អ្នកឯកទេសយល់ថា ថវិកាសម្រាប់ឃុំ-សង្កាត់ត្រឹម៥ភាគរយនៃថវិកាជាតិ គឺអាចឱ្យការអភិវឌ្ឍនៅថ្នាក់មូលដ្ឋានមានភាពប្រសើរច្រើន ហើយសមស្របនឹងប្រាក់ចំណូលនិងចំណាយប្រចាំឆ្នាំរបស់រដ្ឋាភិបាលផងដែរ។
លោកឱក សេរីសោភក្តិ៍ អ្នកឯកទេសខាងផ្នែកអភិបាលកិច្ចល្អ បានបញ្ជាក់ក្នុងកម្មវិធីហេឡូវីអូអេកាលពីថ្ងៃចន្ទថា៖
«ខ្ញុំថាបើសិនជារដ្ឋហ្នឹងទៅអាណត្តិក្រោយ បើសិនជាបោះឆ្នោត ហើយបង្កើនថវិកាឱ្យបានទៅដល់ប្រហែលជា៥ភាគរយដែលត្រូវជា៧ឬ៨ម៉ឺនដុល្លារ សឹងថាជិត១០ម៉ឺនដុល្លារ មិនអាចទៅដល់៥០ម៉ឺនដុល្លារ ដូចគណបក្សសង្គ្រោះជាតិបានស្នើទេ។ ក៏ប៉ុន្តែ បើសិនជាទៅដល់៨ម៉ឺនឬ១០ម៉ឺន ខ្ញុំថាហ្នឹងពួកគាត់នឹងបម្រើប្រជាពលរដ្ឋជាពិសេសថវិកាសម្រាប់អភិវឌ្ឍន៍ឃុំសង្កាត់ហ្នឹង នឹងថានឹងចេញជាលទ្ធផលដល់វិជ្ជមានដល់ជីវិតប្រចាំថ្ងៃរបស់ប្រជាពលរដ្ឋជាមិនខាន។ នេះខ្ញុំទទូចហើយទទូចទៀត»។
លោកឱក សេរីសោភក្តិ៍ បានបញ្ជាក់ថាសព្វថ្ងៃនេះថវិកាដែលឃុំ-សង្កាត់ទទួលបានមានត្រឹមតែពី៣ទៅ៥ម៉ឺនដុល្លារតាមទំហំនៃឃុំ-សង្កាត់នីមួយៗ ដែលនេះពិបាកក្នុងការអភិវឌ្ឍធំដុំនៅថ្នាក់មូលដ្ឋាន ក្រៅពីចំណាយធ្វើផ្លូវតូចតាច ហើយនឹងការថែទាំជួសជុលឡើងវិញតែប៉ុណ្ណោះ។
សម្រាប់ការឃោសនាក្នុងការបោះឆ្នោតក្រុមប្រឹក្សាឃុំ-សង្កាត់ក្នុងពេលខាងមុខ គណបក្សប្រជាជនកម្ពុជាបានដាក់គោលនយោបាយក្នុងការផ្តល់ថវិកាមិនតិចជាង២,៨ភាគរយនៃចំណូលចរន្តជាតិ (ប្រហាក់ប្រហែល៥ម៉ឺនដុល្លារ) ដល់ការអភិវឌ្ឍឃុំ-សង្កាត់ ក្នុងខណៈពេលដែលគណបក្សសង្គ្រោះជាតិដាក់គោលនយោបាយចំណាយរហូតដល់៥០០.០០០ដុល្លារ (ប្រហែល២០ភាគរយនៃថវិកាជាតិ)។
លោកឱក សេរីសោភក្តិ៍ យល់ថាគោលនយោបាយរបស់គណបក្សសង្គ្រោះជាតិត្រូវចំណាយច្រើនហួស៖
«មិនត្រឹមត្រូវទេ មិនមានការទទួលខុសត្រូវទេ ព្រោះវាតំណាង២០ភាគរយនៃថវិការបស់យើងហើយ ក៏ប៉ុន្តែថវិកាសព្វថ្ងៃនេះដែលមានត្រឹមតែពី៣ម៉ឺន ទៅ៥ម៉ឺនហ្នឹងមិនបានទៅដល់២,៨ភាគរយនៃថវិកាសរុបផង»។
គោលនយោបាយគណបក្សប្រជាជនកម្ពុជា ក៏ដូចជាគោលនយោបាយរបស់គណបក្សសង្គ្រោះជាតិ គឺមានផ្តោតលើបញ្ហាឃុំ-សង្កាត់មានសុវត្ថិភាព។ ចំណុចខុសគ្នាបន្តិច គឺគណបក្សសង្គ្រោះជាតិផ្តោតលើការលើកកម្ពស់ការងារនគរបាល រីឯគណបក្សប្រជាជនគឺផ្តោតលើការចេញវិធានការថ្មី លើកទឹកចិត្តអ្នកមានស្នាដៃនិងដាក់វិន័យអ្នកអសកម្ម។
