រដ្ឋមន្ត្រីការបរទេសសហរដ្ឋអាមេរិក លោក Antony Blinken បានថ្កោលទោសយ៉ាងខ្លាំងទៅលើប្រទេសរុស្ស៊ីកាលពីថ្ងៃអាទិត្យដោយចោទប្រកាន់ប្រទេសនេះថាបានប្រព្រឹត្តអំពើព្រៃផ្សៃក្នុងសង្គ្រាមនៅប្រទេសអ៊ុយក្រែន ខណៈពេលដែលពិភពលោកបានឃើញសាកសពជនរងគ្រោះអ៊ុយក្រែនជាច្រើននាក់នៅតាមដងផ្លូវនានានៅក្នុងទីក្រុង Bucha ដែលស្ថិតនៅជាយរដ្ឋធានីកៀវ បន្ទាប់ពីកងទ័ពរុស្ស៊ីបានចាកចេញ។
លោកBlinken បានប្រាប់ទូរទស្សន៍ CNN ក្នុងកម្មវិធី “State of the Union” ថា សហរដ្ឋអាមេរិកនឹងពិនិត្យមើលឲ្យបានដិតដល់ ដើម្បីកត់តា្រនូវឧក្រិដ្ឋកម្មសង្រ្គាមរបស់រុស្ស៊ី នៅទូទាំងប្រទេសអ៊ុយក្រែន បើទោះបីជាអ៊ុយក្រែនបានអះអាងថាខ្លួនដណ្តើមគ្រប់គ្រងឡើងវិញនៅតំបន់កណ្តាលនៃភាគខាងជើង និងនៅជុំវិញរដ្ឋធានីកៀវក្តី។ រុស្ស៊ីបានដកកងកម្លាំងយោធារបស់ខ្លួនចេញពីតំបន់នៅជុំវិញទីក្រុងកៀវ ដើម្បីផ្តោតការវាយប្រហាររបស់ខ្លួនទៅលើទីក្រុងនានារបស់អ៊ុយក្រែននៅភាគខាងត្បូងដែលស្ថិតនៅតាមបណ្តាយសមុទ្រខ្មៅវិញ និងនៅក្នុងតំបន់ Donbas ដែលកំពុងមានការប្រទាញប្រទង់គ្នានៅភាគខាងកើតអ៊ុយក្រែននោះ។
ដោយថ្លែងយោងទៅលើសាកសពជាច្រើនដែលត្រូវបានគេឃើញនូវតាមដងផ្លូវនោះ ប្រធានាធិបតីអ៊ុយក្រែន លោក Volodymyr Zelenskyy បានប្រាប់កម្មវិធី “Face the Nation” របស់ទូរទស្សន៍ CBS ថា៖ «ជាការពិតណាស់ នេះជាអំពើប្រល័យពូជសាសន៍»។ លោកថា ប្រទេសអ៊ុយក្រែនកំពុងត្រូវបានបំផ្លាញ និងធ្វើឲ្យវិនាសដោយកងកម្លាំងទ័ពរុស្ស៊ី។
អគ្គលេខាធិការនៃអង្គការអូតង់ លោក Jens Stoltenberg បានប្រាប់ទូរទស្សន៍ CNN ថា «នេះជាអំពើឃោរឃៅលើប្រជាពលរដ្ឋដែលយើងមិនបានឃើញអស់ពេលរាប់សិបឆ្នាំមកហើយ» នៅទ្វីបអឺរ៉ុប។ លោកថ្លែងថា៖ «ប្រធានាធិបតីរុស្ស៊ី លោក Vladimir Putin មានការទទួលខុសត្រូវ ដើម្បីបញ្ចប់សង្គ្រាមនេះ»។
លោកអគ្គលេខាធិការអង្គការសហប្រជាជាតិ Antonio Guterres បានសរសេរនៅលើបណ្តាញ Twitter ថា៖ «ខ្ញុំមានការតក់ស្លុតយ៉ាងខ្លាំង ចំពោះរូបភាពសម្លាប់ជនស៊ីវិលនៅទីក្រុង Bucha ប្រទេសអ៊ុយក្រែន។ ការស៊ើបអង្កេតឯករាជ្យមួយ ចាំបាច់ត្រូវតែធ្វើឡើងដែលនាំឆ្ពោះទៅរកការទទួលខុសត្រូវយ៉ាងមានប្រសិទ្ធភាព»។
ប្រធានរដ្ឋអាជ្ញារបស់អ៊ុយក្រែនបាននិយាយនៅថ្ងៃអាទិត្យថា អាជ្ញាធរអ៊ុយក្រែនបានរកឃើញសាកសពប្រមាណ៤១០នាក់នៅក្នុងនិងជុំវិញទីក្រុងកៀវ ក្នុងអំឡុងពេលនៃការស៊ើបអង្កេតមួយ ជុំវិញលទ្ធភាពនៃបទឧក្រិដ្ឋកម្មសង្គ្រាមដោយកងកម្លាំងរុស្ស៊ី។ បើទោះបីជាយ៉ាងនេះក្តី ក៏អគ្គរដ្ឋអាជ្ញាអ៊ុយក្រែន លោកស្រី Iryna Venedyktova បាននិយាយថា សាក្សីមួយចំនួននឹងត្រូវសម្ភាសនៅពេលក្រោយ ពីព្រោះពេលនេះពួកគេកំពុងនៅតក់ស្លុតយ៉ាងខ្លាំងដោយសារតែអ្វីដែលពួកគេបានឃើញ។ នេះបើតាមសេចក្តីរាយការណ៍មួយរបស់ទីភ្នាក់ងារព័ត៌មាន Reuters។
ក្រសួងការពារជាតិរុស្ស៊ីបានលើកឡើងនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា កងកម្លាំងរបស់ខ្លួនមិនបានសម្លាប់ជនស៊ីវិលនៅក្នុងទីក្រុង Bucha ទេ ហើយបានអះអាងថា រូបភាពនៅក្នុងវីដេអូនិងរូបថត ដែលបានបង្ហាញពីសាកសពជនរងគ្រោះទាំងនោះ គឺជាការបង្កហេតុមួយទៀត ដោយប្រទេសលោកខាងលិច។ រុស្ស៊ីបានស្នើឲ្យក្រុមប្រឹក្សាសន្តិសុខអង្គការសហប្រជាជាតិ កោះប្រជុំនៅថ្ងៃចន្ទនេះ ដើម្បីពិភាក្សាអំពីសកម្មភាពរបស់«ពួកក្រុមជ្រុលនិយមអ៊ុយក្រែន» នៅក្នុងទីក្រុង Bucha។
ក៏ប៉ុន្តែចក្រភពអង់គ្លេសដែលធ្វើជាប្រធានក្រុមប្រឹក្សាសន្តិសុខអង្គការសហប្រជាជាតិនៅខែនេះ លើកឡើងថា នឹងមិនមានកិច្ចប្រជុំណាមួយទេនៅថ្ងៃចន្ទនេះ ហើយថាបញ្ហានេះនឹងត្រូវយកទៅពិភាក្សាគ្នានៅក្នុងកិច្ចប្រជុំមួយស្តីពីប្រទេសអ៊ុយក្រែន ដែលត្រូវបានគ្រោងរួចហើយ នៅថ្ងៃអង្គារស្អែកនេះ៕
