សហភាពអឺរ៉ុប បានយល់ព្រមពង្រីកការដាក់ទណ្ឌកម្មជុំទី៣របស់ខ្លួនដោយភាគច្រើនសំដៅលើពួកអភិជននិងមន្ត្រីរុស្ស៊ីដែលជិតស្និទ្ធនឹងប្រធានាធិបតី Vladimir Putin ដោយសារការឈ្លានពានដែលមិនមានការបង្កហេតុជាមុនរបស់រដ្ឋាភិបាលក្រុងមូស្គូលើប្រទេសអ៊ុយក្រែន។ នេះបើតាមការរាយការណ៍របស់វិទ្យុ RFE/RL។
ក្រុមប្រឹក្សាអឺរ៉ុបដែលមានប្រទេសបារាំងជាប្រធាន បានបញ្ជាក់នៅក្នុងសារតាម Twitter ជាបន្តបន្ទាប់កាលពីថ្ងៃទី៩ ខែមីនាថា ការដាក់ទណ្ឌកម្មថ្មី បានបន្ថែមលើពួកមេដឹកនាំនិងអភិជនរុស្ស៊ីក៏ដូចជាសមាជិកក្រុមគ្រួសាររបស់ពួកគេដែលបានជាប់ទាក់ទិនក្នុងការឈ្លានពានរបស់រុស្ស៊ីប្រឆាំងនឹងអ៊ុយក្រែន។
ការដាក់ទណ្ឌកម្មជុំទី៣ លើប្រទេសរុស្ស៊ីនេះ ជាទណ្ឌកម្មសហភាពអឺរ៉ុបដ៏ធំបំផុតដែលបានព្រមព្រៀងគ្នាចាប់តាំងពីរុស្ស៊ីចាប់ផ្តើមការឈ្លានពានកាលពីថ្ងៃទី២៤ ខែកុម្ភៈមក ដែលរួមមានទាំងការបង្កកទ្រព្យសម្បត្តិធនាគារកណ្តាលរុស្ស៊ីនៅក្នុងសហភាពអឺរ៉ុប និងការហាមឃាត់បណ្តាញព័ត៌មានរបស់រដ្ឋាភិបាលវិមានក្រឹមឡាំងនៅក្នុងសហភាពអឺរ៉ុបផង៕
