រដ្ឋាភិបាលកម្ពុជា បានអំពាវនាវដល់អ្នកគ្រប់គ្រងក្រុមហ៊ុនក្នុងវិស័យទូរគមនាគមន៍ជាច្រើនឲ្យសងបំណុលជំពាក់ស្ថាប័នប្រៃសណីយ៍ និងទូរគមនាគមន៍របស់រដ្ឋនានា ឲ្យបានមុនដំណាច់ខែមេសា ឆ្នាំ ២០១៨ ជាកំហិត។ នេះបើយោងតាមសេចក្ដីប្រកាសរួមរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងប្រៃសណីយ៍ និងទូរគមនាគមន៍ ដែលបានចេញផ្សាយតាមអង្គភាពព័ត៌មានដែលស្និទ្ធនឹងរដ្ឋាភិបាលកាលពីថ្ងៃព្រហស្បតិ៍។
សេចក្ដីប្រកាសរបស់ក្រសួងទាំងពីរដែលធ្វើឡើងដោយផ្អែកលើចំណាររបស់លោកនាយករដ្ឋមន្ត្រី ហ៊ុន សែន នោះ មិនបានបញ្ចេញឈ្មោះក្រុមហ៊ុន និងចំនួនទឹកប្រាក់ដែលក្រុមហ៊ុនទាំងនោះ ជំពាក់រដ្ឋនោះទេ តែក្រសួងទាំងពីរបានគំរាមថា នឹងទម្លាយឈ្មោះក្រុមហ៊ុន និងទឹកប្រាក់ជំពាក់ បើសិនក្នុងករណីដែលដល់ថ្ងៃឱសានវាទហើយនោះ ក្រុមហ៊ុនទាំងនោះនៅមិនព្រមបង់លុយជំពាក់។
យោងតាមសេចក្ដីប្រកាសរបស់ក្រសួងទាំងពីរ ចុះថ្ងៃទី ២ ខែមេសា ឆ្នាំ ២០១៨ បានសរសេរតាមន័យដើមថា៖
«ក្រសួងសេដ្ឋកិច្ច និងហិរញ្ញវត្ថុ និងក្រសួងប្រៃសណីយ៍ និងទូរគមនាគមន៍ សូមជម្រាបជូនដំណឹងដល់អ្នកឧកញ៉ា លោកឧកញ៉ា លោក លោកស្រី ជាប្រធានក្រុមហ៊ុនប្រតិបត្តិករទូរគមនាគមន៍ទាំងអស់ ដែលនៅមានបំណុលជំពាក់ក្រសួងប្រៃសណីយ៍ និងទូរគមនាគមន៍ ទូរគមនាគមន៍កម្ពុជា និងនិយ័តករទូរគមនាគមន៍កម្ពុជា ត្រូវសងបំណុលទាំងអស់យ៉ាងយូរត្រឹមថ្ងៃទី៣០ ខែមេសា ឆ្នាំ ២០១៨»។
ក្រសួងទាំងពីរបានព្រមានចាត់វិធានការតឹងរ៉ឹងជាបន្តបន្ទាប់មួយចំនួន ដែលរួមមាន ការប្រកាសជាសាធារណៈតាមសារព័ត៌មាន វិទ្យុ ឬទូរទស្សន៍ ចំពោះក្រុមហ៊ុនទាំងឡាយណា ដែលខកខានមិនបានអនុវត្តតាមការកំណត់ខាងលើ ដោយដាក់ចំឈ្មោះក្រុមហ៊ុន ឈ្មោះអភិបាលក្រុមហ៊ុន ម្ចាស់ក្រុមហ៊ុន និងចំនួនទឹកប្រាក់ដែលបានជំពាក់។ ក៏ប៉ុន្តែក្រសួងទាំងពីរមិនទាន់បានបញ្ជាក់ឱ្យបានច្បាស់ថា លុយបំណុលរដ្ឋទាំងនោះជាលុយពន្ធដារឬយ៉ាងណានោះទេ។
វិធានការផ្លូវច្បាប់ក៏នឹងត្រូវបានធ្វើឡើង ដូចជា «បង្កកគណនីនៅធនាគារពាណិជ្ជ បិទហ្វ្រេកង់ស៍ ហាមឃាត់ការនាំចេញ-ការនាំចូល ហាមឃាត់ការចូលរួមក្នុងដំណើរការលទ្ធកម្មសាធារណៈ ព្យួរ ឬដកហូតអាជ្ញាប័ណ្ណប្រតិបត្តិការ អាជ្ញាប័ណ្ណហ្រេ្វកង់ស៍វិទ្យុ កិច្ចព្រមព្រៀង ឬលិខិតគតិយុត្តិពាក់ព័ន្ធផ្សេងៗ សម្រាប់ធ្វើអាជីវកម្ម និងចុងក្រោយរៀបចំសំណុំរឿងដាក់បណ្ដឹងទៅតុលាការ»។