លោក សោភក្តិ៍ យល់ថា នេះគឺជាគោលនយោបាយដែលឆ្លើយតបនឹងស្ថានភាពជាក់ស្តែង៖
«បញ្ហាសុវត្ថិភាព បញ្ហាសន្តិសុខរបស់ប្រជាពលរដ្ឋ ទោះបីថាមានគោលនយោបាយភូមិឃុំ មានសុវត្ថិភាពកន្លងមករួចប៉ុន្មានឆ្នាំហើយក៏ដោយ ក៏ប្រជាពលរដ្ឋនៅមិនទាន់មានការកក់ក្តៅ ហើយពួកគាត់ជួបនឹងបញ្ហាសន្តិសុខសុវត្ថិភាពហ្នឹងសឹងតែរាល់ថ្ងៃសឹងតែរាល់យប់ ដូច្នេះហើយខ្ញុំគិតថា ការណ៍ទាំងអស់នេះត្រូវការការខំប្រឹងប្រែងពីអាជ្ញាធរហ្នឹងខ្លាំងថែមទៀត ដើម្បីបញ្ចេញជាលទ្ធផលជាក់ស្តែងដើម្បីឱ្យប្រជាពលរដ្ឋមានភាពកក់ក្តៅ និងឃើញថាគោលនយោបាយមានប្រសិទ្ធភាពមែន»។
លោកឱក សេរីសោភក្តិ៍ លើកទឹកចិត្តពលរដ្ឋឱ្យបន្តបញ្ចេញមតិលើបញ្ហាសង្គមដោយយល់ឃើញថា សំឡេងរបស់ពួកគេកាន់តែមានតម្លៃជាងមុន ហើយថាក្នុងពេលដែលការបោះឆ្នោតឃុំ-សង្កាត់កាន់តែខិតជិតមកដល់ គឺរដ្ឋាភិបាលកាន់តែមានការប្រុងប្រយ័ត្នចំពោះប្រតិកម្មរបស់ពលរដ្ឋ។
លោកឱក សេរីសោភក្តិ៍ យល់ថាការវិវត្តន៍ថ្មីៗនេះដែលរដ្ឋាភិបាល និងសមត្ថកិច្ចបានដកថយលើផ្នែកគោលនយោបាយ និងចំណាត់ការខ្លះ ដូចជាបញ្ហាសន្តិសុខនៅតាមទូរម៉ាស៊ីនដកប្រាក់ ATM ការដាក់សារតាមទូរស័ព្ទស្តីពីស្ថាប័នមីក្រូហិរញ្ញវត្ថុ និងអត្រាការប្រាក់ជាដើម ដោយសារតែមានប្រតិកម្មពីមហាជនតាមបណ្តាញសង្គម និងទីសាធារណៈមួយចំនួន ហើយនោះគឺជាផ្នែកមួយនៃការជំរុញឱ្យអភិបាលកិច្ចល្អដំណើរការទៅមុខ ហើយគណបក្សកាន់អំណាចក៏មានការព្រួយបារម្ភពីសន្លឹកឆ្នោតគាំទ្រផងដែរ។
«នៅក្នុងពេលសម័យឥឡូវនេះ ទោះបីជារាជរដ្ឋាភិបាលមានសិទ្ធិសម្រេចជាឯកច្ឆ័ន្ទទៅលើគោលនយោបាយអ្វី ក៏ដោយក៏ប៉ុន្តែនៅពេលដែលសម្រេចចេញទៅហើយបើសិនជាមានការយល់ជំទាស់អំពីប្រជាពលរដ្ឋ ទោះបីយ៉ាងណាក៏ត្រូវតែដកថយដែរព្រោះរាជរដ្ឋាភិបាលឬរដ្ឋាភិបាលណាមួយក៏ដោយក្នុងសាកលលោក ជាពិសេសនៅក្នុងលទ្ធិប្រជាធិបតេយ្យមិនអាចអនុវត្តវិធានការយូរបានទេ ដរាបណាមិនមានការពេញចិត្តពីប្រជាពលរដ្ឋ»។
មានគណបក្សនយោបាយចំនួន១២ នឹងចូលរួមប្រកួតក្នុងការបោះឆ្នោតក្រុមប្រឹក្សាឃុំ-សង្កាត់នៅថ្ងៃទី៤ ខែមិថុនាខាងមុខ។ មានតែគណបក្សប្រជាជនកម្ពុជា និងគណបក្សសង្គ្រោះជាតិទេ ដែលបានដាក់បេក្ខជននៅគ្រប់ឃុំ-សង្កាត់ទាំង១.៦៤៦៕
