ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

នាវា​ហ្វឹកហាត់​របស់​កងទ័ព​ជើងទឹក​ចិន​បំពេញ​បេសកកម្ម​សុច្ឆន្ទៈ​ ខណៈ​កំពុង​តំឡើង​សាច់ដុំ​សមយុទ្ធ​ដែនសមុទ្រ


រូបឯកសារ៖ នាវិកចិនឈរលើតួនាវា Qi Jiguang អំឡុងពេលខួបលើកទី ៧០ របស់សាធារណរដ្ឋប្រជាមានិតចិន នៅខេត្ត Shandong។

បេសកកម្ម​សុច្ឆន្ទៈ​នេះ​អាច​ជួយ​បន្ថយ​សម្ពាធ​អន្តរជាតិ​លើ​ប្រទេសចិន​ដែល​រដ្ឋាភិបាល​ក្រុងវ៉ាស៊ីនតោន​បាន​ទម្លាក់​ទម្ងន់​លើ​ការចាក់ពង្រីក​ដែន​សមុទ្រ​ដោយ​រដ្ឋាភិបាល​ក្រុងប៉េកាំង។​

នាវា​ហ្វឹកហាត់​របស់​កងទ័ពជើង​ទឹក​ចិន​មួយ​គ្រឿង​កំពុង​ធ្វើដំណើរ​នៅ​លើ​សមុទ្រចិន​ខាងត្បូង​ដែល​មាន​ជម្លោះ​ និង​បាន​ធ្វើ​ដំណើរ​ហួសឆ្ងាយ​ពី​ព្រំដែន​ដើម្បី​ជួបជាមួយ​នឹង​សម្ព័ន្ធមិត្ត​បរទេស​ បណ្តុះបណ្តាល​ដល់​ក្រុមនាវិក​របស់​ខ្លួន​ សាបព្រួស​បេសកកម្ម​សុច្ឆន្ទៈ ​ខណៈ​ពង្រឹង​ការទាមទារគ្រប់គ្រង​ដែនសមុទ្រ​មាន​ជម្លោះ​ និង​ដើម្បី​បង្អាក់​ឥទ្ធិពល​របស់​ប្រទេសអូស្រ្តាលី​ទៅ​លើ​តំបន់។

រដ្ឋាភិបាល​ក្រុងប៉េកាំង​បាន​បង្កើត​ភាពតានតឹង​នៅក្នុង​ទ្វីបអាស៊ី​ចាប់តាំង​ពី​ឆ្នាំ២០១០​មក​ តាមរយៈ​ការចាក់បំពេញ​កោះតូចៗ​នៅក្នុង​សមុទ្រ​ចិន​ខាងត្បូង​មាន​ជម្លោះ​សម្រាប់​បម្រើ​វិស័យ​យោធា​របស់​ខ្លួន។ ប្រទេស​ប្រ៊ុយណេ ម៉ាឡេស៊ី កោះតៃវ៉ាន់ វៀតណាម និង​ហ្វីលីពីន បាន​ទាមទារ​កាន់កាប់​ចំណែក​ត្រួតស៊ីគ្នា​នៃ​ផ្លូវ​ទឹក​ទំហំ​៣លាន ៥សែន​គីឡូម៉ែត្រការ៉េ​ជាមួយ​ចិន​។ ចិន​អះអាង​ថា​៩០ភាគរយ​នៃ​សមុទ្រ​គឺ​ជា​កម្មសិទ្ធិ​របស់​ខ្លួន។

