដឹងកាលពីថ្ងៃសៅរ៍ ទី១ ខែមេសានៅក្នុងការផ្ដល់ព័ត៌មានសម្ងាត់ប្រចាំថ្ងៃរបស់ខ្លួនអំពីប្រទេសអ៊ុយក្រែនថានាយអគ្គសេនាធិការនៃកងយោធពលរុស្ស៊ីលោក Valery Gerasimov បានបរាជ័យក្នុងការវាយលុកជាធម្មតាមួយនៅរដូវរងានៅអ៊ុយក្រែនដែលការវាយលុកនេះមានគោលដៅពង្រីកការគ្រប់គ្រងរបស់រុស្ស៊ីលើតំបន់ Donbas ទាំងមូល។
សេចក្ដីរាយការណ៍នោះបានឱ្យដឹងថាលោក Gerasimov បានធ្វើជាមេបញ្ជាការនៃ«កិច្ចប្រតិបត្តិការយោធាពិសេសក្នុងប្រទេសអ៊ុយក្រែន ប៉ុន្តែរយៈពេល៨០ថ្ងៃ បានកន្លងផុតទៅ ហើយស្ថានភាពកាន់តែបង្ហាញថា គម្រោងការនេះបានបរាជ័យ»។
បើតាមក្រសួងការពារជាតិចក្រភពអង់គ្លេស រុស្ស៊ីបានពង្រីកការកាន់កាប់របស់ខ្លួនក្នុងប្រទេសអ៊ុយក្រែនតែបន្តិចបន្តួចប៉ុណ្ណោះ ប៉ុន្តែរុស្ស៊ីបានបាត់បង់ទាហានរាប់ម៉ឺននាក់«ភាគច្រើនដោយមានប្រៀបបណ្តោះអាសន្ននៅក្នុងការកេណ្ឌទាហាននៅរដូវស្លឹកឈើជ្រុះ»។
លោកស្រី Izumi Nakamitsu អ្នកតំណាងជាន់ខ្ពស់អ.ស.ប.ខាងកិច្ចការដកសព្វាវុធ បាននិយាយថា៖ «នៅពេលនេះ គ្រោះថ្នាក់នៃការប្រើអាវុធនុយក្លេអ៊ែរមានខ្លាំងជាងពេលណាៗទាំងអស់ចាប់តាំងពីសម័យសង្គ្រាមត្រជាក់មក»។ លោកស្រីថ្លែងទៀតថា៖ «សង្គ្រាមនៅអ៊ុយក្រែនគឺជាឧទាហរណ៍ច្បាស់បំផុតដែលបង្ហាញអំពីគ្រោះថ្នាក់នេះ»។
កំណត់សម្គាល់របស់លោកស្រី Nakamitsu កាលពីថ្ងៃសុក្រ ទី៣១ ខែមីនានៅក្នុងការប្រជុំមួយនៃក្រុមប្រឹក្សាសន្តិសុខអ.ស.ប. ត្រូវបានធ្វើឡើងក្រោយសេចក្តីប្រកាសរបស់ប្រធានាធិបតីរុស្ស៊ីលោក Vladimir Putin កាលពីពេលថ្មីៗនេះថាលោកបានសម្រេចកិច្ចព្រមព្រៀងមួយក្នុងការដាក់អាវុធនុយក្លេអ៊ែរមិនមែនយុទ្ធសាស្ត្រនៅក្នុងប្រទេសបេឡារុសនៅត្រឹមខែកក្កដាខាងមុខនេះ។ ប្រទេសបេឡារុសជាប្រទេសមួយនៅជិតខាងរុស្ស៊ីហើយជាសម្ព័ន្ធមិត្តមួយនៅក្នុងការលុកលុយប្រទេសអ៊ុយក្រែនផងដែរ។
លោកស្រី Nakamitsu បានថ្លែងថា កង្វះការសន្ទនាគ្នានិងការចុះថមថយកិច្ចព្រមព្រៀងអំពីការដកសព្វាវុធនិងការត្រួតត្រាអាវុធ រួមជាមួយវោហារសាស្ត្រដ៏មានគ្រោះថ្នាក់និងការគំរាមកំហែងដោយលាក់លាមអាចបណ្តាលឱ្យមានការបង្កើនការប្រើប្រាស់នុយក្លេអ៊ែរ។
លោកស្រីបានមានប្រសាសន៍ថា៖ «នៅពេលនិយាយអំពីបញ្ហាទាក់ទិននឹងអាវុធនុយក្លេអ៊ែរ រដ្ឋទាំងអស់ត្រូវតែចៀសវាងកុំធ្វើសកម្មភាពណាមួយដែលអាចនាំឱ្យមានការបង្កើនភាពតានតឹង កំហុសឬការភាន់ច្រឡំ»។
កាលពីថ្ងៃសុក្រ ទី៣១ ខែមីនា ប្រធានាធិបតីបេឡារុសលោក Alexander Lukashenko បានគំរាមកំហែងថាបេឡារុសអាចនឹងយល់ព្រមឱ្យដាក់មីស៊ីលនុយក្លេអ៊ែរអន្តរទ្វីបលើដែនដីខ្លួន បន្ថែមពីលើអាវុធនុយក្លេអ៊ែរកលយុទ្ធដែលរុស្ស៊ីបានសម្រេចដាក់តាំងក្នុងប្រទេសបេឡារុស។
នៅក្នុងសុន្ទរកថាប្រចាំឆ្នាំទៅកាន់ពួកសមាជិកសភានិងពួកមន្ត្រីរដ្ឋាភិបាល លោក Lukashenko បាននិយាយថាអាវុធនុយក្លេអ៊ែររបស់រដ្ឋាភិបាលក្រុងម៉ូស្គូអាចជួយការពារប្រទេសបេឡារុស ដែលលោក Lukashenko អះអាងថាស្ថិតនៅក្រោមការគំរាមកំហែងពីពួកបស្ចិមប្រទេស៕
ប្រែសម្រួលដោយលោក ឈឹម សុមេធ
