ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​អូបាម៉ា​ជំរុញ​ឲ្យ​អង់គ្លេស​ស្ថិត​នៅ​ក្នុង​សហភាព​អឺរ៉ុប ដោយ​បំពាន​លើ​ក្រុម​អ្នក​រិះគន់


ប្រធានាធិបតី​អាមេរិក លោក​ បារ៉ាក់ អូបាម៉ា ត្រូវ​បាន​ស្វាគមន៍​ដោយ​នាយក​រដ្ឋ​មន្ត្រី​អង់គ្លេស​ លោក​ David Cameron (ឆ្វេង) នៅ​​ទីក្រុង​ឡុងដ៍ កាល​ពីថ្ងៃទី២២ ខែមេសា ឆ្នាំ២០១៦។
ប្រធានាធិបតី​អាមេរិក លោក​ បារ៉ាក់ អូបាម៉ា ត្រូវ​បាន​ស្វាគមន៍​ដោយ​នាយក​រដ្ឋ​មន្ត្រី​អង់គ្លេស​ លោក​ David Cameron (ឆ្វេង) នៅ​​ទីក្រុង​ឡុងដ៍ កាល​ពីថ្ងៃទី២២ ខែមេសា ឆ្នាំ២០១៦។

លោក​ប្រធានាធិបតី​ស.រ.អា.​ បារ៉ាក់ អូបាម៉ា​ បាន​ចូល​ប្រឡូក​ក្នុង​ការ​ជជែក​ដេញ​ដោល​គ្នា​ក្តៅ​គគុក​មួយ​អំពី​ការ​បោះឆ្នោត​ប្រជាមតិ​នៅ​ថ្ងៃ​ទី​២៣​ខែមិថុនា​ ដែល​នៅ​ក្នុង​នោះ​ក្រុម​អ្នកបោះឆ្នោត​អង់គ្លេស​នឹង​សម្រេច​ចិត្ត​ថា​តើ​ប្រទេស​ពួក​គេ​នឹង​ឋិត​នៅ​ក្នុង​សហភាព​អឺរ៉ុប​តទៅ​ទៀត​ឬ​យ៉ាង​ណា។​

មេដឹក​នាំ​ស.រ.អា. ​រូបនេះ​បាន​មាន​ប្រសាសន៍​នៅ​ក្នុង​សន្និសីទ​កាសែត​រួម​គ្នា​ជាមួយ​លោក​នាយក​រដ្ឋមន្ត្រី​អង់គ្លេស​ David Cameron ​នៅ​ក្រោយ​ជំនួប​របស់​អស់​លោក​កាល​ពី​ថ្ងៃសុក្រ​ថា៖​ «ខ្ញុំ​គ្មាន​ជំនឿ​ថា​សហភាព​អឺរ៉ុប​នឹង​បន្ថយ​ឥទ្ធិពល​របស់​អង់គ្លេស​នៅ​ក្នុង​ពិភពលោក​ទេ វា​នឹង​បង្កើន​ឥទ្ធិពល​នេះ​ទៅ​វិញ​ទេ»។

ការ​ថ្លែង​ដូច្នេះ​ដោយ​មេដឹក​នាំ​ ស.រ.អា.​ រូប​នេះ​ជា​ការ​លើក​ទឹក​ចិត្ត​មួយ​ដល់​លោក ​Cameron​ ដែល​បាន​គាំទ្រ​ឱ្យ​ប្រទេស​អង់គ្លេស​ឋិត​នៅ​ក្នុង​សហភាព​អឺរ៉ុប​តទៅ​ទៀត។​

ក៏​ប៉ុន្តែ​សេចក្តី​ថ្លែង​ទាំង​នេះ​របស់​លោក​ អូបាម៉ា​ បាន​នាំ​ឱ្យ​មាន​ការ​ខឹង​សម្បារ​ពី​សំណាក់​ពួក​អ្នក​មាន​ការ​សង្ស័យ​អំពី​អឺរ៉ុប​ដែល​ភាសា​អង់គ្លេស​ហៅ​ថា​ពួក Euroskeptics ​ដោយ​បាន​ច្រាន​ចោល​អ្វី​ដែល​ពួក​គេ​និយាយ​ថា​ ជា​ការ​ជ្រៀត​ជ្រែក​របស់​មេដឹកនាំ​ស.រ.អា.​ រូប​នេះ​ក្នុង​កិច្ចការ​ផ្ទៃ​ក្នុង​នៃ​ប្រទេស​អង់គ្លេស។​

នៅ​ក្នុង​អត្ថបទ​មួយ​ដែល​បាន​ត្រូវ​បោះ​ពុម្ព​ផ្សាយ​ដោយ​កាសែត The Telegraph ក្នុង​រយៈ​ពេល​ខ្លី​ក្រោយ​ពី​យន្ត​ហោះ​ Air Force One ​របស់​លោក​ប្រធានាធិបតី​អាមេរិក​ ចុះ​ចត​នៅ​ឯ​ចំណត​យន្ត​ហោះ​ Stansted ​នៅ​ខាង​ក្រៅ​ក្រុង ​Londres កាល​ពី​យប់ថ្ងៃ​ព្រហស្បតិ៍ ​លោក​ អូបាម៉ា​ បាន​សុំ​ឱ្យ​ប្រទេស​អង់គ្លេស​ឋិត​នៅ​ក្នុង​សហភាព​អឺរ៉ុប​តទៅ​ទៀត។​

លោក​ អូបាម៉ា ​បាន​សរសេរ​ថា៖ «បញ្ហា​អំពី​ថា​តើ​ប្រទេស​អង់គ្លេស​ឋិត​នៅ​ជា​ផ្នែក​មួយ​នៃ​សហភាព​អឺរ៉ុប​តទៅ​ទៀត​ជា​បញ្ហា​មួយ​សម្រាប់​ក្រុម​អ្នកបោះឆ្នោត​អង់គ្លេស​សម្រេច​ចិត្ត​ដោយ​ខ្លួនឯង។ ទ្វីប​អឺរ៉ុប​មួយ​ដែល​ខ្លាំង​មិន​មែន​ជាការ​គំរាម​កំហែង​មួយ​ដល់​ភាព​ជា​មេដឹក​នាំសាកល​របស់​ប្រទេស​អង់គ្លេស​ទេ តែ​វា​ពង្រឹង ភាព​ជាមេដឹក​នាំ​សាកល​របស់​ប្រទេស​អង់គ្លេស»។

ស.រ.អា.​ និង​ប្រទេស​អង់គ្លេស​មាន​ទំនាក់​ទំនង​មួយ​ដែល​ដែល​ពួក​មេដឹកនាំ​នៅ​ក្នុង​រដ្ឋធានី​វ៉ាស៊ីនតោន​បាន​ព៌ណនា​ចាប់​តាំង​ពី​សម័យ​លោក ​Winston Churchill ​ថា​ ជា​ «ទំនាក់​ទំនង​ពិសេស​មួយ»​ ហើយ​ស.រ.អា. ​យល់​ឃើញ​ថា​ សមាជិកភាព​របស់​ប្រទេស​អង់គ្លេស​ជា​សំឡេង​របស់​រដ្ឋាភិបាល​ក្រុង​វ៉ាស៊ីនតោន​នៅ​ក្នុង​សហភាព​អឺរ៉ុប​ ដែល​មាន​ប្រទេស​ជាតិ២៨​ជាសមាជិក៕

XS
SM
MD
LG