រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុបានឲ្យដឹងថាព្រឹត្តិការណ៍ឆ្លងកូវីដក្នុងសហគមន៍២០កុម្ភៈអាចនឹងនាំឱ្យការចំណាយរបស់រដ្ឋាភិបាលលើការប្រយុទ្ធប្រឆាំងជំងឺកូវីដកើនហួសការរំពឹងទុកដល់ទៅ១,៤ពាន់លានដុល្លារ ពេញមួយឆ្នាំ២០២១ និងទាញទម្លាក់ការព្យាករកំណើនសេដ្ឋកិច្ចនៅឆ្នាំនេះត្រឹមតែ២,៤%។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានបង្ហាញតួលេខខាងលើក្នុងសិក្ខាសាលាអនឡាញមួយជាមួយរដ្ឋសភា កាលពីថ្ងៃអង្គារ ស្ដីអំពីបរិបទសេដ្ឋកិច្ចដើម្បីរៀបចំច្បាប់ថវិកាឆ្នាំ២០២២។
រដ្ឋមន្ត្រីរូបនេះបានថ្លែងថាព្រឹត្តិការណ៍សហគមន៍២០កុម្ភៈបានបង្ខំឱ្យក្រសួងហិរញ្ញវត្ថុវាយតម្លៃពាក់កណ្ដាលឆ្នាំ ដោយទម្លាក់ការព្យាករកំណើនសេដ្ឋកិច្ចពីដើមឆ្នាំថាអាចកើនក្នុងអត្រា៤% មកត្រឹម២,៤%វិញ សម្រាប់ឆ្នាំ២០២១នេះ។
លោកបានថ្លែងក្នុងន័យដើមថា៖ «ដោយសារតែការឆ្លងរីករាលដាលនៃជំងឺកូវីដ១៩ក្នុងសហគមន៍បាននិងកំពុងបន្ទុចបង្អាក់យ៉ាងខ្លាំងដល់សកម្មភាពពាណិជ្ជកម្មដែលធ្វើឱ្យវិស័យទេសចរណ៍វិស័យលក់ដុំលក់រាយដែលជាសកម្មភាពប្រើប្រាស់ក្នុងស្រុក វិស័យសំណង់ និងអចលនទ្រព្យបន្តធ្លាក់ចុះយ៉ាងគំហុក»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ចនិងហិរញ្ញវត្ថុបានបដិសេធមិនអត្ថាធិប្បាយដោយថាជាប់រវល់ប្រជុំ ពេលវីអូអេទាក់ទងកាលពីព្រឹកថ្ងៃសុក្រ។
យ៉ាងណាក្ដីក្នុងឯកសារក្រសួងសេដ្ឋកិច្ចដែលប្រើប្រាស់ក្នុងសិក្ខាសិលាកាលពីថ្ងៃអង្គារ ហើយដែលវីអូអេទទួលបាន ក្នុងចំណោមចំណាយលើកូវីដចំនួន១,៤ពាន់លានដុល្លារ ដែលរដ្ឋប៉ាន់ប្រមាណនៅឆ្នាំនេះ មាន៧៤០លានដុល្លារត្រូវចំណាយលើកិច្ចការទប់ស្កាត់ និងព្យាបាលជំងឺកូវីដ។ ពីដើមឆ្នាំរដ្ឋាភិបាលគ្រោងចំណាយសរុបលើកូវីដត្រឹមតែ៧១៩លានដុល្លារតែប៉ុណ្ណោះ។
បើតាមឯកសារបទបង្ហាញដដែល ក្នុងឆ្នាំ២០២២ រដ្ឋមានគម្រោងចំណាយសរុប៣៤,៦ទ្រីលាន(លានលាន)រៀល ឬប្រមាណ៨,៥ពាន់លានដុល្លារអាមេរិក។ ក្នុងនោះមានប្រមាណ៩១០លានដុល្លារត្រូវបម្រុងទុកចំណាយលើកិច្ចការប្រឆាំងកូវីដ១៩។
លោក អូន ព័ន្ធមុនីរ័ត្ន បានបន្ថែមកាលពីថ្ងៃអង្គារថាថវិកាឆ្នាំ២០២២នេះ «មានចរិតជាការប្រឹងប្រែងប្ដូរផ្ដាច់ក្នុងការប្រយុទ្ធប្រឆាំងនឹងជំងឺកូវីដ១៩ ដើម្បីការពារអាយុជីវិតរបស់ប្រជាជនផង និងកសាងមូលដ្ឋានដើម្បីរស់នៅជាមួយជំងឺកូវីដ១៩ផង ក្នុងគោលដៅស្ដារសេដ្ឋកិច្ច និងស្ដារជីវភាពប្រជាជនឡើងវិញ»។
ការណ៍នេះអាស្រ័យលើយុទ្ធនាការបង្កើតភាពស៊ាំសហគមន៍ទៅនឹងជំងឺកូវីដ១៩ តាមរយៈការចាក់ពង្រាយថ្នាំបង្ការក្នុងចំណោមប្រជាជន ដែលអាចនឹងសម្រេចបានក្នុងឆ្នាំ២០២១នេះ។ នេះបើយោងតាមរដ្ឋមន្ត្រីហិរញ្ញវត្ថុ។