នាវា​ហ្វឹកហាត់​របស់​កងទ័ព​ជើងទឹក​ចិន​ឈ្មោះ Qi Jiguang​ បាន​ចេញ​ដំណើរ​កាល​ពី​ចុង​ខែកញ្ញា​ ដើម្បី​ធ្វើការ​បណ្តុះបណ្តាល​ និង​ធ្វើ​ទស្សនកិច្ច​រយៈពេល​ពីរខែ​ទៅកាន់​ប្រទេស​នានា​នៅក្នុង​តំបន់។ នេះ​បើ​យោង​តាម​សេវា​ព័ត៌មាន​យោធា​ចិន​នៃ​កងទ័ព​រំដោះ​ពលរដ្ឋ​ចិន ។ ប្រទេសប្រ៊ុយណេ​ ទីម័រខាងកើត​ កោះហ្វីជី​ ប្រទេស​នូវែល​ហ្សេ​ឡង់​ និង​ប៉ាពូណូហ្គីណេ​ស្ថិត​នៅក្នុង​បញ្ជី​នៃ​ប្រទេស​ដែល​នាវា​នេះ​ត្រូវ​ធ្វើ​ទស្សនកិច្ច។ នេះ​គឺ​ជា​បេសកកម្ម​លើកទីពីរ​ចាប់តាំង​ពី​ឆ្នាំ២០១៧មក។

លោក Andrew Yang អគ្គលេខាធិការ​នៃ​ក្រុមប្រឹក្សា​សម្រាប់​ការសិក្សា​គោល​នយោ​បាយ​ជឿនលឿន​ចិន​នៅ​កោះតៃវ៉ាន់​បាន​និយាយ​ថា«ខ្ញុំគិត​ថា​ចិន​ ប្រហែល​ជា​កំពុង​អនុវត្ត​គោលនយោបាយ​ទន់ភ្លន់​របស់​ខ្លួន​ ដើម្បី​ព្យាយាម​បញ្ចុះបញ្ចូល​ប្រទេសនានា​ក្នុង​តំបន់​ឲ្យ​គិតថា​ចិន​មាន​អំណាច​ស្លូតត្រង់​ និង​មិន​យក​អំណាច​នោះ​ដើម្បី​ប្រឆាំង​ជាមួយ​នឹង​ពួកគេ​នោះ​ទេ»។

បេសកកម្ម​សុច្ឆន្ទៈ​នេះ​អាច​ជួយ​បន្ថយ​សម្ពាធ​អន្តរជាតិ​លើ​ប្រទេសចិន​ដែល​រដ្ឋាភិបាល​ក្រុងវ៉ាស៊ីនតោន​បាន​ទម្លាក់​ទម្ងន់​លើ​ការចាក់ពង្រីក​ដែន​សមុទ្រ​ដោយ​រដ្ឋាភិបាល​ក្រុងប៉េកាំង។​

​ចាប់តាំង​ពី​ឆ្នាំ២០១៦​មក​រដ្ឋាភិបាល​ក្រុងប៉េកាំង​បាន​ព្យាយាម​បង្កើន​ទំនាក់​ទំនង​ជាមួយ​ប្រទេសនានា​ដែល​ទាមទារ​កាន់កាប់​ផ្នែកខ្លះ​នៃ​សមុទ្រ​ចិន​ខាងត្បូង​ បន្ទាប់​ពី​ចិន​បាន​ចាញ់​ក្តី​នៅ​តុលាការ​អាជ្ញាកណ្តាល​ពិភពលោក​ដែល​បាន​ចេញ​សេចក្តីសម្រេច​ឲ្យ​ប្រទេស​ហ្វីលីពីន​ឈ្នះ​ក្តី​ក្នុង​ការកាន់កាប់​ព្រំដែន​អធិបតេយ្យ​សមុទ្រ។ ស្របពេល​ជា​មួយ​គ្នា​នោះ រដ្ឋាភិបាល​ក្រុងប៉េកាំង​បាន​បន្ថែម​សមត្ថភាព​យោធា​នៅលើ​កោះតូចៗ​ដែល​ខ្លួន​បាន​គ្រប់គ្រង​រួច​ទៅ​ហើយ​ ខណៈ​ខ្លួន​កំពុង​ចូល​ក្នុង​មហាសមុទ្រ​ដែល​គ្រប់គ្រង​ដោយ​សម្ព័ន្ធមិត្ត​បស្ចិម​ប្រទេស​ដែល​ជា​អតីត​គូប្រជែង​កាល​ពី​សម័យ​សង្គ្រាម​ត្រជាក់។ ​