ការប្រកាសរបស់រដ្ឋាភិបាល ស្នើឲ្យក្រុមហ៊ុនទូរគមនាគមន៍សងបំណុលនេះ មិនមែនជាលើកទីមួយនោះទេ ព្រោះករណីដដែលបែបនេះបានកើតឡើងកាលពីឆ្នាំ ២០១៧ ដោយភាគីខាងរដ្ឋបានព្រមានចាត់វិធានការស្រដៀងគ្នានេះ។ នេះបើយោងតាមសេចក្ដីរាយការណ៍របស់សារព័ត៌មានក្នុងស្រុក The Phnom Penh Post។
តែទោះបីជាយ៉ាងណាក៏ដោយ នៅឆ្នាំនេះ មានការខុសប្លែកគ្នាបន្តិច ដោយសារតែការប្រកាសទារបំណុលនេះ បានធ្វើឡើង បន្ទាប់ពីកូនប្រសារបស់លោកនាយករដ្ឋមន្ត្រី ហ៊ុន សែន គឺលោក សុខ ពុទ្ធិវុធ ដែលជាកូនប្រុសបង្កើតម្នាក់របស់លោក សុខ អាន អតីតឧបនាយករដ្ឋមន្ត្រី និងរដ្ឋមន្ត្រីមួយរូប ត្រូវបានតែងតាំងជាប្រធានក្រុមប្រឹក្សាភិបាលរបស់ទូរគមនាគមន៍កម្ពុជា។
ការតែងតាំងរបស់លោក សុខ ពុទ្ធិវុធ ជាប្រធានក្រុមប្រឹក្សាភិបាលរបស់ទូរគមនាគមន៍កម្ពុជានេះ ត្រូវបានរាយការណ៍ដោយអង្គភាពដែលស្និទ្ធនឹងរដ្ឋាភិបាល Freshnews នៅថ្ងៃពុធ គឺចំថ្ងៃប្រកាសពិធីតែងតាំងតែម្ដង។ មួយថ្ងៃបន្ទាប់មកគឺថ្ងៃព្រហស្បតិ៍ ក្រសួងសេដ្ឋកិច្ច និងហិរញ្ញវត្ថុ និងក្រសួងប្រៃសណីយ៍ និងទូរគមនាគមន៍ក៏ចេញសេចក្ដីប្រកាសទារបំណុល។ លោក សុខ ពុទ្ធិវុធ ក៏ជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ផងដែរ។
មន្ត្រីពីរនាក់មកពីក្រសួងសេដ្ឋកិច្ច និងហិរញ្ញវត្ថុ និងក្រសួងប្រៃសណីយ៍ និងទូរគមនាគមន៍ ដែលមានឈ្មោះ និងលេខទូរស័ព្ទទំនាក់ទំនង លើសេចក្តីប្រកាសទារបំណុលក្រុមហ៊ុនទូរគមនាគមន៍ បដិសេធមិនផ្ដល់ព័ត៌មានលម្អិតអំពីចំនួនក្រុមហ៊ុន ប្រភេទជំនួញក្នុងផ្នែកទូរគមនាគមន៍ និងចំនួនឆ្នាំ ដែលក្រុមហ៊ុនមិនព្រមសងលុយជូនរដ្ឋ។
លោក សាត មុនីវិបុល ដែលបានបញ្ជាក់ ប្រាប់ VOA ឲ្យដឹងថា លោកធ្វើការនៅក្រសួងប្រៃសណីយ៍ និងទូរគមនាគមន៍ បានថ្លែងថា៖
«វាក្រុមហ៊ុនរកស៊ីហ្នឹង ខ្ញុំមិនដឹងថាក្រុមហ៊ុនអីទេបងអើយ ខ្ញុំអត់ និយាយទៅជម្រាបឲ្យត្រង់ហ្មង ថាអត់ដឹងរឿងហ្មងហ្នឹងណ៎ា ខ្ញុំអត់រឿងអីផងបងអើយ»។
