ក្រុមបុគ្គលិកជាតិនិងអន្តរជាតិជាង២០នាក់នៃកាសែតភ្នំពេញប៉ុស្តិ៍ បានសម្ដែងការមិនពេញចិត្តរបស់ពួកគេចំពោះទង្វើរបស់ម្ចាស់ថ្មីនៃកាសែតនេះ ដែលបានបណ្ដេញនិពន្ធនាយករបស់ខ្លួនគឺលោក កៃ គឹមសុង ចេញពីការងារភ្លាមៗកាលពីថ្ងៃចន្ទ។ នេះបើយោងតាមសេចក្ដីថ្លែងការណ៍រួមគ្នារបស់ក្រុមបុគ្គលិកទាំងនេះ ដែលបានចេញផ្សាយតែប៉ុន្មានម៉ោងប៉ុណ្ណោះ ក្រោយពីការបណ្ដេញចេញនេះ។
សេចក្ដីថ្លែងការណ៍ដដែល បានលើកឡើងថា បុគ្គលិកជាច្រើននាក់ បានលាលែងចេញពីការងារនៅកាសែតភ្នំពេញប៉ុស្តិ៍នេះរួចទៅហើយ ដើម្បីតវ៉ាប្រឆាំងនឹងការបណ្ដេញចេញនេះ។
លោក Andrew Nachemson អ្នកយកព័ត៌មានម្នាក់របស់កាសែតភ្នំពេញប៉ុស្តិ៍ ដែលបានចុះហត្ថលេខាលើសេចក្ដីថ្លែងការណ៍នេះដែរ បានប្រាប់ VOA កាលពីយប់ថ្ងៃចន្ទថា ការបណ្ដេញបុគ្គលិកនេះ គឺជារឿងអយុត្តិធម៌។
«យើងគ្រាន់តែមានអារម្មណ៍ថា ការបញ្ឈប់បុគ្គលិកនេះ ពីការងារ គឺមិនយុត្តិធម៌និងផ្ទុយនឹងការប្ដេជ្ញាចិត្តរបស់ពួកយើង ចំពោះវិជ្ជាជីវៈសារព័ត៌មានឯករាជ្យ»។
ការបណ្ដេញបុគ្គលិកកាសែតភ្នំពេញប៉ុស្តិ៍ភ្លាមៗនេះកើតឡើង បន្ទាប់ពីអ្នកយកព័ត៌មានពីរនាក់នៃកាសែតនេះគឺលោក Brendan O'Byrne និងលោក Ananth Baliga បានសរសេរអត្ថបទមួយអំពីការលក់កាសែតនេះ ទៅឱ្យអ្នកវិនិយោគម៉ាឡេស៊ីម្នាក់ឈ្មោះ Sivakumar S. Ganapathy កាលពីថ្ងៃអាទិត្យ ដោយបង្ហាញព័ត៌មានអំពីទំនាក់ទំនងដែលអាចមានរវាងម្ចាស់ថ្មីនៃកាសែតនេះ ទៅនឹងមន្ត្រីជាន់ខ្ពស់នៃរដ្ឋាភិបាលកម្ពុជា រួមទាំងលោកនាយករដ្ឋមន្ត្រី ហ៊ុន សែន ផងដែរ។
ក្រុមអ្នកយកព័ត៌មានកាសែតភ្នំពេញប៉ុស្តិ៍ បានឱ្យដឹងថា នៅថ្ងៃដំបូង ក្រោមការគ្រប់គ្រងរបស់ម្ចាស់ថ្មី តំណាងថ្នាក់ដឹកនាំថ្មី បានបង្គាប់ឱ្យក្រុមព័ត៌មាន ដកអត្ថបទរបស់អ្នកយកព័ត៌មានទាំងពីរនាក់នោះចេញពីគេហទំព័ររបស់កាសែតនេះ ប៉ុន្តែ ការបង្គាប់នេះ ត្រូវបានបុគ្គលិកខាងព័ត៌មាន បដិសេធមិនព្រមធ្វើតាម។
ជាលទ្ធផល និពន្ធនាយកនៃកាសែតនេះ ដែលទទួលខុសត្រូវលើការអនុញ្ញាតឱ្យចេញផ្សាយអត្ថបទព័ត៌មានគឺលោក កៃ គឹមសុង ត្រូវបានបញ្ឈប់ពីការងារភ្លាមៗ។