ទស្សនកិច្ច​របស់​នាវា​ទៅកាន់​ប្រទេសប្រ៊ុយណេ

នាវាហ្វឹកហាត់​របស់​កងទ័ពជើងទឹក​ចិន​បាន​ឈប់សំចត​លើក​ទី១​រយៈពេល​បីថ្ងៃ​ចាប់ពីថ្ងៃទី២៧ ខែកញ្ញា​នៅ​ឯ​កំពង់ផែ Muara ក្នុង​ប្រទេសប្រ៊ុយណេ។ នេះ​បើ​យោង​តាម​សេចក្តី​រាយការណ៍​របស់​សេវា​សារព័ត៌មាន​យោធា​ចិន។ មនុស្ស​ជាង៣០០នាក់​រួម​ទាំង​តំណាង​របស់​កងទ័ព​ជើងទឹកប្រ៊ុយណេ​បាន​ទទួល​ស្វាគមន៍​ការ​មក​ដល់​របស់​នាវា​ចិន​នេះ។

សារព័ត៌មាន​បាន​រាយការណ៍​បន្ថែម​ទៀត​ថា​ក្រុមនាវិក​និង​កម្មាភិបាល​ចិន​បាន​ធ្វើទស្សនកិច្ច​នៅក្នុង​នាវា​យាមល្បាត​ក្រោម​ការរៀបចំ​របស់​ទាហាន​ជើងទឹក​ប្រ៊ុយណេ ដើម្បី​ចែករំលែក​និង​ផ្លាស់ប្តូរ​បទពិសោធន៍​យុទ្ធសាស្រ្ត​ការពារ​បរិស្ថាន​ឆ្នេរសមុទ្រ​ជាមួយ​នឹង​ក្រុមនាវិក​ទាហាន​ជើងទឹក​ប្រ៊ុយណេ។

ប្រទេសប្រ៊ុយណេ​និង​ចិន​មាន​ជម្លោះ​ជាមួយ​គ្នា​ពាក់ព័ន្ធ​នឹង​ការទាមទារ​កាន់កាប់ដែន​សមុទ្រ​ប្រវែង៣៧០គីឡូម៉ែត្រ​ចាប់​ពី​ឆ្នេរសមុទ្រ​ដែល​សម្បូរ​ដោយ​ធនធាន​ប្រេងនៃ​ប្រទេស​នៅ​តំបន់​អាស៊ីអាគ្នេយ៍។ តំបន់​នោះ​ត្រូវ​បាន​ចាត់ទុក​ថា​ជា​តំបន់​សម្បូរ​ឧស្ម័ននិង​ប្រេង។

ប្រទេស​ទាំង៧​ ដែល​ទាមទារ​កាន់កាប់​ផ្នែកខ្លះ​នៃ​ដែនសមុទ្រ​មាន​ជម្លោះ​ សុទ្ធ​តែ​ចង់​បាន​សមុទ្រ​ត្រូពិក​មួយ​នេះ​ ដែល​ជា​កន្លែង​សម្បូរ​ធនធាន​បំរុង​ ព្រម​ទាំង​ជា​កន្លែង​សម្បូរត្រី​ និង​ជា​ផ្លូវ​នាវាចរណ៍​ដ៏​សំខាន់​ថែម​ទៀត​ផង។ ចិន​និង​វៀតណាម​បាន​ប៉ះ​ទង្គិច​គ្នា​នៅតំបន់​នោះ​ជា​ហូរហែរ​ចាប់តាំង​ពី​ទសវត្សរ៍​១៩៧០មក។

ភាគច្រើន​នៃ​ប្រទេស​នៅ​ទ្វីបអាស៊ី​មិន​សូវ​មាន​អំណាច​យោធា​ និង​បច្ចេកវិទ្យា​ដូចជា​ប្រទេស​ចិន​ទេ។ ប្រទេសចិន​បាន​សាងសង់​ផ្លូវហោះហើរ​និង​ចំណត​យន្តហោះ​យោធា​នៅ​លើ​កោះតូចៗ​សំខាន់​ចំនួន​បី​នៃ​ប្រជុំ​កោះ​ស្ព្រាតលី​នៅ​សមុទ្រ​ចិន​ខាងត្បូង។ នេះ​បើ​យោង​តាម​វិទ្យាស្ថាន​ស្រាវជា្រវ​សហរដ្ឋអាមេរិក​សម្រាប់​យុទ្ធសាស្រ្ត​និង​ការ​សិក្សា​អន្តរជាតិ។ ប្រទេសចិន​ក៏​បាន​បង្ហោះ​ឧបករណ៍​ដ្រូន​នៅ​លើ​សមុទ្រ​ផង​ដែរ ហើយ​កាល​ពី​ខែសីហា​ ប្រទេសចិន​បាន​សាកល្បង​ដោយ​ជោគជ័យ​ក្នុង​ការដឹក​ជញ្ជូន​សម្ភារៈ​តាម​សាឡាង​ទៅ​កាន់​កោះតូចៗ​នៅ​សមុទ្រ​ចិន​ខាងត្បូង​ផងដែរ។

