ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មនុស្ស​យ៉ាង​តិច​១២៦​​នាក់​បាន​ស្លាប់​ក្នុងករណី​បាក់​កន្លែង​ជីក​រ៉ែ​ថ្លើម​ថ្ម​នៅ​មីយ៉ាន់ម៉ា


រូបថតដោយមន្ទីរពន្លត់អគ្គីភ័យមីយ៉ាន់ម៉ា បង្ហាញក្រុមអ្នកជួយសង្គ្រោះកំពុងលីសាកសពជនរងគ្រោះដោយសារឧប្បទ្ទវហេតុបាក់ដីនៅកន្លែង​ជីក​យក​រ៉ែ​ថ្លើម​ថ្ម​មួយ​កន្លែង​នៅតំបន់ Hpakant (ផាកាន់ថ៍) នៃ​រដ្ឋ Kachin នៅថ្ងៃទី២ ខែកក្កដា ឆ្នាំ២០២០។ (រូបថតដោយមន្ទីរពន្លត់អគ្គីភ័យមីយ៉ាន់ម៉ា via AP)
រូបថតដោយមន្ទីរពន្លត់អគ្គីភ័យមីយ៉ាន់ម៉ា បង្ហាញក្រុមអ្នកជួយសង្គ្រោះកំពុងលីសាកសពជនរងគ្រោះដោយសារឧប្បទ្ទវហេតុបាក់ដីនៅកន្លែង​ជីក​យក​រ៉ែ​ថ្លើម​ថ្ម​មួយ​កន្លែង​នៅតំបន់ Hpakant (ផាកាន់ថ៍) នៃ​រដ្ឋ Kachin នៅថ្ងៃទី២ ខែកក្កដា ឆ្នាំ២០២០។ (រូបថតដោយមន្ទីរពន្លត់អគ្គីភ័យមីយ៉ាន់ម៉ា via AP)

ការ​បាក់​ដី​នៅ​ឯ​កន្លែង​ជីក​យក​រ៉ែ​ថ្លើម​ថ្ម​មួយ​កន្លែង​ នៅ​ភាគ​ខាង​ជើងប្រទេស​មីយ៉ាន់ម៉ា​ បាន​សម្លាប់​មនុស្ស​យ៉ាង​ហោច​ណាស់ ១២៦​នាក់ កាល​ពី​ថ្ងៃ​ព្រសហ្បតិ៍​ នៅ​ពេល​គំនរ​សំណល់​ពី​អណ្តូរ​រ៉ែ​បាន​បាក់​ចូល​ទៅ​បឹង​មួយ​កន្លែង​ ដែល​បាន​បណ្តាល​ឲ្យ​ទឹក​ភក់​កប់​កម្មករ​ជា​ច្រើន។ នេះ​បើ​តាម​ទី​ភ្នាក់​ងារ​ព័ត៌មាន ​Reuters។ អាជ្ញាធរ​បារម្ភ​ថា​ នឹង​មាន​អ្នក​ស្លាប់​ច្រើន​នាក់​ទៀត។

ក្រុម​ផ្សាយ​ជា​ភាសា​ភូមា​នៃ​វីអូអេ (VOA Burmese) បាន​រាយការណ៍​ថា ឧប្បទ្ទវហេតុ​នេះ​បាន​កើត​ឡើងនៅ​តំបន់ Hpakant (ផាកាន់ថ៍) នៃ​រដ្ឋ Kachin ដែល​ជា​តំបន់​មួយ​ដែល​បាន​រង​ផល​ប៉ះពាល់​យ៉ាង​ខ្លាំង​ពី​សកម្មភាព​ជីក​យក​រ៉ែ​ហួសហេតុ ជា​ពិសេសេការ​ជីក​រ៉ែ​របស់​ក្រុមហ៊ុន​ចិន។​

នាយដ្ឋាន​អគ្គិភ័យ​បាន​រាយការណ៍​តាម​ហ្វេសប៊ុក​ថា ក្រុមកម្មករ​ពេល​នោះ​កំពុង​ប្រមូល​ថ្លើម​ថ្ម​នៅតំបន់​សម្បូរ​រ៉ែ​ថ្លើមថ្ម នៅ​ក្នុង​តំបន់ ​Hpakant ក្នុង​រដ្ឋ Kachin នៅ​ពេល​ដែល​រលក​ភក់​ក្រោយ​ភ្លៀង​មួយ​មេ​ធំ​មួយបាន​ហូរ​មក​សង្កត់​គ្រប​ពួក​គេ។

វីដេអូ​ដែល​បង្ហោះ​តាម​បណ្តាញ​សង្គម​បង្ហាញពី​ទិដ្ឋភាពកម្មករ​ជីក​រ៉ែ​ប្រញាប់ប្រញាល់​រត់​ទៅ​ទី​ខ្ពស់​ ដើម្បី​គេច​ពី​គំនរ​សំណល់​រ៉ែ​ដ៏​ធំ​ ដែល​បាន​បាក់​ធ្លាក់​ចូល​បឹង​ និង​បង្កើត​បាន​ជា​ល្បាប់​ភក់​ដែល​ប្រៀប​បាននឹង​រក​ស៊ូណាមិ។​

ការ​បាក់ដី​ដ៏​ប្រល័យ​តែង​កើត​មាន​ជា​រឿយៗ​ នៅ​តំបន់​ជីក​យក​រ៉ែដែល​មិន​សូវ​មាន​ការ​គ្រប់គ្រង​នេះ ហើយ​ដែល​តែង​ទាក់ទាញ​កម្មករ​ក្រីក្រ​ពី​ទូទាំង​មីយ៉ាន់ម៉ា។ ប៉ុន្តែ​ព្រឹត្តិការណ៍​កាល​ពី​ថ្ងៃ​ព្រហស្បតិ៍​ជា​គ្រោះថ្នាក់​ធ្ងន់​បំផុត​មួយ ក្នុង​រយៈ​ពេល ​៥​ឆ្នាំកន្លងមកនេះ។

ការ​បាក់​ដី​មួយ​នៅ​ឆ្នាំ​ ២០១៥​ បាន​សម្លាប់​មនុស្ស​ប្រមាណ​ ១០០​នាក់ ហើយ​បាន​នាំ​ឲ្យ​មាន​ការ​អំពាវនាវ​ឲ្យ​រដ្ឋាភិបាលមីយ៉ាន់ម៉ា ​គ្រប់គ្រង​វិស័យ​ជីករ៉ែ​នេះ​ឲ្យ​បាន​ល្អ​ជាង​មុន៕

XS
SM
MD
LG