រដ្ឋមន្ត្រីការបរទេសអាមេរិកលោក Antony Blinken បានបង្ហាញការសោកស្ដាយក្នុងអំឡុងដំណើរទស្សនកិច្ចនៅថ្ងៃចន្ទនេះនៅទីក្រុងតូក្យូបន្ទាប់ពីការធ្វើឃាតអតីតនាយករដ្ឋមន្ត្រីជប៉ុនលោក Shinzo Abe។ បន្ទាប់ពីជួបជាមួយលោកនាយករដ្ឋមន្ត្រី Fumio Kishida លោក Blinken បានប្រាប់អ្នកយកព័ត៌មានថា «ខ្ញុំចូលរួមមរណទុក្ខជាមួយសហការីជប៉ុនរបស់យើង រំលែកអារម្មណ៍នៃការបាត់បង់ អារម្មណ៍រន្ធត់របស់យើងទាំងអស់គ្នាអារម្មណ៍ ប្រជាជនអាមេរិកាំងនៅក្នុងសោកនាដកម្ម និងការសម្លាប់ដ៏រន្ធត់នេះ។ វាជាការខាតបង់ ព្រោះក្នុងអំឡុងពេលកាន់តំណែងលោកនាយករដ្ឋមន្ត្រី Abe ពិតជាបានធ្វើឱ្យទំនាក់ទំនងរវាងប្រទេសយើងឡើងដល់កម្រិតថ្មី»។
លោក Abe ត្រូវបានគេធ្វើឃាតកាលពីថ្ងៃសុក្រនៅទីក្រុង Nara ខណៈលោកបានថ្លែងសុន្ទរកថាធ្វើយុទ្ធនាការ។ លោក Blinken បាននិយាយថា លោកទៅប្រទេសជប៉ុនតាមការណែនាំដោយផ្ទាល់ពីលោកប្រធានាធិបតីអាមេរិកJoe Biden «ពីព្រោះយើងជាមិត្តជាជាងសម្ព័ន្ធមិត្ត ។ ហើយពេលមិត្តភក្តិឈឺចាប់ មិត្តភក្តិផ្សេងទៀតត្រូវរួមចំណែក។ យើងព្យាយាមជួយសម្រាលទុក្ខ រំលែកអារម្មណ៍នៃការបាត់បង់បង្ហាញសាមគ្គីភាពហើយនោះជាអ្វីដែលយើងកំពុងព្យាយាមធ្វើនៅថ្ងៃនេះ»។
ស្តីពីប្រទេសមីយ៉ាន់ម៉ាឬភូមា កាលពីថ្ងៃអាទិត្យ លោកBlinken បានថ្កោលទោសការគាបសង្កត់ដោយរបបយោធាមីយ៉ាន់ម៉ា ខណៈលោកជំរុញឱ្យប្រទេសចិន និងបណ្តាប្រទេសអាស៊ានដាក់សម្ពាធឱ្យមេដឹកនាំយោធាមីយ៉ាន់ម៉ាស្តារលទ្ធិប្រជាធិបតេយ្យឡើងវិញ និងកាន់ខ្ជាប់តាមកិច្ចព្រមព្រៀងសន្តិភាពដែលបានព្រមព្រៀងកាលពីឆ្នាំមុន។ លោក Blinken បាននិយាយថា «ខ្ញុំគិតថាវាចាំបាច់សម្រាប់ប្រទេសចិននិងផលប្រយោជន៍ប្រទេសចិន ដែលប្រទេសភូមាវិលទៅកាន់មាគ៌ាដូចមុនពេលត្រូវបានបង្អាក់ដោយហិង្សាបណ្តាលមកពីរដ្ឋប្រហារ»។
លោកបាននិយាយនៅក្នុងសន្និសីទសារព័ត៌មាននៅទីក្រុងបាងកកថា ទោះបីជាកិច្ចព្រមព្រៀងសន្តិភាពដោយមាន«ការមូលមតិគ្នាប្រាំចំណុច»កាលពីឆ្នាំមុនដោយអាស៊ាន ដែលរួមមានមីយ៉ាន់ម៉ាក៏ដោយ ក៏«មិនមានជំហានវិជ្ជមានលើបញ្ហានេះទេ»។ កាលពីខែមេសាឆ្នាំមុន ប្រទេសចំនួនប្រាំបួនផ្សេងទៀតរបស់អាស៊ាន និងមេដឹកនាំរបបយោធាមីយ៉ាន់ម៉ា លោក Min Aung Hlaing បានចុះហត្ថលេខាលើកិច្ចព្រមព្រៀងដែលរួមមានការបញ្ឈប់ជាបន្ទាន់នូវអំពើហិង្សា និងការបន្តការពិភាក្សាក្នុងចំណោមភាគីទាំងអស់។
លោក Blinken បាននិយាយថា៖ «បណ្តាប្រទេសអាស៊ានចាំបាច់ត្រូវឱ្យរបបនេះទទួលខុសត្រូវបញ្ហានេះ … បន្តទាមទារឲ្យបញ្ឈប់អំពើហិង្សា និងដោះលែងអ្នកទោស»។ ប៉ុន្តែផ្ទុយទៅវិញ អ្នកការទូតកំពូលរបស់សហរដ្ឋអាមេរិកនេះបាននិយាយថា «ខ្ញុំគិតថា ជាអកុសលនិយាយថា យើងមិនឃើញចលនាវិជ្ជមាន ហើយផ្ទុយទៅវិញ យើងបន្តឃើញការគាបសង្កត់ប្រជាជនភូមា។ យើងបន្តឃើញអំពើហិង្សាលើពួកគេ ដោយ របបនេះ។ យើងនៅតែបន្តឃើញអ្នកប្រឆាំងជាប់ពន្ធនាគារឬនិរទេសខ្លួន»។
លោក Blinken បានបន្ថែមថា «ហើយយើងបន្តឃើញស្ថានភាពមនុស្សធម៌ដ៏អាក្រក់កាន់តែធ្ងន់ធ្ងរឡើង»៕
