នៅថ្ងៃពុធនេះ ក្រសួងការពារជាតិនៃប្រទេសចិនបានចោទប្រកាន់សហរដ្ឋអាមេរិកថា ធ្វើឱ្យតៃវ៉ាន់ទៅជាកន្លែងមានវិបត្តិធ្ងន់ធ្ងរដោយការលក់ឧបករណ៍យោធាកាលពីពេលថ្មីបំផុតឱ្យកោះនេះដែលគ្រប់គ្រងដោយខ្លួនឯងតាមបែបប្រជាធិបតេយ្យដោយមានតម្លៃទាំងអស់៤៤០លាន២សែនដុល្លារ។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ក្រសួងការបរទេសស.រ.អ.បានយល់ព្រមដល់ការលក់គ្រាប់កាំភ្លើង៣០ម.ម.និងគ្រឿងឧបករណ៍ពាក់ព័ន្ធ ជាមួយគ្រឿងបន្លាស់សម្រាប់យានយន្តតៃវ៉ាន់ អាវុធធុនស្រាល ប្រព័ន្ធអាវុធប្រយុទ្ធនិងឧបករណ៍គាំទ្រខាងភ័ស្តុភារ។ អ្នកនាំពាក្យក្រសួងការពារជាតិ លោកវរសេនីយ៍ឯក Tan Kefei បានឆ្លើយតបថា៖ «ស.រ.អ.មិនអើពើនឹងកង្វល់ស្នូលនៃប្រទេសចិន ចោទថាអាមេរិកជ្រៀតជ្រែកក្នុងកិច្ចការផ្ទៃក្នុងនៃចិន និងថាបង្កើនភាពតានតឹងឆ្លងកាត់ច្រកសមុទ្រតៃវ៉ាន់»។
ចិនបានអះអាងថាតៃវ៉ាន់ជាដែនដីរបស់ខ្លួនដែលនឹងត្រូវវាយកាន់កាប់ដោយកម្លាំងបើជាការចាំបាច់ហើយលោក Tan បាននិយាយថា៖ «ការតវ៉ាម៉ឺងម៉ាត់»បានត្រូវបានដាក់ជាមួយស.រ.អ.ហើយ។
លោកបាននិយាយនៅសេចក្តីថ្លែងការណ៍មួយតាមគេហទំព័ររបស់ក្រសួងការពារជាតិចិនថា៖ «ការណ៍នេះជាការបង្កើនការកែប្រែតៃវ៉ាន់ឱ្យទៅជា«កន្លែងមានវិបត្តិធ្ងន់ធ្ងរ»និងជំរុញប្រជារាស្ត្រតៃវ៉ាន់ឱ្យធ្លាក់ក្នុងជ្រោះមហន្តរាយ»។
លោក Tan បានថ្លែងថាការប្រើកម្លាំងដើម្បីស្វះស្វែងឱ្យបានឯករាជ្យជាការគិតបែបស្រមើស្រមៃហើយនឹងទទួលបរាជ័យ ដោយលោកបានប្រើពាក្យពេចន៍ស្តង់ដាររបស់ចិន ដោយបានបន្ថែមថាកងទ័ពរំដោះរបស់ប្រជាជនតែងតែប្រុងប្រៀបជានិច្ចហើយនឹងថែរក្សាសន្តិភាពនិងស្ថិរភាពក្នុងច្រកសមុទ្រតៃវ៉ាន់៕
