លោក Joe Biden អនុប្រធានាធិបតីសហរដ្ឋអាមេរិក នឹងបំពេញទស្សនកិច្ចទៅកាន់ប្រទេសតួកគីនៅថ្ងៃទី២៤ ខែសីហា ហើយវាជាទស្សនកិច្ចលើកដំបូងរបស់មេដឹកនាំកំពូលប្រទេសលោកខាងលិច ចាប់តាំងពីការប៉ុនប៉ងធ្វើរដ្ឋប្រហារកាលពីថ្ងៃទី១៥ ខែកក្កដាមក។
ដំណើរទស្សនកិច្ចនេះ កើតមានឡើងពេលទំនាក់ទំនងរវាងរដ្ឋាភិបាលតួកគី និងរដ្ឋាភិបាលអាមេរិកមានភាពតានតឹងលើការទាមទារឲ្យសហរដ្ឋអាមេរិកប្រគល់បព្វជិតឥស្លាម ដែលត្រូវបានគេចោទថា ជាអ្នកនៅពីក្រោយការរៀបចំចាត់ចែងការប៉ុនប៉ងធ្វើរដ្ឋប្រហារនោះ។
ទីភ្នាក់ងារព័ត៌មាន Anadolu ដែលគាំទ្រដោយរដ្ឋតួកគី បានរាយការណ៍ថា ពួកមន្រ្តីតួកគី បានរៀបចំសំណើជាផ្លូវការមួយដើម្បីឲ្យសហរដ្ឋអាមេរិកចាប់ខ្លួនលោក Fetullah Gulen បព្វជិតឥស្លាមដោយការជាប់ទាក់ទិនរបស់លោកទៅនឹងរដ្ឋប្រហារ។
នៅដើមសប្តាហ៍នេះ លោក Mevlut Cavusoglu រដ្ឋមន្រ្តីការបរទេសតួកគី បាននិយាយថា តួកគីបានទទួលសញ្ញាវិជ្ជមានពីរដ្ឋាភិបាលក្រុងវ៉ាស៊ីនតោន ចំពោះការធ្វើបត្យាប័នបព្វជិតឥស្លាមនោះ។
ក៏ប៉ុន្តែ នាយករដ្ឋមន្រ្តី Binali Yildrim បាននិយាយឡើងវិញថា ដំណើរទស្សនកិច្ចរបស់អនុប្រធានាធាធិបតីសហរដ្ឋអាមេរិក នឹងមិនបើកផ្លូវឲ្យមានការពិភាក្សាពីការសម្រុះសម្រួលបញ្ហានេះទេ។
យោងតាមបណ្តាញទូរទស្សន៍ CNN បានឲ្យដឹងថា នាយករដ្ឋមន្រ្តីតួកគី និយាយថា៖ «ដើម្បីធ្វើឲ្យប្រសើរឡើងនូវទំនាក់ទំនងរបស់យើងជាមួយអាមេរិក គឺអាស្រ័យលើការធ្វើបត្យាប័នលោក Gulen ហើយបញ្ហានេះ គ្មានកន្លែងសម្រាប់ការចរចាទេ»។
រដ្ឋាភិបាលតួកគីបានសុំឲ្យធ្វើបត្យាប័នលោក Fethullah Gulen ដែលត្រូវបានរងការចោទប្រកាន់ពីការរៀបចំផែនការទម្លាក់ប្រធានាធិបតី Recep Teyyip Erdogan ក្នុងអំឡុងពេលនៃការប៉ុនប៉ងធ្វើរដ្ឋប្រហារមិនបានជោគជ័យនៅដើមរដូវក្តៅនេះ។
សហរដ្ឋអាមេរិក បានឆ្លើយតបថា តួកគីត្រូវតែមានភស្តុតាងគ្រប់គ្រាន់ដើម្បីចោទលើបព្វជិតដែលជាអតីតសម្ព័ន្ធមិត្តរបស់ប្រធានាធិបតីតួកគី ដើម្បីធ្វើឲ្យការធ្វើបត្យាប័នបញ្ជូនលោក Gulen មានភាពស្របច្បាប់៕
