ប៉ាគីស្ថានបានសន្យាកាលពីថ្ងៃអង្គារថា ខ្លួននឹងប៉ុនប៉ងនៅក្នុងការចរចានៅពេលខាងមុខជាមួយសហរដ្ឋអាមេរិកដើម្បីផ្សះផ្សាទំនាក់ទំនងទ្វេភាគីដែលមានភាពរកាំរកូស ថ្វីបើមានឈ្លោះប្រកែកគ្នានៅក្នុងការនិយាយទូរស័ព្ទកាលពីពេលថ្មីៗនេះរវាងនាយករដ្ឋមន្ត្រីប៉ាគីស្ថានថ្មីលោក Imran Khan និងរដ្ឋមន្ត្រីការបរទេសអាមេរិកលោក Mike Pompeo។
លោក Shah Mehmood Qureshi រដ្ឋមន្ត្រីការបរទេសប៉ាគីស្ថានខណៈដែលថ្លែងទៅកាន់សភាជាន់ទាបនៃព្រឹទ្ធសភា បានច្រានចោលម្តងទៀតថា មានការពិភាក្សាស្តីពីកិច្ចប្រតិបត្តិការរបស់ពួកជនសកម្មប្រយុទ្ធនៅក្នុងប្រទេសប៉ាគីស្ថាននៅពេលដែលលោករដ្ឋមន្ត្រីការបរទេសអាមេរិក Pompeo បានទូរស័ព្ទលោក Khan។
លោក Qureshi និយាយថា «មានកំហុសបានធ្វើឡើង និងអាចកើតមានឡើង ហើយអ្វីដែលយើងបានថ្លែងអំពីការនិយាយទូរស័ព្ទរវាងលោក Khan និងរដ្ឋមន្ត្រីការបរទេសអាមេរិក Pompeo ជាការត្រូវ។ ខ្ញុំគិតថា យើងត្រូវធ្វើឲ្យមានការជឿនលឿន ហើយប្រសិនបើ លោករដ្ឋមន្ត្រីការបរទេសអាមេរិកមកទស្សនកិច្ចនៅថ្ងៃទី៥ ខែកញ្ញា យើងនឹងព្យាយាមបង្កើនទំនាក់ទំនងទ្វេភាគីរបស់យើងជាមួយប្រទេសអាមេរិកឆ្ពោះទៅកាន់មាគ៌ាប្រសើរឡើងមួយ»។
ក្រសួងការបរទេសអាមេរិកបាននិយាយក្នុងសេចក្តីថ្លែងការណ៍ថា លោករដ្ឋមន្ត្រីការបរទេសអាមេរិក Pompeo បានជូនពរលោក Khan ឲ្យបានទទួលជោគជ័យហើយក៏បានសុំឲ្យលោកចាត់វិធានការដោយឥតរួញរាប្រឆាំងនឹងភេរវជនទាំងអស់ដែលកំពុងប្រតិបត្តិការនៅក្នុងប្រទេសប៉ាគីស្ថាន។
ថ្វីបើការចាប់ផ្តើមប្រកបដោយការចម្រូងចម្រាសជាមួយសហរដ្ឋអាមេរិកក៏ដោយ លោក Qureshi បានសម្តែងនូវសុទិដ្ឋិនិយមអំពីចំណងទាក់ទងនៅពេលអនាគតជាមួយសហរដ្ឋអាមេរិក៕