លោក កៃ គឹមសុង បានថ្លែងប្រាប់ក្រុមអ្នកយកព័ត៌មានកាលពីថ្ងៃចន្ទ ទី៧ ខែឧសភា ក្រោយពីការបណ្ដេញចេញនោះថា ក្រុមហ៊ុនរបស់លោក ក្រោមការដឹកនាំរបស់ម្ចាស់ថ្មី មិនពេញចិត្តនឹងការណ៍ដែលលោកបានអនុញ្ញាតឱ្យចេញផ្សាយអត្ថបទនោះ។
«តាម owner[ម្ចាស់] ថ្មី គាត់គិតថា បងបានសាងកំហុសដ៏ធំមួយ គឺអនុញ្ញាតឲ្យអត្ថបទមួយចេញនៅទំព័រមុខ គឺអត្ថបទពាក់ព័ន្ធរឿងលក់ភ្នំពេញប៉ុស្តិ៍ ហើយក្នុងនាមជា editor-in-chief [និពន្ធនាយក] គេគិតថាមិនគួរឲ្យចេញអត្ថបទហ្នឹងទេ កាលណាចេញអត្ថបទហ្នឹងគឺ គឺជាការសាងកំហុសដ៏ធំមួយ។ អ៊ីចឹងក្រុមហ៊ុនមិនអាចទទួលយកបាន ក្រុមហ៊ុនថ្មីមិនអាចទទួលយកបានទេ»។
លោក Sivakumar S. Ganapathy បានសរសេរនៅក្នុងសេចក្ដីថ្លែងការណ៍របស់លោកមួយចុះថ្ងៃទី៦ ខែឧសភា ឆ្នាំ២០១៨ ដោយរៀបរាប់ពីកំហុសជាច្រើននៅក្នុងរបាយការណ៍របស់អ្នកយកព័ត៌មានទាំងពីរនាក់នេះ ហើយបានទាមទារឱ្យបញ្ឈប់ការងារអ្នកកាសែតទាំងពីរនាក់ ព្រមទាំងនិពន្ធនាយកដែលបានអនុញ្ញាតឱ្យចេញផ្សាយអត្ថបទនោះ។
ប៉ុន្តែ លោក Andrew ដែលបានរាយការណ៍ព័ត៌មានខាងនយោបាយឱ្យកាសែតភ្នំពេញប៉ុស្តិ៍នេះ អស់រយៈជិត២ឆ្នាំ បានប្រាប់ VOA ថា ក្រុមបុគ្គលិកព័ត៌មាន ជឿថា ព័ត៌មានដែលអ្នកកាសែតទាំងពីរនាក់បានរាយការណ៍ គឺជារឿងពិត។
«អត្ថបទដែលត្រូវបានសរសេរ ហើយឈានទៅដល់ការបណ្ដេញពួកគេចេញនោះ គឺតាមពិតត្រឹមត្រូវទាំងអស់។ មានការបង្ហាញពីទំនាក់ទំនងដែលម្ចាស់ថ្មីនៃកាសែតនេះ មានជាមួយរដ្ឋាភិបាលកម្ពុជា និងរដ្ឋាភិបាលម៉ាឡេស៊ី ដែលយើងគិតថា មានការជាប់ទាក់ទងគ្នាទៅនឹងតួនាទីរបស់ពួកគេក្នុងនាមជាម្ចាស់នៃកាសែតភ្នំពេញប៉ុស្តិ៍ ហើយយើងគិតថា គ្មាននរណាម្នាក់គួរត្រូវបានដាក់ទោស ដោយសារតែរាយការណ៍ពីការពិតនោះទេ»។
លោក Andrew បន្តថា ខ្លួនលោកផ្ទាល់ នឹងដាក់ពាក្យលាឈប់ពីការងារនៅកាសែតនេះ នៅប៉ុន្មានថ្ងៃខាងមុខ ជាការតវ៉ាប្រឆាំងនឹងការបណ្ដេញបុគ្គលិកភ្លាមៗនេះ។
«ខ្ញុំគិតថា យើងនឹងលែងមានឯករាជ្យភាពពេញលេញក្នុងការសម្រេចចិត្តទៅលើការផ្សាយរឿងរបស់យើង។ ខ្ញុំគិតថា យើងនឹងមិនអាចមានសុចរិតភាពនិងឯករាជ្យភាព ដូចដែលយើងធ្លាប់មានក្រោមការដឹកនាំរបស់អ្នកចាស់នោះទេ»។