នៅ​ឆ្នាំ​នេះ​ប្រទេស​ជា​សមាជិក​ទាំង១០​នៃ​សមាគមន៍​ប្រជាជាតិ​អាស៊ីអាគ្នេយ៍​ហៅ​កាត់​ថា​អាស៊ាន​ កំពុង​ជំរុញ​ប្រទេស​ចិន​ឲ្យ​ចុះ​ហត្ថលេខា​លើ​ក្រមប្រតិបត្តិ​នៃ​ដែនសមុទ្រ​ហៅ​កាត់​ថា COC ដែល​នឹង​ជួយដោះស្រាយ​បញ្ហា​នៅ​សមុទ្រ​មាន​ជម្លោះ​នេះ។

ការទទួល​ស្វាគមន៍​នាវារ​បស់​ចិន​កាន់​តែ​កើនឡើង​

ប្រទេសផ្សេងៗ​ទៀត​ដែល​ពាក់ព័ន្ធ​ជាមួយ​នឹង​ការហ្វឹកហាត់​បើក​នាវា​នេះ​ ស្ថិតនៅខាង​ក្រៅ​សមុទ្រ​ចិន​មាន​ជម្លោះ​ ប៉ុន្តែ​ស្ថិត​នៅ​ខាង​ក្នុង​ឥទ្ធិពល​នយោបាយ​របស់​ប្រទេស​អូស្តា្រលី។

ប្រទេសអូស្រ្តាលី​ ជប៉ុន ​ឥណ្ឌា ​និង​សហរដ្ឋអាមេរិក​ដែល​ស្ថិត​នៅក្នុង​ក្រុម​មួយ​ដែល​មាន​ឈ្មោះ​ថា​ក្រុម​ចតុកោណ​ ចង់​ត្រួតពិនិត្យ​លើ​ការពង្រីក​ឆ្នេរ​សមុទ្រ​របស់ចិន។ នាវា​កងទ័ព​ជើងទឹក​អូស្រា្តលី​បាន​ឆ្លងកាត់សមុទ្រ​ចិន​ខាងត្បូង​ពីរ​ដង​កាល​ពី​ដើមឆ្នាំ​នេះ ដោយ​មាន​ការ​ឃ្លាំមើល​ពី​សំណាក់​យោធា​ចិន។

ប្រទេសនានា​ដែល​ត្រូវ​បាន​ស្នើ​ឲ្យ​ទទួល​ស្វាមគន៍​នាវា​ហ្វឹកហាត់​នេះ​ ប្រហែល​ជា​នឹង​យល់ព្រម​តាម​សំណើរ​នេះ។ នេះ​បើ​យោង​តាម​លោក Carl Thayer សាស្រ្តាចារ្យ​ចូល​និវត្តន៍​នៃ​សាកលវិទ្យាល័យ New South Wales នៅ​ប្រទេស​អូស្ត្រាលី។ លោក​បាន​ថ្លែង​បន្ថែម​ទៀត​ថា​កងទ័ព​ជើង​ទឹក​របស់​ប្រទេស​ទាំងនោះ​ចង់​ដឹង​តើ​អ្នកណា​ខ្លះ​ស្ថិត​ក្នុង​ចំណោម​កងកម្លាំង​ចិន​ទាំង​នោះ។

