កាសែតភ្នំពេញប៉ុស្តិ៍(The Phnom Penh Post) ដែលបានបោះពុម្ពផ្សាយពីរាជធានីភ្នំពេញអស់ជាង៣ទសវត្សរ៍មកហើយ បានប្រកាសនៅថ្ងៃទី១ខែមីនាថាខ្លួននឹងឈប់បោះពុម្ពផ្សាយកាសែតទាំងជាភាសាអង់គ្លេសនិងភាសាខ្មែរទៀតហើយនៅត្រឹមចុងខែនេះ ដោយសារចំណូលនិងចំនួនអ្នកអានធ្លាក់ចុះ ហើយម្ចាស់ភាគហ៊ុនគ្មានលទ្ធភាពទ្រាំទ្រ«ការខាតបែបនេះ»តទៅទៀតបាន។
ការផ្អាកការបោះពុម្ពផ្សាយកាសែតនេះ ជាការប៉ះពាល់មួយទៀតទៅលើសេរីភាពសារព័ត៌មាននៅកម្ពុជា ដែលបានរងសម្ពាធរួចទៅហើយតាំងពីការបង្ក្រាបរបស់រដ្ឋាភិបាលលើសំឡេងនយោបាយប្រឆាំង ត្រូវបានផ្តួចផ្តើមដោយអតីតនាយករដ្ឋមន្ត្រីលោក ហ៊ុន សែន កាលពីប្រមាណ៨ឆ្នាំមុន។
គណៈគ្រប់គ្រងក្រុមហ៊ុនកាសែតនេះ បានប្រកាសក្នុងសេចក្តីថ្លែងការណ៍មួយ ចេញផ្សាយនៅព្រឹកថ្ងៃទី១ខែមីនាថា៖
«ម្ចាស់ភាគហ៊ុនរបស់យើង បានព្យាយាមបន្ថែមថវិកា ហើយរកចំណូលតាមគ្រប់មធ្យោបាយ ដើម្បីស្តារស្ថានភាពហិរញ្ញវត្ថុរបស់ក្រុមហ៊ុន និងបន្តបោះពុម្ពផ្សាយកាសែតវិជ្ជាជីវៈនិងឯករាជ្យនេះ ដែលបានដំណើរការអស់ជាង៣០ឆ្នាំមកហើយ»។
សេចក្តីថ្លែងការណ៍បន្តថា៖
«អាស្រ័យហេតុនេះ ម្ចាស់ភាគហ៊ុនរបស់យើង បានសម្រេចដោយសោកស្តាយយ៉ាងខ្លាំង ឈប់បោះពុម្ពផ្សាយកាសែតនេះតទៅទៀត ទាំងភាសាអង់គ្លេស ទាំងភាសាខ្មែរ នៅត្រឹមថ្ងៃទី២៩ខែមីនាឆ្នាំ២០២៤»។
កាសែតភ្នំពេញប៉ុស្តិ៍ ត្រូវបានបង្កើតដោយជនជាតិអាមេរិកាំងលោកMichael Hayes និងអ្នកស្រី Kathleen O’Keefe នៅឆ្នាំ១៩៩២ ដោយប្រើប្រាក់ដែលពួកគេបានសន្សំពេញមួយជីវិតចំនួន៥ម៉ឺនដុល្លារ ពេលដែលកងរក្សាសន្តិភាពអង្គការសហប្រជាជាតិ បានមកដល់ប្រទេសកម្ពុជាហើយប្រទេសនេះកំពុងនៅមានសង្គ្រាមនៅឡើយ។
កាសែតនេះ មានកេរ្ត៍ឈ្មោះល្បីយ៉ាងលឿនដោយសារវិជ្ជាជីវៈសារព័ត៌មានឯករាជ្យដែលរាយការណ៍ចំៗឥតលាក់លៀម ខណៈរក្សាសមានចិត្តចំពោះប្រជាជនកម្ពុជានិងប្រវត្តិដ៏ជូរចត់របស់ពួកគេ។ កាសែតនេះ ក៏ជាថ្នាលបណ្តុះបណ្តាលអ្នកកាសែតវ័យក្មេង ដើម្បីចាប់យកអាជីពនេះដែរ។