ដូចលោក Andrew ដែរ កញ្ញា យន់ ស៊ីនាត អ្នកយកព័ត៌មានជាតិម្នាក់របស់កាសែតភ្នំពេញប៉ុស្តិ៍ បានប្រាប់ VOA ថា ការបណ្ដេញនិពន្ធនាយក លោក កៃ គឹមសុង ចេញពីការងារភ្លាមៗ ដែលបានធ្វើឱ្យបុគ្គលិកជាច្រើនទៀត លាឈប់ពីការងារដែរនោះ គឺជាការប្រហារទៅលើសេរីភាពសារព័ត៌មាន។
«យើងយល់ថា នេះគឺជាការគំរាមកំហែងមែនទែនដល់សេរីភាពសារព័ត៌មាន ហើយពួកយើងមានការព្រួយបារម្ភថា ពួកយើងមិនមានលទ្ធភាពពេញលេញក្នុងការបំពេញវិជ្ជាជីវៈរបស់យើង ហើយមិនបានសរសេរ ដោយគោរពទៅនឹងក្រមសីលធម៌ឬក៏សរសេរមិនបានឆ្លុះបញ្ចាំងការពិត»។
ក្រុមអ្នកកាសែតភ្នំពេញប៉ុស្តិ៍ បានបញ្ជាក់ថា បុគ្គលិកបរទេសផ្នែកសរសេរព័ត៌មានជាច្រើននាក់ ព្រមទាំងនាយកប្រតិបត្តិរបស់កាសែតនេះផង បានដាក់ពាក្យសុំឈប់ពីការងារ ក្រោយពីការបណ្ដេញនិពន្ធនាយកកាសែតនេះ។
អង្គការអ្នកកាសែតគ្មានព្រំដែន (Reporters Without Borders) ដែលបានហៅការលក់កាសែតភ្នំពេញប៉ុស្តិ៍ទៅឱ្យវិនិយោគិនម៉ាឡេស៊ីនេះ ថាជាទីបញ្ចប់នៃសេរីភាពនិងពហុភាពព័ត៌មានក្នុងប្រទេសកម្ពុជានោះ បានសរសេរនៅក្នុងសេចក្ដីថ្លែងការណ៍របស់ខ្លួនតែប៉ុន្មានម៉ោង ក្រោយពីការបណ្ដេញនិពន្ធនាយកកាសែតភ្នំពេញប៉ុស្តិ៍យ៉ាងដូច្នេះថា៖
«ក្រោយពីការបិទវិទ្យុអាស៊ីសេរី និងកាសែត Cambodia Daily កាសែតភ្នំពេញប៉ុស្តិ៍ គឺជាសំឡេងប្រព័ន្ធផ្សព្វផ្សាយឯករាជ្យចុងក្រោយបំផុតមួយរបស់កម្ពុជា។ នៅមុនការបោះឆ្នោតសាកល ដែលនឹងចូលមកដល់នាពេលខាងមុខនេះ លោកនាយករដ្ឋមន្ត្រី ហ៊ុន សែន កំពុងបន្តការបង្ក្រាបដ៏គួរឱ្យរន្ធត់របស់គាត់ ទៅលើស្ថាប័នប្រព័ន្ធផ្សព្វផ្សាយដែលមិនធ្វើតាមមាគ៌ារបស់រដ្ឋាភិបាល»។
VOA មិនទាន់អាចទាក់ទងលោក សុខ ឥសាន ដើម្បីស្នើសុំការអធិប្បាយសម្រាប់រឿងនេះបានទេ គិតមកត្រឹមម៉ោងផ្សាយនៅថ្ងៃនេះ ប៉ុន្តែ លោកបានប្រាប់វីអូអេ កាលពីថ្ងៃចន្ទថា រឿងទិញលក់កាសែតភ្នំពេញប៉ុស្តិ៍ មិនទាក់ទងនឹងរដ្ឋាភិបាលកម្ពុជានោះទេ។
យ៉ាងណាក៏ដោយ បើយោងតាមអង្គការអ្នកកាសែតគ្មានព្រំដែន សេរីភាពសារព័ត៌មាននៅកម្ពុជា បានធ្លាក់ចុះរហូតដល់ទៅ១០ថ្នាក់ ហើយបច្ចុប្បន្ន ស្ថិតនៅលំដាប់លេខរៀងទី១៤២ ក្នុងចំណោមប្រទេស១៨០ លើពិភពលោក៕