លោក Thayer បាន​ថ្លែង​បន្ត​ទៀត​ថា «ធនធាន​សម្រាប់​មនុស្ស​ម្នាក់ៗ​មាន​កំណត់។ ក្នុង​មួយ​ឆ្នាំ​មាន​តែ៣៦៥ថ្ងៃ​តែ​ប៉ុណ្ណោះ ដូច្នេះ​នៅពេល​អ្នក​ដាក់​ចិន​នៅក្នុង​ប្រក្រតីទិន​

នោះ​វា​នឹង​បិទ​ពេល​សម្រាប់​អ្នក។ នេះ​គឺ​ជា​ការកសាង​ទំនាក់ទំនង​ ដូច្នេះ​អ្នកត្រូវ​តែ​ត្រៀម​លក្ខណៈ​សម្រាប់​ធ្វើ​សង្គ្រាម​ ប៉ុន្តែ​វិធី​មួយទៀត​ដើម្បី​បញ្ចៀស​កុំ​ឲ្យ​មាន​សង្គ្រាម គឺ​ត្រូវ​បង្កើត​ទំនាក់ទំនង»។

ការបណ្តុះបណ្តាល​កងទ័ព​ជើងទឹក

នាវា​ហ្វឹកហាត់​កងទ័ព​ជើងទឹក Qi Jiguang ក៏​ទំនង​ជា​បណ្តុះបណ្តាល​ផ្នែក​សមយុទ្ធ​យោធា​ដល់​ក្រុមនាវិក​ចិន​ផងដែរ​។ នេះ​បើ​យោង​តាម​លោក Oh Ei Sun អ្នកស្រាវជ្រាវ​ជាន់​ខ្ពស់​នៅ​ឯវិទ្យាស្ថាន​កិច្ចការ​អន្តរជាតិ​នៅ​ប្រទេសសិង្ហបុរី។

លោក Sunបាន​បញ្ជាក់​ដូច្នេះ​ថា​ មនុស្ស​នៅ​លើ​នាវា​នោះ​ប្រហែល​ជា​ធ្វើ​ការហ្វឹកហាត់ ជាពិសេស​លើ​ការធ្វើ​សមយុទ្ធ​យោធា​នៅក្នុង​សមុទ្រ ​ជា​កន្លែង​ដែល​ពួកគេ​កម្រ​នឹង​ទៅ​ដល់​ ដែល​ជា​ផ្នែក​មួយ​នៃ​ការជំរុញ​របស់​រដ្ឋាភិបាល​ក្រុងប៉េកាំង​ដើម្បី​បង្កើត​កិច្ចសហប្រតិបត្តិការ​កងទ័ព​ជើង​ទឹក។

លោក Sun បាន​ថ្លែង​ទៀត​ថា«ពួកគេ​កំពុង​បោះជំហាន​យឺតៗដើម្បី​ចូល​ទៅ​ដល់​កន្លែង​ថ្មីៗ​ដែល​ពួកគេ​មិន​ធ្លាប់​បាន​ទៅ​ដល់​កាល​ពី​មុន»។

លោក Yang បាន​និយាយ​ថា​ ប្រទេសចិន​សង្ឃឹម​ថា​បេសកកម្ម​របស់​នាវា​ហ្វឹកហាត់​នេះ​នឹង​ជា​ការសាកល្បង​របស់ចិន​ទៅ​កាន់​អន្តរជាតិ។ លោក​រំពឹងថា​នឹង​មាន​ប្រតិកម្ម​មិន​ខ្លាំងក្លា​ប៉ុន្មាន​ទេ​ពី​អន្តរជាតិ។

លោក​បាន​ថ្លែង​បន្ថែម​ទៀត​ថា អូស្រា្តលី​នឹង​ឃ្លាំ​មើលសកម្មភាព​នាវាហ្វឹកហាត់​នេះ ហើយ​ប្រទេសនានា​នឹង​គិត​ថា​ នាវា​នេះ​មិន​សូវ​សំខាន់​ដូច​នាវា​ទេសចរណ៍​ ឬនាវា​ចម្បាំង​របស់​ចិន​ឡើយ៕

ប្រែសម្រួលដោយ ស៊ូ ពេជ្រចិន្តា

XS
SM
MD
LG