ពេលកាសែតនេះ រំឭកខួប១០ឆ្នាំរបស់ខ្លួន លោក Hayes បាននិយាយថា៖ «ខ្ញុំចំណាយពេល១០ឆ្នាំមកនេះ ដោយគ្មានប្រាក់ខែ ដោយព្រួយអំពីរឿងលុយរាល់ថ្ងៃ។ ការណ៍ដែលកាសែតនេះរស់បាន ជាអាថ៌កំបាំងសុទ្ធសាធចំពោះខ្ញុំ»។
លោក Hayes បានលក់កាសែតនេះទៅឲ្យសេដ្ឋីក្រុមហ៊ុនរ៉ែអូស្ត្រាលីលោក Bill Clough នៅឆ្នាំ២០០៨។ ឯករាជ្យភាពកាសែតនៅរក្សាដដែលពេលកាសែតនេះ ត្រូវបានប្រែពីការចេញផ្សាយពីរសប្តាហ៍ម្តងទៅជាកាសែតប្រចាំថ្ងៃវិញ។
ប៉ុន្តែ ពេលការបោះឆ្នោតសាកលឆ្នាំ២០១៨ខិតចូលមកដល់ កាសែតនេះ ត្រូវបានតម្រូវឲ្យបង់ពន្ធច្រើនលើសលុប ហួសពីលទ្ធភាពដែលខ្លួនអាចបង់បាន ហើយក៏ត្រូវបានលក់ទៅឱ្យអ្នកជំនួញម៉ាឡេស៊ី លោក Sivakumar S. Ganapathy (ដែលគេហៅថាលោក Siva) នាយកគ្រប់គ្រងក្រុមហ៊ុន AsiaPR ដែលជាក្រុមហ៊ុនផ្នែកទំនាក់ទំនងសាធារណៈម៉ាឡេស៊ី ដែលស្និទ្ធនឹងរដ្ឋាភិបាល។
កាសែតឯករាជ្យមួយទៀតគឺកាសែត The Cambodia Daily ក៏បានបិទកាលពី៨ខែមុនពេលនោះ ក្រោយពីកាសែតនេះ ក៏ត្រូវបានតម្រូវឱ្យបង់ពន្ធហួសប្រមាណ ដោយសកម្មជនខាងសិទ្ធិមនុស្សនិងសេរីភាពសារព័ត៌មាននិយាយថាកាសែតទាំងពីរត្រូវបានបង្ខំឱ្យបិទដោយសារកាសែតទាំងពីរនេះ រិះគន់រដ្ឋាភិបាល។
សេចក្តីថ្លែងការណ៍របស់គណៈគ្រប់គ្រងក្រុមហ៊ុនកាសែតភ្នំពេញប៉ុស្តិ៍នៅថ្ងៃទី១ខែមីនា រៀបរាប់ថា៖ «ការវិវត្តន៍យ៉ាងលឿននៃបច្ចេកវិទ្យានិងការចែកចេញព័ត៌មានយ៉ាងទូលំទូលាយតាមប្រព័ន្ធផ្សព្វផ្សាយសង្គម ក៏បានបង្កការលំបាកខាងហិរញ្ញវត្ថុសម្រាប់ក្រុមហ៊ុនដែរ»។
សេចក្តីថ្លែងការណ៍បន្តថា៖ «តាំងពីជំងឺរាតត្បាតកូវីដ១៩ និងការធ្លាក់ចុះសេដ្ឋកិច្ចជាបន្តបន្ទាប់មក ចំណូលរបស់ក្រុមហ៊ុន ក៏បានធ្លាក់ចុះយ៉ាងខ្លាំង»។
កាសែតជាភាសាអង់គ្លេស ក៏មានចំនួនអ្នកអានជាជនបរទេសធ្លាក់ចុះដែរ។ ការធ្លាក់ចុះនេះ ចាប់ផ្តើមពីការបង្ក្រាបរបស់រដ្ឋាភិបាលលើសំឡេងនយោបាយសប្រឆាំង និងកាន់តែធ្លាក់លឿនថែមទៀតក្នុងអំឡុងនិងក្រោយពេលការរាតត្បាតជំងឺកូវីដ១៩។
