អង្គការហូនីសេហ្វ (UNICEF) ដែលជាទីភ្នាក់ងាររបស់អង្គការសហប្រជាជាតិទទួលបន្ទុកខាងកុមារ បានបញ្ជាក់កាលពីថ្ងៃសុក្រថាខ្លួនកំពុងសិក្សាពីផលប៉ះពាល់នៃការកាត់ជំនួយភ្លាមៗរបស់សហរដ្ឋអាមេរិក ដោយកុមាររាប់លាននាក់បានរងផលប៉ះពាល់រួចទៅហើយដោយសារការបង្កកជំនួយកាលពីខែមករា។ នេះបើយោងតាមសារព័ត៌មាន AFP។
ប្រធានាធិបតីសហរដ្ឋអាមេរិកលោក Donald Trump ពេលកាន់តំណែងថ្ងៃដំបូង បានចេញបញ្ជាឲ្យបង្កករាល់ជំនួយបរទេសទាំងអស់របស់អាមេរិកចំនួន ៩០ ថ្ងៃដើម្បីទុកពេលឲ្យរដ្ឋបាលរបស់លោកពិនិត្យមើលការចំណាយនៅក្រៅប្រទេស ដោយលោកសម្លឹងរកការកាត់កម្មវិធីនានាដែលមិនស្របនឹងរបៀបវារៈ «អាមេរិកជាមុន» របស់លោក។
ក្រសួងការបរទេសអាមេរិកបានប្រកាសកាលពីថ្ងៃពុធថា កិច្ចសន្យាផ្តល់ជំនួយច្រើនឆ្នាំត្រូវបានកាត់ដល់ ៩២% ដើម្បីសន្សំថវិកាប្រមាណ ៦០ ពាន់លានដុល្លារក្នុងកម្មវិធីអភិវឌ្ឍន៍និងមនុស្សធម៌ក្រៅប្រទេស។
អ្នកនាំពាក្យអង្គការ UNICEF លោក James Elder បាននិយាយនៅសន្និសីទកាសែតមួយក្នុងទីក្រុងហ្សឺណែវនៃប្រទេសស្វីសថា៖ «យើងទទួលបានការជូនដំណឹងអំពីការបញ្ចប់កិច្ចសន្យាផ្តល់ជំនួយឥតសំណងដល់ UNICEF ដោយរួមទាំងកម្មវិធីមនុស្សធម៌និងអភិវឌ្ឍន៍ផងដែរ»។
លោក Elder បន្តថា៖ «យើងបន្តវាយតម្លៃអំពីផលប៉ះពាល់នៃការជូនដំណឹងអំពីការបញ្ចប់ជំនួយទាំងនោះលើកម្មវិធីរបស់យើងសម្រាប់កុមារ។ យើងដឹងរួចហើយថាការផ្អាកជាបឋមកន្លងមកបានប៉ះពាល់ដល់កម្មវិធីសម្រាប់កុមាររាប់លាននាក់នៅក្នុងប្រទេសប្រមាណពាក់កណ្តាលដែលយើងធ្វើការ»។
លោក Elder បានបន្ថែមថា៖ «បើគ្មានវិធានការបន្ទាន់ទេ បើគ្មានថវិកាទេ កុមារច្រើនថែមទៀតនឹងខ្វះអាហារូបត្ថម្ភ កុមារកាន់តែតិចនឹងទទួលបានការអប់រំ ហើយជំងឺដែលអាចបង្ការបាននឹងឆក់យកជីវិតកុមារច្រើនជាងមុន»។
រហូតមកដល់ពេលនេះ សហរដ្ឋអាមេរិកគឺជាប្រទេសម្ចាស់ជំនួយអភិវឌ្ឍន៍និងមនុស្សធម៌ធំជាងគេបង្អស់ក្នុងពិភពលោក៕
វេទិកាបញ្ចេញមតិ