សម្តេចសង្ឃ ដាឡៃ ឡាម៉ា មានសង្ឃដីកាថា មានតម្រុយមួយចំនួន ដែលថា លោកប្រធានាធិបតីចិន ស៊ី ជីនពីង ត្រៀមខ្លួនជាស្រេចដើម្បីពិភាក្សាអំពីការស្នើសុំរបស់ព្រះអង្គ ឲ្យផ្តល់ស្វ័យភាពដ៏ជាក់លាក់ដល់ទីបេ ប៉ុន្តែ ព្រះអង្គមានសង្ឃដីកាថា អ្នកនយោបាយតឹងរ៉ឹងកំពុងរារាំងមិនឲ្យមានការចរចារវាងប្រទេស ចិន និងព្រះអង្គផ្ទាល់។ ការលើកឡើងរបស់ព្រះអង្គ បានបង្កឲ្យមានការឆ្លើយតបដ៏ខ្លាំងពីក្រសួងការបរទេសចិន។
លោក Qin Gang អ្នកនាំពាក្យក្រសួងការបរទេសចិន បាននិយាយថា សម្តេចសង្ឃ ដាឡៃ ឡាម៉ា ត្រូវតែឈប់បំបែកសាមគ្គីភាពរបស់ចិន។ សម្តេចសង្ឃ ដាឡៃ ឡាម៉ា ត្រូវការចាត់វិធានការឲ្យបានច្បាស់លាស់ និងបង្កើតជាលក្ខខ័ណ្ឌសម្រាប់ទំនាក់ទំនងរវាងសម្តេចសង្ឃ និងរដ្ឋាភិបាលចិន។ ទាក់ទងនឹងបញ្ហាទីបេ លោក Gang ថា គ្មានអ្នកនយោបាយតឹងរ៉ឹង ឬការអ្នកគាំទ្របែបនោះទេ ទាំងក្នុងជួរបក្ស ឬជួររដ្ឋាភិបាលចិនក្តី។ លោក ក៏ឲ្យដឹងដែរថា ការការពារសាមគ្គីភាពជាតិ ហើយសាមគ្គីភាពរបស់ចិន គឺជាស្មារតីរួមមួយរបស់ប្រជាពលរដ្ឋចិនគ្រប់គ្នា។
សម្តេចសង្ឃ ដាឡៃ ឡាម៉ា បានច្រានចោលការចោទប្រកាន់របស់រដ្ឋាភិបាលចិនពីបទបំបែករដ្ឋ ហើយថា ព្រះអង្គគ្រាន់តែចង់បានស្វ័យភាពឲ្យទីបេ ដែលជាទីកន្លែងកំណើតរបស់ព្រះអង្គ ដែលព្រះអង្គបានរត់គេចខ្លួនកាលពីឆ្នាំ១៩៥៩ នៅពេលដែលកងទ័ពកុម្មុយនីស្តចិនបានបង្ក្រាបការបះបោរនៅទីបេ។
លោកស្រី Isabel Hilton ប្រធានការចរចាជាមួយចិន ឲ្យដឹងថា ការលើកឡើងរបស់សម្តេចសង្ឃ ដាឡៃ ឡាម៉ា មិនឆ្លុះបង្ហាញពីឆន្ទៈរបស់ចិន ក្នុងការផ្តល់ស្វ័យភាពដល់ទីបេទេ ប៉ុន្តែ បានបង្ហាញជាសញ្ញាណនៃគោលបំណងបង្កើតឲ្យការចរចាសារជាថ្មី។
« សម្តេចសង្ឃ ផ្ញើសារថា ប្រជាពលរដ្ឋទីបេ កំពុងបើកចំហរឲ្យមានការចរចាជាមួយចិន។ តែការចរចានេះ មិនមានលទ្ធផលអ្វី ហើយមិនបានធ្វើឡើងអស់រយៈពេលជាច្រើនឆ្នាំមកហើយ»។
មេដឹកនាំ ចិន និងអ្នកតំណាងឲ្យសម្តេចសង្ឃ ដាឡៃ ឡាម៉ា បានចរចាគ្នារហូតមកដល់ឆ្នាំ២០១០ ហើយបានផ្អាក ដោយសារតែការធ្វើបាតុកម្មនៅទីបេ និងដោយសារការបង្ក្រាបជាបន្តបន្ទាប់ដោយរដ្ឋាភិបាលចិន។ ម្តាយរបស់លោកប្រធានាធិបតី ស៊ី ជីនពីង គឺជាអ្នកកាន់សាសនាព្រះពុទ្ធ ហើយសម្តេចសង្ឃ ដាឡៃ ឡាម៉ា ថា ព្រះអង្គត្រូវបានលើកទឹកចិត្ត ដោយសារតែការលើកឡើងរបស់លោកប្រធានាធិបតីចិន អំពីសាសនាព្រះពុទ្ធកាលពីពេលថ្មីៗនេះ។ លោកស្រី Hilton បាននិយាយថា ប្រវត្តិគ្រួសាររបស់លោកប្រធានាធិបតី ស៊ី ជីនពីង ដែលឪពុករបស់លោកធ្លាប់មានទំនាក់ទំនងដ៏ល្អជាមួយនឹងសម្តេចសង្ឃ ដាឡៃ ឡាម៉ា អាចបង្កើតជាក្តីសង្ឃឹមដើម្បីសម្ព័ន្ធភាពដ៏ប្រសើរ។
«ខ្ញុំយល់ថា សម្តេចសង្ឃកំពុងតែផ្តល់ជាសញ្ញាថា ស្ថានភាពនៅតែបន្តយ៉ាប់យ៉ឺន ហើយក្រោមមេដឹកនាំថ្មី ក្តីសង្ឃឹមអាចចាប់ផ្តើមម្តងទៀត ជាជាងការរំពឹងទុក»។
នៅទីបេ វិញ ការធ្វើបាតុកម្មប្រឆាំងការគ្រប់គ្រងរបស់រដ្ឋាភិបាលចិននៅតែបន្ត កើតមានឡើង។ នៅសប្តាហ៍នេះ បុរសម្នាក់បានដុតសម្លាប់ខ្លួនឯងនៅក្នុងខេត្ត Gansu។ បុរសនេះ គឺជាមនុស្សទី១៣៤ហើយ ដែលបានដុតសម្លាប់ខ្លួនក្នុងរូបភាពនៃការប្រឆាំងនឹងរដ្ឋាភិបាលចិន។
ប្រែសម្រួលដោយ ទែន សុខស្រីនិត