លោក Alan Parkhouse អតីតនិពន្ធនាយកនៃកាសែតនេះ បាននិយាយពីគេហដ្ឋានរបស់លោកក្នុងខេត្ត Kamphaeng Phet ប្រទេសថៃ ថា៖ «នេះជាថ្ងៃដ៏ក្រៀមក្រំនិងជាការអាម៉ាស់ជាពន់ពេក ដោយឃើញកាសែតជាក្រដាសបិទ។ ខ្ញុំគិតថាកាសែតនេះនៅប្រឹងត្រដរបានមួយរយៈដែរ ព្រោះវាមិនចំណេញយូរមកហើយ។ សូម្បីកាលខ្ញុំនៅគ្រប់គ្រង កាសែតនេះ ខាតប្រហែល២ម៉ឺនដុល្លារក្នុងមួយខែឬច្រើនជាងនេះ»។
លោក Parkhouse ធ្វើជានិពន្ធនាយក ពីឆ្នាំ២០១១ដល់២០១៥ ពេលដែលកាសែតនេះ ឈ្នះពានរង្វាន់អន្តរជាតិចំនួន២៦។
លោកប្រាប់VOAថា៖«ខ្ញុំមានមោទនភាពណាស់ចំពោះជោគជ័យនោះ។ ទន្ទឹមពេលគ្នានេះ វាគួរឲ្យអាម៉ាស់ដែលឃើញរបៀបដែលប្រព័ន្ធផ្សព្វផ្សាយនៅកម្ពុជាវិវត្ត ហើយក្លាយជាប្រព័ន្ធមិនរិះគន់រដ្ឋាភិបាល»។
លោក Parkhouse បន្ថែមថា៖«បទដ្ឋាននៃប្រព័ន្ធផ្សព្វផ្សាយនៅកម្ពុជា បានធ្លាក់ចុះដល់បាតក្នុងពេលពីរបីឆ្នាំចុងក្រោយនេះ។ ខណៈវាគួរឲ្យអាម៉ាស់ដែលឃើញកាសែតភ្នំពេញប៉ុស្តិ៍បិទ កាសែតនេះ ក៏លែងធ្វើរឿងទាន់ហេតុការណ៍និងដំណឹងក្តៅៗ ដែលកាសែតនេះធ្លាប់ល្បីឈ្មោះដោយសារព័ត៌មានទាំងនោះ»។
លោក Bradley Murg អ្នកស្រាវជ្រាវក្នុងប្រទេសកម្ពុជានៃអង្គការ Pacific Forum ដែលមានមូលដ្ឋាននៅទីក្រុង Honolulu សហរដ្ឋអាមេរិក ក៏មានអារម្មណ៍ដូចលោក Parkhouseដែរ។
លោក Murg ថ្លែងថា៖«កាសែតភ្នំពេញប៉ុស្តិ៍ នឹងត្រូវគេគេចងចាំជាពិសេសព្រោះវាជាកាសែតភាសាអង់គ្លេសចុងក្រោយគេ ដែលរាយការណ៍ព័ត៌មានសេដ្ឋកិច្ចនិងហិរញ្ញវត្ថុស៊ីជម្រៅក្នុងព្រះរាជាណាចក្រនេះ»។
ប៉ុន្តែចាងហ្វាងកាសែតភ្នំពេញប៉ុស្តិ៍ លោក លី តាយសេង ប្រាប់វីអូអេនៅថ្ងៃសុក្រនេះថាបើទោះកាសែតភ្នំពេញប៉ុស្តិ៍នឹងបញ្ឈប់ការបោះពុម្ពផ្សាយជាកាសែតរបស់ខ្លួន ប៉ុន្តែសារព័ត៌មាននៅតែបន្តដំណើរការលើប្រព័ន្ធអនឡាញជាធម្មតា។ លោកបន្តថាកាសែតភ្នំពេញប៉ុស្តិ៍នឹងបញ្ឈប់បុគ្គលិកផ្នែកបោះពុម្ពកាសែតតែប៉ុណ្ណោះ។
លោកថ្លែងថា៖ «ចំពោះបុគ្គលិកគឺយើងនឹងបញ្ឈប់បុគ្គលិកដែលធ្វើការពាក់ព័ន្ធនឹងការបោះពុម្ព ប៉ុន្តែអ្នកដែលត្រូវធ្វើការទាក់ទងរឿងអនឡាញ អ្នកយកសារព័ត៌មានធ្វើ សរសេរព័ត៌មានហ្នឹងគឺនៅរក្សាធម្មតាដដែល»៕
ប្រែសម្រួលដោយ លោក សាយ មុន្នី
វេទិកាបញ្ចេញមតិ