អ្នកស្រី ឃួន សុដារី អនុប្រធានទី២រដ្ឋសភាបានលើកឡើងក្នុងសិក្ខាសាលា ដោយស្នើរដ្ឋាភិបាលឱ្យរក្សាការឈរជើង ពង្រឹងស្ថិរភាពថវិកា ក្នុងន័យដើមយ៉ាងដូច្នេះថា៖ «សន្ដិសុខសេដ្ឋកិច្ចគឺជាបញ្ហាសន្តិសុខរបស់ជាតិ។ យើងនឹងមិនអាចរក្សាបាននូវឯករាជ្យភាពជាតិនិងស្វ័យភាពជាយុទ្ធសាស្ត្រ ប្រសិនបើសេដ្ឋកិច្ចជាតិរបស់យើងមិនមានភាពរឹងមាំ និងភាពធន់នោះទេ»។
គិតត្រឹមថ្ងៃព្រហស្បតិ៍ កម្ពុជាបានចាក់វ៉ាក់សាំងដល់ប្រជាពលរដ្ឋបានជាង៨លាន៦សែននាក់។ រដ្ឋាភិបាលមានគោលដៅចាក់ឲ្យបាន១៣លាននាក់ក្នុងចំណោមពលរដ្ឋសរុបជាង១៦លាននាក់។ បើតាមក្រសួងសុខាភិបាល គិតត្រឹមថ្ងៃសុក្រ កម្ពុជារកឃើញការឆ្លងកូវីដសរុបចំនួន ៨៨.២៤២ករណី និងមានមនុស្សស្លាប់ ១.៧៦២នាក់។
រដ្ឋាភិបាលកម្ពុជាក៏បានសម្រេចកាត់បន្ថយចំណាយផងដែរ ដើម្បីទុកថវិកាជួយដោះស្រាយវិបត្តិជំងឺកូវីដ១៩។
ក្នុងលិខិតមួយច្បាប់ផ្ញើទៅលោក ព្រុំ សុខា រដ្ឋមន្ត្រីមុខងារសាធារណៈ នៅសប្តាហ៍នេះ លោក អូន ព័ន្ធមុនីរ័ត្នបានប្រកាសដែរថានឹងមិនមានការជ្រើសរើសមន្ត្រីរាជការស៊ីវិល និងកងកម្លាំងប្រដាប់អាវុធបន្ថែមនៅឆ្នាំ២០២២ទេ ដើម្បីសន្សំសំចៃការចំណាយរបស់រដ្ឋលើការប្រយុទ្ធនឹងកូវីដនិងស្ដារសេដ្ឋកិច្ច។ តែវិធានការនេះត្រូវបានលើកលែងចំពោះក្របខណ្ឌក្រសួងសុខាភិបាល។
បណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៅរាជបណ្ឌិត្យសភាកម្ពុជាដែលជាស្ថាប័នរដ្ឋាភិបាលបានលើកឡើងថាវិធានការកាត់បន្ថយចំណាយដូចយ៉ាងការផ្អាករើសមន្ត្រីថ្មីចូលក្របខណ្ឌរដ្ឋនេះបានបង្ហាញពីភាព«ម៉ឺងម៉ាត់និងតឹងរ៉ឹង»នៃយុទ្ធសាស្ត្រចំណាយថវិការបស់រដ្ឋក្នុងបរិបទកូវីដ១៩នេះ។
អ្នកជំនាញនៅស្ថាប័នរដ្ឋរូបនេះបន្តថាសេដ្ឋកិច្ចកម្ពុជាមានកំណើនដូចព្យាករណ៍របស់ក្រសួងនេះដោយសារការបន្តលំហូរនៃការនាំចេញទំនិញទៅក្រៅប្រទេស ចំពេលប្រទេសនានា ដែលកំពុងរងវិបត្តិឆ្លងរាលដាលនៃជំងឺកូវីដ១៩ខ្លាំងជាងកម្ពុជា ជួបភាពរអាក់រអួលក្នុងការផលិត។
លោក គី សេរីវឌ្ឍន៍ បញ្ជាក់ថា៖ «នៅពេលដែលយើងអាចចាក់វ៉ាក់សាំងបានវិស័យដែលយើងអាចរំដោះត្រឡប់មកវិញបានគឺគ្មានអ្វីក្រៅពីវិស័យដែលមានស្រាប់ទេ។ ទីមួយវិស័យទេសចរណ៍ យើងអាចបើកឱ្យដំណើរការហើយបើគ្មានទេសចរពីក្រៅស្រុក ទេសចរក្នុងស្រុកជាយុទ្ធសាស្ត្រល្អបំផុត ដែលបង្កើនចំណាយនិងផលិតកម្មក្នុងស្រុក»។
បណ្ឌិត គី សេរីវឌ្ឍន៍ លើកឡើងថាវិស័យទ្រទ្រង់គឺកសិកម្មនិងកសិឧស្សាហកម្មដើម្បីជួយដល់ផលិតកម្មក៏សំខាន់ដែរដែលរដ្ឋត្រូវយកចិត្តទុកដាក់ផ្នែកចរន្តនិងស្ថិរភាពទីផ្សារដើម្បីបន្ធូរបន្ថយការពឹងផ្អែកលើប្រទេសជិតខាង។
បើតាមឯកសារដដែលរបស់ក្រសួងហិរញ្ញវត្ថុ ត្រឹមពាក់កណ្ដាលឆ្នាំ២០២១នេះ បំណុលរដ្ឋជំពាក់បរទេសកើនឡើងដល់៩ពាន់លានដុល្លារ ហើយត្រូវរំពឹងថានឹងឡើងហួស១០ពាន់លានដុល្លារត្រឹមដំណាច់ឆ្នាំ៕