ក៏ប៉ុន្តែក្រោយមក លោកថ្លែងថា ការទារបំណុលនេះគ្រាន់តែជារឿងធម្មតា ដែលម្ចាស់បំណុលត្រូវប្រឹងទារលុយពីកូនបំណុល។ លោកបានឆ្លើយបែបនេះ នៅពេលត្រូវបានសួរអំពីការប្រកាសទារបំណុលស្រដៀងគ្នាកាលពីឆ្នាំមុន។
លោកថ្លែងថា៖
«អញ្ចេះ អធ្យាស្រ័យ អានេះជាវិធានការ[ប្រឹង]ទាររបស់ របស់អាដេញស្ថាប័ន។ ធម្មតាកាលណាមានបំណុលប្ដឹងទារលុយគេវា ដូចខ្ញុំ ដូចតែដឹងស្រាប់អីចឹង ការប្រឹងទារគេ ត្រូវតែយើងអាសា បើកាលណាអត់មាន តែរៀងរយាលអីចឹង យើងត្រូវតែប្រឹងប្ដឹងទារ ត្រូវតែជូនដំណឹងអីចឹងជារឿងធម្មតា ធម្មតាអាហ្នឹងអ្ហូ!»។
នៅពេល VOA សួរលោកថា តើការឡើងកាន់តំណែងរបស់លោក សុខ ពុទ្ធិវុធ អាចនឹងធ្វើឲ្យអ្នកជំពាក់រួសរាន់សងប្រាក់ជំពាក់រដ្ឋទេ លោក សាត មុនីវិបុល មានប្រសាសន៍ថា លោកមិនបានដឹងអំពីការឡើងកាន់តំណែងនេះទេ។
ចំណែកលោក អ៊ុំ កក្កដា ដែលបញ្ជាក់ថា លោកធ្វើការនៅក្រសួងសេដ្ឋកិច្ច និងហិរញ្ញវត្ថុ មិនឆ្លើយសំណួរអំពីចំនួនឆ្នាំដែលក្រុមហ៊ុនទាំងនោះបានជំពាក់លុយរដ្ឋ។
លោកមានប្រសាសន៍ថា៖
«អាណឹងមានតែតាមគណនីក្រុមហ៊ុន សូមអធ្យាស្រ័យ ខ្ញុំកំពុងនៅក្នុងប្រជុំ»។
VOA មិនទាន់អាចទាក់ទងលោក អ៊ឹម វត្ថា សមាជិកនិយ័តករទូរគមនាគមន៍កម្ពុជាបានទេនៅថ្ងៃសុក្រនេះ។
ទូរគមនាគមន៍កម្ពុជា ដែលជាក្រុមហ៊ុនរកប្រាក់ចំណូលរបស់ក្រសួងប្រៃសណីយ៍ និងទូរគមនាគមន៍ ធ្លាប់ជួបរឿងអាស្រូវមួយចំនួន ពាក់ព័ន្ធនឹងការប្រព្រឹត្តអំពើពុករលួយ ដែលឈានដល់ការបណ្ដេញចេញអតីតអគ្គនាយកនៃអង្គភាពនេះផងដែរ។
កាលពីឆ្នាំ ២០១៦ លោក ឡាយ ម៉ារីវ៉ូ អគ្គនាយកទូរគមនាគមន៍កម្ពុជាត្រូវបានបណ្ដេញចេញ ខណៈដែលមានការស៊ើបអង្កេតមួយរកឃើញថា ការគ្រប់គ្រងមិនត្រឹមត្រូវរបស់លោក បានធ្វើឲ្យបុគ្គលិកមានលទ្ធភាពកិបកេងលុយរដ្ឋ ចំនួនប្រមាណ២៣ម៉ឺនដុល្លារអាមេរិក។ នេះបើតាមសេចក្ដីរាយការណ៍របស់កាសែត The Cambodia Daily ដែលបានបង្ខំចិត្តបិទទ្វារ ក្នុងសំណុំរឿងពន្ធដារកាលពីឆ្នាំ២០១៧។
នៅប្រទេសកម្ពុជា មានក្រុមហ៊ុនជាប្រតិបត្តិករខាងទូរស័ព្ទចល័តដែលមានភ្ជាប់បណ្ដាញអ៊ីនធឺណិតជាច្រើន ក្នុងនោះមានក្រុមហ៊ុន Cellcard Metfone និង Smart ជាដើម៕
